1-2. Uzye tungakonka wuli mu matampulo ya kwe Yesu? Lanjililani.

YELENGANYANI ukuti muli pi wumba lya wantu wano wayile mukutandala ku ncende yimwi. Yo-o incende yakwata sana e nsenga swinya yawipa nkaninye. Wino akumitandazya waminena ukuti mwakonka mulyanye muno akulyata. Nomba wapitisya nkani ica kuti waleka nu kuloleka. Uzye cingalenga musakamale? Awe. Amuno mumanyile muno mwandi mwalyata.

² Yo-o insi yino twikalamo yawa ngati ayonye incende ya kwe nsenga imbipe. Awina Klisitu nawo wawa ngati alyonye iwumba lino liyile mukutandala kwe yo-o incende ya kwe nsenga swinya imbipe. Lelo twawa nkaninye nu longo amuno e Yehova watupa umwana wakwe wino tungakonka sana mumatampulo yakwe. (1 Pet. 2:21) Ilyasi limwi likalondolola ukuti e Peter pe lyo-o iwaliko wakolanyanga e Yesu kwe katungulula. Wulyanye vino e katungulula angasya ivimanyilo vya matamba yakwe kuno afumile, ne Yesu watusila amatamba ya mankolanya muno tuzipizile ukulyata. Nomba lekani twasuke amawuzyo yatatu yano yakuti, Uzye casula mwinye ukukonka mu matampulo ya kwe Yesu? Amulandu ci wuno tuzipizile ukukoncela mu matampulo yakwe? Swinya tungacita wuli pa kukonkamo?

3. Uzye casula mwinye ukukonka mu matampulo ya kwe wumwi?

³ Uzye casula mwinye ukukonka mu matampulo ya kwe wumwi? Mwe Baibolo izwi lya kuti “ukupita” ni lya kuti “amatamba” impindi zimwi yakasula vino umuntu akacita mu wumi. (Inta. 6:9; Imilu. 4:26) Vino wumwi akacita mu wumi wakwe tungavikolanya ku matamba yano umuntu akasya ku nsizi pano akupita. Fwandi ukukonka mu matampulo ya kwe wumwi cikasula ukucita vino wacitanga nanti ukumukolanya.

4. Uzye casula mwinye ukukonka mu matampulo ya kwe Yesu?

 ⁴ Nomba, uzye casula mwinye ukukonka mu matampulo ya kwe Yesu? Cikasula ukumukolanya. Mwe lyo-o iwaliko pano pafumile co-o icipande e Peter walanzile pe vino tungakolanya Yesu mwe vino watwalilizile ukusipicizya pano wapitanga mu ntazi. Lelo tungakolanya e Yesu na mwe vinjinye. (1 Pet. 2:18-25) Vyonsinye vino walandanga nu kucita mu wumi wakwe vyawa aca kulolelako icizima kwe sweswe.

5. Uzye swe wantu swewano tutapwilililka tungakonka mu matampulo ya kwe Yesu? Londololani.

⁵ Uzye swe wantu swewano tutapwilililka tungakonka mu matampulo ya kwe Yesu? Ee. Nga mwizuka e Peter walanzile ukuti ‘twakonka mumatamba ya kwe Yesu’ atalanzile ukuti twalyata wulyanye ukwasowa ukupulumbila nanti pamwi. Fwandi nga tukwelezya na maka ukukonka mu matampulo ya kwe Yesu asa mulandu nu kukanapwililika lyo tukwivwila amazwi ya mutumwa Yohani aya kuti: “Wapita ndi vino weliwe [Yesu] wapitanga.”​—1 Yoh. 2:6.

6-7. Amulandu ci wuno tungalandila ukuti ukukonka mu matampulo ya kwe Yesu kungalenga tupalamile sana kwe Yehova?

⁶ Ukukonka mu matampulo ya kwe Yesu kulilenga tupalamile sana kwe Yehova. Amulandu ci wuno twalandila wo-o? Ica kutalicila, Pano Yesu walinji mu nsi watulanjizizye vino tuzipizile ukucita pa kuti twasecelesya Leza. (Yoha. 8:29) Fwandi nga tukukonka mu matampulo ya kwe tungasecelesya Yehova. Amuno umukwasi witu uwa kwi yulu akapalamila nkaninye kwe wano wakavwambisya ukuwa iviwuza vyakwe.​—Jemu. 4:8.

