Avyani vino vyalenzile e Yesu alande amazwi ya kwe David yano yawa pa Amalumbo 22:1 pano kwasyalavye katici ukuti afwe?

Pa mazwi ya kulecelezya yano Yesu walanzile pawa na yano yawa pe Mateyu 27:46 yano yakati: “Leza wane, Leza wane, nga wansila cani?” Pano Yesu walanzile ya-a mazwi waficilisyanga vino e kimbila wa malumbo e Davidi walanzile pa Amalumbo 22:1. (Mar. 15:34) Citanga ciwe icete umuntu ukwelenganya ukuti cino calenzile Yesu alande ya amazwi waweni ukuti Leza wamukwelengula nanti ukwelenganya ukuti isuwilo lyakwe lyatonsinye. Amuno e Yesu wamanyile icete nkaninye umulandu wuno walinji nu kufwila swinya waitemezilwe ukufwa. (Mat. 16:21; 20:28) Wamanyile nu kuti impindi yakwe iya kufwa nga yafika, e Yehova walinji nu kuleka “ukumucinjilila.” (Job 1:10) Cino Yehova wacitizile wo-o walondanga e Yesu alanjizye apatiswenye ukuti walinji nu kutwalilila ni cisinka asa mulandu ni nzila yino walinji nu kufwilamo.​—Mar. 14:35, 36.

Nomba lyo tungati amulandu ci wuno Yesu walandizile ya-a amazwi ya mwi buku lya malumbo? Nanti aca kuti tutamanya icasuko mukulungatika, twalandako pe vimwi nce pamwi vino vyalenzile ukuti alande ya-a amazwi. *

E Yesu pa kulanda ya-a amazwi afwile wakomailanga pa cisinka ca kuti e Yehova atalinji nu kumucinjilila pa mfwa yakwe. E Yesu wazipizile ukupa inzuwi ukwasowa ukuti e Yehova amwavwe. Swinya pe yo-o impindi  walinji nu muwili wa wuntu wuno wayine ukuti “afwile awantu wonsinye.”​—Hebe. 2:9.

Pamwi walondanga ukuti wanji welenganye pe vino vyalinji mwi lumbo lyonsinye. Cazesile nkaninye pe yoyo impindi ku wantu ukusunjila amalumbo amavule ku mutwe. Fwandi ukwizusyavye umuntu e vesi yonga kwamwavwanga ukwizuka vyonsinye vino vyawa mwe lyolyo ilumbo. Nga ca kuti ne Yesu nye avino walondanga ukucita kwe wano wateyelezyanga, lyo afwile wavwizye awaYuda wano wamukonkanga ukwizuka amasesemo yonsinye aya mwe lyo-o ilumbo yano yakalanda pe vyonsinye vino vyalinji nu kucitika pa mfwa yakwe. (Amalu. 22:7, 8, 15, 16, 18, 24) Cinji aca kuti mu mavesi ya kulecelezya mwe lyo-o ilumbo, e kimbila wa malumbo walumbinye Yehova nu kumulondolola ukuti Amfumu ya nsi yonsinye.​—Amalu. 22:27-31.

Pamwi cino calenzile ukuti alande ya-a amazwi ya kwe Davidi wasulanga ukuti walinji awakaele. Pano e Yesu watani wamukome, icilye ca Sanhedrin camupile umulandu wa wufi uwakuti wapontelanga Leza. (Mat. 26:65, 66) Co-o icilye casunkine pe wulyanye uwanda uwusiku nu kupingula Yesu ukwasowa ukukonka amasundo. (Mat. 26:59; Mar. 14:56-59) Fwandi e Yesu pa kuwuzya iwuzyo lya kuti Leza wane Leza wane, nga wansila cani? Afwile wasulanga ukuti walinji awakaele, atacisile umulandu uwuliwonsinye uwa kufwilapo.

Pamwi walondanga ukwizusya wanji ukuti ne Davidi nye pano waculanga e Leza atamulecelezizye. Iwuzyo lino Davidi wawuzizye litalanjizyanga ukuti atalinji ni suwilo. Amuno e Davidi pa nsizi ya kuwuzya lyo-o iwuzyo walanzile amazwi yano yakalanjizya ukuti wasuwizile mu maka ya kwe Yehova aya kupususya. (Amalu. 22:23, 24, 27) Fwandi ne Yesu nye “umwanakwe Davidi,” pano waculanga pa cimuti citasulanga ukuti e Yehova wamulecelezizye.​—Mat. 21:9.

Uzye ya-a amazwi yakalanjizya ukuti wivwile uwulanda nkaninye pe vino Yehova walesile ukumucinjilila pa kuti alanjizye wucisinka wakwe? E Yehova atapanzile umwana wakwe ukuti ayize acule nu kufwa. Lelo cino calenzile amulandu wa wucintivwa wa kwe Adamu ne Eva. E Yesu atacisile umulandu uwuli wonsinye uwa kufwilapo. Cino walondangavye akupa ivyasuko ku mawuzyo yano Satana wakatusizye. Swinya walondanga nu kulipila inzuwi yino yalondekwanga pa kuti akale vino Adamu wasovizye. (Mar. 8:31; 1 Pet. 2:21-24) Fwandi pa kuti aficilisye vyonsinye vyo-o e Yehova wazipizile ukuleka umumucinjilila pe yo-o impindi intale.

Pamwi walondanga ukwavwa awasambilizi wakwe ukwelenganya pa mulandu wuno Yehova wazumilizizye ukuti afwe imfwa imbipe pa cimuti. * E Yesu wamanyile ukuti imfwa yakwe iya pa cimuti iya kufwa ngati acipondo yalinji nu kupunuzya awavule. (1 Kor. 1:23) Awasambilizi wakwe walinji nu kumanya uwupiliwulo wa mfwa yakwe nga wivwicisya umulandu wuno Yesu wafwizile. (Gal. 3:13, 14) Ukucita wo-o kwalinji nu kulenga wamulola ukuti we Katula wawo asa cipondo.

Acino asa mulandu na cino calenzile e Yesu alande ya-a amazwi, wamanyile ukuti ukufwa imfwa imbipe pa cimuti wacitanga ukulonda kwa kwe Leza. Pa nsizi vye ya kulanda amazwi yano yawa pa malumbo, e Yesu watili: “Kanonzi casila!” (Yoha. 19:30; Luk. 22:37) Wo-o vino e Yehova atacinjilizile e Yesu pa mpindi ya welezyo calenzile e Yesu aficilisye mukukumanila vyonsinye vino Yehova wamunenile ukucita. Calenzile nu kuti aficilisye vyonsinye vino vyalembwa “mu Masundo ya kwe Musa, mwa Kasesema na mu Malumbo.”​—Luk. 24:44.