1. Amulandu ci wuno e Yesu walenjezile kwe Yehova ukuti awacinjilila awasambilizi wakwe?

PA WANDA wa kulecelezyako pano Yesu atani afwe welenganyanga nkaninye pa ntazi zino awasambilizi wakwe walinji nu kupitamo. Nomba pa mulandu wa kuti wawakunzile, wawapepezileko kwe Yisi ukuti “uwawacinjilila ku muwipe.” (Yoha. 17:14, 15) Cino calenzile awapepeleko amuno wamanyile ukuti nga wanyocelamo kwi yulu, e Satana Ciwa walinji nu kutalika ukulwisya wonsinye wano wakawombela Yehova. Fwandi awantu wa kwe Yehova walondekwanga ukuwacinjilila.

2. Amulandu ci wuno twasuwila ukuti Yehova alitwalilila ukwasuka amapepo yitu?

² Cino calenzile e Yehova ayasuke ipepo lya kwe Yesu amuno wamukunda nkaninye. Nasweswenye nga tukwelezya na maka yitu ukucita ivya kumusecelesya aliwakwasuka amapepo yitu nga twapepa ukuti atucinjilile. Swinya alitwalilila ukutusakamala wulyanye vino umutwe wa lupwa umuzima akasakamala ulupwa lwakwe. Amuno nga wapotwa ukutusakamala izina lyakwe lingakwelenguka.

3. Amulandu ci wuno tukalondekwa ukuti e Yehova awatucinjilila mwe ya-a amanda?

³ Yo-o ayili mpindi yino tukalondekwa ukuti e Yehova awatucinjilila nkaninye. Amuno e Satana wamuwinga kwi yulu swinya ali “nu wukali uwukulu.” (Ukuwu. 12:12) E Satana walenga na wamwi wano wakatucuzya wakwelenganya ukuti, nga wakutucuzya lyo “wakuwombela Leza.” (Yoha. 16:2) Ne wanji wano watazumila mwe Leza wakatucuzya pa mulandu wa kuti tusicitako vino awa mu nsi wakacita. Lelo asa mulandu na cino cikalenga ukuti awa mu nsi watucuzya, tusitina. Amulandu ci? Amuno Izwi lya kwe Leza likati: “Ukuwa imfumu yeni ayakusimicila,  wandi alange akuwapa amaka mbali nu kumicinjilila ku muwipe.” (2 Tes. 3:3) Uzye e Yehova akatucinjilila wuli? Lekani tulande pa nzila ziwili zino akawomvya.

4. Ukulingana na Waefeso 6:13-17, avyani vino Yehova watupa ukuti vyatucinjilila?

⁴ E Yehova watupa ivyanzo vya wulwi vino vingatucinjilila ku kusansa kwa kwe Satana. (Wazyani Waefeso 6:13-17.) Vyo-o ivyanzo vya wulwi vyawoma swinya vikawomba icete nkaninye! Lelo pa kuti vyatucinjilila tuzipizile ukuzwala vyonsinye, ukuviwomvya nu kukana vizula. Uzye icanzo conga na conga cikakwimililako vyani? Lekani tulole.

5. Uzye umupango wa cisinka acani, swinya amulandu ci wuno tuzipizile ukuwuzwalila?

⁵ Umupango wa cisinka wukakwimililako ivisinka vyonsinye vino vyawa mwi Zwi lya kwe Leza Baibolo. Nomba amulandu ci wuno tuzipizile ukuwuzwalila? Amuno ivisinka vino vyawa mu Baibolo vikatucinjilila ku wufi wa kwe Satana e “canyina wa wufi.” (Yoha. 8:44) Wawipa awantu pa myaka imivule swinya wawipa “awantu insi yonsi”! (Ukuwu. 12:9). Uzye tukazwala wuli wonye umupango wa cisinka? Tukawuzwala ukupitila mu kusambilila icisinka pe Yehova, “ukumupepa ni myezo ya kusimicila” nga nu kuwa awacisinka mwe vyonsinye.​—Yoha. 4:24; Efes 4:25; Hebe 13:18.

