1. Uzye e Yehova tuli nawe wuli?

 MWE lo-o ulupwa lwa kapepa wa kwe Yehova, mwawa ne Yesu, “e katote umwana monsi wino wakula walusya ivyelewulwa vyonsi,” nga ni mintapendwa ya wangeli. (Kolo. 1:15; Amalu. 103:20) Pano e Yesu walinji mu nsi wavwizye awantu ukumanya ukuti wangita e Yehova ukuti “Tata.” Impindi yimwi pano walandanga na wasambilizi wakwe, walanzile pe Yehova ukuti ‘e Tata e so namwe.’ (Yoha. 20:17) Nasweswenye nga twayipa kwe Yehova nu kubatizwa, tukawa mu lupwa lwa wanawitu na wankazi wano watukunda.​—Mar. 10:29, 30.

2. Avyani vino twandi tusambilile mwe co-o icipande?

² Wamwi cikawawomela nkaninye ukulola e Yehova ukuti amukwasi wawo. Ne wamwi cingawatalila ukumanya ivyakulanjizya ulukundo ku wanawitu na wankazi. Mwe co-o icipande twandi tulole vino Yesu watwavwa ukulola Yehova ukuti amukwasi witu wino watukunda. Na vino tungacita pakupalamila kwe weliwe. Cinji acakuti twandi tulole ni nzila zino tungakolanizizyamo e Yehova mwe vino tukalola awanawitu na wankazi.

3. Uzye ipepo lino Yesu watusambilizizye likatwavwa wuli ukupalamila kwe Yehova?

³ E Yehova amukwasi walukundo. Wonye wo-o avino ne Yesu nye akalonda tuwalola Yehova. Akalonda tuwamulola ukuti amukwasi witu uwacikuku swinya uwalukundo, wino tungalanda nawe impindi iyili yonsinye yino tukulonda. Asilonda tuwamulola ukuti wakalala swinya akatunenavye ivya kucita. Tukakwivwicisya co-o icisinka nga twalola amazwi yano yawa mwi pepo lino wasambilizizye awasambi wakwe. Mwe lyo-o ipepo watalicizile na mazwi ya kuti “Tata witu.” (Mat. 6:9) E Yesu wanga alonde nga watunenile ukuti tuwamwita vye ukuti “Uwamaka yonsi” “Umwelewuzi” nanti “Mfumu ya muyayaya.” Amuno ya-a amalumbo ya kwe Yehova yawalikwa  na mu Baibolo. (Inta. 49:25; Efes. 3:9; 1 Tim. 1:17) Lelo watunenile kuno tuwamwita ukuti “Tata.”

4. Twamanya wuli ukuti e Yehova akalonda tupalamile sana kwe weliwe?

⁴ Swe wamwi cikatutalila ukulola Yehova ukuti amukwasi witu uwalukundo. Uzye na mwemwe avino mukayivwa? Kweni nga cakuti mwakula nu mukwasi wino atawa nicikuku, cingamitalila ukulola Yehova ukuti amukwasi witu uwacikuku. Lelo tukakwivwa icete nkaninye ukumanya ukuti e Yehova, wamanya vino tukayivwa, na cino calenga tuwayivwa wowo. Swinya akalonda ukupalamila sana kwe sweswe. Awuli umulandu wuno Baibolo yikatuwomelezezya ukuti: “Palamilani pakwe Leza nawe wandi apalamile kwe mwemwe.” (Jemu. 4:8) E Yehova watukunda swinya watulaya ukuti alitukunda ukucila na vino umukwasi uwili wensinye angatukunda.

