1. Antazi ci zimwi zino awawomvi wa kwe Yehova wakupitamo?

UZYE kuli yimwi intazi nkulu yino mukupitamo? Nce pamwi kuli umwanawitu wumwi nanti e nkazi wino wamiluvyanya mwi wungwe. (Jemu. 3:2) Nanti pamwi wano mukawomba nawo nanti ukusambilila nawo wakamiseka pa mulandu wa kuwa Inte ya kwe Yehova. (1 Pet. 4:3, 4) Nanti nce pamwi wa lupwa lwinu wakamilesya ukulongana nu kuwizya. (Mat. 10:35, 36) Impindi zimwi nga ca kuti intazi yakula nkani, cino tukatalika ukwelenganyapo vye akuleka ukuwombela Yehova. Lelo muzipizile mwakwizuka ukuti, asa mulandu ni ntazi yino mungapitamo e Yehova angamipa amano na maka yano yangamyavwa ukupingula icete pa vintu nu kumyavwa ukutwalilila ukusipicizya.

2. Ukulingana na Waroma 15:4, awuzima ci wuno wawa mu kuwazya Izwi lya kwe Leza Baibolo?

² Mu Baibolo mwawa amalyasi ya wantu wano watwalilizile ukusipicizya asa mulandu ni ntazi zino wapisilemo. Amulandu ci wuno Yehova wazumilizizye ukuti ya-a amalyasi yalembwe? Icasuko tukacizana mu mazwi yano wanenile umutumwa Paulo ukulemba, aya kuti akalonda na sweswenye twasambililako. (Wazyani Waroma 15:4.) Acino ukuwazya ya-a amalyasi kungatusansamusya nu kutuwomya nkaninye. Lelo pa kuti twaitopwa tutazipizile ukupelela pa kuwazya, tuzipizile ukuleka yatutungulula mwe vino tukakwelenganya na vino tukuyivwa pa vintu. Ku cakulolelako, nga mukulonda ukuwombela pa ntazi yimwi yino mukupitamo muzipizile ukucita vino vyakonkapo: (1) Mwapepa, (2) Mwakwelenganya ukuti akuno muli, (3) Ukwelenganyapo sana, ne (4) Mwaviwomvya. Lekani tulande vino vyasanzyamo mwe conga na conga pe vyo-o vino twalandapo. * Pa nsizi twandi  tuwomvye vyonye vyo-o vino twalandapo pano tukulanda pe vino vyaciticizile Imfumu Davidi nu mutumwa Paulo.

3. Avyani vino muzipizile ukucita pano mutani mutalike ukuwazya Baibolo swinya amulandu ci?

³ (1) Mwapepa. Pano mutani mutalike ukuisambilizya Baibolo mwapepa kwe Yehova ukuti amyavwe ukwivwicisya vino mukuwazya. Ku cakulolelako, nga mukulonda ukumanya ivya kucita pa kumala intazi yimwi, mwalenga kwe Yehova ukuti amyavwe ukuzana ivisinka vya masundo ya mu Baibolo vino vingamyavwa ukupingula icete pe yoyo untazi.​—Flpi. 4:6, 7; Jemu 1:5.

4. Avyani vimwi vino muzipizile ukucita pa kuti mwivwicisye ilyasi limwi ilya mu Baibolo?

⁴ (2) Mwakwelenganya ukuti akuno muli. E Yehova watupa icawila icizima nkaninye ica kwelenganya pa vintu vimwi nge vikucitika nu kucitika. Acino nga mukulonda ukwivwicisya ilyasi limwi, pano mukuwazya mwakwelenganya ukuti amwewano vyovyo ivintu vikuciticila. Mwakwelezya na maka ukulola ivintu vino weyo umuntu wino mukuwazyapo walolanga, na vino wayivwanga.

