1. Avyani vino awasambi wa kwe Yesu wanenile iwumba ukucita?

 IMPINDI yimwi awantu wafumile mu nsi impusane pusane nu kuya mukulongana ku Yerusalemu. Wa-a awantu walandanga ivitundu ivipusane pusane. Nomba cino cawazungusizye aca kuti wivwanga awaYuda wakulanda ivitundu vya ku nsi zyawonye kuno wafumile. Na cino cawazungusizye nkani avyewo vino awaYuda nu mutumwa Peter wawanenile. Wawanenile ukuti cino cingalenga vye wapusuke akusuwila mu nzuwi ya kwe Yesu Klistu. Ya-a amazwi yawafisile nkaninye pa mwezo ica kuti wawuzizye nu kuti: “Nga fwandi tucite wuli wanawitu?” E Peter wawasusile ukuti: “Mwensinye mubatizwe.”​—Imili. 2:37, 38.

2. Avyani vino twandi tusambilile mwe co-o icipande? (Lolani icikope pa nkupo.)

² Cinji ica kuzungusya cino cacitisile pe wo-o uwanda aca kuti awantu ku ma 3,000 wabatizizwe nu kuwa awasambi wa kwe Klistu. Yo-o ayili yino yalinji antalicilo ya mulimo wa kupanga awasambi yino Yesu wanenile awasambilizi wakwe ukuwomba. Wo-o umulimo watwalilila ukuwombwa ukufika ni lelo. Nomba pe yo-o impindi tutanga tutungulule umuntu isambililo lye Baibolo mu wanda wonganye abatizwe nu kubatizwa. Wamwi pa kuti abatizwe pakapita imyezi, wamwi umwaka nanti pamwi nu kucilapo. Fwandi pa kuti mwavwe wumwi ukuwa umusambi wa kwe Klistu pakapinda ukuwombesya nkaninye. Mwe co-o icipande twandi tulole vino tungacita pa kwavwa umusambi ukulunduluka ukufika ku lubatizyo.

3. Ukulingana ne Mateyu 28:19, 20, avyani vino umusambi azipizile awacita pa kuti alunduluke ukufika ku lubatizyo?

³ Pa kuti umusambi afikepo ukubatizwa azipizile awawomvya vino akusambilila. (Wazyani Mateyu 28:19, 20.) Nga ca kuti umusambi akuwomvya vino akusambilila akawa ngati ‘amonsi wa mano’ uwa mu cilanjililo ca kwe Yesu, wino wazenzile ing’anda yakwe pe mfuzi.  (Mat. 7:24, 25; Luk. 6:47, 48) Uzye tungavwa wuli umusambi pa kuti awawomvya vino akusambilila? Lekani tulande pa vintu vitatu vino tungacita.

4. Avyani vino tuzipizile ukucita pa kwavwa umusambi ukulunduluka ukufika ku lubatizyo? (Lolani na kambokosi kakuti “ Yavwani Umusambi Ukupanga Ivya Kucita ni Vyakucita pa Kuficilisya.”)

⁴ Yavwani umusambi ukupanjila lyankani vino akulonda ukucita. Amulandu ci wuno ukucitila wo-o kwacindamila? Katulanjilile: Tuti mwakatuka uwulendo wumwi uwa kuya ku ncende yimwi iya kutali, avyani vino muzipizile ukucita pa kuti mutatonta nkani na pa kuti uwulendo wufupile? Muzipizile mwapuzako mumwi mumwi. Wonye wo-o avino cawa na kwe wano tukatungulula amasambilila ye Baibolo. Nga ca kuti wapanga ukucitako vimwi mu mulimo wa kwe Leza pano watani wabatizwe cili wavwa ukumanya ukuti nu kubatizwanye watanga wapotwe ukubatizwa. Cimwi cino mungawomvya pa kuwavwa ukumanya vino wangacita, akuwomvya uluwali lwa kuti, “Yelezya Ukucita wo-o” mwi buku lya kuti Ungikala Amanda Pe! Pa nsizi yi sambililo lyonga na lyonga mwavwani ukumanya vino ukuwomvya vino akusambilila kulemenkine na vino wapanga ukucita pano atani abatizwe. Nga kuli na vinji vino mukulonda umusambi winu ayize acite, mungavilemba pa luwali lwa kuti “Vinji.” Cila mpindi mwapituluka nu musambi pe vino akulonda ukucita mu mulimo wa kwe Leza pe yo-o impindi na ku nkolelo.

