Awina Klistu wamwi wakawomvya e Intaneti ku kulanzyanizizyamo na walupwa lwawo nga na wina Klistu wawuye. Lelo umwina Klistu e songo mu vya kwe Leza pano akuwomvya yo-o inzila, azipizile ukwizuka ukusunda kwa mu Baibolo kuno kukati: “Umuntu wa mano akalewuka nga walola intazi zikwiza. Ukuwa umuntu cino amuntu awowo, akayisuncilizya ayizuka pano aminzi yafika mu nsingo.”​—Imilu. 27:12.

Twamanya ukuti e Yehova akalonda ukutucinjilila. Awuli umulandu wuno tukawombesya ukukanalazyanya na wano wakaleta amalekano mwi wungwe, awawingwe nga na wasangu. (Roma 16:17; 1 Kor 5:11; 2 Yoh 10, 11) Na mwi wungwenye asa we wonsi wano wawa ni miwele mizima. (2 Tim. 2:20, 21) Acino pano tukupanga iviwuza tuzipizile twakwizuka ukuti, tutange tupange iciwuza icizima ukupitila mu kulanzyanyavye pa intaneti.

Tuzipizile ukucenjela sana pano tukupanga iviwuza, maka maka nga ca kuti mwe lyolyo iwumba mwawa awantu awavule wano tutamanya. Amuno awina Klistu wamwi wasuka wailetelela ni ntazi pa mulandu wakuzanwa mwe yanye ya-a amawumba. Nomba acani cino cingavwa umwina Klistu ukumanya wano azipizile ukulanzyanya nawo mwi wumba lya musango wo-o? Icisinka aca kuti citange cipepuke ukuwamanyicisya wonsi nu kumanya vino wuciwuza we cila muntu wawa ne Yehova. Lelo iwaliko lya Amalumbo 26:4 likati: “Nsiyisanzya mu mupanda wa wantu wawipe. Nsipecela wakacenjezya nanti wano wakayifisa vino wawa.” Lyo-o iwaliko likatwavwa ukumanya ukuti, tuzipizile ukulalanzyanya na wantu wano twamanya.

Lelo nanti aca kuti mwe lyolyonye iwumba mutavula sana awantu, naponye umwina Klistu azipizile ukucenjela sana pa mpindi yino akasumbapo nga na malyasi yano wano wawa mwe lyolyo iwumba wakalandapo. Tutazipizile ukulola ukuti, nasweswenye mpaka tulandepo pa lyasi lino wawikapo. Nanti ukwelenganya ukuti, tungasumba impindi iyili yonsinye yino swe weneco tukulonda. E Paulo wasosile e Timoti ukutaluka ku ‘wantu awakwakwa na wano wakaisanzya mwe vino vitawakumile.’ (1 Tim. 5:13) Mwe ya-a amanda, awantu wa musango wo-o tungawazana na pa intanetinye.

Umwina Klistu e songo mu vya kwe Leza, asilanda nanti ukuteyelezya ku malyasi yakusuzya nanti aya nkama pa wina Klistu wawuye. (Amalu. 15:3; Imilu 20:19) Cinji aca kuti, asiteyelezya amalyasi ya wufi nati yano atasinincisizye pa Nte zya kwe Yehova. (Efes. 4:25) Amuno wamanya ukuti ivyewo vya cisinka vikazanwa mu mabuku yitu, pa webusayiti ya jw.org napa mulawasa wa JW Broadcasting^®.

Awanawitu wamwi wakawomvya amawumba yano wapanga na wina Klistu wawuye pa intaneti ukuwa anzila ya kukazizyapo, ukukalilapo nanti ukumanyisizyapo ivya wukazi vino wakukazya. Kweni icisinka aca kuti ivya wukazi nu kupepa e Yehova vyawa avintu viwili ivipusane nkaninye. Acino umwina Klistu wensinye wino ‘asilonda ukuwa nu lunkumbwa lwa ndalama’, asiwomvya awina Klistu wawuye pa kuti awe ni cuuma.​—Hebe. 13:5.

Uzye cawa icetenye ukuwomvya amawumba yano twapanga pa intaneti ku kulenjelamo indalama zya kwavwilizizyamo awanawitu wano wakusowezya nanti wano waponezilwe nu wusanso? Kweni twakunda sana awanawitu swinya tukalondesya ukuwavwa nu kuwawomelezya. (Jemu. 2:15, 16) Lelo ukucita wo-o kungalenga ciwomele sana umusambo nanti iwungwe ukwavwilizya awanawitu wano waponelwa ni ntazi ya musango wo-o. (1 Tim. 5:3, 4, 9, 10, 16) Swinya tusilonda nanti katinye ukuyipa umulimo wuno watatupa uwakusakamala iwungwe lya kwe Leza.

Tukalondesya nkaninye ukucita vino vingalenga e Leza ukucindikwa (1 Kor. 10:31) Acino pano mutani musole inzila iyili yonsinye iyakulanzyanizizyamo na wamwi pa intaneti, mwacenjela nkaninye.