5. Ukulingana ne Luka 10:22, amulandu ci wuno tungalandila ukuti e Yesu angatwavwa ukupalamila kwe Yehova?

⁵ E Yesu angatwavwa ukupalamila kwe Yehova. Amuno wamumanya icete sana. Akakolanya ni miwele yakwe yonsinye wulyanye vino wawa. Awuli umulandu wuno walandizile ukuti: “Wensi wino wandola nene ye walola nu Tatanye.” (Yoha. 14:9) Ngati awulyanye vino umwana e songo pa wawuye akasambilizya awazuna wakwe, avino ne Yesu nyene akacita. Akatusambilizya ivyakucita pa kuti tuwacindika nu kwivwila umukwasi witu. Cinji acakuti akatusambilizya vino tuzipizile ukucita na vino tutazipizile ukucita pakuti tuwamusecelesya. Na pano atani aye kwi yulu watwavwizye ukumanya ukuti e Yehova wawa ni cikuku swinya watukunda. (Wazyani Luka 10:22.) Lekani tulandeko pe vimwi vino vya muciticizile.

6. Twamanya wuli ukuti e Yehova wateleyezyanga kwe Yesu? Landani ivya kulolelako

⁶ E Yehova akakwivwa ku wana wakwe nga wakupepa. Lolani vino wasukanga amapepo ya mwana wakwe. Wateyelezyanga ku mapepo amavule yano umwana wakwe wapefile pano walinji mu nsi. (Luk. 5:16) Ku cakulolelako, e Yehova wasusile ipepo lya mwana wakwe, pano wapefile ukuti amwavwe ukusola awatumwa 12. (Luk. 6:12, 13) Ni mpindi yinji pano Yesu wapefile lyo-o asakamisilwe nkaninye, e Yehova wivwile ipepo  lyakwe. Co-o cacitisile pano Yuda wamufutusile lyo-o kwasyalavye katici ukuti wamuleme. E Yesu wapefile nkaninye kwe Yehova pe vino vyalinji nu kutalika ukumuciticila. Atapelezilevye pakwivwa ku mapepo ya kwe Yesu, lelo watumile nu mungeli uwakuya mukumuwomya.​—Luk. 22:41-44.

7. Uzye mukakwivwa wuli ukumanya ukuti e Yehova akakwivwa ku mapepo ya wantu wakwe?

⁷ Namweyanye amanda e Yehova watwalilila ukuteyelezya ku mapepo ya wawomvi wakwe. Akakwasuka pa mpindi injanane swinya mu nzila iyizima. (Amalu. 116:1, 2) Wonye wo-o avino calinji kwe nkazi wumwi ku India. Wayilolezile vino Yehova wasusile amapepo yakwe. We-e nkazi wasakamikwanga nkaninye. Acino walondololezile e Yehova vyonsinye vino wayivwanga. Walanzile ukuti: “E Yehova wasusile ipepo lyane, ukupitila mwe JW Broadcasting iya mu May 2019. Yino yalandanga pe vino tungacita nga cakuti tukasakamikwa sana. Yo-o e programu yizile pa mpindi injanane kwe nene.”

8. Uzye e Yehova walanjizizye wuli ukuti wakunzile e Yesu?

⁸ E Yehova watukunda swinya akatusakamala wulyanye vino wacisile kwe Yesu pano walinji mu nsi. (Yoha. 5:20) Wavwizye Yesu ukutwalilila ukuwa ni suwilo iliwome. Wamuwomelezyanga nga cakuti wasakamikwa. Wasinincizyanga nu kuti ali na vyonsinye vino walondanga pa kuti atwalilile ukuwa nu wumi. E Yehova wanenile umwana wakwe ukuti wamukunzile. Swinya wasecelelanga pe weliwe. (Mat. 3:16, 17) E Yesu wamanyile ukuti umukwasi wakwe uwalukundo walinji nawe swinya wamusakamalanga. Co-o calenzile atayivwa ukuti walinji wenga.​—Yoha. 8:16.

