1. Ukulingana ne Mateyu 24:9, amulandu ci wuno tutazipizile ukuzungucila awa munsi nga watupata?

E YEHOVA watwelewuzile mu nzila ya kuti twakundikwa nu kukunda wanji. Awuli umulandu wuno tukakwivwila sana uwuwi nga ca kuti wumwi watupata swinya impindi zimwi tukatalika nu kwivwa intete. Ku cakulolelako, e nkazi Georgina uwa ku Europe walanzile ukuti: “Pano nalinji ni myaka 14, e mama wampasile pa mulandu wakuwombela Yehova. Nayivwile uwuwi nkaninye, ica kuti natalisile ukwelenganya ukuti pamwi ntacisile icete pa kutalika ukuwombela e Yehova.” * Umwanawitu uwi zina lya kuti Danylo nawe walanzile ukuti: “Walile pano amasoja wanjuma, wantuka nu kuntinya pa mulandu wa kuwa Inte ya kwe Yehova, nivwile uwuwi swinya natinile nkaninye.” Kweni nga ca kuti ivya musango wo-o vyatuciticila, tukayivwa uwuwi. Lelo tusizunguka amuno e Yesu walandizile lyankani ukuti awantu walitupata.​—Wazyani Mateyu 24:9.

2-3. Amulandu ci wuno awa munsi watupatila?

² Amulandu ci wuno awa munsi watupatila? Amuno “tusi swe wa munsi” wulyanye vino calinji na kwe Yesu. (Yoha. 15:17-19) Nanti ciwe wo-o, tukacindika wa kateka. Lelo tusiyisanzya mu vikanza vya nsi, ukusalyuta kwe fulagi nanti ukwimbila ulwimbo lwa cisipa. Tukapepavye e Yehova wenganye nu kutunjilila imitecele yakwe imizima yino e Satana ni “kwata” lyakwe wasuzya. (Inta. 3:1-5, 15) Tukawizya nu kuti wonye Uwufumu wa kwe Leza awuno wuliyiza wumale intazi zyonsinye zino awantu wakapitamo nu konona wonsinye wano wakawulwisya. (Dan. 2:44; Ukuwu. 19:19-21) Lyo-o lyawa ali lyasi ilizima ku wafuke. Lelo likapunuzya awawipe.​—Amalu. 37:10, 11.

³ Cinji cino calenga ukuti watupate, amuno tukakonka amasundo  ya kwe Leza. Vino sweswe tukalola ukuti aviwipe, weni wakati avizima. Ku cakulolelako, awamwe yo-o insi wakazumilizya uwuzelele uwuwipe ni miwele yinji imiwipe ndi vino yilyalye yino yalenzile e Yehova ayonone umusumba wa Sodomu ne Gomora! (Yud. 7) Pa mulandu wa kuti tukakonka sana amasundo yakwe Leza, calenga awa munsi watuseka nu kutulola ngati twawomya sana ivintu.​—1 Pet. 4:3, 4.

4. Amiwele ci yino yingatwavwa ukusipicizya pano wakutucuzya?

⁴ Avyani vino vingatwavwa ukusipicizya nga ca kuti awantu watupata nanti watukwelengula? Alisuwilo iwome ilya kuti nanti ciwe wulinye e Yehova alitwavwa. Isuwilo iwome lyawa ngati ankwela ya kucinjilila “imivwi ya imililo yino yikavwintwa nu muwipe.” (Efes. 6:16) Lelo tutazipizile ukupelelavye pa kuwa ni suwilo. Tuzipizile ukuwa nu lukundo. Amulandu ci? Amuno mu lukundo “mutawa ukusamalila ukuvitwa.” Ulukundo lukasulako nu kusipicizya iviwipe vyonsinye. (1 Kor. 13:4-7, 13) Nomba lekani tulole vino ukukunda Yehova, awanawitu na wankazi nga na walwani witunye kukatwavwa ukusipicizya.

