Ku cawulanda, pano nafisya imyaka 13 wuciwuza wane ne Yehova wizile awutalika ukunyocela pansi. Cino calenzile, natalisile ukulola ngati wakasukulu wanji weni wakweti sana uwuntungwa ukucila nene. Na cino cafumilemo natalisile ukuwakumbwa nu kuvwamba ukuwa ndi vino woliwo. Co-o calenzile ntalike nu kulola amasundo ya wakwasi wane na ya kwe Yehova ngati yatala sana ukuyakonka. Ica kuti nu kuwombela Yehova nye natalisile ukukulola ngati acisendo. Namanyile ukuti e Yehova akuno wawa lelo ntayivwanga ukuti napalamila kwe weliwe.

Kweni ntalesile ukuwizya, lelo nayangavye nga campingula. Swinya nga naya ntapekanyanga. Ukucita wo-o kwalenganga cambomela ukutwalilila ukulanzyanya nu muntu pa mpindi ntali. Cinji aca kuti ntakweti isambililo ilili lyonsinye swinya nanti nayanye ntapanganga icipempu nanti conga. Co-o calenzile mpate sana umulimo wa kuwizya. Nizile intalika nu kwelenganya ukuti, ‘Nga vino cikawa na kwe wanjinye, nene ntanga nkwanisye ukuwomba.’

Nalile nafisya imyaka 17 natalisile ukuvwambisya nkaninye ukuwa nu wuntungwa. Acino nafumile pa ng’anda nu kucintila ku Australia. Awakwasi wane wasakamisilwe sana swinya wayivwile uwuwi pano nafumile pa ng’anda. Lelo wanzumilizizye amuno welenganyanga  ukuti nalinji nu kutwalilila ukuwombela Yehova ukuli konsinye kuno naya.

Pano nafisile ku Australia wuciwuza wane ne Yehova wanyocezile nkaninye pansi ica kuti natalisile nu kupuswa mu kulongana. Napanzile wuciwuza na wacitici wanji mwi wungwe awa kuti uwanda wa kulongana nga wafika, atuloleka ukuti swe wakalongana. Lelo nga wapitavye akuya mu mabaa mu kumwa ipala nu kucina. Nga nizuka vino uwumi wane walinji pe yoyo impindi nkalola ukuti icinama conga calyasile mwi wungwe lya kwe Leza ne cinji naco calyasile mu vya mwe yo-o insi. Lelo ntalolanga ukuti nalinji ku luwali ululi lonsinye.

Pa nsizi ya myaka yiwili e nkazi wumwi wizile anjavwa ukumanya vino nazipizile ukuwomvya uwumi wane cingatenga weni atamanyile nu kuti wanjavwanga. Mu ng’anda yino twikalangamo twalinji swe wasimbe watupunye 5. Acino impindi yimwi pano e kangalila wa muputule ne wakwakwe e Tamara wizile awatandalila iwungwe litu twizile atwikala nawo e sabata wensinye. Nomba lyonsinye umwanawitu nga waya mukuwomba imilimo yimwi iyi wungwe twasyalanga nu muci swinya watusansamusyanga nkaninye. Natemilwe vino walinji. Walinji amuyicefye swinya umuyipepusye nkaninye. Vino we-e enkazi walinji vyamfisile nkaninye pa mwezo. Amuno ntelenganyanga ukuti umuntu wa musango wo-o angawa ni mpindi ya kuseka na wantu.

E Tamara walinji amucincile nkaninye mu vyakwe Leza. Vino wacitanga vyalanjizyanga ukuti wakunda sana icine nu mulimo wa kuwizya. Ukuwombela Yehova nu mwezo wakwe wonsi kwalenganga awawa ni nsansa. Lelo nene ntawanga ni nsansa pa mulandu wa kuti namuwombelanga cino awowonye. Imiwele yino wakweti na vino wawanga ni nsansa vyamfisile nkaninye pa mwezo. Ica kulolelako cakwe icizima acino calenzile ntalike ukwelenganya pa cisinka icicicndame ica kuti: E Yehova akalonda swensinye twamuwombela “ni cimwemwe.”​—Amalu. 100:2.