5. Ukulingana ne Marko 10:17-22, avyani vino e Yesu wanenile umonsi wa cuuma ukucita, swinya amulandu ci?

⁵ Yavwani umusambi ukupiluka. (Wazyani Marko 10:17-22.) E Yesu wamanyile ukuti calinji nu kuwomela umonsi wa cuuma ukukazya vyonsinye vino wakweti. (Mar. 10:23) Lelo atalesilepo vye, wamunenile ukuti avikazye. Amulandu ci? Amuno wakunzile we-e umonsi. Impindi zimwi tungasyondoloka ukunena umusambi ukuti atalike ukupiluka mwe vimwi. Cimwi cino cingalenga, tungakwelenganya ukuti impindi yicili iya kuti atalike ukuwombela pe vino akusambilila. Kweni molimomye cikasenda impindi pa kuti wumwi azule uwuntu wukali nu kuzwala uwuntu wupya. (Kolo. 3:9, 10) Lelo nga mwawanjilila ukumunena angatalika ukupiluka zuwa. Swinya mwakwizuka ukuti  nga mukucita wo-o lyo mukulanjizya ukuti mwamuwikako amano.​—Amalu. 141:5; Imilu. 27:17.

6. Amulandu ci wuno tuzipizile ukuwuzizya awasambi amawuzyo yano yangalenga tumanye vino wakwelenganya?

⁶ Tuzipizile twawuzya amawuzyo yano yangalenga umusambi ukusokolola vino akwelenganya pe cino tukulandapo. Ukucita wo-o kungalenga tumanye nga ca kuti akwivwicisya nu kumanya vino wazumilamo. Swinya nga mukucita wo-o cila mpindi ciliwaya cikumipepucila ukulanzyanya nawe pe vinji vino mukalola ngati atanga apilukemo. Mwi buku lya kuti Ungikala Amanda Pe! mwawa amawuzyo amavule aya musango wonye wo-o. Ku cakulolelako mwi sambililo 4 mwawa iwuzyo lya kuti: “Ukwelenganya ukuti e Yehova weni akakwivwa wuli nga ca kuti wawomvya izina lyakwe?” Mwi sambililo 9 namo mwawa iwuzyo lya kuti: “Avyani vimwi vino ungakunda ukupepelapo?” Pa kutalika pamwi cingatalako ku musambi winu ukwasuka ya-a amawuzyo. Mungavwa umusambi ukupelulula pe ya-a amawuzyo ukupitila mukuwomvya amawaliko ni vikope vino vili mwi sambililo.

7. Uzye tungawomvya wuli ivya kulolelako vye wanji ku kwavwa umusambi?

⁷ Nga ca kuti umusambi wamanya vino azipizile ukucita, womvyani ivya kulolelako vye wamwi vino vingamwavwa ukucita vilyanye vino wasambilila. Ku cakulolelako, nga ca kuti umusambi asizanwa mukulongana mungamulanjizya e vidyo ya kuti Yehova wansakamile yino ikuzanwa pa luwali lwa kuti “Manyilapo na Vinji” mwi sambililo 14. Ivya kulolelako mungavizana mu masambililo amavulenye mwi buku lya kuti Ungikala Amanda Pe! mu luwali lwa kuti “Sambilila Ivicile pa-a” na muluwali lwa kuti “Manyilapo na Vinji.” * Lelo mutazipizile ukulinganya umusambi winu ku wantu wanji ukupitila mu kumunena ukuti “Nga ca kuti weyo angacita wo-o na wewenye utanga upotwe. Mwaleka umweneconye awino afika ku cisinka ca kuti atanga apotwe ukucita wowo. Mwemwe umulimo winu akumwavwavye ukulola ivisinka vimwi vino vyavwizye wino tewatamba mwe vidyo. Ku cakulolelako, pamwi mungalandavye pi waliko nanti pe vimwi vino wacisile vino vyamwavwizye. Lyonsinye pano cayana mwakwelezya na maka ukumwavwa ukulola vino Yehova wavwizye weyo umuntu.

