Iwumba lino likatungulula likulondesya nkaninye ukuwomvya imisangulo kukuzenjela ivikulwa vino vingatwavwa ukuwomba umulimo wakuwizya pa Wufumu. Kucakulolelako, mu mwaka wa mulimo uwa 2023, amakampani yano imisambo ya Nte zya kwe Yehova yawomvizye, yasumvile amadola ukucila pe 500 millioni ku kukala, ukuzenga, ukulimbuzya nu kuzifya ama Ng’anda ya Wufumu nu mwakulonganila ukulongana kukulu ukuzinguka insi yonsinye. a Zyo-o indalama zisanzizyepo na zino ama wungwe yonsinye yawomvizye kukusakamala ama Ng’anda ya Wufumu.

 Cinji acakuti indalama zino tukasangula, wakaziwomvya na mukuzenga nu kuzifizyako ivikulwa vya pa musambo vino vikakwavwilizya mukulundulula umulimo wa kuwizya insi yonsinye. Swinya twacefyako imiwomvezye ya ndalama pa Musambo pakuti zyawombako mukuzenga nga nu kuzifya ama Ng’anda ya Wufumu nu mwakulonganilamo ukulongana Kukulu. Nanti ciwe wo-o, pakalondekwa imisangulo pakuti wazifye, ukucinsya umusambo nu kuwuzenjela kunji nga nu kulimbuzya ivikulwa vino tukawomvya. Amulandu ci wuno ya-a amawuzengo yacindamila? Uzye imisambo yikatunjilila wuli umilimo uwucindame uwakuwizya? Lekani tulole.

 Imisambo imivule yamala imyaka 30 ukufika kwe 40 ukufumilila pano yazenjezilwe. E Nicholas, wino wawa mwe Dipatiment Yino Yikalolecesya pa Wuzengo Insi Yonsinye, walanzile ukuti: “Ni vikulwanye vino wazenga icete navyonye vikakwiza mukononeka mukuya kwa mpindi. Fwandi ukuzifya nanti ukulimbuzya vyo-o ivikulwa kungalenga vitononeka zuwa.”

 Ivikulwa vya pa musambo navyonye vizipizile ukuzengwa munzila yakuti awavipilula nga kwawa ukupiluka mwi wungwe lya kwe Yehova. Ukufumilila pano imisambo imivule yazenjelwa, impendwa ya kawizya yakulilako ukuzinguluka insi yonsinye,. Pakuti co-o cicitike, pakalondekwa awawomvi awakuyipelesya ukuwomba mwe yo-o imisambo. Wo-o awuli umulandu wuno ivikulwa vya pa misambo vikaya vikucepelako pamulandu nukuvulilako kwa wawomvi wakwavwilizya.

 Ukuyicinjilila nakonye kwacindama sana, amuno tukwikala mu manda ya kulecelezya muno amasanso yavuzile nkaninye. (Luka 21:11) Fwandi ukuwomvya inzila impya izyakuzenjelamo ivikulwa, kungacinjilila awanawitu wano wakuwombela mwe vyo-o ivikulwa. Cinji acakuti, zyo-o inzila impya izyakuzenjelamo vyo-o ivikulwa, zikalenga nga cakuti kwacitika uwusanso awanawitu ukwikala ponga nukulanzyanya vino wandi watwalilile ukutunjilila umulimo wakuwizya.

 Mu mwaka wa mulimo wuno wafumileko uwa 2023 Iwumba Lino Likatungulula lyazumilizizye ukuti awanawitu wawombeko umulimo wakuzenga ivikulwa vya misambo 43. Co-o cikupiliwula ukuti, mupipi ne hafu wa vikulwa vya pa misambo vyawombezilwepo insi yonsinye. Mukwai lolani ivyakulolelako vino vikulanjizya uwucindami we wo-o umulimo.

 Angola. E Matt, uwa mwe Komiti ya Musambo ku Angola watili: “Twawa nisyuko lyakulola kuno uwusesemo wuno wawa pe Hagayi 2:7 wukuficiliswa munzila iyiyiwele. Pa myakavye 10, impendwa yakawizya yakulilako ukufika kwe 60 pesenti. Acino pakuti tutunjilile wa-a wakawizya, palondekwanga awawomvi na wanji awavule awakuwombela pa musambo. Lelo pa mulandu wakucepa kwa vikulwa pa musambo, twaposilwe ukwitilako awawomvi nawanji. Co-o calenzile ukuti awanawitu pa musambo wawomba amaawala amavule ukulusya na pe yano wazipizile ukuwomba, pakutivye watunjilileko.”

 Awanawitu wapilwe umulimo wakuvwambilizya pe vino wangacita pakumala yo-o intazi. Avino wizile awalola ukuti inzila inzima iyakumalilamo yo-o intazi, akuzengulula nukuzifya amaofesi ya musambo. Nomba pa nsizi yakuvwambilizya, wizile wazana ukuti ukucita wo-o, kwalinji nukusumba nkaninye indalama. Acino wizile wasolapovye ukukala nu kulimbuzya icikulwa cimwi cino calinji mupipi nu musambo. E Matt watili “Pano twanenile awa mwe Komiti ya Musambo pe lyo-o ilyasi, cino twelenganyangapo nkani acakuti co-o icikulwa citalinji nukuwomba icete ndi vino icikulwa cino twayizenjela sweweneco cingawomba.” Walanzile nukuti “Pe yo-o impindi twalola ukuti ukucita wo-o kwawomba icete sana kwe sweswe. Ukwasowa nukuvwilika e Yehova wapala ko-o ukupingulapo.”

