1. Avyani vino Yehova akalola mu wantu wakwe?

E YEHOVA LEZA “akasecela mu wantu wakwe.” (Amalu. 149:4) Ukumanya co-o icisinka kukalenga twawa sana ni nsansa. E Yehova akawika amano ku miwele mizima yino twakwata. Akalola na vino tungiza tumucitile. Swinya akatwavwa ukuwa iviwuza vyakwe. Acino nga twatwalilila ukuwa awa cisinka kwe weliwe, aliwa we ciwuza witu umuyayaya!​—Yoha. 6:44.

2. Amulandu ci wuno wamwi cikawawomela ukuzumila ukuti Yehova wawakunda?

² Awantu wamwi wamanya ukuti e Yehova wakunda awantu wakwe ngati aliwumba. Lelo wakavwilika nga cakuti nawonye angawakunda pa lwawo. Acani cino cikalenga awavule wakwelenganya wo-o? E Oksana * wino wacuzile nkaninye ku wutici walanzile ukuti: “Pano nabatizizwe nu kutalika ukuwomba wupayiniya nakunzile nkaninye. Lelo pa nsizi ya myaka 15 natalisile ukuyivwa uwuwi pa viwipe vino vyanciticilanga ku wutici. Natalisile ukwelenganya ukuti Yehova waleka ukunkunda nu kuti ntayana ukukundikwa kwe weliwe.” Wonye avino calinji na kwe nkazi Yua e painiya wino wacuzile pano walinji amutici. Walanzile ukuti: “Cino calenzile ukuti njipe kwe Yehova, amuno nalondanga ukuti namusecelesya. Lelo nelenganyanga ukuti atalitela ankundepo.”

3. Amawuzyo ci yano twandi twasuke mwe co-o icipande?

³ Tusakuvwilika ukuti namwemwenye mwakunda Yehova ngati awanye wankazi wawili. Lelo manda yamwi tungatalika ukuvwilika nga ca kuti watukunda. Amulandu ci wuno tutazipizile twavwilicila ukuti akatusakamala? Swinya avyani vino vingamyavwa nga mwatalika ukwelenganya ukuti Yehova atamikunda? Ya-a ayali mawuzyo yano twandi twasuke.

4. Awuwipe ci wuno wawa mu kuvwilika ukuti Yehova watukunda?

⁴ Nga tusakuvwilika ukuti Yehova watukunda tuliwawomba pano pangapelela amaka yitu asa mulandu ni ntazi zino tungapitamo. Nomba nga twatalika ukuvwilika tulitonta. (Imilu. 24:10) Cinji aca kuti nga twafupuka twatalika nu kulola ngati Leza atatukunda tulipotwa ukukana amelezyo ya kwe Satana.​—Efes. 6:16.

5. Avyani vino vyacitisile ku wanawitu wano watalisile ukuvwilika nga ca kuti Leza wawakunda?

⁵ Awanawitu na wankazi wamwi amasuwilo yatonta pa mulandu wakwelenganya ukuti Yehova atawakunda swinya atawawikako amano. E eluda wumwi uwi zina lya kuti James wino akawomba pa bethel watili: “Nanti aca kuti nawombanga pa Bethel swinya nayitopwanga ukuwa mwi wungwe lino likalanda icitundu cinji, navwilikanga nga ca kuti Yehova walolanga vino namuwombelanga. Natalisile nu kuvwilika nga ca kuti Yehova wateyelezyanga ku mapepo yane.” E nkazi Eva nawe wino akawombela pa Bethel watili: “Nazana ukuti ukuvwilika nga ca kuti Yehova watukunda kwawipa nkaninye, amuno kukakuma vyonsinye vino tukamuwombela. Kukalenga atusyala tukumuwombela co awowonye. Swinya tukaleka ukuwa ni nsansa pano tukumuwombela.” E Michael nawe e eluda swinya e painiya wa mpindi zyonsi walanzile ukuti: “Nga watalika ukuvwilika ukuti e Yehova akakusakamala, ungatalika ukumusya katici katici.”

