Cila mwaka wano wakawomba mu mulimo wampindi zyonsi uwuyiwele, wakawitako ukuzanwa kwisukulu lino likawela ku Patterson mu New York. a Wano wakazanwa kwe lyo-o isukulu wakasambilila ivyakuwomba icete imilimo imilekane lekane mwi wungwe lya kwe Yehova. Vino wakasambilila kwe lyo-o isukulu vikawavwa ukuwomya amawungwe na maofesi ya misambo insi yonsinye.

 Molimonye isukulu ya Gilyadi alya nsi yonsinye. Ku cakulolelako, mwi sukulu lya namba 147, lino lyalinjiko mu 2019, mwalinji wakasukulu 56, wano wafumile mu nsi 29. Wano wazanilwe kwi sukulu lya Gilyadi wawombanga mu mulimo wapindi zyonsi uwuyiwele, ponga ngati akuwombela pa Bethel, mu muputule, wumishonari, na wupainiya uwuyiwele.

 Wakapekanizizya kucili ivye wano waliwaya ku sukulu lya Gilyadi lyo nu kusambilila kutani kutalike. Ku cakulolelako e Dipatiment ya Transport ku Maofesi Makulu yikakalila lyankani ama tiketi ya ndeke aye wano wisilwe ukwiza ku sukulu. Indalama zino wawomvyanga ku muntu wenga pe wano wafumanga ku nsi zinji awa mu kilasi lya namba 147, yafikanga ku madola 1,075 aya ku U.S. Wakasukulu wano wafumile ku Solomon Islands wawomvyanga ama tiketi 4 ukuya ku Patterson ne pakunyocela ku ma ng’anda kumwawo wawomvyanga ama tiketi yatatu. Uwutali wawulendo wonsinye wafikanga ku ma kilomita 35,400. Pa kukalila umuntu wenga e tiketi papitanga indalama ukufika ku madola 2,300 aya ku U.S. Acino pakuti watasumba nkani indalama, e Dipatiment ya Transport ku Maofesi Makulu yikawomvya ama kompyuta pakuvwambilizya ama tiketi yano yangacepako umutengo. Swinya nga cakuti wayazana wasileka ukuvwambilizya. Wakatwalilila ukuvwambilizya ukuwomvya ama kopyuta pa ma sabata nanti pa myezi, ukulola nga cakuti imitengo yinyosileko pa nsi. Awa mwe Dipatiment ya am Transport ku Maofesi Makulu, wakawomvya na ma tiketi yawila yano awantu wakasangula.

 Awasambi wano wakwiza kwe lyo-o isukulu awavule, wakalondekwa ivipepala vyakuwazumilizya pakwinjila mu United States. Acino awa mwe Dipatimenti ya Legal ku maofesi makulu wakawavwa ukuzana ya-a amapepala. Pa kuti vyonsinye vyo-o visile kwe cila musambi pakasumba indalama ukufika ku madola $510 (U.S.).

 Avizima ci vino tukazanamo kwe wano wakaya mukusambilila kwi sukulu lya Gilyadi? E Hendra Gunawan, e eluda ku Southeast Asia wino wawa mwi wungwe muno mwawa awatwalane wano wafumile kwi sukulu lya Gilyadi walanzile ukuti: “Kali mwi wungwe litu mutalinjipo uwili wensinye wino wawombanga wupainiya wa mpindi zyonsi. Lelo pa mulandu wakuyipelesya nu kuwombesya kwe wa-a awatwalane wano wafumile kwi sukulu lya Gilyadi, kwalenzile na wanji ukupingulapo ukutalika ukuwomba wupainiya wampindi zyonsi. Mukupita kwa mpindi e nkazi wenga mwi wungwe litu, wayile azanwako na kwi Sukulu lya Kawizya wa Wufumu.”

 E Sergio Panjaitan wino akawombela ponga nawano wafumile kwi sukulu lya Gilyadi ku Bethel yaku Southeast Asia walanzile ukuti: “Vino wasambilizile kwe lyo-o isukulu vitalinjivye alongo kwe woliwo lelo na sweswenye tukazanamo ivizima. Wasambilizile ivivule nkaninye, lelo ukucila ukuyilola ukuti wacindama ukulusya wanji pa mulandu na vino wasambilizile, wakaviwomvya ukwavwako wanji. Wo-o vino wakacita vikatuwomelezya nkaninye icakuti naswe tukawomelezyako na wanji.”

 Uzye iwungwe likafumya kwinye indalama zyonsinye zino wakawomvya kwe lyo-o isukulu? Zikafuma ku misangulo ya nsi yonsi, zino awantu wakasangula ukuwomvya inzila indekane ndekane ukuwikako nayino yikazanwa pa donate.pr418.com. Tukumisalifya nkaninye pa mwezo winu uwakupa wuno mwawa nawo pa kutunjilila lyo-o isukulu ilya wasambi wano wakafuma munsi imvule.