5. Avyani vino vyasanzyamo mukwelenganya sana pe vino tukuwazya, swinya avyani vino vingatwavwa ukwelenganyapo sana?

⁵ (3) Mwakwelenganyapo sana. Mukwelenganya sana pe vino tukuwazya mwasanzyamo nu kulola vino tungawomvya vino tukuwazya. Ukucita wo-o kukatwavwa ukulemenkanya ivisinka vino vili mwi lyasi nu kutwavwa ukwivwicisya ilyasi lyonsinye. Ukuwazya Baibolo ukwasowa ukwelenganyapo kwawa ngati akutalika ukulolecesya vye injelwa ukwasowa ukutalika ukuziwika ponga pakuti mupange icikulwa. Lelo ukwelenganyapo kwawa ngati akusenda injelwa yonga na yonga nu kuyiwika pano izipizile ukuwa pa kuti icikulwa citalike ukuloleka. Vimwi vino vingatwavwa ukwelenganyapo sana pe vino tukuwazya, akuyiwuzya amawuzyo ndi vino: ‘Avyani vino we-e umuntu wacisile pa kumala yo-o intazi? Uzye Yehova wamwavwizye wuli? Uzye lyo-o ilyasi linganjavwa wuli pa ntazi yino nkupitamo?’

6. Amulandu ci wuno tuzipizile ukuwomvezya vino tukusambilila?

⁶ (4) Mwaviwomvya. E Yesu watili nga tusakuwomvya vino tukusambilila tuliwa ngati amonsi wino wazenzile ing’anda yakwe pe senga. We-e umonsi wononile vye impindi na maka yakwe. Amulandu ci wuno twalandila wo-o? Amuno pano icimuza ne mulamba viziile, yizile ayipona. (Mat. 7:24-27) Wonye wo-o avino cingawa na kwe sweswenye nga tukupelela vye pa kupepa, ukulola ukuti akuno tuli nga nu kwelenganyapo sana. Amuno intazi nga ziza nanti watucuzya isuwilo litu lingatonta. Lelo nga tukuwomvya vino tukusambilila tuliwapingula icete pa vintu, ukuwa nu mutende swinya isuwilo litu liliwawomelako. (Ayize. 48:17, 18) Lekani nomba tulole vino tungawomvya vyo-o vino twasambilila pano tukulanda pe vimwi vino vyaciticizile Imfumu Davidi.

7. Ali lyasi ci ilya mu Baibolo lino twandi tulandepo?

⁷ Uzye kwawako e ciwuza winu nanti e lupwa lwinu wino wiza wamipilucila? Nga vino cawa, ilyasi lya kwe Davidi pano umwana wakwe e Absalomu walondanga ukumupoka uwufumu lingamyavwa nkaninye.​—2 Sam. 15:5-14, 31; 18:6-14.

8. Avyani vino muzipizile ukucita pa kuti Yehova amyavwe?

⁸ (1) Mwapepa. Pano mutani mutalike ukuwazya ilyasi limwi mu Baibolo lino likulanda pa ntazi yino ikoline na yino mukupitamo, muzipizile ukunena Yehova vyonsinye vino mukuyivwa pe vino wamiluvyanya. (Amalu. 6:6-9) Mutapita mu mbali pano mukupepa. Swinya mwalenga ukuti amyavwe ukuzana ivisinka vya masundo vino vingamyavwa ukumanya ivya kucita pa kumala yoyo intazi.

9. Avyani vino vyaciticizile e Davidi ne Absalomu?

 ⁹ (2) Mwakwelenganya ukuti akuno muli. Pano mukuwazya lyo-o ilyasi, yelenganyani vino ivintu vili na vino Davidi akuyivwa. E Absalomu awombesizye pa myaka imivule pa kuti awantu wamukunde. (2 Sam. 15:7) Pano umweneco walola ukuti cayana watuma inengu mu vitungu vyonsinye ivya mu Israeli, pakuti awantu waye wamupocelele ukuwa amfumu yawo. Swinya walenga ne Ahitofeli impanda mano ya kwe Davidi ukumupilucila nu kuwa ku luwali lwakwe. Mukulecelezya wayiwika pa wufumu swinya wati awavwamba nu kukoma yisi e Davidi wino pe yo-o impindi amulwale nkaninye. (Amalu. 41:1-9) Pano Davidi wamanya vino umwana wakwe akulonda ukucita wasamala ukufuma mu Yerusalemu. Cino cakonkapo aca kuti awasilika wa kwe Absalomu watalika ukulwa na wasilika wa kwe Davidi lelo waluza swinya wakoma ne Absalomu.