9. Twamanya wuli ukuti e Yehova watukunda?

⁹ Namweyanye ya-a amanda twalola vino Yehova akalanjizya ukuti watukunda ngati awulyanye vino wacisile kwe Yesu. Teyelenganyani pe co-o, watuleta mwi wungwe lyakwe muno mwawa awanawitu na wankazi wano wakatusansamusya nu kutuwomelezya nga ca kuti twasakamikwa. (Yoha. 6:44) Akatupa na vyonsinye vino tukalonda pa kuti tutwalilile ukuwa ni suwilo iliwome. Asa vyo-o vyonga, akatupekanizizya na vino tukalonda pa kuti tutwalilile ukuwa nu wumi. (Mat. 6:31, 32) Nga twelenganya pe vino e Yehova watukunda, na sweswe tukaya tukumukundilako.

10. Avyani vino tungasambililako kwe vino e Yehova akalanjizya ulukundo kuwanawitu na wankazi?

¹⁰ E Yehova wakunda awanawitu na wankazi. Lelo sweswe asawe lyonsi pano cikapepuka ukulanjizya ukuti twawakunda. Manda yamwi cino cikalenga amulandu wakupusana kwa ntambi, na vino watukuzya. Ne pamulandu wa kukanapwililika, tukacita ivintu vimwi vino vikalumisya awina Klistu awanji umwezo nanti ukuwapunuzya. Nomba tungacita wuli pa kuti tuwomye wuciwuza witu nawanawitu na wankazi? Tuzipizile ukukolanya umukwasi witu uwa lukundo. (Efes. 5:1, 2; 1 Yoh. 4:19) Lekani tulole vino tungasambililako kwe Yehova.

11. Uzye e Yesu walanjizizye wuli ukuti walinji ‘ni nkumbu’ ndi vino Yehova wawa?

¹¹ E Yehova “awankumbu nichikuku.” (Luk. 1:78) Umuntu wa nkumbu akakwivwa uwuwi nga walola wamwi wakuyimba. Swinya akavwamba ni nzila zino angawavwilamo nu kuwawomelezya. Vino e Yesu wacitanga ku wantu vyalanjizyanga ukuti wakolanyanga e Yehova wino wawa ni nkumbu. (Yoha. 5:19) Walile walola amawumba ya wantu, “ichilanda achimulema, amuno watamikanga nu kuluwaluwa ngati ang’onzi zino zisi numuchemi.” (Mat. 9:36) Atapelezilevye pakuwivwila inkumbu lelo wacisilepo cimwi pa kuti awavwe. E Yesu wapozizye awalwale nu kwavwa wano “wakuwantikanga swinya wano wang’wamizilwe.”​—Mat. 11:28-30; 14:14.

12. Tungalanjizya wuli ukuti twawa ni nkumbu ku wanawitu na wankazi?

¹² Nga ca kuti tukwelenganya sana pa ntazi zino awanawitu na wankazi wakupitamo, ciliwatupepucila  ukuwivwila inkumbu. Ku cakulolelako, e nkazi angalanga akalwalilila swinya asiyilizyanyapo nu kuyilizyanya pa ndwala yino walwala. Lelo nanti ciwe wo-o, we-e nkazi angakunda nkaninye nga cakuti kwalinji uwakumwavwa mwe vimwi. Fwandi cingazipa ukulola nga ca kuti akukumanisya ukusakamala ulupwa lwakwe mwe vino lukalonda. Uzye tungamutendelako utwakulya, nanti ukumwavwako utumilimo tumwi utwa pa ng’anda. Nga nga ca kuti umwanawitu incito yasila, uzye tungacita wuli? Tungamupako akandalama kamwi kano kangamwavwa pano akulindilila ukuvwamba incito yinji. Swinya manda yamwi tungacita wo-o ukwasowa nu kuti amanye ukuti indalama zifumile kwe sweswe.

13-14. Tungalanjizya wuli ukuti twawa nu mwezo wakupa ndi vino Yehova?

