Ulupungu lwa kwe Malonda ulwa June 1, 1912 lwalanzile ukuti “Awavule wano wakawazya amabuku yitu wamanyicisya nkaninye intonko. Wangawazya amabuku yitu ukwasowa ukulipila.” Lo-o ulupungu lwa kwe Malonda lwalanzile nu kuti. “Intonko zikasalifya nkaninye pi lyasi lizima lino likalanda pa mapalo yano yali nu kwiza ku nkolelo.”

 Pano ya-a amazwi yano yakalanda pa mapalo yatani yalembwe lyo insi imvule zino zikalanda icizungu zitani ziwe na wa mashini wakupiliwulila amabuuku mu lulimi lwa ntonko. Lelo lyo inte zyakwe Yehova zyeni lyo zyalenga kali icine ca mu Baibolo ukumanyikwa mu vilembo vya ntonko. Swinya tucili twatwalilila ukucita wonye. Pe yo-o impindi twawa na mabuuku ya ntonko ukucila pe 50. Nomba tukacita wuli pakuti ya-a amabuuku yafume?

 Tukatalicila ukuyapiliwula nu kuyalemba mu vilembo vya ntonko. Umwanawitu Michael Millen wino akawomba umulimo wakupiliwula ku Patterson, New York walanzile ukuti “Twawomvyanga ivilembo vye wanji pa kupiliwula ivilembo vya ntonko lelo vitawombanga mu vitundu ivivule vino twalondanga. Nomba pe yo-o impindi tukawomvya iciwombelo cino cikakwavwa wakapiliwula ukuwomba icete wo-o umulimo. Co-o iciwombelo wakacita ukuti Watchtower Translation System. Nasuwila ukuti pasi kumwi kuno kwawa iciwombelo ca musango wo-o.”

 Amabuuku ya ntonko yatawavye ni vilembo lelo yakalondolola ni vikope. Ku cakulolelako icikope cino cawa vilembo vya ntonko mwi buuku lino likati Ungikala amanda Pe! Wacilondolola ukuti: “Umulumendo watalika ukupita mu kanzila ka makona muno mu mbali muli imyamba na maluwa amayembe.” E Jamshed, e Painiya swinya umuwomvi wino akatumicila intonko walanzile ukuti, “Ya-a amazwi yano yakalondolola ivikope yacindama nkaninye kwe nene.”

 Pa nsizi yakupiliwula wakatwala ku misambo ino ikapanga ivilembo vya ntonko. Awa ku misambo nga wapocelela wakalemba utumatoni pa mapepa ayawome yano yatanga yalepuke nga watalika ukupanga nanti ukuleka ukuloleka icete pa nsizi yakuyawomvya nkani. Nga wamala wakayatuma ponga ni mpapulo zya mu mawungwe nanti ukuyatuma ku positi ofesi akuli ukuti kuno awantu wakaya mukupocelela amakalata na vinji. Wakalembapo ukuti “amabuuku ya ntonko” nga cakuti yo-o inzila ikawomba. Mpindi zimwi awanawitu awa ku musambo wakatuma zuwa amabuuku ku wanawitu na wankazi wano wasilolecesya nkani nanti intonko. Pakuti wawe na ya-a amabuuku yano yakulondekwa pa kulongana.

 Pa kuti vyonsinyene vyo-o viwombwe pakasumba impindi inkulu ni ndalama. Nakuwa impindi ino wakawomvya pakupuntilako ama Baibolo 50,000 ukuwomvya e mashini yaku Wallkill, New York, ayili mpindi ino wakawomvya kukupulintilavye ama Baibolo yawili aya ntoko. E Baibolo ya cizungu iya ntonko yawa nama Volyumu 25. Swinya iviwombelo vino vikalondekwa pakuti wapange vingiza imiku 123 ukucila pe vino vingalondekwa pa kupangavye Baibolo injinye. a Pa kupangavye inkupo iyama Baibolo yonsinyene ayama volyumu 25 pakasumba impiya 150! (U.S.)