5. Avyani vino Yesu wacisile pa mulandu wa kukunda e Yisi?

⁵ Uwanda wa kulecelezyako pano Yesu atani afwe, wanenile awasambi wakwe ukuti: “Nakunda tata, acaleka nkucita vyonsi ndi muno wansundila ukucita.” (Yoha. 14:31) Cino calenzile e Yesu ukuzipicizya intazi, amulandu wa kuti wakunzile nkaninye e Yehova. Nasweswenye nga ca kuti twakunda nkaninye e Yehova tuliwasipicizya intazi.

6. Ukulingana na Waroma 5:3-5, avyani vino awawomvi wa kwe Yehova wakatwalilila ukucita pano wakuwacuzya?

⁶ Ukukunda e Yehova akuno kukakwavwa awawomvi wa kwe Yehova wonsinye awa cisinka ukutwalilila ukusipicizya pano wakuwacuzya. Ku cakulolelako, pano icilye cikulu ica waYuda canenile awatumwa ukuleka ukuwizya, ulukundo aluno lwalenzile wasolepo “ukutontela Leza awantu pole.” (Imili. 5:29; 1 Yoh 5:3) Lonye ulukundo luno walanjizizye, aluno lwatwalilila ukwavwa awanawitu na wankazi mwe ya-a amanda pano wakuwacuzya kwa kateka wa maka swinya awakalale. Lelo asa mulandu watucuzye, tusinenuka swinya tukatwalilila ukuwa ni nsansa.​—Imili. 5:41; wazyani Waroma 5:3-5.

7. Avyani vino tuzipizile ukucita nga ca kuti walupwa lwitu wakutucuzya?

⁷ Walupwa lwitu nga watalika ukutucuzya cisipepuka ukutwalilila ukusipicizya. Ku cakulolelako, nga ca kuti twatalika ukusambilila Baibolo, walupwa lwitu wamwi wangalola ngati twasowa. Ne wanji nawo wangalola ngati tupenile. (Linganyaniko Marko 3:21.) Manda yamwi wangatalika nu kutucuzya sana. Lelo nga cawa wo-o tutazipizile ukuzunguka. Amuno e Yesu watili: “Awalwani wa muntu waliwa awa mu ciwanza cakwenye nanti mung’anda yakwe.” (Mat. 10:36) Awuli umulandu wuno tusiwapatila nanti watucuzye wulinye. Amuno ukukunda Yehova kukalenga atukunda na wantu. (Mat. 22:37-39) Nomba nanti ciwe wo-o tutalitela tuleke ukukonka amasundo ya mu Baibolo pa kutivye tuwasecelesye.

8-9. Avyani vino vyavwizye nkazi Georgina ukusipicizya pano wamucuzyanga?

⁸ E nkazi Georgina wino tetulanzilepo ku nsizi, watwalilizile ukusipicizya asa mulandu nu kumucuzya kuno e mama wakwe wamucuzyanga. Walanzile ukuti: “Nene ne mama twatalisile ponganye ukusambilila Baibolo ni Nte zya kwe Yehova. Lelo pa nsizivye ya myezi 6 walile walola ukuti nkasi ntalike ukulongana watalisile ukuncuzya. Cino calenzile atalike ukuncuzya amulandu wa kuti watalisile ukukoncelela vino awasangu walandanga. Watalisile ukuntuka nkaninye. Swinya amanda yamwi nga kunjuma wanzutanga ni nyele. Cinji aca kuti wansumbilanga na mabuukunyene yano nawomvyanga. Pano nafisizye imyaka 15 nizile imbatizwa. Co-o camulumile  nkaninye ica kuti wizile ansenda nu kuntwala ku kawungwe kano kasakamalanga awakazyana wano watalinji ni miwele imizima. Ala citapepuka ukusipicizya intazi nga ca kuti umuntu wino akukucuzya awino azipizile ukukunda nu kukusakamala.”