10. Uzye avyani pamwi vino e Davidi wange acite?

¹⁰ Yelenganyani vino Davidi wayivwile pano umwana wino wakunzile e Absalomu ne ciwuza wino wasuwizile e Ahitofeli wizile awamupondocela awavwamba nu kumukoma. Ukwasowa nu kuvwilika e Davidi wivwile uwuwi nkaninye. Swinya co-o pamwi nga calenzile atalike nu kuvwilika iviwuza vyakwe vinji nu kulola ngati nawonye wali ku luwali lwa kwe Absalomu. Swinya pamwi nga watalisile ukwelenganya ukusamala wenganye nanti nga wivwile intete nkaninye. Lelo weni asa vino wacisile. Na cino cafumilemo aca kuti wizile acimvya zyo-o intazi. Nomba avyani vino vyalenzile ukuti acimvye?

11. Avyani vino Davidi wacisile pano wapisile mwe yo-o intazi?

¹¹ (3) Mwakwelenganyapo sana. Avisinka ci vino mungasambilila kwi lyasi lya kwe Davidi? Cimwi cino cingamyavwa, akwasuka iwuzyo lya kuti, “Avyani vino Davidi wacisile pa kuti ayipususye?” E Davidi atasakamisilwe ukucila mu cipimo nanti ukwivwa intete ica kuti apotwa nu kupingula icete pa vintu. Vino wacisile, wapefile kwe Yehova nu kulenga iviwuza vyakwe ukuti vimwavwe. Cinji, wawombezilepo zuwa pe vilyanye vino wapinguzilepo ukucita. Kweni nanti aca ukuti e Davidi pe yo-o impindi wafuzilwe, atapasile uwili wensinye pe wano wamufyenzile swinya watwalilizile ukusuwila Yehova ni viwuza vyakwe.

12. Uzye e Yehova wavwizye wuli e Davidi?

¹² Uzye e Yehova wavwizye wuli e Davidi? Nga mwasokotelapo ivyewo mulizana ukuti wamupile amaka yano yamwavwizye ukutwalilila ukusipicizya. (Amalu. 3:1-8) Swinya wamupazile mwe vyonsinye vino wapinguzilepo ukucita. Cinji aca kuti e Yehova wacinjilizile iviwuza vya kwe Davidi vino vyamucinjililanga pano walondanga ukumukoma.

13. Ukulingana ne Mateyu 18:15-17, uzye mungakolanya wuli e Davidi nga ca kuti wumwi wamiluvyanya?

¹³ (4) Mwaviwomvya. Mungayiwuzya ukuti, ‘Uzye ningakolanya wuli e Davidi?’ Cimwi cino mungacita akuwombelapo zuwa nga ca kuti wumwi wamiluvyanya. Ukulingana na vino ivintu vili, mungawomvya icisinka cino Yesu walanzilepo mwe Mateyu icipandwa 18. (Wazyani Mateyu 18:15-17.) Mutati mwafika mukupingula pa vintu pano mucili mufuzilwe. Lelo mwapepa kwe Yehova pa kuti amyavwe ukuteka umwezo pano mukupingulapo. Cinji aca kuti mwasuwila awanawitu na wankazi swinya mutakana nga ca kuti wakulonda ukumyavwa. (Imilu. 17:17) Ni cicindamisye aca kuti mwakonka ukupanda amano kuno kwawa mwi Zwi lya kwe Leza.​—Imilu. 3:5, 6.

