1-2. Awaweni wano wangavwa awasambi we Baibolo ukulunduluka ukufika na kulubatizyo?

E AMY wino akakwikala ku Fiji walanzile ukuti: “Nakunzile vino nasambililanga pi sambililo lye Baibolo. Swinya namanyile ukuti vyalinji avya cisinka. Lelo cino canjavwizye ukulunduluka ukufika na ku kubatizwa, akuzanwa ponga na wanawitu na wankazi”. Vino vyaciticizile e Amy vikatusambilizyako icisinka ca kuti, pa kuti umusambilizi alunduluke ukufika na ku kubatizwa, wonsinye mwi wungwe wazipizile ukuwombela ponga.

² E kawizya uwili wensinye wawa nu mulimo wakwavwa umusambi ukwiza mwi wungwe lya kwe Leza. (Efes. 4:16) Conye acili icisinka cino ne nkazi wumwi e painiya wino akakwikala ku Vanuatu uwi zina lya kuti Leilani walanzile. Watili: “Awa mwi wungwe wazipizile ukuwombela ponga pa kuti umusambi alunduluke ukufika na ku lubatizyo wulyanye vino cikawa mu kaya pa kuti umwana akule icete. Ku cakulolelako, awakwasi, wa lupwa, iviwuza na wasambilizya wakamusambilizya nu kumuwomelezya.” Wonye avino cizipizile ukuwa na ku masambililo ye Baibolo nye. Awa mwi wungwe wangawapandako amano, ukuwawomelezya nga nu kuwa icakulolelako icizima kwe woliwo.​—Imilu. 15:22.

3. Avyani vino mwasambililako ku mazwi yano e Ana, Dorin, ne Leilani walanzile?

³ Amulandu ci wuno e kawizya wino wawa ni sambililo atazipizile ukufulilwa nga ca kuti awa mwi wungwe wakwavwako umusambi wakwe? Mulole vino e nkazi Ana e painiya umuyiwele ku Moldova walanzile watili, “Umusambi nga watalika ukulunduluka, akalondekwa umwakumwavwa umuvule. Fwandi wino akamutungulula isambililo atange akumanisye ukumwavwa wenga.” Umwanawitu e Dorin e painiya umuyiwele wino akakwikala kwe yonye insi walanzile ukuti: “Impindi imvule zino nkasenda wakawizya  ku masambililo yane, vino wakaya mu kunena awasambi vikawafika sana pa mwezo. Amuno ivyewo vimwi wakavilandila mu nzila ya kuti nsitela njelenganyepo nu kwelenganya.” E Leilani wino tulanzilepo nawe walanzile ukuti: “Nga ca kuti umusambi wamanya ukuti wonsinye mwi wungwe wamuwisileko amano, cingalenga amanye ukuti awina Klistu wa cisinka.”​—Yoha. 13:35.

4. Avyani vino twandi tusambilile mwe co-o icipande?

⁴ Nomba pamwi mungayiwuzya ukuti ‘Ningavwa wuli umusambilizi wino asa lisambililo lyane?’ Pa kwasuka lyo-o iwuzyo twandi tulande vino tungacita nga ca kuti wumwi watusenda kwi sambililo, umusambi nga watalika ukwiza mu kulongana, na vino wa eluda wangacita pa kwavwa umusambi ukulunduluka ukufika na kulubatizyo.

5. Avyani vino muzipizile ukucita nga wamisenda kwi sambililo?

⁵ Pi sambililo, e katungulula awino wawa nu mulimo wakwavwa umusambi ukwivwicisya ivya mu Baibolo. Acino nga wumwi wamisenda kwi sambililo lyakwe, muzipizile ukuya mu kumutunjilila. (Ekawi. 4:9, 10) Nomba uzye mungatunjilila wuli umweni sambililo?

