E Paulo walemvile ukuti: “Ku masundo nafwa, amasundonye ayano yankoma alya kuti imbe nu wumi kwa kwe Leza.”​—Gal. 2:19.

Vino Paulo walemvile vyalemenkine sana ni cisinka cino walandangapo mwe kalata yino walembezile amawungwe ya mu Roma aya mu citungu ca Galatiya. Awina Klistu wamwi watalisile ukukoncelela vino wakasambilizya wawufi wasambilizyanga. Wa-a wakasambilizya walandanga ukuti pa kuti umuntu ayize apusuke azipizile ukuzembululwa ukulingana ni Isundo lya kwe Musa. Lelo umutumwa Paulo wamanyile ukuti awawomvi wa kwe Leza watalondekwanga ukuzembululwa pe yoyo impindi. Wapeluluzinye nawo icete nkaninye nu kuwapa uwusinincizyo wa kuti co-o icisambilizyo calinji acawifi. Ukucita wo-o kwalenzile awina Klistu ukusuwila nkaninye mu nzuwi ya kwe Yesu Klistu.​—Gal. 2:4; 5:2.

E Baibolo ikalanda ukwasowa nu kupita mu mbali ukuti umuntu nga wafwa asimanya cimwi nanti ukumanya vino vikucitika. (Ekawi. 9:5) Pano e Paulo walanzile ukuti: “Ku masundo nafwa,” wasulanga ukuti Amasundo yatakweti amaka pe weliwe. Lelo ukusuwila mu nzuwi akuno kwalenzile ‘awe nu wumi kwa kwe Leza.’

Ko-o ukupiluka kwa kwe Paulo kwizile pa mulandu ‘wi sundo.’ Munzila ci? Amuno walanzile ukuti, “we Leza awino akalungamika umuntu muno alisuwilo mwa kwe Yesu Klistu.” (Gal. 2:16) Isundo lya kwe Musa lyawomvile umulimo uwucindame nkaninye. E Paulo walondolozile wo-o umulandu ukuti: “Yonjelezizwe ku kulenga uwuwembu wuloleke, asuke uwikwata lya kwe Abrahamu wino watasilwe ayize aloleke.” (Gal. 3:19) Isundo lyalenzile cimanyikwe apatiswenye ukuti, awantu wano watapwililika watanga wakonke isundo mu kufikapo swinya walondekwanga inzuwi ya kulecelezya iyipwililike. Isundo lyatungululangavye awantu “ku wikwata lya kwe Abrahamu,” akuli kuti kwe Klistu. Ukusuwila mwe Yesu Klistu akuno kwalinji nu kulenga Leza awalola umuntu ukuti amulungamane. (Gal. 3:24) Leza walolanga e Paulo ukuti amulungamane amuno Isundo nye alino lyalenzile azumile nu kusuwila Yesu. Fwandi e Paulo ‘wafwile ku masundo’ nu kuwa nu “wumi kwa kwe Leza.” Amasundo ya kwe Musa yatakweti amaka lelo e Leza awino wakweti amaka pe weliwe.

Pano walembelanga awina Roma e kalata walanzile icisinka icikolaneko. Watili, “Wanawitu namwenye mwafwile mwalufuma ku masundo mu muwili wa kwe Klistu . . . Ukuwa kanonzi twalufuma ku masundo, amuno twafwa twalufuma kwe coco cino catulemile uwuzya.” (Roma. 7:4, 6) Lyo-o iwaliko ponga na Wagalatiya 2:19, yakalanjizya ukuti e Paulo atalandanga pa kufwa kwa muntu umuwembu, lelo walandanga pa kuluwulwa ukufuma mu wuzya. Isundo litakwetipo amaka pe weliwe wulyanye vino calinji na ku wina Klistu wanji wano wasuwizile mu nzuwi ya kwe Klistu.