1. Avyani vino Yehova wacita kwe swensinye?

 E YEHOVA watuleta swensinye kwe weliwe. (Yoha. 6:44) Teyelenganyani pe vino ya-a amazwi yakusula. Pa wantu imintapendwa mu nsi, pano e Yehova wavwambanga wano wangamuwombela, waweni icizima mwe mwemwe, akuli kuti umwezo wuno wungamukunda nu kutalika ukumuwombela. (1 Imila. 28:9) Fwandi e Yehova wamimanya nkaninye, akamivwicisya swinya wamikunda. Ala ukumanya vyo-o ivisinka, kukatusansamusya nkaninye!

2. Acilanjililo ci cino Yesu wawomvizye pa kutwavwa ukwivwicisya vino Yehova watuwikako amano?

² E Yehova wamiwikako sana mano wulyanye vino akacita na ku wanawitu na wankazi wanji insi yonsinye. Pakutwavwa ukwivwicisya co-o icisinka, e Yesu wakolinye e Yehova kwe kacema. Nga cakuti ing’onzi zili 100 apano yonga yasowa, avyani vino kacema akacita? Walanzile ukuti “akasya ing’onzi 99 mu mbali yamwamba aya mukuvwamba vwamba yino yasowa.” Ngawayizana asiyifulilwa lelo akazewela. Cino tukulandapo aca kuti, ing’onzi zyonsinye zyacindama kwe Yehova. E Yesu watili: “Awowonye kusi akulonda kwa mukwasi winu uwa mwi yulu ukuti wumwi alowe uwawaticinye waa.”​—Mat. 18:12-14.

3. Avyani vino twandi tusambilile mwe co-o icipande?

³ Tusilonda nanti katicinye ukufupula umwanawitu nanti e nkazi uwili wensinye. Nomba avyani vino tuzipizile ukucita pakuti tutapunuzya wanji? Swinya tungacita wuli nga ca kuti wumwi watupunuzya? Ya-a ayali amawuzyo yano twandi twasuke mwe co-o icipande. Nomba lekani tetutalicile ukumanya wanye “awatici” wano walandapo mwi buku lya kwe Mateyu icipandwa 18.

4. Uzye “awatici” awaweni?

⁴ Wa-a “awatici” awantu awavimo vyonsinye wano wakakonka e Yesu. Wonsinye wawa ngati “awana” amuno wakayikundila ukusambilila kwe Yesu. (Mat. 18:3) Nanti aca kuti wapusana inkulilo, intambi zino wakakonka na vino wawa, wonsinye wasuwila mwe Klistu. Swinya nawe wawakunda nkaninye.​—Mat. 18:6; Yoha. 1:12.

5. Uzye e Yehova akayivwa wuli nga ca kuti wumwi wapunuzya umuntu wakwe?

⁵ Wonsinye wa-a “awatici” wacindama nkaninye kwe Yehova. Pa kuti twivwicisye vino akayivwa pe woliwo, teyelenganyani vino tukayivwa pa wana! Pa mulandu wa kuti wacindama, tukawacinjilila. Amuno wasiwa na maka, amano swinya wasimanya ivivule ndi vino cikawa kwa songo. Kweni swensinye tusikwivwa icete nga twalola wamwi wakucuzya wumwi. Lelo tukakwivwa uwuwi ukucilapo nga twalola wakucuzya umwana. Wonye wo-o avino cawa na kwe Yehova. Akalonda ukutucinjilila swinya akayivwa uwuwi nkaninye nga ca kuti wamwi wapunuzya awawomvi wakwe nanti wakuwacuzya!​—Ayize. 63:9; Mar. 9:42.

6. Ukulingana ne 1 Wakorinte 1:26-29 uzye awa mu nsi wakalola wuli awasambi wa kwe Yesu?

⁶ Amunzila ci yinji yino awasambi wa kwe Yesu wawela ngati “awatici”? Awantu wamwe yo-o insi wakakwelenganya ukuti awantu awacindame awawo wano wawa ni cuuma, awalumbuke na wamaka. Nomba wo-o asa vino awasambi wa kwe Yesu wawa. Awuli umulandu wuno awa mu nsi wakawalolela ukuti watacindama swinya awantu wa pansi. (Wazyani 1 Wakorinte 1:26-29.) Nomba wo-o asa vino e Yehova weni akawalola.