6. Avyani vino tuzipizile ukucita nga twatalika ukuyivwa ukuti e Yehova atatukunda?

⁶ Vyo-o ivya kulolelako vyatwavwa ukwivwicisya iviwipe vino vingafumamo nga twatalika ukuvwilika ukuti Yehova watukunda. Nomba avyani vino tuzipizile ukucita nga twatalika ukwelenganya ukuti Yehova atatukunda? Tuzipizile ukuleka ukwelenganyapo paponye! Swinya tuzizpizile ukupepa kwe Yehova pakuti atwavwe ukuleka ukwelenganyapo nu kutupa ‘umutende wakwe wuno walusya amelenganyo ya wuntu pakuti wucinjilile umwezo na melenganyo yitu.’ (Amalu. 139:23; Flpi. 4:6, 7) Mwakwizuka nu kuti asa mwemwe mwenga mwe wano mukakwivwa wowo. Awanawitu na wankazi awavule wakapita mu ntazi iyili yonganye. Na wawomvi wa kwe Yehova nye awa ku nsizi wayivwanga wowonye vino mukayivwa. Lekani tuloleko vimwi vino tungasambililako ku mutumwa Paulo.

7. Antazi ci zino Paulo wakweti?

⁷ Uzye impindi zimwi mukalola ngati mwakwata imilimo imivule iya kuwomba swinya mutange mukumanyisye ukuyiwomba yonsinye? Nga avino mukayivwa, icakulolelako cakwe Paulo cingamyavwa. E Paulo atasakamisilwevye pi wumgwe lyonga. Lelo wasakamisilwe pa mawumgwe yonsinye. (2 Kor. 11:23-28) Uzye mwalwala indwala yimwi yino yikalenga mutawa ni nsansa? E Paulo nawenye walinji ni ntazi yimwi yino yamucuzizye nkaninye. Yo-o intazi yifwile yalinji andwala inkulu yino walondanga ukuti yifume pa muwili wakwe. (2 Kor. 12:7-10) Uzye amanda yamwi mukafupuka pa mulandu wa kukanapwililika kwinu? Nga avino cawa, ne Paulo nye avino wayivwanga impindi zimwi. Impindi yimwi wasusile alanda nu kuti “nasyama wuli!”​—Roma. 7:21-24.

8. Acani cino cavwanga e Paulo ukusipicizya intazi?

⁸ E Paulo watwalilizile ukuwombela Yehova asa mulandu ni ntazi zino wawanga nazyo. Acani cino camwavwanga ukusipicizya? Akusuwila sana mu nzuwi. Cinji wasuwizile na mu wulayo wa kwe Yesu uwa kuti: “Wensinye wino wawika insingo nanti ukusuwila mwe [Yesu] aliwa nu wumi wa muyayaya.” (Yoha. 3:16; Roma. 6:23) E Paulo walinji pa wantu wano wasuwizile sana mu nzuwi. Atavwilikanga ukuti e Yehova akalonda ukutetela nawalyanye wano wacita imembu inkulu nga walapila.​—Amalu. 86:5.

9. Avyani vino tukusambilila ku mazwi yano Paulo walanzile yano yawa pa Wagalatiya 2:20?

⁹ E Paulo wasuwizile ukuti e Yehova wamukunzile nkaninye amuno wamutumuzile ne Yesu ukwiza mufwila. (Wazyani Wagalatiya 2:20.) Lolani amazwi ukuzipa yano walanzile mukulecelezya mwe lyo-o iwaliko. Watili: “Umwanakwe Leza wankunda. Wayifimile nanti ukuyipa pa mulandu wane.” E Paulo atayilolanga ukuti walinji amuwipe nkaninye ica kuti Leza atange amutetele nanti ukwelenganya ukuti ‘e Yehova wakunda awanawitu lelo nene atange ankunde.’ Wanenile na wina Roma ukuti: “Pano twalinji swe wawembu e Klistu wizile atufwila.” (Roma. 5:8) Pasi icili consinye cino cingalenga Leza aleke ukutukunda!