6. Uzye icakucinga icifuwa ica wulungamane acani, swinya amulandu ci wuno tuzipizile ukucizwalila?

⁶ Ica kucinga icifuwa ica wulungamane cikakwimililako amasundo ya kwe Yehova amalungamane. Nomba amulandu ci wuno tuzipizile ukucizwalila? Wulyanye vino ica kucinga icifuwa cikacinjilila umwezo wa musilika avino ni cakucinga icifuwa ica wulungamane cikacinjilila umwezo witu uwa mankolanya ku vintu vya mwe yo-o insi vino vingatonona. (Imilu. 4:23) E Yehova akalonda ukuti twamukunda nu kumuwombela nu mwezo witu wonsinye. (Mat. 22:36, 37) Lelo e Satana akalonda tukunde ivintu vya mwe yo-o insi pa kuti tuleke ukuwombela Yehova nu mwezo witu wonsi. (Jemu 4:4; 1 Yoh. 2:15, 16) Nga walola ukuti wapotwa ukuwomvya yo-o inzila akatalika ukututinya pa kuti tucite vino Yehova wapata.

7. Uzye tukazwala wuli ica kucinga icifuwa ica wulungamane?

⁷ Tukazwala ica kucinga icifuwa ica wulungamane nga twazumila ukuti e Yehova awino wayana ukutunena icizima ni ciwipe. Swinya nga tukukonka vino akutunena. (Amalu. 97:10) Wamwi wakalola ngati amasundo ya kwe Yehova yakatupoka uwuntungwa. Lelo nga twaleka ukukonka vino Baibolo ikalanda, tungawa ngati amusilika wino wazula ica kucinga icifuma pano akulwa inkondo pa mulandu wa kwelenganya ukuti camwama nkani. Ala cingawa awuwele wele ku musilika ukucita icintu ca musango wo-o! Swe wano twakunda Yehova tusilola amasundo yakwe ukuti ‘yatala’ lelo tukayalola ukuti aya kutupa uwumi.​—1 Yoh. 5:3.

8. Uzye casula mwinye ukuzwala ilandwe lizima ngati andyatu ku manama yitu?

⁸ E Paulo watuwomelezizye ukuti ilandwe zima ilya mutende liwe ngati anyatu zino mwazwala ku manama yinu. Mu nzila yinji walandanga ukuti tuwawa swe wayipekanye ukuwizya ilyasi lizima impindi yonsinye. Amuno nga twawizizyako wanji ilyasi lizima lino likazanwa mu Baibolo isuwilo litu likawomelako. Tukakwivwa icete nkaninye nga twalola vino awawomvi wa kwe Yehova wakuwombesya mwe wo-o umulimo wa kuwizya. Ku cakulolelako, wakawizizya walupwa lwawo, wano wakasambilila nawo, ku ng’anda ni ng’anda, mu vifulo vya ncito, nga waya mukukala vimwi, na wantu wanjinye wano wamanya. Lelo  nga twaleka ukuwizya pa mulandu wa kwivwa intete, tungawa ngati amusilika wino wazula indyatu zyakwe pano akulwa inkondo. Na vino vingafumamo angayicisa swinya angapotwa ukuyicinjilila nga wamusansa. Cinji aca kuti cingamuwomela ukukonka vino umusilika mukulu akumunena.

9. Amulandu ci wuno tuzipizile ukusendela inkwela inkulu iyisuwilo?

⁹ Inkwela inkulu iyi suwilo ikakwimililako isuwilo lino twakwata mwe Yehova. Twasuwila ukuti alificilisya vyonsinye vino watulaya. Isuwilo lilitupa amaka ya kucinjilila “imivwi ya mulilo yino ikavwintwa nu muwipe.” Amulandu ci wuno tuzipizile ukusendela yo-o inkwela inkulu? Amuno ikatucinjilila ku visambilizyo vya wufi ivya wasangu nanti nga ca kuti watalika ukutuseka pe vino twazumilamo. Swinya isuwilo nye alino likatwavwa nga wamwi watunena ukucita vino Yehova wapata ciwe akusukulu nanti ku ncito. Nomba nga tusi ni suwilo tulitontela nga wamwi watunena ukucita iviwipe. (1 Pet. 3:15) Lyonye isuwilo ikulu alino lilitwavwa ukukana yinjila incito yino iliwatusendela impindi inkulu iya kuwomba imilimo ya kwe Leza asa mulandu watulaye ukutufolesya indalama imvule. (Hebe. 13:5, 6) Cinji aca kuti isuwilo nye alino likalenga atutwalilila ukuwombela Yehova asa mulandu nu kutucuzya.​—1 Tes. 2:2.