7. Uzye Yehova akalonda twalola wuli awanawitu na wankazi?

⁷ E Yehova watemwa awawomvi wakwe wonsinye asa mulandu watalika kali ukumuwombela nanti apano wabatizizwe. Awanawitu na wankazi wonsinye wacindama kwe Yehova. Swinya wonye avino nasweswenye tuzipizile ukuwalola. Tuzipizile ukuwakunda wonsinye. Asakukundavye wamwi wamwi pole. (1 Pet. 2:17) Tuzipizile ukulenga wayivwa ukuti wakundikwa swinya tutazipizile ukucita icili consinye cino cingawapunuzya. Acino, nga twaluvyanya wumwi tutazipizile ukusulakovye nu kwelenganya ukuti wandi atutetele asuleko nu kusula. Avyani vino vikalenga wamwi wafulwa zuwa? Wamwi cino cikalenga, amulandu ni nkulilo yawo. Wakayilola ngati awa pansi sana. Wanji nawo pamulandu wa kuti apano wasambilizile icine, watamanya nga ca kuti wazipizile ukutetela wanji nga wawaluvyanya. Lelo asa mulandu twapunuzya wamwi nanti watupunuzya, tuzipizile ukwelezya na maka ukupanga umutende. Cinji aca kuti nga tukafulwa zuwa tuzipizile ukuwombelapo pa kuti tutafulwa zuwa. Nga twacita wo-o tuliwa ni nsansa swinya tuliwakwivwana na wantu wanji.

8. Amiwele ci yino yazesile pano Yesu walinji mu nsi yino yakumile na wasambi wakwenye?

⁸ Acani cino calenzile ukuti e Yesu alande pe wa-a “awatici”? Amuno awasambi wakwe wizile awamukolowozya ukuti: “Nga fwandi eweni wino wakula walusya mu wufumu wa mwi yulu?” (Mat. 18:1) Pe yoyo impindi awaYuda walondanga wanji wawalola ukuti wacindama. E kalemba wumwi walanzile ukuti: “Awantu cino wacindisile sana akulumbuka, ukumanyikwa nu kucindikwa.”

9. Uzye avyani vino awasambi wa kwe Yesu wazipizile ukucita?

⁹ E Yesu wamanyile ukuti awaYuda awavule wayilolanga ukuti wacindama sana ukucila wanji. Fwandi awasambi wazipizile  ukuwombesya pa kuti wapiluke mwe vino welenganyanga. E Yesu wawanenile ukuti: “Ukuwa wino wakula mwakwe mwemwe, awino wazipila ukuwa amutici nkani. Nawe e nankolelo wazipila ukuwa amuwomvi.” (Luk. 22:26) Tukawa ngati swe watici nga tukulola wanji ukuti watucila. (Flpi. 2:3) Nga ca kuti tukulola wanji ukuti watucila, tutaliwawapunuzya.

10. Akusunda ci ukwa kwe Paulo kuno tuzipizile ukukonka?

¹⁰ Awanawitu na wankazi wonsinye, kwawako vimwi vino wakacitamo icete ukucila sweswe. Tungavilola nga ca kuti tukuwika amano ku miwele yawo imizima. Swinya tuzipizile ukuwika amano ku kusunda kuno e Paulo walembezile awina Korinte ukwa kuti: “Nga weni wakupa uwusongo pa wawuyo? Uzye asiwe Leza wino wakupa vyonsinye vino uli navyo? Ale, nga uli na cani cino ukuyitumvizya ngati cino wapocelezile citalinji acawila?” (1 Kor. 4:7) Acino tutazipizile ukucita vino vingalenga awantu wawika amano kwe sweswe nanti walola ngati twacila wanji. Ku cakulolelako awanawitu wano wakalanda icete amalyasi nanti wankazi wano wawa ni cawila cakutalika ukutungulula amasambililo ye Baibolo, wazipizile ukuleka ilumbo ukuya kwe Yehova.