 Uzye wano wakakwalizyako ku kupanga amabuuku ya ntonko wakaivwa wuli pa mulimo wawo? E Nadia wino akawombela ku musambo waku South Africa walanzile ukuti: “Awanawitu na wankazi intonko na wano wasilola nkani watawa nu wumi uwupepuke. Acino nkalola ukuti alipalo ukucitako vimwi pa kuwavwa. Co-o cikalanjizya ukuti e Yehova wawakunda nkaninye”

 Nomba ngandi nga cakuti intonko ikupotwa ukuwazya ivilembo vya ntonko? Imyaka imwi ku nsizi ino yapita twafumizye ibuuku lya kuti Sambililani Ukuwazya Icitundu ca Ntonko, lino lyalinji ni vilembo vya ntonko nga ni vipulintevye. Lyapangwa mu nzila yakuti intonko na wino akalolanye angawazyamo. Yo-o broshuwa yawa nu makulemba muno intonko ingawomvya pa kulemba. Wino akusambilila angawomvya yonye inzila pakuyimbela vino wasambilila mu vilembo vya ntonko. Ukucita wo-o kukakwavwa wino akusambilila ukumanya cila cilembo ukupitila mukupalampasya.

 Avizima ci vino awanawitu na wankazi wazanamo mukuwomvya ya-a amabuuku? E Ernst uwaku Haiti, wazanwanga mu kulongana. Lelo atalinji ni buuku limwi iya vilembo vya ntonko. Co-o calenganga ukuti asunjilavye ivyakwiza mukulanda pa kulongana nga wapwa ulongo lwa kulandapo. Walanzile ukuti “Pe yo-o impindi nkatumpula ikasa pa mpindi iili yonsinye. Nkalola ukuti twawa ponga na wanawitu na wankazi. Amuno swensinye tukapocelelaivyewo vya kuwomelezya ivili vyonganye ukufuma kwe Yehova!”

 E Jan e eluda waku Austria wino akatungulula ulupungu lwa kwe malonda ni sambililo lye Baibolo pi wungwe walanzile ukuti “amabuuku yitu yakawazika icete nkaninye ukucila amabuuku ya kunji. Ku cakulolelako twawa na manambala yano yakatwavwa ukuzana cino ukulonda, amafutunoti nu wulondolozi wa vikope vino vitasyupa nu kuvizana.”

 E Seon-ok, e Painiya waku South Korea, antonko swinya we puli. Kali we-e nkazi nga ali pa kulongana wasintilizilevye pa kuwomvya amakasa nga akulanda. Lelo pe yo-o impindi akaiwazizya umweneco isambililo lye Baibolo mu vilembo vya ntonko. Walanzile ukuti “Mu mabuuku ya kunji amatoni musiwa, imilaini ikawa ayinyongane swinya amapepala yakawa amapepuke nkaninye. Lelo Inte zya kwe Yehova weni wakawomvya amapepala amawome. Swinya amatoni yakaloleka icakuti cikampepucila nkaninye ukuwazya. Kali ntawazyanga amabuuku yitu yano yakalanda pe Baibolo. Wambwazizyangavye. Nomba pe yo-o impindi nkaiwazizya ne mweneco. Co-o calenga nawa sana ni nsansa amuno nkaipekanizizya ne mweneco ukulongana swinya nkakwasukapo. Pe yo-o impindi nkaiwazizya ne mweneco amabuuku ya vilembo vya ntonko icakuti ngalanda apatiswenye ukuti ‘Cawelela’ ntanga ndeke nu kuleka.”

 Wulyanye vino cawa ku mabuuku amapulintwe avino cawa nakwe yanye amabuuku ya ntonko. Yawa na mazwi yakuti “Lyo-o ibuku asa lyakukazya. Alya kuwomvya mu mulimo wa nsi yonsinye uwa kusambilizya awantu Baibolo. Wo-o umulimo wukakwavwilizwa nu wupe wa kuyikundila.” Tukasalifya nkaninye pa nzila zyonsinye zino mukawomvya izyapa donate.pr418.com. Wo-o vino mukaipelesya ukusangwilako, cikalenga wonsinye ukupocelela amabuuku yano yakalanda pe Baibolo ukuwikako ni ntonko nga na wano wasilola nkani.