8. Uzye tungavwa wuli umusambi ukukunda Yehova?

⁸ Yavwani umusambi winu ukukunda Yehova. Mungacita wuli pa kumwavwa? Pano mukusambilila mwakwelezya na maka ukwavwa umusambi winu ukulola imiwele mizima yino Yehova wakwata. Mwaleka awalola ukuti e Yehova we Leza wa nsansa wino akatunjilila wonsinye wano wamukunda. (1 Tim. 1:11; Hebe. 11:6) Muzipizile ukumwavwa ukulola ukuti nga akukonka vino akusambilila ivintu viliwa muzipila. Nu kumwavwa ukumanya ukuti ayili nzila yino Yehova akalanjizizyamo ukuti wamukunda. (Ayize. 48:17, 18) Umusambi winu aliwaya akupiluka katici katici pano akuya akumanyilako e Yehova.​—1 Yoh. 5:3.

9. Ukulingana ne Marko 10:29, 30, avintu ci vino umusambi angayipusula pa kuti afikepo ukubatizwa?

⁹ Pa kuti umusambi alunduluke afike na kulubatizyo azipizile ukupiluka mu vivule. Wamwi pa kuti awe amusambi wa kwe Yesu azipizile ukucita vino umonsi wa cuuma wino walandanga ne Yesu waposilwe ukucita. Ku cakulolelako, nga ca kuti incito yino akawomba yisikwivwana na vino amawaliko yakalandapo azipizile ukuleka nu kuvwamba yinji. Wamwi nawo wangasolapo ukusya iviwuza wano wasiwombela Yehova. Wanji nawo wangawakana kwa lupwa lwawo wano watakunda Inte zya kwe Yehova. E Yesu walanzile ukuti wamwi citaliwawapepucila ukucita vyo-o vino twalandapo. Swinya walanzile nu kuti wonsinye wano wakumukonka watalilengwa insoni. Watili e Yehova walinji nu kuwapaala ukupitila mukuwawika  mu lupwa muno mwawa awantu wano wakundana. (Wazyani Marko 10:29, 30.) Avyani vino mungacita pa kwavwa umusambi ukuyitopwa co-o icawila iciyiwele?

10. Avyani vino mwasambililako kwe vino Manuel walanzile?

¹⁰ Pangani wuciwuza nu musambi. Cacindama nkaninye ukulanjizya umusambi ukuti twamuwikako nkaninye amano. Amulandu ci? Mwivwe vino e Manuel wino akakwikala ku Mexico walanzile. Watili: “Pano nasambililanga Baibolo, umusambilizya wane lyonsinye watalicilanga ukumanya vino indi pano tutani tutalike ukusambilila. Ukucita wo-o kwalenganga campepucila ukulanda nawe pa vili vyonsinye. Swinya kwalenzile manye ukuti wambisileko sana amano.”

11. Avizima ci vino vingafumamo nga tukuwako ni mpindi ya kuwa ponga nu musambi?

¹¹ Mwakwatako impindi ya kuwa na wasambi winu wulyanye vino Yesu wacitanga ku wasambi wakwe. (Yoha. 3:22) Pano cayana mungitako umusambi winu wino akulunduluka ku ng’anda pa kuti mwizizye ponga, mulile ponga icakulya nanti mutambile ponga e JW Broadcasting. Mungacita wo-o ku musambi na pano walupwa lwakwe nanti iviwuza wakuzevya amaholide yano yasikwivwana na vino Amawaliko yakalanda. Amuno pa impindi ya musango wo-o angatalalilwa sana. E Kazibwe wino akakwikala ku Uganda watili, “Nasambililanga ivivule nkaninye pe Yehova ukupitila mukusumba impindi inkulu ponga nu musambilizya wane ukucila na vino nasambililanga pi sambililo. Nalolanga vino Yehova akasakamala awantu wakwe na vino wakawa ni nsansa. Swinya vyonye vyo-o avino navwambisyanga mu wumi wane.”