6. Uzye mungawomvya wuli icisinka cino cawa pa Imilumbe 20:18 ndi wumwi wamisendako kwi sambililo?

⁶ Mwapekanizizya lya nkani pano mutani muye kwi sambililo. Vimwi vino mungacita pa kupekanya isambililo, akuwuzyako umusamblizya wakwe pa kuti amineneko vimwi pa musambi. (Wazyani Imilumbe 20:18.) Mungawuzya amawuzyo ndi vino: “Uzye umusambi winu wawa wuli? Mukuya mukusambilila nawe pa cani? Avyani vino mukulonda umusambi winu amanye pe lyo-o isambililo? Uzye kuliko vimwi vino ntazipizile ukulanda nanti ukucita pano tuli pi sambililo? Avyani vino umusambi angatemwa ukwivwa vino vingamwavwa ukulunduluka?” Lelo nanti mwawuzya yonsinyene ya-a amawuzyo mutazipizile ukwenecela umusambilizya wakwe ukuminena ni vya nkamanye pe weyo umusambi. Lelo vino aliminena vingamyavwa sana. Vyonye vyo-o vino twalandapo avino ne mishonari wumwi uwizina lya kuti Joy akalondololela wano akasenda ku masambililo yakwe. Walanzile ukuti: “Ukucita wo-o kukakwavwa wano nkasenda ku masambililo ukumanya vino wangacita na vino wangalanda pano wakuwomelezya awasambi.”

7. Amulandu ci wuno muzipizile ukupekanizizya lyankani isambililo nga ca kuti wamwi waminena ukuti walimisendako?

⁷ Nga ca kuti wamwi waminena ukuti walimisendako kwi sambililo, muzipizile ukupekanizizya lyankani isambililo lino muliya mukusambililapo. (Ezra 7:10) Umwanawitu e Dorin wino tulanzilepo kali watili: “Nkakwivwa icete sana nga ca kuti wino nsenzile kwi sambililo ayipekinye. Amuno cikamwavwa ukumanya ivisinka vino angawomvya pa kuwomelezya umusambi.”  Cinji aca kuti nga umusambi wamanya ukuti mwensinye muyipekinye, nawenye aliwapekanizizya lya nkani isambililo. Fwandi nanti aca kuti mutapekinye ukufikapo, muzipizile ukumanyako ivisinka vikulu vino vili mwe lyolyo isambililo.

8. Uzye acani cino cingamyavwa ukupepa ipepo izima pi sambililo lye Baibolo?

⁸ Ipepo lyacindama nkaninye pi sambililo lye Baibolo. Fwandi muzipizile ukwelenganizizya lyankani amazwi yano mwandi mukawomvye mwi pepo nga ca kuti wino amisenzile wamipako ulongo lwa kupepa. Ukucita wo-o kulilenga ipepo lifike umusambi winu pa mwezo. (Amalu. 141:2) E Hana wino akakwikala ku Japan acili akakwizuka amazwi yano umuwuye we wino wamusambilizyanga Baibolo walanzile mwi pepo. Watili: “Amazwi yano walanzile mwi pepo yalanjizizye apatiswenye ukuti walinji nu wuciwuza uwuwome ne Yehova. Co-o calenzile na nenenye navwambisya sana ukumukolanya. Swinya nalile nivwa walumbula izina lyane mwipepo calenzile ndole ukuti naninye nakundikwa.”

