Uzye mwawazizye nkaninye e magazini ya Ulupungu lwa kwe Malonda iya nombanye? Mukwai, lolani nga ca kuti mungasuka amawuzyo yano yakonkapo:

Uzye amazwi yano yawa pe Jemusi 5:11 ayakuti e Yehova “awili wankumbu-nkumbu nuluse” yakatwavwa ukumanya cani?

Twamanya ukuti uluse luno Yehova wawa nalo aluno lukalenga awatutetela. E Jemusi 5:11 yikatwavwa ukumanya ukuti uluse luno wawa nalo lukalenga awatwavwa. Fwandi nasweswenye tukacita icete nkaninye ukumukolanya.—w21.01, ifwa. 21.

Amulandu ci wuno Yehova wawicilako wu mutwe?

Wacita wo-o pamulandu wakuti watukunda. Na co-o cikalenga awa mu lupwa lwa kwe Yehova wawa nu mutende nu kulemenkana. Wonsinye awa mu lupwa lwa kwe Yehova wano wakakonka lyo-o isundo wamanya wano wawa na maka yakutungulula na yakupingula pa vintu.—w21.02, ifwa. 3.

Amulandu ci wuno awina Klistu wazipizile ukucenjela pano wakuwomvya inzila zya kulanzyanizizyamo izya pa intaneti?

Nga cakuti wumwi wasolapo ukuwomvya inzila iyili yonsinye iyakulanzyanizizyamo na wamwi pa intaneti, azipizile ukucenjela nkaninye nukusola icete. Lelo ukucita wo-o kwatala maka maka nga cakuti mukuwomvya amawumba amakulu. (1 Tim. 5:13) Mukucita wo-o mwawa uwuwipe amuno pakawa ukusalanganya amalyasi yawufi swinya awantu wakawomvya awina Klistu wawuye kukuwapanjila indalama.—w21.03, ifwa. 31.

Amilandu ci yino yalenzile e Leza azumilizye umwana wakwe ukucula nu kufwa?

Ica kutalicila aca kuti, ukupamantilwa kwe Yesu pa cimuti kwalenzile ukuti atule awaYuda pa lutipo lwawo. (Gal. 3:10, 13) Umulandu waciti wili awa kuti, e Yehova wamupekanizizyanga ku mulimo wuno walinji nu kuwomba ku nkolelo uwa kuwa e Simapepo Mukulu. Nu mulandu wa citi tatu awa kuti, wo-o vino e Yesu watwalilizile ukuwa uwa cisinka mpaka ni mfwa ya kwe, calanjizizye apatiswenye ukuti umuntu angatwalilila ukuwa uwa cisinka asamulandu nukupita mu ntazi izikulu. (Job 1:9-11)—w21.04, amafwa. 16-17.

Mungacita wuli nga cakuti musizana awantu pa mang’anda pano muli mu mulimo wakuwizya?

Tuliwawizizya awantu awavule nga ca kuti tukuwatandalila impindi yino wakazanwa pa mang’anda. Mungelezya ukuwombelako ku vifulo ivilekane lekane. Swinya mungawomvyako ni nzila izilekane lekane izyakuwizizyamo ponga ngati, akulemba amakalata.—w21.05, amafwa 15-16.

Uzye e Paulo wasuzile mwinye pa kulanda ukuti: “Kuvyamasundo, nafwa amasundonye ayano yankoma”?—Gal. 2:19

Isundo lyalenzile cimanyikwe apatiswenye ukuti, awantu wano watapwililika watanga wakonke isundo mu kufikapo swinya lyatunguluzile na wina Israeli kwe Klistu. (Gal. 3:19, 24) Isundo nye lyo-o alino lyalenzile e Paulo azumile nu kusuwila Klistu. Fwandi e Paulo ‘wafwile ku masundo’ amuno walesile ukutungululwa ni sundo.—w21.06, ifwa. 31.

Uzye e Yehova wawa wuli acakulolelako kwe sweswe icakusipicizya?

E Yehova watwalilila ukusipicizya kukukwelengulwa kwi zina lyakwe, ukulwisya imitecele yakwe, wucipondoka wa wana wakwe, uwufi wa kwe Satana, ukulola awawomvi wakwe wakucula, ukufwilwa awantu wano wakunda, ulufyengo mu nsi, nukulola vino awantu wakakonona insi yino wapanga.—w21.07, amafwa. 9-12.

Tungasambililako vyani kukutekanya kwa kwe Yosefe?

Wasipicizizye pano wandume zyakwe wamucuzyanga. Swinya pano wamukazizye, wayile awamuwipizya uwufi uwukulu nkaninye nukumunyepa mu cifungo ku Egypt pamyaka imivule.—w21.08, ifwa. 12.

Akuyinganya kwa musango ci kuno kwawa pe Hagayi 2:6-9, 20-22?

Awamu mawuteko wakakana ukuteyelezya kwi lyasi lizima ilya Wufumu lino tukawizya, lelo awavule wakwiza mukumupepa kwa cisinka. Nombanye e Yehova wandi ayinganye imyiko yonsinye umuku wakulecelezya pano wandi azyonone.—w21.09, amafwa. 15-19.

Amulandu ci wuno tutazipizile ukutonta pano tukuwomba umulimo wakuwizya?

E Yehova akalola vino tukawombesya ukufika pano papelezile amaka yitu swinya akasecelela. Nga cakuti tutatonsile swinya tutakunenuka tuliwa nu wumi wamuyayaya.—w21.10, amafwa. 25-26.

Uzye iwaliko lya kwe Levitikasi 19 lingatwavwa wuli ukukonka ukusunda kuno kukati: “Ukuwa mwachita ivintu vyonsi ichete, muwe mwewatele”? (1 Pet. 1:15)

Ya-a amazwi yano yawa pe yo-o vesi yakolanako nayano yawa pe Levitikasi 19:2. Mu cipandwa 19 mwawa ivyakulolelako ivivule vino vingatwavwa ukumanya ivyakuwomvya amazwi yano yawa pe 1 Peter 1:15 mu mikalile yitu.—w21.12, amafwa. 3-4.