E Yesu wanenile awasambi wakwe ukuti: “Mwize muwe mwe wakalola wane . . . Mu vipya vyansi yonsi.” (Imili. 1:8) Mwe ya-a amanda, Inte zyakwe Yehova wacincila nkaninye mu mulimo wakuwizya. Lelo nanti ciwe wo-o mu ncende zimwi ukuwikako na muno mwawa awantu awavule, watani wivwepo ilyasi lizima. Swinya mu nsi zimwi awantu wacepa. (Mat. 9:37, 38) Nomba avyani vino tungacita pakuti tuwizizye awantu wonsinye?

 Pa kukonka isundo lino Yesu watupa, e Dipartiment ya mulimo iyi wumba lino likatungulula ikatuma wa mishonari ukuzinguluka insi yonsinye mu ncende zino wakawizya wacepa. Ukuzinguluka insi yonsinye kuli wa Mishonari 3,090. a Awavule wawasambilizya ku masukulu ndi vino kwi sukulu lya Kawizya wa Wufumu. Wamishonari wakayikundila ukusya amang’anda yawo nukuya ku ncende yino watamanya. Pa mulandu wakukula mu vyakwe Leza, ukuwasambilizya ivyakuwomba nga nu wumanyilo wuno wawa nawo, wakasalanganya ilyasi lizima insi yonsinye. Swinya wakawa avyakulolelako ku wasambi awapya.

 E Dipatmenti yino yikasakamala awa mu mulimo uwuyiwele iye Service Department, yikawombela ponga ne Komiti wa Musambo pa kwavwilizya wamishonari wano wakulondekwa ukwavwa, ponga ngati akuwavwambila aman’ganda, ukuwavwa ku vyakucipala apano na kandalama kakuwavwa ukukala vino wakulonda. Mu mwaka wa mulimo uwa 2020 Inte zya kwe Yehova wawonvizye $27 million (U.S.) pa kusakamalilamo wa mishonari. Tukasalifya sana pe yo-o imisangulo. Wamishonari wakawika sana amano na maka yawo ku mulimo wa kuwizya apano nu kuwomelezya awa mu mawungwe.

 Avizima ci vno vikafumamo wo-o vino wamishonari wakawombesya mu mulimo wa kuwizya? Umwanawitu Frank Madsen, wino akawombela mwe Komiti wa Musambo ku Malawi, walanzile ukuti: “Pa mulandu wakusipa kwawo na vino wacenjelamo, wamishonari wavwa amawungwe amavule ukutalika ukuwombela mu ncende zino zyasyupa ukuwombelamo ponga ngati amumalinga na muno wakalanda ivitungu vinji. Cinji acakuti wo-o vino wakawombesya ukusambilila ivitundu vinji ni ntambi, wakawomelezya wanji swinya wakakwavwa na wacitici ukuwavwambisya ukuwombako umulimo wa mpindi zyonsi. Tukasalifya nkaninye e Yehova pa kuwa na wamishonari.”

 Winji wino akawombela mwe Komiti wa musambo ku nsi yinji nawe walanzile ukuti: “Wa mishonari wawa acakulolelako icizima cino cikalanjizya ukuti awantu wa kwe Yehova walemenkana insi yonsinye. Na wano asa Nte zya kwe Yehova walola apatiswenye ukuti intambi zitalenga tupotwe ukulemenkana, lelo vino Baibolo yikatusambilizya vyalenga twawombela ponga ngati twafuma ing’anda yonga.”

 Uzye wa mishonari wakakwavwa wuli wa kawizya? E Paulo, uwa ku Timor-Leste, akasalifya nkaninye pa mishonari wano wayile mukuwombela ku nsi yakumwawo, walanzile ukuti: “Ku ncende yakumwitu kwalungula nkaninye. Lelo co-o citalenzile wamishonari wano wafumile ku ncende iyitalale ukuleka ukuwizya. Lyonsinye umutondo tondo wakazanwa ku mituwululo iya mumulimo wa kuwizya. Swinya nkawalola lyonsinye wakanyocela kuvipempu lyo kulungwile nkaninye. Cinji acakuti wakaya mukuwizya na manguziznye. Wavwa awantu awavule nkaninye ukusambilila icine ukuwikako na nenenye. Pa mulandu wakucincila kwawo, wakawomvya uwumi wawo wonsinye ukuwombela Yehova swinya co-o cavwa awamwi wungwe wonsinye ukuwawombesya pano pangapelela amaka yawo.”

 E Ketti, e painiya wampindi zyonsi ku ku Malawi nawe walanzile vino wamishonari awatwalane wavwile ulupwa lwakwe, watili: “Pano wa-a wamishonari wizile mukuwombela kwi wungwe litu anemuno nalinjivye ne Nte mu lupwa lwitu. Lelo wizile awanjavwa nkaninye icakuti wapalamisizye ku lupwa lwane. Icakulolelako cawo icizima cavwizye awana wane ukulola uwuzima wuno wawa mu kuwombela Yehova. Nkasalifya nkaninye pe vino wa-a wamishonari wavwa awana wane awakazyana, icakuti pe yo-o impindi awapainiya wampindi zyonsi. Swinya ne wakwane watalika ukuzanwa mukulongana.”

 Uzye indalama zyakwavwilizya wa-a wamishonari zikafuma kwinye? Akupitila mu misangulo ya nsi yonsi yino awavule wakasangulako ukuwomvya inzila zino zyawa pa donate.pr418.com. Ala tukasalifya nkaninye pe yo-o imisangulo.