⁷ Ica citi wili aca kuti e Yesu wakolanyanga nkaninye umukwasi wakwe. Awuli mulandu wuno walandizile nu kuti: “Wensi wino wandola nene lyo walola nu Tatanye.” (Yoha. 14:9) Ku cakulolelako nga tukukolanya imiwele ya kwe Yesu ndi  vino uluse luno walanjizizye ku wamambombo, icikuku cino walanjizizye ku mwanaci wino walwile indwala imbipe, nga na wano walosyanga lyo tukukolanya Yehova. (Mar. 1:40, 41; 5:25-34; Yoha. 11:33-35) Nga tukukolanya sana e Yehova aliwaya akupalamila kwe sweswe.

8. Amulandu ci wuno tungalandila ukuti ukukonka mu matampulo ya kwe Yesu kungalenga ‘tucimvye’ insi?

⁸ Ukukonka mu matampulo ya kwe Yesu kulilenga ukuti tutawika amano ku vya kwe yo-o insi. Pa wanda wa kulecelezyako ukuwa na wasambilizi wa kwe pano atani afwe, e Yesu walanzile ukuti: “Nacimvya insi.” (Yoha. 16:33) Cino wasulanga aca kuti atalesile amelenganyo ya wantu wa mwe yo-o insi, vino wacitanga na vino walondanga ukucita mu mawumi yawo ukumulesya ukuwika amano ku kuwombela Yehova. E Yesu lyonsinye wizukanga ukuti cino wizizile mo-o munsi akulenga izina lya kwe Yehova ukucindikwa. Nga sweswe? Kweni, mwe yo-o insi mwawa ivintu ivivule vino vingalenga tuleke ukuwika amano ku kuwombele Yehova. Lelo nga twawika amano ku kuwombela Yehova na sweswenye ‘tulicimvya’ insi.​—1 Yoh. 5:5.

9. Avyani vino tuzipizile ukucita pa kuti tutwalilile ukupita mu nzila ya ku wumi wa muyayaya?

⁹ Ukukonka mu matampulo ya kwe Yesu kulilenga tuwe nu wumi wa muyayaya. Pano umulumendo wa cuuma wawuzizye Yesu pe vino angacita pa kuwa nu wumi wa muyayaya, e Yesu wamunenile ukuti: “Unkonke.” (Mat. 19:16-21) AwaYuda wamwi wano watasuwizile ukuti we Klistu wawanenile ukuti: “Ing’onzi zyane . . . zikankonka. Nkazipa uwumi wa muyayaya.” (Yoha. 10:24-29) Ne e Nikodemu uwa mu cilye ca Sanhedrini wino walondanga ukumanya ivivule pa misambilizizye yakwe, e Yesu wamunenile ukuti, “wensi wino akuwika insingo mwa kwe weliwe nanti ukumusuwila” walinji nu kuwa nu “wumi wa muyayaya.” (Yoha. 3:16) Tungalanjizya ukuti tukukonka Yesu nga tukukonka vino wasambilizyanga nu kucita vino wacitanga. Ukucita wo-o kulilenga twize tuwe nu wumi wa muyayaya.​—Mat. 7:14.

10. Ukulingana ne Yohani 17:3, casula mwinye “ukumanya” icete Yesu?

¹⁰ Ica kutalicila cino tuzipizile ukucita pano tutani tutalike ukukonka mu matampulo ya kwe Yesu, akumumanya. (Wazyani Yohani 17:3.) “Ukumanya” Yesu acintu cino tuzipizile ukutwalilila ukucita. Pa kuti tumumanye icete tuzipizile ukutwalilila ukusambilila pa miwele yakwe, vino akakwelenganya na vino wakunda. Fwandi asa mulandu ni myaka yino twamala mwi wungwe lya kwe Leza tuzipizile ukutwalilila “ukumanya” Yehova nu Mwana wakwe.

¹¹Vino e Yehova wacisile pa kutwavwa ukumanya icete umwana wakwe, wazumilizizye ukuti amabuku ya malandwe 4 yano yakalanda pa wumi wa kwe Yesu yawe mu Baibolo. Ya-a amabuku yakatwavwa ukumanya vino Yesu wacitanga, vino walandanga na vino wayivwanga. Yakatwavwa nu “kwelenganya nkaninye” pe Yesu. (Hebe. 12:3) Amuno mwawa amatamba yano Yesu watusizile. Fwandi nga cakuti tukuwazya nkaninye ya-a amabuku ya malandwe yalilenga twaya tukumumanyilako. Na cino cilifumamo tuliwakonka mumatampulo yakwe.

12. Uzye tungacita wuli pa kuti twaitopwa pano tukuwazya amabuku ya Malandwe?

 ¹² Nga tukulonda twaitopwa pano tukuwazya ya-a amabuku tutazipizile ukupelela vye pa kuwazya. Tuzipizile twaisambilizya nu kwelenganyapo nkaninye. (Linganyaniko Joshua 1:8.) Nomba lekani tulande pa nzila ziwili zino zingatwavwa ukwelenganyapo sana nu kuwomvya vino tukusambilila pano tukuwazya amabuku ya malandwe.