9. Ukulingana ne Jemusi 1:19, avyani vino mungacita nga ca kuti wumwi wamisendako kwi sambililo lye Baibolo?

⁹ Mwatunjilila umusambilizya pano muli pi sambililo. E nkazi Omamuyovbi e painiya umuyiwele wino akakwikala ku Nigeria walanzile ukuti, “Cikakwivwika icete nkaninye nga ca kuti wino mupisile nawe kwi sambililo akukonkamo nu kulandapo pano mukusambilila swinya nga atakulandapo sana. Amuno umulimo wa kusambilizya awa kwe wino akutungulula.” Nomba ampindi ci yino muzipizile ukulandapo, swinya amazwi ci yano muzipizile ukuwomvya? (Imilu. 25:11) Mwawikako sana amano pano umusambi ne katungulula wakulanzyanya. (Wazyani Jemusi 1:19.) Ukucita wo-o kulimyavwa ukumanya impindi yino mungalandapo. Swinya muzipizile ukwelenganyapo sana pano mutani mulande. Co-o cikusula ukuti mutazipizile mwalandapo nkani, ukucilinganya e katungulula pano akusambilizya nanti ukuletapo icisinka cinji. Lelo nga mukulonda icisinka cimwi civwike, mungawomvyavye amazwi matici, icilanjililo nanti ukumuwuzyavye iwuzyo. Ne mpindi zimwi mungamusalifyavye. Ukucita wo-o kungavwa umusambi ukulunduluka.

10. Uzye ukusimicilako umusambi winu vino mwapitamo mu wumi winu kungamwavwa wuli?

¹⁰ Mwawasimicilako vino mwapitamo. Mungawasimicilako vino mwasambilizile icine, vino mwacimvizye intazi yimwi nanti vino e Yehova wamyavwa mu wumi winu. (Amalu. 78:4, 7) Ukusimicilako awasambi ya-a amalyasi kungawavwa nkaninye. Amuno manda yamwi kungawomya amasuwilo yawo, ukuwavwa ukulunduluka ukufika na kulubatizyo nanti ukuwavwa ukucimvya intazi yino wakupitamo. (1 Pet. 5:9) E painiya umuyiwele uwizina lya kuti Gabriel wino akakwikala ku Brazil acili akakwizuka vino vyamwavwizye pano wasambililanga Baibolo. Walanzile ukuti: “Ukwivwa ku malyasi amalekane lekane yano awanawitu wansimicilanga,  kwalenzile manye ukuti e Yehova akalola nga tukupita mu ntazi. Co-o calenzile manye nu kuti na nenenye ningacimvya intazi zino nkupitamo.”

11-12. Amulandu ci wuno tuzipizile ukupocelela awasambi ni nsansa nga wiza mu kulongana?

¹¹ Pa kuti umusambi alunduluke ukufika na kulubatizyo azipizile awazanwa ku kulongana konsinye. (Hebe. 10:24, 25) Nomba pa kuti atalike ukuzanwa mu kulongana, wino akamusambililzya azipizile ukumwitako. Co-o citakusula ukuti swe wanji pasi vino tungacita pa kwavwa umuzambi ukulunduluka. Cimwi cino tungacita nga wiza mu kulongana, akumuwomelezya ukuti azanwa lyonsinye. Nomba tungacita wuli pa kumuwomelezya?

¹² Mupocelelani ni nsansa. (Roma. 15:7) Nga ca kuti twapocelela umusambi ni nsansa pano wiza mu kulongana angatemwa ukuti azanwako lyonsinye. Vimwi vino vingalanjizya ukuti mu mupocelezile icete, akumulamuka ni nsansa ukwasowa ukumulenga ayivwa ngati asi nu wuntungwa nu kumumanyisyako kwe wanji. Mutazipizile mwakwelenganya ukuti umusambilizya wakwe awino akwiza mupocelela. Amuno pamwi angalanga ali na vinji ivicindame vino akuwomba nanti pamwi atani afike pa Ng’anda ya Wufumu. Cinji aca kuti, mwawikako sana amano pano akumilondololela vimwi swinya mwalanjizya ukuti mutemilwe pa kumulola. Nomba amulandu ci wuno ukucitila wo-o kwacindamila? Mwivwe vino umuwomvi wumwi wino akatumicila uwizina lya kuti Dmitrii walanzile. Watili: “Pano nayile mu kulongana umuku wa kutalicilapo nayile mficilavye palonde. Nomba walile umwanawitu wumwi wandola wizile ansenda nu kunjinjizya mu Ng’anda ya Wufumu. Swinya twalile twinjilavye awantu nyanya wizile mu kundamuka. Nakunzile sana ica kuti natalisile ukwelenganya nu kuti cingazipa nkaninye nga tukulongana cila wanda. Wampocelezile icete vino wasitela wampocelelepo ku ceci icili consinye.”