¹³ E Yehova akapako wanji. (Mat. 5:45) Nasweswenye tutazipizile twalindilila ukuti mpaka awanawitu na wankazi wize watulenge apano tuwape. Lelo tungayitalicilakovye swe weneco wulyanye vino Yehova akacita. Akatutonyezya imvula ukwasowa nu kuti tumulenge. Nga wacita wo-o cikazipila awantu wonsinye ukuwikako na walyanye wano wasisalifya. Uzye mutakuzumila ukuti wo-o vino Yehova akatupa vyonsinye vino tukalonda cikalanjizya ukuti watukunda? Twakunda nkaninye e Yehova, amuno wawa nu luse swinya akapako wanji.

¹⁴ Awanawitu na wankazi wakakolanya e Yehova swinya wakapako wanji. Ku cakulolelako, mu 2013 ku Philippines kwapisile icimuza icikulu nkaninye cino witanga ukuti Super Typhoon Haiyan cino cononile ivintu ivivule nkaninye. Icakuti ama ng’anda ni viya vya wanawitu na wankazi awavule vyononesile. Lelo awanawitu na wankazi ukuzinguluka insi yonsinye watalemile na kwi sote ukuwavwa. Awavule wasanguzilekovye ne wamwi wayile kulyanye mukwavwilizya. Ica kuti mu myezivye yakupenda wazenzile amang’anda mupipi ne 750. Ne mu mpindi ye Corona Inte zya kwe Yehova wawombesizye nkaninye ukwavwilizya awanawitu na wankazi. Tuliwalanjizya ukuti twakunda awanawitu na wankazi nga ca kuti tutakuwayawaya ukuwavwilizya.

15-16. Ukulingana ne Luka 6:36, avyani vino tuzipizile ukucita pakukolanya Umukwasi witu uwa kwiyulu?

¹⁵ E Yehova wawa nu luse swinya akatetela. (Wazyani Luka 6:36.) Cila wanda akatutetela pe vino tukaluvyanya. (Amalu. 103:10-14)  Awasambilizi wa kwe Yesu watalinji awapwililike. Lelo e Yesu wawivwilanga uluse nu kuwatetela. Wayikundizile nukupa uwumi wakwe pa kuti amawembuko yitu yatetelwe. (1 Yoh. 2:1, 2) Vino e Yehova ne Yesu wakalanjizya uluse kwe sweswe na vino wakatutetela vikatupalamika kwe woliwo.

¹⁶ Nga ca kuti tukutetela awanawitu na wankazi tukakundana nkaninye. (Efes. 4:32) Kweni impindi zimwi cisipepuka ukutetela wanji, fwandi tuzipizile ukuwombesya. E nkazi wumwi waweni ukuti icipande ca mu Ulupungu lwa kwe Malonda cino catinji: “Muwatetelana ni Myezo Yinu,” camwavwizye pe lo-o uluwali. * Walanzile ukuti: “Co-o icipande canjavwile ukulola uwuzima wuno wawa mukutetela wanji. Calondolozile ukuti, nga watetela wumwi lyo-o citakusula mukuti vino weyo umuntu wacisile vyalinji icetenye swinya citakulumile. Lelo nga twamutetela tukaleka ukupita ni cikonko swinya tukawa nu mutende.” Nga tukutetela awanawitu na wankazi lyo-o tukulanjizya ukuti twawakunda swinya lyo-o tukukolanya umukwasi witu e Yehova.

17. Ukulingana ne Mateyu 5:16, tungalanjizya wuli ukuti tukacindika Umukwasi witu uwa kwi yulu?

¹⁷ Tukasalifya nkaninye pa kuwa mu lupwa lwa wanawitu na wankazi wano wakundana insi yonsinye. Swinya tukalonda na wantu na wanji wize mukupepa kwa kwe Yehova. Acino tutazipizile ukucita icili consinye cino cingaleta umusamu pi zina lya kwe Yehova na pa wantu wakwe. Tukakwelezya na maka ukuwa ni miwele mizima pa kuti awantu wavwambisya ukusambilila icisinka ca mu Baibolo nu kuwombela Yehova.​—Wazyani Mateyu 5:16.