14. Ampindi ci pano iwaliko lya kwe 2 Timoti 1:12-16; 4:6-11, 17-22 lingatuwomya sana?

¹⁴ Uzye walupwa lwinu wakamikanya nanti ukumicuzya pa mulandu wa kuwombela Yehova? Nanti uzye pamwi mwikala mu nsi muno wawinda imilimo yimwi iya Nte zya kwe Yehova  nanti yonsinye? Nga vino cawa iwaliko lya kwe 2 Timoti 1:12-16; 4:6-11, 17-22 lingamiwomya nkaninye. * Amuno pano Paulo walembanga lyo-o iwaliko lyo akuyimba mu cifungo.

15. Avyani vino muzipizile ukulenga kwe Yehova?

¹⁵ (1) Mwapepa. Pano mutani mutalike ukuwazya ya-a amawaliko muzipizile ukulondololela Yehova intazi yino mukupitamo na vino mukuyivwa. Swinya mutazipizile mwapita mu mbali. Cinji aca kuti muzipizile ukumulenga ukuti amyavwe ukwivwicisya ivisinka vya masundo vino vyavwizye Paulo vino vingamyavwa na mwemwenye pa intazi yino mukupitamo.

16. Avyani vino vyaciticizile Paulo?

¹⁶ (2) Mwakwelenganya ukuti akuno muli. Yelenganyani ukuti vyo-o vino vikuciticila Paulo amwewano vikuciticila. E Paulo wamunyefile na maceni mu cifungo mu Roma. Wo-o asa muku wa kutalicilapo ukumunyepa swinya pe yo-o impindi asa kuvwilika nu kuvwilika ukuti wandi wamukome. Cinji aca kuti iviwuza vyakwe vimulecelezizye swinya atonsile nkaninye.​—2 Tim. 1:15.

17. Avyani pamwi vino Paulo wanga acite?

¹⁷ E Paulo pamwi nge watalisile ukwelenganya ukuti nanga ntawombesya mu mulimo nge watanyepa. Swinya pamwi nge wafulizilwe awina Klistu wa mu Asia wano wamusamazile. Cinji aca kuti nge walesile ukusuwila iviwuza vyakwe vinji. Lelo e Paulo asa vino wacisile. Avyani vino vyalenzile ukuti atwalilile ukusuwila iviwuza vyakwe nu kusuwila ukuti e Yehova alimulambula?

18. Avyani vino e Paulo watwalilizile ukucita pano wapitanga mu ntazi?

¹⁸ (3) Mwakwelenganyapo sana. Cimwi cino cingamyavwa akwasuka iwuzyo lya kuti, “Avyani vimwi vino Paulo wacisile pa ntazi yino wapitangamo?” Nanti aca kuti e Paulo wamanyile ukuti walinji nu kumukoma, cino wacindamisile sana mu wumi wakwe akulenga izina lya kwe Yehova ukucindikwa. Swinya wavwambanga inzila zino angawomelezezyamo awantu wanji. Cinji aca kuti walanjizizye ukuti wasuwizile mwe Yehova ukupitila mu kupepa cila mpindi. (2 Tim. 1:3) E Paulo atelenganyanga pa viwuza vyakwe vino vyamusamazile. Lelo watwalilizile ukusalifya iviwuza vyakwe vino vyatwalilizile ukumwavwa nu kumulanjizya ulukundo pano wapitanga mwe yo-o ntazi. Ukulunda pe vyo-o, watwalilizile ukuyisambilizya Izwi lya kwe Leza. (2 Tim. 3:16, 17; 4:13) Ni cicindamisye aca kuti lyonsinye wizukanga ukuti e Yehova ne Yesu wamukunda swinya walimulambula pa wucisinka wakwe.

19. Uzye e Yehova wavwizye wuli e Paulo?

¹⁹ E Yehova wanenezile e Paulo lyankani ukuti walinji nu kupita mu ntazi pamulandu wa kuwa umwina Klistu. (Imili. 21:11-13) Nomba uzye e Yehova wamwavwizye wuli? Wasusile amapepo yakwe swinya wamupile na maka. (2 Tim. 4:17) Wamunenile nu kuti walinji nu kumupa icilambu pa mulandu wa kuwombesya kwakwe. Swinya wamwavwizye ukupitila mu viwuza vya cisinka vino vyamwavwanga.