10. Avyani vino tukusambililako ku mazwi yano yawa pa Waroma 8:38, 39?

¹⁰ Wazyani Waroma 8:38, 39. E Paulo wamanyile ukuti ulukundo lwa kwe Leza lwawa na maka nkaninye. Amuno walanzile ukuti pasi nanti conga “cino cingatupantula ku lukundo lwa kwe Leza.” E Paulo waweni vino Yehova watekanizizye awina Israeli  na vino wamutekanizizye pa lwakwe. Mu nzila yinji e Paulo walandanga ukuti, ‘Ntazipizile ukuvwilikaukuti Yehova wankunda amuno watumile umwana wakwe ukwiza mfwila.’​—Roma. 8:32.

11. Nanti aca kuti e Paulo wacisile imembu inkulu zino walumbula pe 1 Timoti 1:12-15, amulandu ci wuno atavwilicilanga ukuti e Leza wamukunzile?

¹¹ Wazyani 1 Timoti 1:12-15. E Paulo impindi zimwi afwile wayivwanga uwuwi nkaninye nga wizuka vino wacitanga ku nsizi. Awuli mulandu wuno wayitizile ukuti “ne muwembu umucilepo.” Pano e Paulo atani awe amwina Klistu wacuzyanga nkaninye awina Klistu, ukuwawika mu vifungo nu kuzumilizyako ukuti wamwi wawakome. (Imili. 26:10, 11) E Paulo afwile wayivwanga uwuwi nkaninye nga wasunkanya umwina Klistu wacitici uwa kuti awakwasi wakwe wafwa pamulandu wakuti weliwe watunjilizile ukuti wawakome. Nomba nanti aca kuti wayivwanga wo-o, wamanyile ukuti atalinji na maka yakupilula vino vyacitika kali. Atavwilikanga nanti katici ukuti Yesu wamufwizile. Awuli mulandu wuno walembezile ukuti: “Ukuwa muno Leza wamfwila inkumbu indi ndi vino indi.” (1 Kor. 15:3, 10) Avyani vino tukusambililako? Muzipizile ukusuwila ukuti e Yesu wamifwizile nu kulenga muwe nu longo lwa kuwa e ciwuza wa kwe Yehova. (Imili. 3:19) E Leza asiwika amano kwe vino twaluvyanyanga ku niszi nampo nga twalinji swe Nte yakwe nanti awe. Lelo akawika amano kwe vino tukucita pe yo-o impindi na vino tulicita kunkolelo.​—Ayize. 1:18.

12. Uzye 1 Yohani 3:19, 20 yingatwavwa wuli nga twatalika ukuyivwa ukuti tutakundikwa?

¹² Nga mwatalika ukwelenganya pe vino Yesu wacuzile pa kufwa, mungatalika ukulola ngati mutayana ukumifwila. Acani cino cingalenga twayivwa wo-o? Amuno umwezo witu wungatuwipa, wungalenga twayilola ngati pasi vino twawa. (Wazyani 1 Yohani 3:19, 20.)  Nga twatalika ukuyivwa wowo, tuzipizile twakwizuka ukuti “e Leza wakula walusya imyezo yitu.” Umukwasi witu uwa kwi yulu alitwalilila ukutukunda nu kututetela asa mulandu na vino twaluvyanya kali. Tutazipizile twayivwilika nanti katicinye ukuti Yehova watukunda. Lelo pa kuti tutavwilika tuzipizile twayisambilizya Izwi lya kwe cila wanda, ukupepa lyonsi nu kutwalilila ukuzanwa na wantu wakwe. Amulandu ci wuno ukucitila vyo-o vino twalandapo kwacindamila?

13. Uzye ukuyisambilizya Baibolo kungatwavwa wuli? (Lolani akambokosi kano kakuti “ Vino Izwi lya kwe Leza Likawavwa.”)

¹³ Mwayisambilizya Baibolo cila wanda, pakuti mwamanyilako imiwele ya kwe Yehova yinji imizima. Ukucita wo-o kulimyavwa ukumanya ukuti wamikunda. Nga ca kuti mukwelenganya sana pe vino mukuwazya mu Baibolo muliwalola ivintu ndi vino Yehova akavilola swinya yiliwamyavwa ukuleka ukwelenganya pa viwipe. (2 Tim. 3:16) E eluda uwi zina lya kuti Kevin wino walolanga ngati atakundikwa kwe Yehova walanzile ukuti: “Ukuwazya nu kwelenganya sana pi waliko lya Amalumbo 103 kwalenga manye ukuti Yehova wambikako sana amano.” E Eva nawe wino tulanzilepo kali watili: “Cila wanda pano uwanda wukuya wukusila nkakwelenganya pa vintu ivizima. Ukucita wo-o kukalenga ntasakamikwa swinya isuwilo lyane likawomelako.”