11. Avyani vino tukusambililako ku cilanjililo ce Yesu ica mfumu nu muzya?

¹¹ E Yesu pa nsizi ya kusoka awasambi wakwe ukuti watazipizile ukupunuzya wanji, walanzile pa cilanjililo ca mfumu nu muzya. Imfumu yafusile inkongole imvule zino umuzya wakweti. Lelo we-e umuzya weni wakanile ukufuta inkongole intici zino umuzya muwuye wakongozile kwe weliwe. Imfumu yalile yivwa lyo-o ilyasi yawisile we-e umuzya mu cifungo wino wakanile ukutetela umuzya muwuye. Acani cino tukusambililako? E Yesu watili: “Avino nu mukwasi winu uwa mwi yulu alicita nga ca kuti mutakutetela wamunyonko ni myezo yinu yonsi.”​—Mat. 18:21-35.

12. Uzye tukapunuzya wuli wanji nga twakana ukutetela wino atuluvinye?

¹² Vino weyo umuzya wacisile vyakumile awavule. Ica kutalicila walanjizizye ukuti atalinji nu luse, pa “kuwika umuwuye mu cifungo mpaka ayize amulipile impiya.” Ica citi wili, wapunuzizye awazya wawuye wano walolanga vino wacisile. Amuno e Baibolo ikati, “awala awazya wawuye walola vino vyacisilwe amalanda ayawalema nkaninye.” Wonye avino cikawa nga tutakutetela wanji. Vino tukucita vikakuma awavule. Amuno tukalenga wino atuluvinye ayiwa uwuwi pakukana mutetela. Akatalika ukuyilola ngati atakundikwa swinya tutamuwikako amano. Ica citi wili, tukalenga awa mwi wungwe ukuwipilwa nga wamanya ukuti tusi pa mutende na weliwe.

13. Avyani vino mukusambililako kwe nkazi Crystal?

¹³ Nga tukutetela wanji ivintu vikatuzipila swensinye. Wonye avino calinji nakwe nkazi e payiniya uwizina lya kuti Crystal. We-e nkazi wivwanga uwuwi pe vino e nkazi muwuye wacitanga. Walanzile ukuti: “Amazwi yano wawomvyanga mpindi zimwi ntayatemwanga nanti katicinye. Nivwanga ngati akuntota nu mupeni. Ica kuti ntalondanga nanti akuwomba nawe mu mulimo wa kuwizya. Nalesile ukuwa ni nsansa swinya nawombanga umulimo wa kuwizya co awowonye.” We-e nkazi walolanga ngati calinji icetenye ukufulilwa e nkazi muwuye pe vino wamuluvyanyanga. Lelo icizima aca kuti atatwalilizile ukumufulilwa nanti ukuwikavye amano kwe vino wamuluvyanyanga. Wayicefizye nu kukonka ukusunda kwa mu Baibolo kuno kwalinji mu Ulupungu lwa kwe Malonda ulwa October 15, 1999 pa mutwe wa kuti “Mwatetela ni Myezo Yinu Yonsi.” Pa nsizi ya kuwazya co-o icipande wamutetezile. Walanzile  nu kuti: “Pe yo-o impindi niza namanya ukuti swensinye tukawombesya ukuzifyako uwuntu witu. Swinya e Yehova akatutetela cila wanda. Nkayivwa ukuti natula icisendo cino nanyamuzile. Swinya nawa ni nsansa.”

14. Ukulingana ne Mateyu 18:21, 22, antazi ci pamwi yino umutumwa Peter wakweti, swinya avyani vino tukusambililako kwe vino Yesu wamwasusile?