Nalondanga ukuwa ni nsansa ndi vino Tamara walinji. Lelo pa kuwa nazyo nalondekwanga ukupiluka mu vintu ivivule. Cansendezile impindi inkulu lelo nayanga nkupiluka katici katici. Vino nacisile, natalisile ukupekanya pa kuya mu mulimo wa kuwizya. Natalisile nu kuwombako wupainiya mu mpindi mu  mpindi. Ukucita wo-o kwalenzile ndeke ukwivwa sana intete nga nu kuyivwilika. Swinya pa mulandu wakuti nizile intalika ukuwomvya sana Baibolo mu mulimo wakuwizya nayitopwanga nkaninye pano nkuwomba. Mukupita kwa mpindi nalembesizye wupainiya wa kwavwilizya uwa kutwalilila.

Nizile impanga iviwuza awavimo ivilekane lekane wano watemilwe umulimo wa kwe Yehova. Ivya kulolelako vyawo ivizima vyalenzile ntalike ukuwika amano ku vintu ivicindame mu wumi nga nu kuwazya Baibolo cila wanda. Natalisile ukuyitopwa nkaninye umulimo wa kuwizya ica kuti nasozilepo nu kutalika ukuwomba wupainiya wa mpindi zyonsi. Co-o calenzile ntalike ukuwa ni nsansa ndi zino nakweti pa kutalika swinya natalisile nu kuyivwa ukuti nemucinjililwe pa kuwa mwi wungwe.

Pa nsizi ya kuwomba wupainiya pa mwaka wonga twamanyine ne Alex, umonsi uwa cikuku swinya wino watemilwe Yehova nu mulimo wa kuwizya. Pe yo-o impindi lyo amuwomvi wino akatumicila swinya lyo wawomba wupainiya pa myaka 6. E wakwane wayile awombelako na ku Malawi kuno wakawizya wacefile. Pano walinji ku Malawi wawomvile na mishonari awalekane lekane wano wamuwomelezizye ukutwalilila ukuwika ivya wufumu inkolelo mu wumi wakwe.

Twizile atutwalana mu 2003, swinya twatwalilila ukuwomba umulimo wa mpindi zyonsi. Twasambilila ivintu ivivule mwe wo-o umulimo, swinya e Yehova watupaala mu nzila imvule nkaninye.

Mu 2009, watutumile ukuya mukuwomba wumishonari mu nsi ya Timor-Leste. Twaweni vye nge ciloto, twatemilwe nkaninye. Lelo twalinji ni ntete pa mpindi iyili yonganye. Pa nsizi ya myezi 5 twafisile mu musumba uwukulu uwa Dili.

Imikaliile yino twayile atuzana kwe yo-o incende yapusine na yino twasile kuno twafumile. Twazipizile ukusambilila intambi impya, icitundu nga ni vyakulyanye. Impindi imvule nga twaya mu mulimo wa kuwizya twazananga awantu awapina, wano watasambilila nga na wano wawacuzyanga ku wantu wanji. Twazananga awantu wano wakweti intazi na masakamika  pa mulandu wa nkondo ni vyongo vino vyalinjiko kali kwe yo-o incende. *