18. Acani cino cingatwavwa ukukanawa ni ntete pano tukuwizya?

¹⁸ Manda yamwi wangatuseka nu kutucuzya pa mulandu wakwivwila umukwasi witu uwakwi yulu. Nomba tungacita wuli nga ca kuti tukakwivwa intete ukunenako wanji pe vino twazumilamo. Tuzipizile ukusuwila ukuti e Yehova ne Yesu waliwatwavwa. E Yesu wawuzizye awasambilizi wakwe ukuti watazipizile ukusakamikwa pe vino walinji nukulanda ni nzila yakuvilandilamo. Amulandu ci? E Yesu walanzile ukuti “Ndi impindi  yiza yiza mulipwa icakuvwanga. Amuno amazwi yano muliwavwanga yasi amazwi yinu. Yalifuma mu muzimu wa Monsi [Mukwasi NWT] winu awino aliwavwanga mwa kwe mwemwe.”​—Mat. 10:19, 20.

19. Landani pa cakulolelako ce wumwi wino wawizizye mukusipa.

¹⁹ Lekani tetulandeko pe Robert. Pano wasambilizilevye icisinka ca mu Baibolo swinya lyo atani abatizwe nu kubatizwa, wamutwite ku cilye pa kuti akalondolole umulandu wuno atayisanzizyanga mu wusilika. Walondololezile wakapingula mukusipa ukuti atalondanga ukuyisanzya mu wusilika amuno wakunzile sana wamuyina. Wo-o vino wacisile walanjizizye apatiswenye ukuti wacindika nkaninye uluwali luno wawa nalo mwi wungwe lya kwe Yehova. Nomba walile walandavye wonye wo-o wakapingula wamukolowozizye mu wukali ukuti: “Awaweni wamunyonko?” E Robert atelenginyepo nukwelenganya pe lyo-o iwuzyo. Lelo paponye wizusile vino iwaliko lya wanda wulyanye lyalandanga. Lyalinji aliwaliko lya kwe Mateyu 12:50 pano pakati: “Wensi wino akucita ukulonda kwa kwe Tata wamwi yulu awili umwanawitu, awili nkazi yane, awili mayo.” Cingatenga pe yo-o impindi lyo apano e Robert wasambililavye e Baibolo. Umuzimu wa kwe Leza wamwavwizye ukwasuka lyo-o iwuzyo na mawuzyo yanji yano atenecelenga. Ukwasowa nu kuvwilika e Yehova afwile watemilwe nkaninye pe vino Robert wacisile! Wonye wo-o avino Yehova akayivwa nga ca kuti twasintilila sana pe weliwe nukuwizya mukusipa asamulandu nukuti ivintu viwifile.

20. Acani cino tuzipizile tuwalondesya ukucita? (Yohani 17:11, 15)

²⁰ Tukakwivwa icete nkaninye ukuwa mu lupwa muno mwawa awantu wano wakundana. Mwe lo-o ulupwa twawa nu mukwasi umuzima wino atanga alingane nu mukwasi uwili wensinye na wanawitu na wankazi wano watukunda. Acino lyonsinye tuzipizile twasalifya pe co-o. E Satana na wano wakamutunjilila wakakwelezya na maka ukuvulunganya ukulemenkana kuno twakwata na wanawitu na wankazi, nu kulenga twavwilika nga cakuti e Yehova watukunda. Wo-o awuli umulandu wuno e Yesu watupepezileko ku mukwasi witu ukuti atwalilile ukutucinjilila, pa kuti tutwalilile ukuwa awalemenkane mu lupwa lwitu. (Wazyani Yohani 17:11, 15.) E Yehova watwalilila ukwasuka lyo-o ipepo. Acino mutazipizile ukuvwilika nanti katicinye ukuti e Yehova watukunda swinya aliwatwavwa. Lekani tutwalilile ukupalamila nkaninye ku wanawitu na wankazi.