Ukulingana ne Lipoti Ukufuma ku Kawungwe ka United Nations:

•    Ukufuma pa 7 October ukufika pa 23 October, 2023, inkondo pakasi ke Gaza ne Israel yalenzile ukuti awantu ukucila pe 6,400 ukufwa, ne awali 15,200 awano wacisisile. Awavule pe wa-a, walinji awantu wakaele wano watawapo na muwusilika. Swinya awantu awavule wasile ama ng’anda yawo.

•    Ukufika pa 24 September, 2023 awantu wa kaele mu Ukraine ukufika ku mpendwa ye 9,701 wafwile ne awali 17,748 wacisisile pa mulandu ni nkondo yino yawako pakasi ke Russia ne Ukraine.

 Avyani vino Baibolo yalaya wonsinye wano wakacula pa mulanu ni nkondo?

 E Baibolo yalaya ukuti e Leza “alilesya isumo insi yonsi.” (Amalumbo 46:9) Aliwomvya uwuteko nanti uwufumu wamwi yulu ukupyana pa ma wuteko ya wantunse. (Daniel 2:44) Wo-o uwufumu wa kwe Leza, wulileta umutende ku wantu.

 Lolani vino e Yesu Imfumu ya wufumu wa kwe Leza alicita:

•    ‘Alitula awalanda wano wakamulilila, nawasaluke wano watapechelwa. Alilolela awatonte inkumbu; alitula uwumi wawasaluke wano wakuyimba. Aliwatula kuwikwelengulo nawa walombwa.’​—Amalumbo 72:12-14.

 E Leza aliwomvya uwufumu wakwe pa kufumyapo ukucula, kuno kukakwiza pa mulandu wa nkondo ni vyongo.

•    ‘Aliwapyela aminsozi yonsi mu minso yawo. Kutaliwa imfwa swinya, amalanda yataliwapo nanti akulila, nanti awulumilanye. Ivintu vikali vyasowa na pano vyaya.’​—Ukuwumbulika 21:4.

 Nombanye Uwufumu wa kwe Leza wuli nukufumyapo iviwipe vyonsinye munsi. E Baibolo yalandizile lyankani ukuti “muliyivwa imbilikiti yi sumo” yino tukulola yikucitika mwe ya-a amanda. (Mateyu 24:6) Vyo-o vino twalandapo apano na vinji, vikulajilizya ukuti tuli “mu manda yakupelelecezya” aya mawuteko ya wantu.—2 Timoti 3:1.