1. Aliwuzyo ci ncepamwi lino tungayikolowozya?

UZYE mukakwivwa intete nga mwelenganya pa nkondo ya Amargedoni, pa kusansa kwe Gogi wakuma Magogi, napakononwa kwamipepele yawufi? Uzye mukatela amuyikolowozyapo ukuti ‘Uzye ndikwanisya ukutwalilila ukuwa ni cisinka pano vyonsinye vyo-o ivyakutinya viliwacitika?’ Nga mukatela amwelenganyapo, lyo-o amazwi yano yali piwaliko pano pasintilizile icipande yano Yesu walanzile yandi yamyavwe nkaninye. E Yesu wanenile awasambilizi wakwe ukuti: “Mutaleka imyezo yinu iwatamika nukulwilwinta, Suwilanji.” (Yoha. 14:1) Isuwilo iliwome lilitwavwa ukuteka umwezo asa mulandu na vino vilitalika ukucitika kunkolelo.

2. Tungawomya wuli isuwilo litu, swinya avyani vino twandi tusambilile mwe co-o icipande?

² Ngatwelenganya pamelezyo yano twacimvya tungawa ni suwilo iliwome ilyakuti tulicimvya amelezyo nayanjinye yano tuliwapitamo ku nkolelo. Cinji acakuti nga twelenganya pe vino twacisile pakucimvya zyozyo intazi, tungalola na muno tuzipizile ukuzifya pakuti tutwalilile ukuwa ni suwilo iliwome. Nga cakuti twacimvya intazi iyili yonsinye isuwilo litu likawomelako. Na co-o cilitwavwa ukusipicizya intazi zino tulikwata kunkolelo. Mwe co-o icipande twandi tulande pa ntazi 4 zino awasambizi wakwe Yesu wapisilemo. Swinya twandi tulole navino zyawavwizye ukumanya muno wazipizile ukuzifya pakuti watwalilile ukuwa ni suwilo iliwome. Twandi tulole napa ntazi izikolaneko nazino naswe tungapitamo mwe ya-a manda navino zingatwavwa ukwizasipicizya intazi zino tulikwata ku nkolelo.

3. Uzye amazwi yano Yesu walanzile pe Mateyu 6:30, 33 yakatwavwa ukwivwicisya cani pi suwilo?

³ Acizima nkaninye umutwe walupwa ukuwavwambila umuci na wana ivyakulya ni vyakuzwala, nu mwakwikala. Lelo ase lyonsi  pano cikapepuka ukucita wo-o. Amuno impindi zimwi awanawitu nawa nkazi izyancito zikasila. Swinya nanti wawombesye wulinye wakapotwa ukuzana zinji. Newamwi wakakana ukutalika ukuwomba incito zino awina Klistu watanga wawombe. Nga cakuti ivyamusango wo-o vyatuciticila tuzipizile ukusuwila sana mwe Yehova. Ukumanya ukuti aliwatupa vyonsinye vino tukulonda mu lupwa lwitu. E Yesu walondololezile awasambilizi wakwe co-o icisinka pi lyasi lya pamwamba. (Wazyani Mateyu 6:30, 33.) Nga tutakuvwilika ukuti e Yehova atalitela atulecelezye, tuliwawika sana amano ku kumuwombela. Ngatwalola vino Yehova akutwavwa mwe vino tukulondekwa pakuti tutwalilile ukuwa nu wumi, tulipalamila nkaninye kwe weliwe swinya isuwilo litu liliwoma.

4-5. Acani cino cavwizye ulupwa lumwi luno lwasakamikwanga pamulandu wakukana kwata vino lwakawilanga mu wumi?

⁴ Lolani vino Yehova wavwizye ulupwa lumwi ku Venezuela wano wasakamikwanga pe vino walinji nu kucita pakuti wakwate vino vikalondekwa pakutwalilila ukuwa nu wumi. Pakutalika, ulupwa lwa Castro lwalinji ni ndalama iziyane izya kuwomvya pano wikalanga pa famu yawo. Nomba kwizile akwiza awonsi wamwi wano walinji ni mbundusi wano wizile awawawinga nukuwapoka impanga. E Miguel umukwasi waconsi walanzile ukuti: “Pe yo-o impindi tukalimavye pakacalo akatici kano wamwi watwazima. Cila wanda nga kwaca tukatalicila ukulenga Yehova ukuti atupe vino tukulonda mwe wowonye uwanda.” Ivintu vyatala nkaninye mwe lo-o ulupwa. Lelo nanti ciwe wo-o wasuwila nkaninye mwe Yehova ukuti wandi awa wasakamala nu kuwapa vyonsinye vino wakulonda pakuti watwalilie ukuwa nu wumi. Lo-o ulupwa lukazanwa lyonsinye mu kulongana nu kaya mu mulimo wakuwizya. Wawika umulimo wa kwe Yehova inkolelo swinya e Yehova akawapa vyonsinye vino wakulonda.