10. Uzye icisote cipusucilo acani swinya amulandu ci wuno tuzipizile ukucizwalila?

 ¹⁰ Icisote cipusucilo lyawa alisuwilo lino Yehova akatupa. Lyo-o alisuwilo lya kuti alitulambula nga twatwalilila ukucita ukulonda kwakwe nu kuti nanti twafwanye alituzyulupula. (1 Tes. 5:8; 1 Tim 4:10; Tait 1:1, 2) Wulyanye vino icisote cikacinjilila umutwe wa musilika, avino ni suwilo lya kupusuka likatucinjilila ku melenganyo mawipe. Uzye likatucinjilila wuli? Likatwavwa ukuwika amano kwe vino Leza watulaya ukucila ku ntazi zino tukupitamo. Nomba uzye tukazwala wuli conye icisote cipusucilo. Akupitila mu kulola ivintu ndi vino Yehova akavilola. Ku cakulolelako, tusisuwila mu vyuuma vino vikakononeka lelo tukasuwila mwe Leza.​—Amalu. 26:2; 104:34; 1 Tim 6:17.

11. Uzye ulupanga lwa ku muzimu acani swinya amulandu ci wuno tuzipizile ukuluwomvezya?

¹¹ Ulupanga lwa ku muzimu Alizwi lya kwe Leza Baibolo. Lo-o ulupanga lwawa na maka ya kusokolola ivisambilizyo vyonsinye ivya wufi ni miwele yonsinye yino ikateka awantu uwuzya swinya lukalenga nu kuti awawa awantungwa. (2 Kor. 10:4, 5; 2 Tim 3:16, 17; Hebe 4:12) Tukamanya ivya kuwomvya lo-o ulupanga nga ca kuti tukuyisambilizya lyonsi swinya tukukonka na vino iwungwe lya kwe Leza likutunena. (2 Tim. 2:15) Lelo kwawa na vinjinye vino Yehova watupekanizizya vino vingatucinjilila. Avyani vyovyonye?

12. Acani cinji cino Yehova akawomvya pa kutucinjilila swinya amulandu ci?

¹² Umusilika wino wamanya ukulwa inkondo akamanya ukuti atanga acimvye uwulwi pa lwakwe wenga lelo akalondekwa na wanji awakumwavwa. Nasweswenye pa kuti tucimvye e Satana na wano akawomvya tuzipizile ukusintilila pa wanawitu na wankazi asa pa maka yitu swenga. E Yehova watupekanizizya awanawitu ukuzinguluka insi awakutwavwa.​—1 Pet. 2:17.

13. Ukulingana na Waheberi 10:24, 25, avizima ci vino tukayitopwa nga twazanwa mu kulongana?

¹³ Inzila yonga yino tungawomelezezwamo akuzanwa mu kulongana. (Wazyani Waheberi 10:24, 25.) Twamanya ukuti swensinye tukafupulwa mpindi zimwi. Lelo nga twazanwa mu kulongana tukawomelezwa nkaninye. Inzila yimwi yino awanawitu wakatuwomelezezyamo nu kutwavwa ukutwalilila ukuwombela Yehova akupitila mu vyasuko vyawo ivizima nga na malyasi yano wakalanda pa kulongana. Swinya tukawomelezwa nkaninye kwe vino awanawitu wakatusimicilako pano ukulongana kutani kutalike na pano kwasila. (1 Tes. 5:14) Cinji aca kuti ukulongana kukatwavwa ukuwa ni nsansa zino zikafuma mukwavwa wanji. (Imili. 20:35; Roma 1:11, 12) Ukulongana kukatwavwa na mumbali zinjinye. Amuno kukalenga atuwa wakawizya swinya wakasambilizya awazima. Ku cakulolelako, kukatwavwa ukumanya ivya kuwomvya iviwombelo vino Tukawomvya pa Kusambilizya Baibolo. Acino mwapekanya nkaninye ukulongana, mwawikako amano pano amalyasi yakulandwa swinya mwawomvya vino mukusambilila. Nga mukucita wo-o muliwa mwe “musilika umusuwilwa uwa kwe Klistu Yesu.”​—2 Tim. 2:3.

