E Yehova wanenile awina Israeli ukuti wazipizile ukuwa awatele. Pakuwavwa ukuti wawe awatele wawanenile ukuti: “Chitazipa ukuya ukusonzya ivyawukwakwa ku wantu. Swinya chitazipa ukutalizya umuwuyo uwumi wakwe. Nenenye ne Mfumu e Leza.”—Lev. 19:2, 16.

Amazwi yakuti “chitazipa ukutalizya umuwuyo” wayapiliwula ngati amulumbe mu ciHeberi. Nomba uzye yakasula mwinye? Uwulondolozi wa ciYuda wuno wawa mwi buku lya kwe Levitikasi wukalanda ukuti: “Yo-o e vesi . . . yatamya nkaninye ukuyivwicisya pamulandu nu mulumbe wa ciHeberi wuno wawamo, wuno wapiliwula ukuti ‘utamwimilila, utakwimilila apafupi.’”

Awasambilile sana wamwi wakakwelenganya ukuti ya-a amazwi yalemenkana na mazwi yano yawa pa vesi 15 ayakuti: “Mutize muwapanzya uwuwi. Mutize muwavindilichizya umulanda pakupanzya amuwila kumuchindame, chazipila ukupanzya umuwuyo ndimuno imipanzizye yawela.” (Lev. 19:15) Nga vino cawa, lyo-o isundo lino likazanwa pa vesi  16 ilyakuti “ukutalizya umuwuyo”, lyasulanga mukuti awina Israeli watazipizile ukuwa nakapatulula mu vilye, mu mawukazi yano wacitanga namuzya ndupwa. Swinya watazipizile ukukanawa nicisinka pakutivye ivintu viwawazipila aweneco. Wonye wo-o avino nasweswenye tuzipizile ukucita. Nomba nanti ciwe wo-o kwawa inzila nayinjinye yino tungalondololelamo ya-a amazwi yano yawa pa vesi. 16.

Lekani tulande pamazwi yakutalicila yano yawa mu vesi 16. E Leza wapile awantu wakwe isundo lyakuti watazipizile ukulanda ivyawufi pe wanji pakutivye wawononele izina. Mwakwizuka ukuti ukononela wumwi izina kwawipa nkaninye ukucila na pa lwambo, nanti acakuti nulwambonye lukaleta intazi izivule. (Imilu. 10:19; Ekawi. 10:12-14; 1 Tim. 5:11-15; Jemu. 3:6) Ukononela wumwi izina kwasula mukulanda iviwipe pe weyo umuntu. Wino akakonona izina lya muntu winji akalanda iviwipe pe weyo umuntu nanti acakuti vino akulanda vingakomesya wino akulandapo. Izukani ukuti e Nabati wamupozile amawe panka wamukoma, pamulandu nu kuti wano wamuwifizyanga izina walanzile ivya wufi pe weliwe. (1 Izya. 21:8-13) Wonye avino nu muntu wino watemwa ukonona amazina ye wanji angasuka awakomesye, ngati avino niwaliko lya kwe Levitikasi 19:16 likalanda.

Cinji acakuti, ulupato lungalenga umuntu ukuwifya izina lya muntu winji. Pe 1 Yohani 3:15, pakati: “Wensi wino akapata umunyina wechikoma, mwamanya nukumanya kuno chikoma asi nuwumi wamuyayaya.” Pano Leza walanzile ukuti “chitazipila ukutalizya umuwuyo uwumi wakwe.” Walanzile nu kuti “Utize uwachitila umunyonko ichikonko mumwezo.”—Lev. 19:17.

Ukwasowa nukuvwilika ko-o akusunda ukwa maka nkaninye kuno tukazana pe Levitikasi 19:16. Fwandi tuzipizile twakwelezya na maka yitu yonsinye pakuti tutakwelenganya iviwipe pe wanji nukuwononela amazina. Amuno nga ‘tukutalizya winji’ ukupitila mukumononela izina pamulandu wawuzuwa nanti pa mulandu wakuti tusimulonda vye, lyo tukulanjizya apatisyenye ukuti twamupata. Swe wina Klistu tutazipizile ukuwa nu lupato kwe wanji.—Mat. 12:36, 37.