⁵ Pano e Miguel nu muci e Yurai wapitanga mu ntazi zyonsinyene zyo-o, wasintilizile sana pe Yehova ukuti wandi awa wasakamala. Impindi zimwi e Yehova wawomvyanga awanawitu nawa nkazi ukupa lo-o ulupwa ivintu vino lwalondanga nanti ukwavwa e Miguel ukuzana incito iyizima. Ne impindi yinji e Yehova wawomvizye Iofesi lya musambo ukupa lo-o ulupwa vino lwakawilanga. E Yehova asitela awalecelezye. Naco cafumamo acakuti isuwilo lye wonsinyene mulupwa lyawomelako. Pansizi yakusimika pe cimwi cino Yehova wawacitizile, umwana wawo umwanaci e Yoselin walanzile ukuti: “Cikambomelezya nkaninye ukulola vino Yehova watwavwa. We ciwuza wane swinya nsivwilika ukuti aliwanjavwa.” Walanzile nukuti: “Wo-o uwelezyo wuno twapisilemo mulupwa, wulitwavwa nu kusipicizya intazi zyonsinye zino tulisunkanya ku nkolelo.”

6. Mungawomya wuli isuwilo linu nga cakuti mukusowezya vimwi mu wumi?

⁶ Uzye imikaliile yinu yisyufile mu wumi? Nga vino cili, lyo-o mukupita mu ntazi. Lelo nanti mungapita mu vya musango, mungawomvya yonye impindi kukuwomya isuwilo linu. Muwapepa kwe Yehova, nukuwazya amazwi yano e Yesu walavwanzile pe Mateyu 6:25-34 nukwelenganyapo  sana. Mwakwelenganya napavyakulolelako vimwi vino vikalanzizya ukuti e Yehova akasakamala awawomvi wakwe wano wakawombesya mu mulimo wakwe. (1 Kor. 15:58) Ukucita wo-o kulilenga musuwile ukuti e Yehova alimyavwa wulyanye vino wavwizye wanji wano wapitanga mu ntazi izikolaneko nazino mukupitamo. Wamanya vino mukalonda swinya wamanya nivyakucita pakuti amipe vyo vyo ivintu. Nga mukulola vino Yehova akumyavwa mu wumi, isuwilo linu liliwomelako. Icakuti mulisipicizya ni ntazi izikulu zino mulisunkanya ku nkolelo.—Haba. 3:17, 18.

7. Ukulingana ne Mateyu 8:23-26, uzye ‘icimuza icikulu’ celezizye wuli isuwilo lya wasambi?

⁷ Wanda wumwi pano Yesu walinji na wasambilizi wakwe muwato, kwakatusile icimuza icikulu pa luzi. E Yesu wawomvizye yo-o impindi pakwavwa awasambilizi wakwe ukuti wazipizile ukuwomya isuwilo lyawo. (Wazyani Mateyu 8:23-26.) Icimuza cakalambine ica kuti na minzi yatalisile ukwinjila mu wato, lyo Yesu alazile. Awasambilizi wakwe walinji ni ntete icakuti wayile awamukatusya nu kumuwuzya ukuti awapususye. Nawe wawasusile ukuti: “Ngamuno chani chino muli nintete? Ye, mwachepa isuwilo wuli!” Wa-a awasambi wano walinji ni ntete wafwile wilusile ukuti e Yehova walinji na maka yakucinjilila e Yesu na wano walinji nawo. Uzye mukusambililako cani? Isuwilo lingatwavwa ukusipicizya vyonsinye ukutalicila pa cimuza icikulu ukufika na ku ntazi zino zyawa ngati ‘acimuza icikulu’

8-9. Uzye isuwilo lye Anel lyelezizwe wuli, swinya acani cino camwavwizye?