13. Uzye icakulolelako cinu icizima cingavwa wuli umusambi?

¹³ Mwawa icakulolelako icizima kwe woliwo. Imiwele yinu iyizima yingalenga umusambi amanye ukuti mwe wina Klistu wa cisinka. (Mat. 5:16) E Vitalii e painiya wa ku Moldova walanzile ukuti: “Nalile nalola imiwele yino waNte wakwata na vino wakacita vyalenzile manye ukuti awina Klistu wa cisinka.”

14. Uzye imiwele yinu imizima yingavwa wuli umusambi ukulunduluka?

¹⁴ Pa kuti umusambi afikepo ukubatizwa azipizile awomvya vino akusambilila. Kweni ukucita wo-o kutapepuka. Lelo nga ca kuti umusambi walola ivizima vino vikafumamo nga mwakonka ivisinka vya mu Baibolo, aliwavwambisya ukumikolanya. (1 Kor. 11:1) Conye cino twalandapo acino cavwizye nkazi Hanae, wino tulanzilepo  ku nsizi. Watili: “Vimwi vino vyanjavwizye ukuti nawomelezya wanji, ukuwatetela nu kulanjizya ukuti nawakunda, akulola vino awanawitu na wankazi walandanga ivizima pe wanji nu kucita vilyanye vino wasambililanga.”

15. Ukulingana ni Imilumbe 27:17 amulandu ci wuno tuzipizile ukupanjila wuciwuza na wasambi wano watalika ukulongana?

¹⁵ Pangani wuciwuza nawe. Umusambi nga watalika ukulongana, muzipizile ukumulanjizya ukuti mwamuwikako amano. (Flpi. 2:4) Vimwi vino mungacita pa kupanga wuciwuza, akumusalifya pe vino akuwombesya, ukumuwuzyako pi sambililo lya pa lwakwe, pa lupwa lwakwe nanti pa ncito. Lelo mutazipizile ukumukolowozya pe vino vitamikumile. Ukucita wo-o kungalenga wuciwuza winu ukuwoma nu kumwavwa ukufika ku lubatizyo. (Wazyani Imilumbe 27:17.) E Hanae pano walandanga vino vyamucitizile pano watalisile ukulongana watili: “Nalile napanga iviwuza mwi wungwe navwambisyanga sana ukuzanwa mu kulongana nanti ntonsilenye. Nivwanga icete nkaninye nga ca kuti indi nawo. Co-o calenzile ndeke nu kwizya na wano watapepanga Yehova. Swinya pa mulandu wa kuti navwambisyanga sana ukupalamila ku wanawitu na wankazi napinguzilepo ukubatizwa.” Pe yo-o impindi we-e nkazi we painiya.

16. Avyani vinji vino tungacita pa kulenga umusambi alola ukuti wacindama sana mwi wungwe?

¹⁶ Pano umusambi akuya akulunduluka muzipizile ukulenga nawenye ayilola ukuti wacindama sana mwi wungwe. Inzila yimwi yino mungacitilamo wo-o, akumwitako ku ng’anda. (Hebe. 13:2) E Denis wino akakwikala ku Moldova walanzile ukuti: “Pano nasambililanga Baibolo, awanawitu na wankazi watwitanga ne wakwane ku mang’anda ku mwawo. Swinya nga watwita watusimicilangako vino Yehova wawavwa mu wumi wawo. Ukucita wo-o, kwatuwomyanga nkaninye. Swinya kwalenzile tutalike ukwelenganya pa kuwombela Yehova. Cinji aca kuti kwalenzile tumanye ukuti kuli ivintu na vinjinye vino tuliyitopwa ku nkolelo.” Umusambi nga wawa we kawizya mungamusendako mu mulimo wa kuwizya. Mukucita wo-o mukafuma ivizima. Lolani vino umwanawitu e Diego uwa ku Brazil walanzile. Watili: “Pano nawa ne kawizya awanawitu wansendangako mu mulimo wa kuwizya. Ukucita wo-o kwalenzile nsambilileko ivivule kwe woliwo nu kuwamanya icete. Swinya kwalenzile nayivwa ukuti nacindama sana kwe Yehova na kwe Yesu.”