12. Amulandu ci wuno tuzipizile ukusendela wakawizya awapusane pusane kwi sambililo?

¹² Mwasenda wakawizya awapusane pusane kwi sambililo. Manda yamwi tungalola ukuti cikatupepucila ukuya swenga kwi sambililo nanti ukusenda e kawizya uwili wenganye. Kweni ukucita wo-o kutawipa, lelo umusambi angasambilila ivivule nga ca kuti tukuya na wakawizya awapusane pusane. Wonye wo-o avino calinji na kwe Dmitrii uwa ku Moldova. Walanzile ukuti, “Cila kawizya wino wizanga nu musambilizya wane walondololanga ivyewo mu nzila iya kuti nsitela vyelenganizizyemo. Ukucita wo-o  kwalenganga namanya inzila na zinjinye zino ningawomvyezyamo ivyewo vino nasambilila. Swinya calenzile ukuti ntakivwe insoni pano nayile mukulongana pa muku wa kutalicilapo. Amuno lyo namanyana kali na wanawitu na wankazi awavule.”

13. Amulandu ci wuno tuzipizile ukwavwila umusambi ukuti awazanwa mu kulongana?

¹³ Yavwani umusambi winu ukuti awazanwa mu kulongana. Amulandu ci? Amuno lyo-o alisundo ukufuma kwe Yehova swinya aluwali lwa kupepa kwitu. (Hebe. 10:24, 25) Cinji aca kuti awanawitu na wankazi alupwa lwitu ulwa ku muzimu. Nga twasunkana mu kulongana cikawa ngati tuli pa ng’anda tukulila ponga ivyakulya. Fwandi nga ca kuti mwavwa umusambi winu ukutalika ukulongana, lyo mukumwavwa ukucita ivintu vino vingiza vilenge afikepo ukubatizwa. Lelo manda yamwi citanga cipepucile umusambi winu ukutalika ukulongana. Acino uzye ibuku lya kuti Ungikala Amanda Pe! lingamwavwa wuli ukucimvya intazi zino zingalenga awapotwa ukuzanwa mu kulongana?

14. Uzye tungacita wuli pa kwavwa umusambi ukuvwambisya ukutalika ukwiza mu kulongana?

¹⁴ Womvyani isambililo 10 mwi buku lya kuti Ungikala Amanda Pe! pa kwavwa umusambi winu ukutalika ukuvwambisya ukuzanwa mu kulongana. Pano lyo-o ibuku litani lifume wanenile wamwi ukuwomvya isambililo 10 pa kwavwa awasambi wawo ukutalika ukuzanwa mu kulongana. Wano waliwomvizye walanzile ukuti lyawomvile icete nkaninye ukwavwa awasambi wawo ukutalika ukuzanwa mukulongana. Lelo co-o citakusula ukuti mufwile ukufika mwi sambililo 10 pa kuti mutalike ukunena umusambi winu ukwiza mu kulongana. Muzipizile ukuwanjilila. Swinya muzipizile nu kumanya ukuti intazi zino umusambi wenga na wenga akapitamo zikapusana. Acino mwawikako sana amano ku musambi nu kulola vino mungamwavwa. Mutazipizile ukuyivwa uwuwi nga ca kuti umusambi atafisile watalika ukulongana. Muzipizile ukumutekanizizya nu kutwalilila ukumuwomelezya ukuti awazanwako.