13. Avyani vimwi vino vingamyavwa ukwivwicisya ilyasi pano mukuwazya ibuku lilandwe?

¹³ Ica kutalicila, mwakwelenganya ukuti vikucitika. Pano mukuwazya mwakwelenganya ukuti akuno muli, mukwivwa nu kulola vyonsinye vino vikucitika. Vimwi vino vingamyavwa ukucita wo-o akuvwambilizya ivyewo na vinji mu mabuku yano iwungwe lya kwe Yehova lyatupekanizizya. Manyani vino vyacitisile nanti vino vyacitikanga pano lyolyo ilyasi lino mukuwazyapo litani licitike na vino vizile avicitika pa nsizi. Vwambilanipo ivyewo na vinji pe kuno lyolyo ilyasi lyaciticizile na wantu wano walinjiko. Linganyani lyolyo ilyasi kwe vino ibuku linji ililandwe lyalandapo. Amuno impindi zimwi icisinka cimwi cino e kalemba wi landwe limwi walandapo winji atacilandapo.

14-15. Uzye tungacita wuli pa kuti twawomvya vino twawazya mu mabuku yano yakalanda pa wumi wakwe Yesu?

¹⁴ Ica citi wili mwakwelenganya vino mungaviwomvya mu wumi winu. (Yoha. 13:17) Fwandi nga mwawazya ilyasi limwi pe Yesu mwayiwuzya ukuti: ‘Avyani vino nasambilila vino ningawomvya mu wumi wane? Uzye ningaviwomvya wuli ku kwavwa wanji? Mungelenganyako pe wumwi wino mungavwako nanti ukumusimicilako amasambililo yamwi yano mwasambililamo mwi lyasi. Lelo muzipizile ukucita wo-o pa mpindi iyiyanane, mu lukundo swinya mu cikuku.

¹⁵ Lekani tulole vino tungawomvya zyo-o inzila ziwili zino twalandapo. Twalanda pe mukamvwilwa umupina wino e Yesu wawisileko nkaninye amano pano walinji mwi tempile.

16. Londololani vino vikucitika nga mwawazya vino vyalembwa pe Marko 12:41.

¹⁶ Mwakwelenganya ukuti vikucitika. (Wazyani Marko 12:41.) Apa Nisani 11, 33 C.E. lyo kwasyalavye amanda ya kupenda ukuti e Yesu wamukome. Swinya impindi inkulu pe wo-o uwanda ayiwomvizye ku kusambilizya awantu mwi tempile. Swinya lyo wasimapepo welezizye ukumusuzya mu nzila indekane ndekane. Wamwi pe woliwo lyo wamunenile ukuti awanene kuno akafumya amaka yano akacitila ivintu. Wanji nawo lyo wamuwuzizyeko na mawuzyo yano tewakwelenganya ukuti atanga ayasuke. (Mar 11:27-33; 12:13-34) Pe yo-o impindi acili ali pi tempile nye lelo wazingulucilavye ku luwali lunji. Papo pano ayisile akulola na kakusumbilamo imisangulo. Afwile ali ku ncende yino wakakwita ukuti Uluwanza lwa Wanaci. Wikala pansi swinya akulolecesya awantu wano wakusumbila imisangulo yawo mu vipao. Walola awakankala wakusumbilamo indalama imvule. Swinya asi ukutali nkani, afwile akwivwa na vino indalama zikulila wumwi nga wasumbila mu cipao.

17. Londololani e muka fwilwa wino walandapo pe Marko 12:42.

¹⁷ Wazyani Marko 12:42. Pano acili ayisile walola umwanaci wenga ‘umupina nkaninye’ swinya ‘we mukamfwilwa.’ (Luk. 21:2) Imikalile yakwe yasyupa nkaninye ica kuti akapotwa nu kukumanisya vino akulonda mu wumi. Waya pa cipawo cimwi pe vino wasumbilangamo imisangulo nu kusumbilamo utumakoini tuwili tuno nce twakana nu kupanga icongo ndi vino tecili ku wakankala. E Yesu wamanya ukuti wasumbila utundalama tuwili tuno wakakwita ukuti lepta utucepesye nkaninye pa ndalama nzyonsinye. To-o utundalama atutici nkaninye ica kuti tutanga tukale nanti akampeta konganye. Utumpeta atuli tunyunyi utucipe nkaninye pa tunyunyi tonsinye tuno awantu wakalya.