Umulimo wa kuwizya wazifile nkaninye! Ku cakulolelako, twizile atusunkanya umukazyana e Maria uwa myaka 13 wino walinji nkaninye nu wulanda. * Pano twamusunkinye lyo papitavye imyaka ya kupenda ukufuma pano mama wakwe wafwizile. Swinya e tata wakwe wamulolanga vye mu mpindi mu mpindi pa mulandu wa kuti atikalanga nawe. E Maria atamanyile vino walinji nu kucita mu wumi wakwe wulyanye vino calinji na kuwacitici wanji awa cimo cakwe. Nkakwizuka impindi yimwi pano wandondololelanga vino wayivwanga walizile. Kweni ntivwile vyonsi vino walanzile amuno lyo ntani ncimanye icete icitundu cino walandanga. Acino napefile kwe Yehova ukuti anjavwe ukuwomelezya Maria. Pa nsizi vye ya kupepa nizile imuwazizya amawaliko yano yamusansamusizye. Mu myaka yitici yino yakonsilepo nizile indola vino icine capiluzile Maria. Wizile awa ni nsansa swinya wapilusile na vino walinjinye. Mukupita kwa mpindi wizile abatizwa swinya watalisile nu kutungulula amasambililo ye Baibolo. Pe yo-o impindi e Maria wawa mu lupwa ulukulu ulwa wantu wa kwe Yehova swinya akayivwa ukuti wakundikwa.

E Yehova akupaala nkaninye umulimo wa kuwizya mu Timor-Leste. Nanti aca kuti wakawizya awavule mwe yo-o insi papita vye imyaka 10 ukufuma pano wabatizizwe awavule awapainiya, awawomvi wano wakatumicila wanji awaeluda. Ne wanji nawo wakawombela pa maofesi ya kapiliwula pa kuti wapiliwula amabuku yano yakalanda pe Baibolo mu ndimi zyawo izya cikaya. Nkakwivwa icete nkaninye nga nalola awanawitu na wankazi wakwimbila pa kulongana, wali ni nsansa swinya wakutwalilila ukulunduluka mu vya kwe Leza.

Imikaliile mu Timor-Leste yapusana nkaninye na yino twasile ku Australia. Lelo twalinji ni nsansa nkaninye mu wumi witu. Impindi zimwi watupampanga nkaninye mwe kamini basi. Ukuzana momonye walonzile ni nswi inkale na wamusalu wano watwalanga ku maliketi. Ne nga ciza pa kutungulula amasambililo ye Baibolo, manda yamwi ukuzana mung’anda muno muli mupile muli na se! Pamwi ukuzana momonye muli ni nkoko, nazyo zikupitana mwalwenye. Lelo asa mulandu na vyonsinye vyo-o, twayitopwanga nkaninye umulimo wa kuwizya.

Nga nelenganya pe vino uwumi wane walinji ku nsizi, nkasalifya sana awakwasi pa kuwombesya ukunsambilizya pe Yehova, na pa kutwalilila ukumbomelezya pano wuciwuza wane ne Yehova wanyocezile pansi. Nalola vino iwaliko lya Imilumbe 22:6 lyaficiliswa mu wumi wane. E mama ne tata wakakwivwa icete nkaninye nga walola nene ne wakwane Alex tukutwalilila ukuwombela Yehova. Ukufuma mu 2016 nene nu wakwane tukawomba umulimo wa kutandalila amawungwe mu ncende yino umusambo wa Australasia wukalolecesyapo.

Nkapotwa ukusinincizya nga nizuka ukuti impindi yimwi mu wumi wane napasile umulimo wa kuwizya. Lelo pe yo-o impindi nawukunda nkaninye! Cino niza nazana aca kuti asa mulandu na vino tungapitamo mu wumi witu, cino cingalengavye tuwe ni nsansa akuwombela Yehova nu mwezo witu wonsinye. Yonsinye yo-o imyaka yino twawombela ponga ne wakwane nawa ni nsansa nkaninye mu wumi wane. Niza nivwicisya nkaninye icisinka cino e kimbila wa malumbo e Davidi walanzile pe Yehova ica kuti: “Wonsi wano wakakwikala nawe walisecela; waliwakwimbila indwimbo zya cimwemwe penye . . . . Wano wakukunda waliwasecela mwe wewe.”​—Amalu. 5:11.