⁸ Lolani vino isuwilo lye nkazi Anel umusimbe uwaku Puerto Rico lyawomezileko pano wacimvizye uwelezyo ‘wacimuza icikulu’ cino caponile ku ncende kuno wikalilanga. Co-o icimuza cino wakakwita ukuti Hurricane Maria catalisile mu 2017. Swinya cononile ni ng’anda ye Anel. Asa co-o citupu, pamulandu nicimuza incito yino Anel wawombanga yasizile. Walanzile ukuti: “Pano napitanga mwezyonsinye zyo-o intazi nasakamikwanga nkaninye. Lelo nizile injiluka ukuti nzipizile ukusuwila sana mwe Yehova ukupitila mukupepa nukukanaleka amasakamika ukundesya ukucita cino nzipizile ukucita.”

⁹ E Anel walanzile ukuti icivwila camwavwizye ukusipicizya intazi yino wapitangamo. Watili: “Ukukonka vino iwungwe lya kwe Yehova lyanenanga ukucita, kwanjavwizye ukuteka umwezo. Swinya naweni na vino Yehova wanjavwanga ukuwomvya awanawitu nawa nkazi. Wambomelezyanga nu kumpa ivintu vino nalondekwanga pakuti ntwalilile ukuwa nuwumi .” Walanzile nukuti: “E Yehova wampanga ivivule ukucila na pe vino namulenganga. Swinya isuwilo lyane lyawomezileko nkaninye.”

10. Avyani vino muzipizile ukucita nga cakuti muli ni ntazi yino yili ngati ‘acimuza icikulu’?

¹⁰ Uzye mukupita mu ntazi pamulandu wakuti kuno mwikalila kwapisile ‘icimuza icikulu’? Nanti uzye mukupita mu ntazi yino yili ngati ‘acimuza icikulu’ ponga ngati akulwalilila kuno kwalenga muwasakamikwa? Kweni mpindi zimwi mungasakamikwa, lelo mutazipizile ukuleka amasakamika yamilesye ukusuwila Yehova.  Mwapepa kwe Yehova ukufuma pansi ya mwezo. Mwawomya isuwilo linu ukupitila mukwelenganya pe vino Yehova wamyavwile ku nsizi. (Amalu. 77:11, 12) Nga mukucita wo-o, mungasuwila ukuti e Yehova atalitela amilecelezye pe yo-o impindi na kunkolelo.

11. Amulandu ci wuno tuzipizile ukuwela nicivwila kwe wano wakatungulula?

¹¹ Acani cinji cino cingamyavwa ukusipicizya intazi? Ndi vino Anel walanzile, icivwila cingamyavwa. Mwasuwila nkaninye wano e Yehova ne Yesu wasuwila. Manda yamwi wano wakatungulula wangapingulapo ukuti tucite icintu cimwi cino sweswe tukulola ukuti citacindime nu kucindama. Lelo nanti ciwe wo-o, e Yehova akapaala wano wawa nicivwila. Twalola vino Baibolo yikalanda, na vino ivyakulolelako vya wawomvi wa kwe Leza awacisinka vikalanjizya ukuti icivwila cikapususya. (Ukuf. 14:1-4; 2 Imila. 20:17) Mwakwelenganyapo sana pevyo ivyakulolelako. Nga mukucita wo-o cilimyavwa ukuwawombela ponga ni wungwe pe yo-o impindi na kunkolelo. (Hebe. 13:17) Mutaliwatiina nanti awucuzi wukulunye wuno wandi wize nombanye.—Imilu. 3:25.

12. Ukulingana ne Luka 18:1-8, uzye isuwilo nu kusipicizya ulufyengo vyalemenkana wuli?

¹² E Yesu wamanyile ukuti ulufyengo lwalinji nu kwelezya isuwilo lya wasambilizi wakwe. Pakuwavwa ukusipicizya wo-o uwelezyo, walanzile pa cilanjililo cino calembwa mwi buku lya kwe Luka. Walanzile pe mukamfwilwa wino watwalilizilevye ukulila kwe kapingula wino atapingulanga mu wulungamane. We-e mukamfwilwa wamanyile ukuti ngawatwalilila ukupapata, e kapingula walinji nu kumwavwa. We-e e kapingula wasusile wamwivwila uluse nu kumwavwa. Tukusambililako cani? E Yehova wawa nu mulinganya. E Yesu walanzile ukuti: “Wuzye Leza atalivwanjila awantu wakwe wano wakumulilila umusanya nuwusiku?” (Wazyani Luka 18:1-8.) Walanzile nu kuti: “Wuzye pano Umwana Muntu wizawiza alizana isuwilo munsi?” Nga cakuti tutakunenuka swinya tutekinye pano tukupita mu ntazi, tulilanjizya ukuti twawa nisuwilo iliwome ngati we mukamfwilwa. Tutaliwavwilika nanti katicinye ukuti e Yehova aliwatwavwa pe yo-o impindi nakunkolelo. Swinya tulisuwila nukuti ipepo lyawa na maka nkaninye. Manda yamwi ipepo litu ncepamwi lingasukwa ukulingana navino tutenecelanga.