⁹ Avyani vino vyavwizye nkazi Georgina ukusipicizya? Walanzile ukuti: “Uwanda wuno mama watalisile ukuncuzya awuli wanda wuno namazile ukuwazya Baibolo. Ukumala ukuwazya Baibolo kwalenzile ntavwilika ukuti cino nazanile acili icisinka. Swinya napalamizile nkaninye kwe Yehova. Napepanga sana kwe weliwe swinya wasukanga amapepo yane. E mama walile wantwala kwe kako akawungwe, e nkazi wumwi wizile ansenda ukuti twakwikala nawe swinya twayitopwanga nkaninye ukusambilila ponga Baibolo nu kuwomelezyanya. Pe yo-o impindi yonsinye yino twikalanga na we-e nkazi, awanawitu wambomelezyanga sana. Wansenzilevye nge ne lupwa lwawo. Vyo-o vino napisilemo vyalenzile nsinincizye ukuti e Yehova wawa na maka nkaninye ukucila wano wakatucuzya asa mulandu na vino wangawa.”

10. Avyani vino Yehova alitwalilila ukucita kwe sweswe?

¹⁰ Umutumwa Paulo walemvile ukuti pasi nanti conganye cino “cingatupawula ku lukundo lwa kwe Leza luno lwawa mwa kwe Klistu Yesu e Tatakulu.” (Roma. 8:38, 39) Nanti aca kuti wangatucuzya pa mpindi yimwi, e Yehova atalitela atulecelezye. Alitwalilila ukutusansamunsya nu kutuwomya. Swinya wulyanye vino calinji kwe nkazi Georgina e Yehova alitwalilila ukutwavwa ukupitila mu wanawitu na wankazi.

11. Uzye ulukundo luno e Yesu walanzile pe Yohani 15:12, 13 lwavwizye wuli awasambi wakwe? Landani ica kulolelako.

¹¹ E Yesu pano atani afwe uwanda wa kulecelezyako, wizusizye awasambi wakwe ukuti wazipizile ukukundana. (Wazyani Yohani 15:12, 13.) Cino walandizile ya-a amazwi amuno wamanyile ukuti nga wakundana, walilemenkana swinya walitwalilila ukusipicizya pano wakuwacuzya. Ku cakulolelako, ukufumilila pano iwungwe lya ku Tesalonika lyapanjizilwe, awanawitu na wankazi wawacuzyanga nkaninye. Lelo watwalilizile ukuwa ivya kulolelako ivizima ku kusipicizya na ku lukundo. (1 Tes. 1:3, 6, 7) Swinya e Paulo wawawomelezizye ukuti watwalilile ukukundana ukucila na pe vino wakundine. (1 Tes. 4:9, 10) Amuno ulukundo lwalinji nu kulenga watwalilile ukusansamusya wano wawanga nu wulanda na wano watonta. (1 Tes. 5:14) Wa-a awina Klistu wakonsile ukusunda kwa kwe Paulo. Amuno mwe kalata wino wizile awalembela pa nsizi wawanenile  ukuti: “Ulukundo mwakwe wila muntu mwakwe mwemwe mwensi lukulundulucila umuwuye nu muwuye.” (2 Tes. 1:3-5) Ukukundana kwawavwizye ukusipicizya intazi zyonsinye zino wapisilemo.

12. Uzye awanawitu na wankazi kunsi yimwi walanjizizye wuli ulukundo ku wina Klistu wawuye pano kwalinji inkondo?

¹² Wonye wo-o avino calinji kwe Danylo wino tetulanzilepo pa kutalika. Pano inkondo yatwalilizile ku ncende yino wikalilanga, weliwe ne wakwakwe watwalilizile ukulongana nu kuwizya. Swinya wapangako na wina Klistu wawuye ivya kulya. Lelo ku cawulanda wanda wumwi amasoja wayile pa ng’anda ya kwe we-e umwanawitu ni mbundusi. Umwanawitu Danylo watili: “Pano wafika wizile awanena ukuti ndande ukuti naleka ukuwa ne Nte ya kwe Yehova. Pano nakanile wizile awanjuma nu kunsota imbundusi mu mutwe nge wakulonda ukumpika. Swinya pano wapitanga wasile awanena ukuti nga wiza wanyoka, walilema e wakwane pa maka nu kucita nawe uwuzelele. Walile awanawitu wivwavye lyo-o ilyasi, paponye watukwezizye e tileni nu kututwala kwi tawuni linji. Ntalitela njiwilile ulukundo luno wa-a awanawitu na wankazi watulanjizizye. Swinya na pano twafisile kwe lyonye lyo-o itawuni, awanawitu watwavwizye nkaninye. Amuno watuletelanga ivya kulya, wanjavwizye ukuvwamba incito nga ni ng’anda. Vino wacisile vyalenzile nani inkwateko nu longo lwa kusakamala awanawitu na wankazi wano wasamazile ku ncende kuno kwalinji inkondo.” Vino vyaciticizile umwanawitu Danylo vikatwavwa ukusinincizya ukuti ulukundo lwa wanawitu lungatwavwa ukusipicizya pano wakutucuzya.