18. Ukulingana ne Marko 12:43, 44, avyani vino e mukamfwilwa wacita?

¹⁸ Wazyani Marko 12:43, 44. Vino we-e e mukamfwilwa wacita vyafika nkaninye e Yesu pa mwezo. Acino wita awasambililizi wakwe nu kuwanena ukuti: “Nkuwanena nkuti we-e umwanaci umusimbe mufwilwe umusaluke wasumbila mwenemo walusya wonsi.” Wawanena nu kuti: “Amuno wonsi wasumbizilemo ku kutavuzya kwawo, ukuwa weni ku kusowelwa kwakwe wasumbila vyonsi vino walinji navyo ivya wumi wakwe wonsi.” Vino we-e umwanaci e mukamfwilwa wacisile wo-o uwanda vyalanjizizye ukuti wasuwizile ukuti e Yehova walinji nu kutwalilila ukumusakamala nanti ciwe wulinye.​—Amalu. 26:3.

19. Alisambililo ci ilicindame lino tungasambilila ku mazwi yano Yesu walanzile pe mukamfwilwa?

¹⁹ Womvyani vino mwasambilila. Yiwuzyani ukuti, ‘Avyani vino nkusambilila ku mazwi yano Yesu walanzile pe mukamfwilwa? Tusakuvwilika ukuti we-e e mukamfwilwa walondesyanga nkaninye ukupa Yehova ukucila na pe vino wamupile. Lelo wapile ukulingana na pano papelezile amaka yakwe. E Yesu wamanyile ukuti wo-o umusangulo wuno mukamfwilwa wapile wacindime nkaninye mu minso ya kwe Yehova. Acani cino tukusambililako kwe lyo-o ilyasi? E Yehova akatemwa nkaninye nga twawomba ukufika pano papelezile amaka yitu, nanti nga twamuwombela nu mwezo wonsinye. (Mat. 22:37; Kolo. 3:23) Ala akakwivwa icete nkaninye nga walola tukuwombesya! Co-o icisinka tungaciwomvya ku mpindi na maka vino tukasumba ku milimo ya kwe Leza muno mwasanzyamo ukulongana nu kuwizya.

20. Uzye mungawomvya wuli ilyasi lya kwe mukamfwilwa ku kuwomelezyako wanji? Landani icakulolelako.

²⁰ Uzye mungawomvya wuli ilyasi lya kwe mukamfwilwa ku kuwomelezyako wanji? Yelenganyaniko pe wamwi wano wangawomelezwa nga wivwa ukuti e Yehova akasalifya nkaninye pe vino wakamuwombela. Ku cakulolelako, uzye  mwamanyako e nkazi wumwi uwa cisongo wino akayipa imilandu pa mulandu wa kuti asiwombesya mu mulimo wa kuwizya ndi vino wawombanga kali? Nanti uzye mwamanyako umwanawitu wumwi wino akalwalilila wino akakwivwa uwuwi pa mulandu wa kukanazanwa lyonsi mukulongana? Mungavwa awa musango wo-o ukupitila mu kuwanena amazwi ya “kuwawomya.” (Efes. 4:29) Mungawasimicilako isambililo lino mwasambilila kwi lyasi lya kwe mukamfwilwa umupina. Amazwi yinu aya kuwomelezya yangawizusya icisinka ca kuti e Yehova akasalifya nkaninye nga ca kuti tukuwombesya ukufika pano amaka yitu yangapelela. (Imilu. 15:23; 1 Tes. 5:11) Acino nga mukwelezya na maka yinu yonsinye ukuwomelezya awanawitu pe vino wakuwombesya mu mulimo wa kwe Yehova lyo mukukonka mumatampulo ya kwe Yesu.

21. Avyani vino mukulondesya ukucita?

²¹ Ala tukakwivwa icete nkaninye ukuwazya amabuku ya Malandwe! Amuno yakatwavwa ukumanya ivivule pe Yesu nu kulenga twavwambisya ukumukolanya nanti ukukonka mu matampulo yakwe. Fwandi cingazipa nga tukupawulako impindi ya kuwazyako amabuku ya malandwe pano tukuyisambilizya Baibolo nanti pa Mapepo ya Lupwa. Lelo pa kuti tuitopwe pano tukuisambilizya amabuku ya Malandwe tuzipizile twalola ukuti akuno tuli pano vino tukuwazya vikucitika nga nu kuviwomvya mu wumi witu. Cinji cino tuzipizile ukucita pa kuti twakolanya Yesu akwivwila vino walandanga. Mu cipande cino cikonsilepo tulilola vino tungasambililako ku mazwi yano Yesu walanzile pano atani afwe.