13. Uzye ipepo lyavwizye wuli ulupwa lwe wano wacuzyanga?

¹³ Teyelenganyani pe vino vyaciticizile e nkazi Vero, wino akakwikala ku Democratic Republic of the Congo. E Vero nu mulume wino asa Nte ya kwe Yehova nu mwana wawo umukazyana uwa myaka 15, wasamalanga ukufuma mukaya muno wikalanga pano awasilika wawasamazizye. Pano wasamalanga wizile awazana pano awasilika wacinzile swinya wawalemile nu kuwatinya ukuti wandi wawakome. E Vero watalisile ukulila. Lelo umwana wakwe watalisile ukumuwomelezya nu kupepa mukupongomoka, ko-o lyo akunyocezyapo imiku imivule ukulumbula izina lya kwe Yehova. Pano we-e umwana wamazilevye ukupepa, e songo wawasilika wamukolowozizye  ukuti , “We kamukazyana weni wakusambilizya ukupepa?” Nawe wasusile ukuti, “E mama awino wansambilizya ukupepa ukulingana na vino iwaliko lya kwe Mateyu 6:9-13 likalanda.” E songo wawasilika nawe walanzile ukuti, “Kamukazyana pitani umutende nawakwasi wako, swinya e Yehova Leza winu amicinjilile”

14. Acani cino cingelezya isuwilo litu, swinya acani cino cingatwavwa ukusipicizya?

¹⁴ Vyo-o ivyakulolelako vikutwavwavye ukumanya ukuti ipepo lyacindama nkaninye. Nomba avyani vino muzipizile ukucita nga cakuti ipepo linu litasusilwe zuwa swinya mu nzila yino mwenecelanga? Muzipizile ukutwalilila ukupepa ngati we mukamfwilwa uwa mucilanjililo ca kwe Yesu, nu kusuwila ukuti e Yehova atalimisya mwenga. Aliyasuka ipepo linu pa mpindi iyiyane. Swinya muzipizile ukusuwila ukuti aliwomvya inzila iyili yonsinye pa kwasuka ipepo linu. Lyonsinye mwapepa kwe Yehova ukuti awamipa umuzimu wakwe uwutele. (Flpi. 4:13) Mwakwizuka ukuti e Yehova alimipaala swinya mutaliwakwizukapo ni ntazi iyili yonsinyene yino mukapitamo pe yo-o impindi. Nga cakuti e Yehova wamyavwa ukusipicizya intazi yino mu kupitamo pe yo-o impindi, isuwilo linu liliwomelako. Swinya mulisipicizya intazi izivule zino mulisunkanya ku nkolelo.—1 Pet. 1:6, 7.

15. Ukulingana ne Mateyu 17:19, 20, antazi ci zino awasambilizi wakwe Yesu wapisilemo?

¹⁵ E Yesu wasambilizizye awasambilizi wakwe ukuti, isuwilo lyalinji nu kuwavwa ukucimvya intazi. (Wazyani Mateyu 17:19, 20.) Impindi yimwi awasambi wa kwe Yesu waposilwe ukuwinga ivimizimu viwipe, nanti acakuti wacitanga wo-o impindi mvule. Acani calenzile wapotwe? E Yesu walanzile ukuti wazipizile ukuwa ni suwilo iliwome. Wawanenile nu kuti nga cakuti wawa ni suwilo iliwome walinji nu kucimvya intazi inkulu zino zyalinji ngati amyamba. Nasweswenye mwe ya-a manda tungapita mu ntazi inkulu zino zingawa ngati amyamba.

16. Acani cavwizye e Geydi ukusipicizya pano wamukomezile e wakwakwe?

¹⁶ Lolani cino caciticizile e nkazi Geydi uwaku Guatemala. Pano we-e nkazi ne wakwakwe Edi wafumanga mukulongana, e Edi wizile awamukoma kuvipondo. Uzye isuwilo lyavwizye wuli e Geydi ukusipicizya yo-o intazi? Walanzile ukuti: “Ipepo likanjavwa ukusumbila ivisendo vyane pe Yehova. Na co-o cikalenga imba nu mutende. Nalola vino Yehova akansakamala ukupitila mwa lupwa ni viwuza mwi wungwe. Ukuwa umupamviwe mu mulimo wa kwe Yehova kukanjavwa ukukanasakamikwa, swinya kukanjavwa ukutwalilila ukusipicizya nu kukanasakamala pa wanda wa mutondo. Pansizi yakupita mu ntazi zyonsinyene zyo-o, nasuwila ukuti e Yehova, e Yesu, ni wungwe nga wanjavwa, ndisipicizya intazi nazinjinyene zino ndisunkanya ku nkolelo.”