¹⁴ Twamanya ukuti ukutetela wanji acintu cino tuzipizile ukucita. Lelo impindi zimwi cisipepuka ukucita wo-o. Nu mutumwa e Peter impindi yimwi afwile avino wayivwile. (Wazyani Mateyu 18:21, 22.) Nomba acani cino tuzipizile ukucita nga ca kuti cikutuwomela ukutetela wanji? Ica kutalicila mwakwelenganya pe vino Yehova wamitetela. (Mat. 18:32, 33) Tutazipila nu kuti atutetela lelo akayikundilavye umweneco ukuti atutetele. (Amalu. 103:8-10) Swinya watunena nu kuti twakundana. Fwandi ukutetela asa cintu cino tuzipizile ukucitavye pano twakunda. Lelo tuzipizile ukutetela awanawitu. (1 Yoh. 4:11) Ica citi wili mwakwelenganya pe vino vikafumamo nga ca kuti mwatetela wanji. Tukakwavwa wino atuluvinye, tukalenga mwi wungwe ukuwa ukulemenkana, tukacinjilila wuciwuza witu ne Yehova swinya tukapepucilwa. (2 Kor. 2:7; Kolo. 3:14) Ica kulecelezya mwapepa kwe wino akatunena ukuti twatetela wanji. Mutazipizile ukuleka Satana ayonone wuciwuza wuno mwakwata na wamunyonko mwi wungwe. (Efes. 4:26, 27) Fwandi tuzipizile ukulenga ukwavwa kwakwe Yehova pa kuti mwi wungwe mwawa umutende.

15. Ukulingana na Wakolose 3:13, avyani vino muzipizile ukucita nga ca kuti e munyonko akamipunuzya mwe vino akalanda nu kucita?

¹⁵ Avyani vino muzipizile ukucita nga ca kuti umwanawitu nanti e nkazi akamipunuzya nkaninye? Muzipizile ukuwombesya pa kuti mutwalilile ukuwa pa mutende nawe. Mwanena Yehova vino mukuyivwa. Mwamunena ukuti  ayavwe umuntu wino amiluvinye. Mwamulenga nu kuti amyavwe ukulola imiwele yino akalola mwe weyo umuntu. (Luk. 6:28) Nga ca kuti cikamiwomela ukwiwilila kwe vino wumwi amiluvinye, mwakwelezya ukulola inzila yino mungalanzyanizizyamo mu mutende. Na cino cingamyavwa akwizuka ukuti e munyonko atateyimilile pa kumipunuzya. (Mat. 5:23, 24; 1 Kor. 13:7) Swinya pano mukulanzyanya mutavwilika vino akulanda. Nomba uzye mungacita wuli nga ca kuti atakulonda ukupanga umutende? Muzipizile ukutwalilila ukuzizimicizyanya nu kumutekanizizya. (Wazyani Wakolose 3:13.) Ni cicindame aca kuti mutazipizile ukutwalilila ukumufulilwa. Amuno ukucita wo-o kungonona wuciwuza winu ne Yehova. Mutazipizile ukuzumilizya icili consinye ukumipunuzya. Nga mukucita wo-o lyo mukulanjizya ukuti mwakunda Yehova ukucila icili consinye.​—Amalu. 119:165.

16. Amulimo ci wuno swensinye twakwata mwi wungwe?

¹⁶ Tukalola ukuti alongo nkaninye ukuwombela Yehova ponga na wanawitu na wankazi. Amuno twawa mu luwa longa ne kacema wenga. (Yoha. 10:16) Ibuku lya kuti Abateyanishiwa ku Kucita Ukufwaya kwa kwa Yehova pi fwa 165, pakati: “Muzipizile ukucita vino vingalenga mutwalilile ukulemenkana na wonsinye awa mwi wungwe.” Fwandi tuzipizile ukusambilila ivya kulola awanawitu na wankazi ndi vino Yehova akawalola. Amuno swensinye kwe weliwe twawa swe wana “awatici” swinya awacindame. Uzye wonye wo-o avino namwemwe mukalola awanawitu na wankazi? E Yehova akawikako amano swinya akasalifya nkaninye pe vino mukawasakamala nu kuwavwa.​—Mat. 10:42.

17. Avyani vino tukulondesya ukutwalilila ukucita?

¹⁷ Twatemwa awanawitu na wankazi wonsinye. Acino ‘tutazipizile ukuwapunuza nanti ukucita icili consinye cino cingalenga waponele mu luwembu.’ (Roma. 14:13) Tuzipizile twalola awanawitu na wankazi wonsinye ukuti watucila nu kuwatetela ni myezo yitu yonsinye. Swinya tutazipizile ukuleka vino wanji wakalanda nu kucita vyatupunuzya. Lelo lekani twacita ivintu “vino vingaleta umutende swinya vino vingatuzenga.”​—Roma. 14:19.