15. Avyani vimwi vino vingalenga awasambi ukwivwa intete?

¹⁵ Uzye kwalinjiko impindi yimwi yino mwatinanga ukuwa Inte ya kwe Yehova? Pamwi cino calenzile, mwalolanga ukuti mutanga mukwanisye ukuwomba umulimo wa kuwizya. Nanti pamwi mwatinanga ukuti walupwa lwinu walitalika ukumikanya. Nga ca kuti avino calinji lyo mungivwicisya vino umusambi winu akayivwa. E Yesu walanzile ukuti awantu wamwi wangivwa intete zya musango wonye wo-o. Lelo walanzile nu kuti wano wakamukonka watazipizile ukuleka intete zilenge wapotwe ukuwombela Yehova. (Mat. 10:16, 17, 27, 28) Uzye Yesu wavwizye wuli awasambi wakwe ukuleka ukutina swinya tungamukolanya wuli?

16. Uzye tungavwa wuli umusambi pa kuti awanenako wanji vino akusambilila?

¹⁶ Yavwani umusambi ukuti awanenako wanji vino akusambilila. Awasambi wa kwe Yesu wafwile wivwile intete pano wawatumile mu kuwizya. Lelo e Yesu wawavwizye ukupitila mukuwanena kuno walinji nu kuya mukuwizizya na vino walinji nu kuya mukulanda. (Mat. 10:5-7) Uzye mungakolanya wuli e Yesu? Yavwani umusambi ukumanya wano angaya akawizizye. Ku cakulolelako, muwuzyani nga ca kuti kungawako wumwi wino angakunda ukumanya icisinka cimwi cino wasambilila. Pa nsizi mwavwani ukumanya vino angalondolola coco icisinka mu nzila impepuke. Swinya impindi zimwi mungawomvya uluwali lwa kuti “Wamwi Wakati” nu lwa kuti “Wumwi Angakolowozya Ukuti” mwi buku lya kuti Ungikala Amanda Pe! Pano mukuwomvya lo-o uluwali mwakwavwa umusambi ukumanya ivya kwasuka amawuzyo ukuwomvya Baibolo mu nzila impepuke swinya mu mucenjelo.

17. Uzye tungawomvya wuli Mateyu 10:19, 20, 29-31 pano tukwavwa umusambi ukusuwila mwe Yehova?

¹⁷ Yavwani umusambi ukusuwila Yehova. E Yesu  wanenile awasambi wakwe ukuti e Yehova walinji nu kulawavwa amuno wawakunzile. (Wazyani Mateyu 10:19, 20, 29-31.) Namwemwenye muzipizile ukunena umusambi winu ukuti e Yehova aliwamwavwa. Mungamwavwa ukusuwila mwe Yehova ukupitila mukupepela ponga pe vino akalonda ukucita mu mulimo wa kwe Leza. Umwanawitu e Franciszek uwa ku Poland watili: “Impindi imvule wino wansambilizyanga Baibolo nga akupepa walandanga pe vino nkalonda ukucita. Nalile nalola vino e Yehova wasukanga amapepo ya kwe wino wansambilizyanga Baibolo na nenenye natalisile ukupepa. Naweni vino Yehova wanjavwizye pano nayile kwe songo wa ncito mu kulenga ukuti anzumilizye ukuti naya mukulongana kwa pi wungwe nu kwa citungu.”

18. Uzye e Yehova akayivwa wuli pa mulimo wuno awina Klistu wakawomba?

¹⁸ E Yehova wawika amano nkaninye ku masambililo ye Baibolo. Wakunda awina Klistu wonsinye wano wakakwavwa awantu ukupalamila kwe weliwe swinya akasalifya nkaninye pe vino wakawombesya. (Ayize. 52:7) Nga ca kuti pe yo-o impindi mutakwata isambililo lino mukatungulula, mungavwa awasambi we wanji ukulunduluka ukufika ku lubatizyo. Mungacita wo-o ukupitila mu kuwasucilila ku masambililo yawo aye Baibolo.