20. Ukulingana na Waroma 8:38, 39, acani cino cavwizye Paulo ukusipicizya intazi, swinya tungamukolanya wuli?

²⁰ (4) Mwaviwomvya. Yiwuzyani ukuti, ‘Uzye ningakolanya wuli e Paulo?’ Wulyanye vino calinji kwe Paulo nasweswenye wangatucuzya pa mulandu na vino twazumilamo. (Mar. 10:29, 30) Vimwi vino vingatwavwa ukutwalilila ukuwa awacisinka pano tukupita mu ntazi alipepo nu kuisambilizya Baibolo lyonsinye. Lyonsinye tuzipizile twakwizuka ukuti icintu icicindame cino tuzipizile ukucita akucindika Yehova. Nga twacita wo-o e Yehova atalitela atulecelezye. Swinya kusi uwili wensinye nanti icili consinye cino cingalenga ukuti e Yehova aleke ukutukunda.​—Wazyani Waroma 8:38, 39; Hebe. 13:5, 6.

21. Avyani vino vyavwizye Aya ne Hector ukucimvya intazi zino wakweti?

²¹ Ivya kulolelako vino vyalembwa mu Baibolo vingatwavwa ukusipicizya intazi iyili yonsinye yino tungapitamo. Ku cakulolelako, e nkazi Aya e painiya ku Japan watili ilyasi lya kwe Yona lyamwavwa nkaninye ukuleka ukutina ukuwizya ku cintu wavule. E Hector nawe wino akakwikala ku Indonesia wino awakwasi wa kwe wasiwombela Yehova watili, ilyasi lya kwe Ruti alino lyamwavwizye ukuvwambisya ukusambilila pe Yehova nu kutalika ukumuwombela.

22. Avyani vino mungacita pa kuti mwayitopwa ukutamba nanti ukuwazya amalyasi ya mu Baibolo yano yawa pa luwali lwa kuti “Imitate Their Faith”?

²² Akwinye kuno mungazana ivya kulolelako vya mu Baibolo vino vingamyavwa ukuwomya isuwilo linu? Mungavizana pa webusaiti yitu iya jw.org. Nga mwaya pa luwali lwa kuti “Imitate Their Faith” pawa amavidyo na malyasi amakopwe yano yangamyavwa ukwivwicisya vino vyawa mu Baibolo. * Nomba pano mutani mutambe, ukuteyelezya nanti ukuwazya, muzipizile ukupepa kwe Yehova pa kuti amyavwe ukuzana ivisinka vya masundo vino vingamyavwa mu wumi winu. Mwakwelenganya ukuti vino mukuwazya amwewano vikuciticila, mwakwelenganya sana pe vino wacisile na vino Yehova wawavwizye, nu kulola vino mungawomvya vyovyo ivyewo mu wumi winu. Swinya mwasalifya e Yehova pe vino akumyavwa. Nomba mungalanjizya ukuti mukasalifya pe vino Yehova akamyavwa nga ca kuti mukuwomelezyako wanji nu kuwavwa.

23. Ukulingana ne Ayizeya 41:10, 13, avyani vino Yehova watulaya?

²³ Ivintu mu nsi ya kwe Satana vikuya vikuwipilakovye swinya manda yamwi tutanga tumanye ni cakucita. (2 Tim. 3:1) Lelo vyo-o vitazipizile vyatutinya nanti ukutusakamika. Amuno e Yehova wamanya vyonsimye vino tukapitamo. Swinya watulaya nu kuti nga twawa ni ntazi alitulema ni kasa lyakwe ilya kwe ndilo. (Wazyani Ayizeya 41:10, 13.) Acino tusakuvwilika nanti katicinye ukuti e Yehova alitwalilila ukuwomvya Izwi lyakwe ukutupa amaka yano yangatwavwa ukusipicizya intazi zino tukupitamo.