14. Awaweni wanji wano wakatwavwa?

¹⁴ Wanji wano twakwata wano wakatwavwa amintapendwa ya wangeli. Umungeli wenganye angacita ivya kuzungusya. (Ayize. 37:36) Nomba teyelenganyani pa mintapendwa ya wangeli, wevinga vino wangacita? Kutawa umuntu uwuli wensinye nanti icimuzimu icili consinye cino cingacimvya awangeli wa kwe Yehova. E Yehova wawa na maka nkaninye. Nga ca kuti ali ku luwali lwitu, awalwani witu nanti wangavula wulinye lyo tuwalusizye  amaka. (Kapa. 6:16) Tusivwilika nanti katicinye ukuti co-o acisinka! Acino nga ca kuti wino mukasambilila nawe, wino mukawomba nawe nanti e lupwa lwinu walanda nanti ukucita vino vingamifupula, mwakwelenganya pe wano wali ku luwali lwinu. Mwakwizuka ukuti mutawa mwenga mwe wo-o uwulwi. E Yehova atalitela amilecelezye amuno mukakonka uwutunguluzi wakwe.

15. Ukulingana ne Ayizeya 54:15, 17, amulandu ci wuno awantu wa kwe Leza watalitela walecele ukuwizya?

¹⁵ Kwawa imilandu imivule yino yalenga awantu wa mwe yo-o insi watupate. Amuno tusiyisanzya mu vikanza vyansi nanti ukulwako inkondo. Tukalanda pi zina lya kwe Leza nu kuwizya ukuti uwufumu wakwe wutupunye awuno wulileta umutende munsi. Tukakonka amasundo yakwe amalungamane. Tukalenga na wantu ukumanya ukuti e kateka we yo-o insi we cawufi umuwipe nkaninye swinya we cikoma. (Yoha. 8:44) Cinji aca kuti tukawizya nu kuti insi ya kwe Satana yandi iyononwe nombanye. Lelo nanti ciwe wo-o e Satana na wano akawomvya watalitela walesye umulimo wa kuwizya. Sweswe tulitwalilila vye ukulumbanya Yehova. Nanti aca kuti e Satana wawa na maka wapotwa ukulesya ilyasi lizima ukuti lifike ku wantu wonsinye. Cino calenga amuno e Yehova watwalilila ukutucinjilila.​—Wazyani Ayizeya 54:15, 17.

16. Uzye e Yehova alipususya wuli awantu wakwe mu muwucuzi wukulu?

¹⁶ Avyani vino tukwenecela ku nkolelo? Mu mpindi ya wucuzi wukulu e Yehova alitucinjilila mu nzila ziwili iziyiwele. Umuku wa kutalicila e Yehova alicinjilila awantu wakwe pano alilenga izya mfumu zya mu nsi ukusansa e Babiloni Mukulu akuli kuti ukupepa konsinye kwa wufi. (Ukuwu. 17:16-18; 18:2, 4) Umuku wa citi wili alipususya awantu wakwe pa Armagedoni pano aliwakonona yo-o insi mbipe iya kwe Satana.​—Ukuwu. 7:9, 10; 16:14, 16.

17. Avyani vino vilifumamo nga twatwalilila ukupalamila kwe Yehova?

¹⁷ Nga ca kuti e Yehova ali ku luwali lwitu pasi cimwi cino Satana angacita cino cingalenga ukuti twize tononwe umuyayaya. Weliwenye awino aliyononwa umuyayaya. (Roma 16:20) Acino twalililani ukuzwala ivizwalo vyonsinye ivya wulwi swinya kusi kwelezya ukuvizula! Mutati muwalwa wo-o uwulwi mwenga. Mwakwavwa wamunyonko swinya mwakonka uwutunguluzi wa kwe Yehova. Nga mukucita wo-o umukwasi winu uwa kwi yulu alitwalilila ukumiwomya nu kumicinjilila.​—Ayize. 41:10.