“Nalindililanga co-o pa myaka 19!” Acani coconye cino awanawitu walindililanga? We Baibolo wa New World Translation of the Christian Greek Scriptures mu lulimi lwa ci Bengali. Na wanjinye awavule wakalanda icili conganye nge Baibolo ya New World Translation yafuma mu citundu cawo. Nomba uzye mukatela amwelenganyapo vino cikawa pakupiliwula nu kufumya yanye ama Baibolo?

 Ica kutalicilapo awanawitu na wankazi wano wakawombela pe wo-o umulimo wakawasola ukupitila mu wutunguluzi we Dipatimenti ya Kulemba iyi Wumba Lino Likatungulula. Amyaka yinga yino yikapitapo pa kuti wamale ukupiliwula Baibolo? E Nicholas Ahladis, wino akawombela mwe Dipartimenti ya Translation Services ku Warwick, mu New York, watili: “Mukasanzyamo ivivule. Cikasanzyamo nu kumanya impendwa ya kwakapiliwula wano wakuwombela pe Baibolo, vino icitundu cawa nampo nga cawoma nanti poole, vino wano waliwazya Baibolo wamanya pe vino awantu wano walembwa mu Baibolo wikalanga, nga na vino coco icitundu wakaciwomvya mu ncende impusanepusane. Nga kukonkavye cingasumba umwaka wonga ukufika kwe yitatu pa kumala ukupiliwula Amawaliko ya ciGriki. Ne pakumala e Baibolo wensinye pangasumba imyaka ukutalicila pe yitatu ukufika kwe 4. Nga ya mu citundu ca kwa ciwulu weni cikasumba impindi inkulu pa kuyimala.”

 Asa wakapiliwula vye wano wakalondekwa pa kupiliwula Baibolo. Lelo pa kalondekwa na wanawitu na wankazi wano wangapitulukamo mwenemo pano yitani yifume, awa viimo ivilekane lekane, impindi zimwi wakafuma na munsi zinji. Wakawomvya indalama zyawo pakwavwako kwe wo-o umulimo. Vino wakanena wakapiliwula pano wakupitulukamo avino vikawavwa ukupiliwula e Baibolo yino yikafika awanawitu na wankazi pa mwezo. Swinya yino yikulanda ivyewo vya cisinka. Wulyanye vino umwanawitu uwa ku South Africa wino akasambilizya wakapiliwula walanzile avisinka, watili, “wakapiliwula wakalola ukuti wali nu mulimo uwukulu uwa kulandilako e Yehova pa kuti wano wakuya mukuwazya wize wivwe amazwi ya kwe wulyanye vino yalanzilwe.”

 Ngu kupiliwula kwasila, e Baibolo ikapulintwa nukuyiwika ponga. Pa kuti co-o cicitike, wakawika ivintu ivilekane lekane ukufika kwe 10 mwa mashini wa kupulinta, muno mwawa ama inki, amapepala, vino vikalondekwa ku nkupo, ivya kulemenkanya, na vinji 6 vino vyasyala pa kuti e Baibolo yiwe ponga. Mu 2019, indalama ukucila 20 million dollars (aya ku U.S.) azino wawomvizye kwe vyo-o pa kupanga Baibolo. Awanawitu na wankazi wano wakawombela ku kupulinta wawomvile amaawazi ukucila 300,000 mu 2019 pa kupanga nu kutuma ama Baibolo.

 Amulandu ci wuno tukawomvezya impindi ni ndalama zyavula wo-o kwe yo-o imilimo? E Joel Blue wino akawombela kwe Dipatimenti yakupulinta wanzile ukuti “E Baibolo alili ibuku ilicindamisye pa mabuku yonsinye yano tukafumya. Acino tukalonda imilolecele ye Baibolo yacindika e Leza wino tukapepa, ni lyasi lizima lino tukawizya.”

 Tusifumya vye ivipande vye New World Translation, lelo tukafumya ni vipande vye wano wali mukukawila ukuyiwele. Ku cakulolelako e New World Translation iya ntonko akuno yawa mu vitundu 10. E Baibolo yonga iya ntonko yingasumba amaawazi 8 pakuyimala, swinya yikapangwa mu mavolyumu amavule yano yangizula pe ka buku shewofu kano kangatalimpa mupipi na mamita 2.3 (7.5 ft). Swinya tukapiliwula ni vipande vya mu Baibolo ivya wafungwa amuno amapepala vye yatici ayano wazumilizya.

 E New World Translation yikakwavwa wonsinye wano wakayiwazya. Ku cakulolelako lolani vino calinji kwi wungwe lino likawomvya iciKiluba mu Tombe, ku Congo. Yo-o incende ya Tombe yawa pano pawa ama kilometers 1,700 ukufuma kuno kwawela itawuni likulu ilya mwe yo-o insi. Wa Nte wonsinye wano wawa kwe yo-o incende walinji ne Baibolo yonganye, nayo yalinji mu ciKiluba cakali nkaninye. Yonye e Baibolo yonganye ayino awanawitu walecelananga pakupekanya ukulongana. Lelo ukutalika mu August 2018, e Baibolo ye New World Translation yafumile yonsinye mu ciKiluba icipepuke swinya awanawitu wonsinyene wakweti.

 Lolani vino e nkazi wino akalanda iciGerman walanzile pano e Baibolo ye New World Translation iyipitulukwemo yafumile mu citundu cakwe. Watili: “Pe yo-o impindi nsilanda ukuti nzipizile ukuwazya e Baibolo. Lelo nkayikolowozya ukuti, ‘Ampindi ci yino ningawazizyapo na vinji?’” Umufungwa wumwi walemvile ukuti: “Wampile e kope ye New World Translation, swinya yikupilula nkaninyene uwumi wane. Nsitela njivwicisyepo Izwi lya kwe Leza ndi vino njivwicisizye pano nkuwazya e kopi ye Baibolo iyipitulukwemo. Ningakunda ukumanya ivivule pa Nte zya kwe Yehova na vino ningacita pakuti nani imbe ne Inte.”

 Wano wakawazya e New World Translation wakasalifya nkaninye pa misangulo yino yikalenga ukuti e Baibolo yiwafuma. Zyonsinyene zyo-o imisangulo izya kwavwilizya umulimo wa nsi yonsi zikapwa ukupitila mu nzila indekane ndekane zino zyawa pa donate.pr418.com. Tukasalifya nkaninye pa mwezo winu uwa kupa.