17. Tungacita wuli nga cakuti twawa ni ntazi iyikulu yino yili ngati amwamba?

¹⁷ Uzye mukulosya lupwa lwinu wino wafwile? Nga vino cili, mwapawulako impindi iyakuwomya isuwilo linu pa kuzyulupuka. Ukupitila mukuwazya  amalyasi ya mu Baibolo pe wano wazyulupusile. Uzye muli nu wulanda pamulandu wakuti e lupwa lwinu wawinzilwe? Mwawazya Baibolo pakuti muyisinincizizye mwe weneco ukuti ukusunda kwe Yehova kukalenga ivintu ukutuzipila. Mwawomvya intazi iyili yonsinyene yino mukupitamo kukuwomya isuwilo linu. Mwanena Yehova vyonsinye vino vili kumwezo winu. Mutayipawulaa, lelo muwawa ponga nawanawitu nawa nkazi. (Imilu. 18:1) Mwacita ivili vyonsinye vino vingalenga musipicizye, nanti acakuti pano mukuvicita vingamizusya pe vino vimiciticizile. (Amalu. 126:5, 6) Mwazanwa mukulongana lyonsinye, ukuyisambilizya Baibolo, nga nu kuwombako umulimo wakuwizya. Mwakwelenganya sana pa malayo ya ku nkolelo yano Yehova watulaya. Pano mukwelenganya pe vino Yehova wamyavwa, isuwilo linu liliwaya likuwomelako.

18. Avyani vino mungacita nga cakuti mwazana ukuti isuwilo linu litonsile?

¹⁸ Nga cakuti muli ni ntazi pe yo-o mpindi nanti mwalinji ni ntazi ku nsizi zino zyalenzile isuwilo linu ukutonta, mutazipizile ukuyivwa uwuwi. Mwalola ukuti yoyonye ayili impindi yakuwomya isuwilo linu. Namwemwenye mungalenga ndi vino awatumwa wa kwe Yesu walenzile ukuti: “Kuzya isuwilo litu.” (Luk. 17:5) Swinya mwakwelenganya sana napa vyakulolelako vino tulanzilepo mwe co-o icipande. Mwakwizuka lyonsinyene vino Yehova wamyavwile, ngati we Miguel ne Yurai. Mwapepa lyonsinyene kwe Yehova ukuti amyavwe maka maka pano muli ni ntazi izikulu, ngati avino umwana Vero umukazyana ne Anel wacisile. Mwakwizuka ukuti e Yehova angamipa vino mukukawila mu wumi ukupitila mwa lupwa ni viwuza, ngati avino wacisile kwe Geydi. Nga cakuti mwasuwila ukuti e Yehova wandi awamyavwa pa ntazi zino mukupitamo pe yo-o impindi, na kunkolelonye nga mwiza mwasunkanya intazi, mutaliwavwilika nanti katicinye ukuti e Yehova wandi amyavwe.

19. Acani cino Yesu atavwilikanga, swinya acani cino naswenye tutazipizile ukuvwilika?

¹⁹ E Yesu wavwizye awasambilizi wakwe ukumanya muno wazipizile ukuzifya pakuti wawe ni suwilo iliwome. Lelo nanti ciwe wo-o, atavwilikanga nanti katicinye ukuti awasambilizi wakwe walinji nu kucimvya intazi izili zyonsinye zino walinji nu kupitamo nga cakuti Yehova wawavwa. (Yoha. 14:1; 16:33) E Yesu wamanyile ukuti isuwilo iliwome lyalinji nu kwavwa iwumba likulu ukucimvya intazi zino walinji nu kusunkanya pa wucuzi wukulu. (Ukuwu. 7:9, 14) Uzye namwemwe muliwapo pe wa-a? Pamulandu wakuti e Yehova wawa nu luse, na mwewenye muliwapo nga cakuti mukuwombesya peyonye impindi ukuwomya isuwilo linu!—Hebe. 10:39.