14. Uzye ipepo lingatwavwa wuli?

¹⁴ Mwapepa lyonsinye. (1 Tes. 5:17) Pa kuti mupange iciwuza nu muntu muzipizile mwalanzyanya lyonsinye nu kumunena vino mukuyivwa. Wonye avino tuzipizile ukucita pa kuwa iviwuza vya kwe Yehova. Nga tukumunena vino tukuyivwa, vino tukwelenganya na vino vikutusakamika lyo tukulanjizya ukuti twamusuwila nu kuti twamanya ukuti watukunda. (Amalu. 94:17-19; 1 Yoh. 5:14, 15) E nkazi Yua wino tulanzilepo kali nawe watili: “Pano nkupepa kwe Yehova nsimunenavye vino vinciticizile pe wowo uwanda. Lelo nkamunena na vino nkuyivwa. Ukucita wo-o kukalenga ntalola Yehova ngati we songo wa pa kampani, lelo nkamulola ukuti amukwasi wino wakunda awana wakwe.”​—Lolani na kambokosi kano kakuti “ Uzye Mwaliwazya?”

15. Uzye e Yehova akalanjizya wuli ukuti watuwikako amano?

¹⁵ Mwazanwa ponga na wantu wa kwe Yehova; amuno vyawa avya wila ukufuma kwe weliwe. (Jemu. 1:17) Umukwasi witu uwa kwi yulu akalanjizya ukuti watukunda ukupitila mu kutupa awanawitu wano wakatulanjizya ulukundo “impindi yonsinye”. (Imilu. 17:17) Mwe kalata yino Paulo walembezile awina Kolose walanzile pa wina Klistu wano wamutunjililanga ukuti ‘wamwavwanga nkaninye.’ (Kolo. 4:10, 11) Ne Yesu Klistu nye walondanga awakumutunjilila.  Swinya wasalifizye nkaninye pe vino iviwuza vyakwe ivya munsi na kwi yulu vyamutunjilizile.​—Luk. 22:28, 43.

16. Uzye awina Klistu wanji wakatwavwa wuli ukupalamila kwe Yehova?

¹⁶ Uzye mukasalifya pa vyawila vino Yehova wamipa? Nga twanenako umwina Klistu e songo mu vya kwe Leza vino tukupitamo lyo citakusula ukuti isuwilo litu lyatonta. Lelo yingawa anzila ya kuyicinjililamo. E James wino tulanzilepo kali watili: “Ukunenako awina Klistu wa songo mu vya kwe Leza pe vino nkupitamo kwanjavwa nkaninye. Wakateyelezya sana nga nkuwalondololela swinya wakanjizusyako ukuti wankunda. Wo-o vino wakacita vyalenga manye ukuti Yehova wankunda swinya wambikako amano.” Ala cacindama nkaninye ukupanga wuciwuza na wanawitu na wankazi mwi wumgwe!

17-18. Uzye tuzipizile ukuteyelezya kwe weni, swinya amulandu ci?

¹⁷ E Satana akalonda tuleke ukucita icizima nu kutalika ukuyilola ngati tutayana ukukundikwa ne Yehova. Lelo ukulingana na vino twasambilila, wo-o awufi.

¹⁸ E Yehova wamikunda swinya mwacindama nkaninye kwe weliwe. Nga mukumwivwila mulitwalilila “ukwikalilila mu lukundo lwa kwe” wulyanye vino cawa na kwe Yesu. (Yoha. 15:10) Acino mutazipizile ukuteyelezya ku wufi wakwe Satana nanti kwe vino umwezo winu wungamiwipa ukuti mutakundikwa. Lelo mwateyelezya kwe Yehova wino akalola ivizima mwe sweswe. Mutavwilika ukuti e Yehova wacindamika sana awantu wakwe ukuwikako na mwemwenye!