13. Uzye umuzimu uwutele wukatwavwa wuli ukutwalilila ukusipicizya pano tukuwombela Yehova asa mulandu nu kutucuzya?

¹³ E Yesu wanenile awasambi wakwe ukuti wakunda awalwani wawo. (Mat. 5:44, 45) Ukucita wo-o ku maka yitu citapepuka nanti katicinye! Lelo umuzimu wa kwe Leza wungatwavwa ukuwakunda. Amuno pa vikomwa vya muzimu wa kwe Leza, pawa ulukundo, ukupupuzya, inkumbu, uluse, wucimyamya nu kuyilama. (Gal. 5:22, 23) Yo-o imiwele yikatwavwa nkaninye pano wakutucuzya. Awavule wano watucuzyanga waleka ukutucuzya pamulandu wa kuti e wakwawo, umwana nanti umwina mupalamano wawo wawalanjizizye yo-o imiwele. Swinya wamwi pe wa-a wiza wapiluka wawa awina Klistu. Acino nga ca kuti pawa wamwi wano wamipata pa mulandu wakuwombela Leza, mwalenga kwe Yehova ukuti amipa umuzimu uwutele. (Luk. 11:13) Swinya lyonsinye mwakwizuka  ukuti mu kwivwila Yehova mukafuma ivizima.​—Imilu. 3:5-7.

14-15. Uzye iwaliko lya Waroma 12:17-21 lyavwizye wuli nkazi Yasmeen pano wakwakwe wamucuzyanga?

¹⁴ Pano e nkazi Yasmeen wizile awa Ante ya kwe Yehova e wakwakwe watalisile ukumucuzya nkaninye. Amuno walolanga ngati waNte wamupa vimwi. E wakwakwe wamutukanga nkaninye. Swinya watalisile nu kumutinya ukupitila mwa lupwa lwakwe, wa simapepo na wasing’anga ukuti nga atalesile ukuwa Inte ya kwe Yehova iviwipe vyalinji nu kumuciticila. Watalisile nu kumuwipizya ukuti walecelezizye ulupwa lwakwe. Cinji aca kuti e wakwakwe wayanga na mukutuka awanawitu pa Ng’anda ya Wufumu. Impindi imvule e nkazi Yasmeen walilanga nkaninye pe vino e wakwakwe wamucuzyanga.

¹⁵ E nkazi Yasmeen lyonsinye nga ali pa Ng’anda ya Wufumu, awanawitu na wankazi wamusansamusyanga nu kumuwomelezya. Waeluda wamuwomelezyanga ukuti awomvya vino vikazanwa pi waliko lya Waroma 12:17-21. (Wazyani.) We-e nkazi walanzile ukuti, “Citapepusile ukusipicizya. Lelo napepanga lyonsinye kwe Yehova nu kwelezya ukukonka vino Baibolo ikalanda. Swinya nga ca kuti e wakwane wafisya umufulonye mu kicini nayanga nu kuzifyamo. Nga wantuka namwasukanga mu mucinzi. Ne impindi yinji pano walwazile namusakamile nkaninye.”

16-17. Avyani vino mwasambililako kwe vino vyaciticizile nkazi Yasmeen?

