Pa 9 October, 2024, akawungwe ka World Wildlife Fund kalanzile ilyasi lya wulanda pe vino awantu wakucita vikonona impanga ni vya wumi vino vyawamo. Kalanzile ukuti: “Pa myaka 50 yino yapita (akuli ukuti ukufumilila mu 1970 ukufika mu 2020), ivyawumi ivya mumpanga vikaya vikucepelakovye.” Swinya kalanzile nu kuti: “Asancozyo nga tukulanda ukuti vino tukucita pe yo-o impindi avino vikulanjilila vino insi yiliwa imyaka 5 yino yikwiza.”

 Awantu awavule wakasakamikwa nga wivwa ama lipoti ya musango wo-o. Twakunda sana insi na vino vyawamo, awuli umulandu wuno tukakwivwila uwuwi nga twalola vino ivyawumi vikufwa. Tukayivwa wo-o, amuno e Leza awino watupile umulimo uwakusakamala ivyawumi.​—Intaliko 1:27, 28; Imilumbe 12:10.

 Nomba tungayikolowozya ukuti, ’uzye kweni tulikumanisya ukucinjilila ivyawumi pa kuti vitakalowe? Avyani vino Baibolo yalandapo?’

 Asamulandu na vino tungelezya ukucinjilila ivyawumi, e Leza mutupunye awino angavicinjilila ukufikapo. E Baibolo pa Ukuwumbulika 11:18, yalanda ukuti e Leza akwiza mukonona “wano wakakonona insi.” Kwe lyo-o iwaliko tukasambililako ivintu viwili:

1.  1. E Leza alifumyapo wonsinye wano wakakonona insi.

2.  2. E Leza wandi afumyepo nombanye wano wakakonona insi. Nacino calenga tumanye wo-o acakuti, vino awantu wakucita pe yo-o impindi vikonona sana ivyawumi ukucila vino calinji kali.

 Nomba avyani vino Leza alicita pakumala yo-o intazi? Aliwomvya uwuteko nanti Uwufumu wakwe ku kuteka insi yonsinye. (Mateyu 6:10) Mwe wo-o uwuteko muliwa awantu wacivwila wano walimanya ivya kusakamala nu kusunga icete ivyawumi.​—Ayizeya 11:9.