 Kweni mukuya kwa mpindi, umusambo wa ku Angola wuliwalondekwa incende na yinji. Nanti ciwe wo-o, co-o icikulwa cino walimbuzizye nga nivikulwa vya pa musambo, vilenzile cawapepucila ukutwalilila ukutunjilila umulimo wakupanga awasambi wuno wukuya wukukulilako.

 Japan. Pano wazenjezile ivikulwa vya pa musambo wa ku Japan papisile imyaka mupipi ne 40. Nanti ciwe wo-o wasitela wavizifyepo nanti ukupilulako ivili vyonsinye. Kweni nanti acakuti awanawitu wawombesyanga na maka ukuviyanya nukuvizifya, vyawomvile nkaninye ukulusya na pa mpindi yino wavizenjezile ukuti vingawomba. Wo-o awuli umulandu wuno pe yo-o impindi wakuvizifya nu kupilulako vimwi.

 Imikalile ya pa musambo yapiluka ukucila vino calinji ku nsizi. Ukufumilila ku nsizi ukufika mu 2015, awanawitu pa musambo wawatendelangavye ivyakulya. Kali mu miputule yino awanawitu walalangamo, mwalinji utumiputule ututici muno “watendelanga ivyakulya” impindivye zimwi. Lelo pa mulandu wakuti pe yo-o impindi wakuzyako imiputule, ivyakulya ilivule wakayitendela. E nkazi e Kumiko wino akawombela pa musambo wa ku Japan watili, “Vino wapanga amakichini pe yo-o impindi vikalenga ndayivwa ukuti ndi pa ng’anda swinya cikanjavwa ukutunjilila yo-o imitanticile iyipya yino waleta.”

 Umulimo wuno wukuwombwa pa musambo wa ku Japan awucindame nkaninye insi yonsinye. (Mateyu 28:19, 20) Umusambo wa ku Japan awuli umusambo nawunji wuno wukapulintavye e Baibolo yonsinye. Acino icikulu nkani cino wakuwombelapo ukuzifya ivikulwa, akuwika ivya kucinjilila wano wakawombela ku kupulinta ku lukungu. Ukukala nukuwika icakucinjilila ku lukungu casenzile ama dollar 1 million, lelo umulimo wa kupulinta amabuku yano yakalenga twawomya wuciwuza witu ne Leza nkani nkani e Baibolo watwalilila.

 Pano wazifyanga ivikulwa, awanawitu wasinincizizye ukuti umulimo wakupulinta Baibolo nawonye watwalilila. Umwanawitu e Trey, uwa mwe Komiti wa Musambo watili: “Pakuzifya ivikulwa, twafumyanga ama Baibolo amavule swinya ukuzinguluka insi yonsinye awantu wayalondesyanga nkaninye. Acino pakuti umulimo wakupulinta nukuzifya ivikulwa wutwalilile, awantu na wa mu ma departimenti amalekanelekane walondekwanga ukuwombela ponga pakuti cimanyikwe icete cete impindi yakuwika iviwombelo ivipya ni ya kupulinta amabuku.” Asamulandu navino wayanyanga muno wakapulintila, cila mwezi pakasi ke March ne August 2023 wapulintanga ama Baibolo 220,000. Yonsinye yo-o imilimo yasizile ukwasowa ukusumba indalama imvule pakuzenga.

 Ukuzifya ivikulwa kucindime nkaninye amuno kuli ukuwika vino vyandi vyalenga amalaiti yatalika. Waliwikako ama solar amapya, cino cililenga indalama kuma 120,000 dola pe zino wawomvyanga pakukala amalaiti zyasyalako cila mwaka. Cinji acakuti, waliwika ama windo yano yapampinkana yatatu yano yalilenga indalama 10,000 dola ziwasyalako cila mwaka. Nanti acakuti vyo-o vilisumba indalama imvule pa kuvikala, vililenga wasunge idalama ukucila pa ma dola 3.5 million pa mpindi yonsinye yino viliwawomba. Walicefyako vino vingalenga icikulwa ukononeka zuwa nanti vino vingaleta intazi pa musambo.

 Ya-a amawuzengo yawili yano twalandapo, yakulanjizyavye imilimo yino yizipizile ukuwombwa pakusinincizya ukuti ivikulwa vya mu ma Bethel vikwavwilizya umulimo wakuwizya. Nanti ciwe wo-o, umulimo wakuzenga wucili wutwalilizile. Umwanawitu e Aaron uwa mwe Dipatiment Yino Yikalolecesya pa Wuzengo Insi Yonsinye, walanzile ukuti: “Awanawitu wawombesizye nkaninye, lelo kucili kuli na vinji ivivule vino vizipizile ukuwombwa.” Walanzile nukuti “Tukusalifya nkaninye pa misangulo yino mukapa mukuyikundila pakutunjilila yo-o imilimo swinya tukusalifya na kwe wonsinyene wano wavwilizizyeko ukuwomba na wano wakuyipekanizizya ukuti wize wawombeko ku nkolelo. Ko-o ukuyipelesya kukulanjizya ukuti e Yehova akupala wo-o umulimo.”​—Amalumbo 110:3.

 Wo-o umulimo wakuzenga nukuzifya ivikulwa, wukatunjililwa ni misangulo yakuyikundila, yino ilivule wakasangula ukuwomvya e donate.pr418.com. Tukusalifya nkaninye pawukape-kape winu.