¹⁶ E nkazi Yasmeen walambulwa nkaninye pa mulandu wa kulanjizya ulukundo kwe wakwakwe. Walanzile ukuti: “E wakwane watalisile ukunsuwila. Amuno wamanyile ukuti lyonsinye nalandanga icisinka. Wizile atalika ukuteyelezya mu mucinzi nga ca kuti twatalika ukulanda vimwi pa mipepele. Swinya walanzile nu kuti atandi awacita ivimvulunganya pa ng’anda. Pe yo-o impindi watalika nu kumbomelezya ukuya mu kulongana. Twakundana nkaninye nu wakwane swinya tukakwivwana. Cino nkapepelapo aca kuti wanda wumwi e Yehova nga kulonda e wakwane alisuka apiluke nu kutalika ukumuwombela.”

¹⁷ Vino vyaciticizile nkazi Yasmeen vikalanjizya ukuti ulukundo “lukasula ivintu vyonsinye, . . . lukasuwila vyonsinye, lukazizimicizya vyonsinye.” (1 Kor. 13:4, 7) Nanti aca kuti ulupato lwawipa swinya lwawa na maka, ulukundo lweni lwawa na maka ukucilapo. Awuli umulandu wuno nga tukulanjizya ulukundo kwe wano wakutucuzya, wangaleka ukutucuzya. Cinji aca kuti tukalenga umwezo wa kwe Yehova ukuzewela. Lelo manda yamwi nanti aca kuti wano wakutucuzya watalesilenye, tungatwalilila ukuwa ni nsansa. Acani cino cingatwavwa ukuwa ni nsansa?

18. Amulandu ci wuno tungatwalilila ukuwela ni nsansa na pano watupata?

¹⁸ E Yesu walanzile ukuti: “Mwewa nsansa nga ca kuti awantu wamipata, [NWT].” (Luk. 6:22) Tusikwivwa icete nga ca kuti awantu wakutucuzya pe vino twazumilamo. Swinta tusiyisolela swe weneco ukuti watucuzya. Nomba lyo amulanduci wuno tuzipizile ukuwela ni nsansa na pano wakutucuzya? Kwawa imilandu yitatu. Uwakutalicila awa kuti, nga twasipicizya pano wakutucuzya e Yehova akatutemwa. (1 Pet. 4:13, 14) Ica citi wili tukawelako awantu awazima swinya isuwilo litu likawomelako. (1 Pet. 1:7) Uwa citi tatu awakuti, tulipocelela icilambu icizima nkaninye ica wumi wa muyayaya.​—Roma. 2:6, 7.

19. Amulandu ci wuno awasambi wa kwe Yesu watwalilizile ukuwa ni nsansa na pano wawumile ivikoti?

¹⁹ Pa nsizi ya kuzyulupuka kwe Yesu nu kuya kwi yulu, awatumwa wakwe wizile awawa ni nsansa zino wawanenile ukuti waliwa nazyo. Amuno walile pano wawuma ivikoti nu kuwalesya ukuwizya, wasecelezile. Acani cino calenzile ukuti wasecelele? “Amuno wazipizile ukukwelengulilwa pi zina lya kwe Yesu.” (Imili. 5:40-42) Wakunzile nkaninye e Yisikulu ukucila na pe vino watinanga awalwani wawo. Walanjizizye ukuti wamukunzile ukupitila mu kuwizya ilyasi lizima “ukwasowa ukuleka.” Na mweyanye ya-a amanda, awanawitu watwalilila ukuwizya ilyasi lizima asa mulandu ni ntazi zino wakapitamo. Wamanya ukuti Yehova atalitela ayiwilile imilimo yawo nu lukundo luno walanjizya kwi zina lyakwe.​—Hebe. 6:10.

20. Avyani vino tulisambilila mu cipande cino cikonsilepo?

²⁰ Pano yo-o insi yitani yononwe, awa munsi walitwalilila ukutupata. (Yoha. 15:19) Lelo tutazipizile ukutina. Ndi vino tulilola mu cipande cino cikonsilepo, e Yehova alitwalilila ‘ukutupa amaka nu kutucinjilila.’ (2 Tes. 3:3) Acino lekani tutwalilile ukukunda Yehova, awanawitu na wankazi ukuwikako na walwani witunye. Nga twakonka ko-o ukusunda, tulitwalilila ukulemenkana ni suwilo litu liliwawomelako. Swinya tulilanjizya apatiswenye ukuti ulukundo lwawa na maka nkaninye ukucila ulupato.