17. Uzye wa eluda wangavwa wuli awasambi?

¹⁷ Mwapawulako impindi ya kuzanwa na wasambi. Nga ca kuti mukulanjizya awasambi ukuti mwawakunda swinya mwawawikako amano, walilunduluka ukufika na kulubatizyo. Inzila yimwi yino mungacitilamo wo-o, akupawulako impindi ya kulanda nawo pano muli pa kulongana.  Swinya mungalanjizya ukuti mwawakunda nga ca kuti mutakuwiwilila amazina pano wakwasukapo pa kulongana. Cinji aca kuti mwapawulako impindi iya kusucililako wano wawa na masambililo ye Baibolo pano wakuya mu kutungulula amasambililo. Ukucita wo-o kungavwa nkaninye umusambi ukulunduluka ukucila na pe vino mukwenecela. E nkazi wumwi e painiya uwi zina lya kuti Jackie wino akakwikala ku Nigeria walanzile ukuti: “Awasambi wane wakazunguka nkaninye nga wamanya ukuti wino tuli nawe pi sambililo we eluda. Umusambi wane wumwi wasusile alanda nu kuti: ‘E pasita wane asitela antandalilepo na wanda. Akatandalilavye awa vyuuma na wano wakamupako kamwi!’” Pe yo-o impindi we-e umusambi watalika nu kulongana.

18. Uzye waeluda wangawomvya wuli amazwi yano yawa pa Imilimo 20:28?

¹⁸ Mwasambilizya wakawizya nu kuwawomelezya. Nga ca kuti mwe waeluda, mwawa nu mulimo wakwavwa wa kawizya ukumanya ivya kuwizya nu kusambilizya icete. (Wazyani Imilimo 20:28.) Acino nga wumwi wamisenda kwi sambililo nomba akwivwa intete zya kutungulula, mungamunena ukuti mwandi mutungulule. E jackie wino tulanzilepo kali watili: “Waeluda lyonsinye wakankolowozyako pe vino amasambililo yane yakupita. Swinya nga nawa ni ntazi yimwi pa vyakutungulula isambililo, wakanjavwa nkaninye.” Kwawa ivivule vino waeluda wangacita pakwavwa wakawizya ukuwa awakasambilizya wazina. (1 Tes. 5:11) E Jackie walanzile nu kuti: “Nkakwivwa icete nkaninye nga ca kuti waeluda wakunsalifya nu kumbomelezya. Amazwi yawo yakawa ngati aminzi amatalale pano kupile. Yakalenga manye ukuti umulimo wakutungulula amasambililo wacindama nkaninye swinya nkawelako ni nsansa.”​—Imilu. 25:25.

19. Ansansa ci zino swensinye tungawa nazyo?

¹⁹ Nanti aca kuti pe yo-o impindi tutange tuwe ni sambililo limwi lino tukutungulula, tungavwa awasambi we wanji ukulunduluka ukufika na kulubatizyo. Vimwi vino tungacita pa kuti tuwavwe, tutazipizile twalanda sana pano tuli pi sambililo. Tuzipizile twapekanya icete nu kuwombela ponga ne kasambilizya. Vinji vino tungacita akuwapanga wuciwuza nga wiza mu kulongana nu kuwa icakulolelako icizima. Nga mwe waeluda mungavwa awasambi nga mukupawulako impindi ya kuwa ponga nawo. Wakawizya nawo mungawavwa nga mukuwawomelezya pa kuti wawe awakawizya swinya wakasambilizya awazima. Ala kutawa insansa zino tungawa nazyo zino zingacila pa kwavwa umuntu ukukunda Yehova nu kutalika ukumuwombela!