Wakawizya wazipizile ukuwa awasipe pakuwomba umulimo wakuwizya ilandwe zima. Wazipizile ukuwawizizya “awalanda ilandwe zima”, nu kulanda “ukuti impindi yafika yino Imfumu e Leza alitulila awantu wakwe” ku walwani wawo.

Umwanawitu J H.  Hoskin wino wikalanga ku Canada, watwalilizile ukuwizya mukusipa asamulandu nu kumucuzya. Impindi yimwi mu 1921 pano walinji mu mulimo, wazanile e simapepo wa ku Methodist. Pakutalika ukulanzyanya nawe e simapepo, umwanawitu walanzile amazwi yakuti: “Cingazipa sana ukuti tulanzyanyeko icete ivya mu Baibolo. Nanti acakuti pano tukulanzyanya tungapusanako mwe vimwi, cazipa tulanzyanye mu mutende swinya tutwalilile ukuwa iviwuza.” Lelo vyo-o vitacitisile. Umwanawitu  Hoskin walanzile nukuti: “Twalile twalanzyanyavye pa mamineti matici, we-e simapepo wumile ku cisakati ni cikalazi, icakuti naweni ngati igilasi lyapacisakati lyafwantika.”

Wakalifile nu kulanda ukuti “Nga cani cino utanga uye mukusambilizya awantu wano asa wina Klistu?” Umwanawitu Hoskin atatolelezile cimwi. Nomba pano wafumanga pe yo-o ing’anda, wapisile akwelenganya ukuti, ‘Nga vyo-o nawenye akulanjizya ukuti asa mwina Klistu.’

Uwanda wuno wakonsilepo pano we-e simapepo wapepesyanga mu calici cakwe, watalisile ukulanda iviwipe pa mwanawitu Hoskin. E Hoskin walanzile ukuti “Wanenile awamu calici cakwe ukuti nalinji ne mufi umukulu pa wafi wonsinye wano wayilepo mwe lyo-o itawuni. Swinya nayine vye ukuti wankome.” Co-o citalenzile umwanawitu aleke ukuwizya. Watwalilizile ukuwomba swinya walanzyanyanga na wantu awavule. Umwanawitu Hoskin watili: “Nayitopwanga nkaninye ukuwomba umulimo wakuwizya kwe yo-o incende. Icakuti wamwi wampundililanga nu kumpundilila ukuti, ‘Namanya ukuti ukawomba umulimo wa kwe Leza!’ Wanenanga nu kuti wandi wampa vyonsinye vino nkulonda.”

Pakuti awasambi we Baibolo wavwe awantu ukwivwicisya ivya mu Baibolo, wafumizye ibuku lya kuti The Golden Age, * lino peyo impindi tukakwita ukuti e Loleni! Mwe lyo-o ibuku mwalinji amawuzyo ni vyasuko. Mwalinji na mawuzyo ya mu Baibolo aya wana, yano awakwasi walanzyanyanga na wana wawo. Awakwasi “wakolowozyanga awana wawo ya-a amawuzyo nu kuwavwa ukuzana ivyasuko mu Baibolo.” Wawawuzyanga amawuzyo ndi vyo: “Uzye mu Baibolo mwawa  amabuku yanga?” Ya-a amawuzyo yawavwanga ukusambilila vimwi ivipepuke pe Baibolo. Ne amawuzyo yanji ndi vyo ilya kuti: “Uzye awina Klistu wonsinye wazipizile ukwenecela ukuwacuzya?,” yapekanizizyanga awacitici ukuwa wakawizya awasipe.

Kwalinji amawuzyo ya mu Baibolo ni vyasuko vino vyavwanga na walyanye wano wamanyile ivivule pe Baibolo. Ivyasuko wavizananga mwi buku lya kutalicila ilya masambililo ya mu Baibolo lino watinji Studies in the Scriptures. Awantu awavule wasambilizile ivivule kwe ya-a amawuzyo. Lelo mwi buku lyakuti The Golden Age lino lyafumile pa 21 December  1921 mwalinji ica kuwilizya cakuti ya-a amawuzyo yandi yaleke ukufuma. Amulandu ci?

Awanawitu wano watungululanga wilusile ukuti awantu wavwambikwanga ukusambilila pi lyasi lyonga na lyonga ilya mu Baibolo katici katici. Acino mu November 1921, wizile awafumya ibuku lyakuti The Harp of God. Wonsinye wano wavwambanga ukusambilila, wizile awatwalilila ukusambilila Baibolo mwi buku lya kuti The Harp of God. Mwe lyo-o isambililo wayisambilizyanga pa lwawo. Lyo-o ibuku lyavwizye awantu ukumanya ukuti “e Leza akalonda awantu wize wawe nu wumi wamuyayaya.” Nomba uzye lyonye ibuku waliwomvyanga wuli?

Nga cakuti umuntu wazumila ukusenda lyo-o ibuku, wamupanga ka kadi akatici pano wawicizile lyankani amafwa yano azipizile ukuya mukuwazya mwe lilyanye ibuku. Pa nsizi ye sabata wenga wamutumilanga ka kadi pano pawanga amawuzyo amavule pe vino wawazizye. Yo-o kadi yalecelezyanga namafwa yi buku yano azipizile ukuwazya e sabata wino akonsilepo.

Cila sabata, pa masabata 12, umusambi we Baibolo wapocelelanga e kadi iyipya kuwa mwi wungwe lino lyalinji mupipi na kuno wikalilanga. Ya-a ama kadi wapangavye wasongo na wano watakweti amaka yakuya ku ng’anda ni ng’anda. Ku cakulolelako e, nkazi, Anna K. Gardner, wino wikalanga mu Millvale ku Pennsylvania, U.S.A., watili: “Pano ibuku lya kuti The Harp of God lyafumilevye, lyalenzile e songo wane umwanaci e Thayle wino wasyupikanga ukupita, awe nu longo ulwa kuti awatumako ama kadi ya mawuzyo ku wantu, cila sabata.” Vyo cawanga, nga cakuti wumwi wamala ukusambilila. Uwa mwi wungwe wayanga mukumutandalila pa kuti amwavwe ukumanyilapo na vinji pavya mu Baibolo.

Pano umwaka wayanga mukusila, Umwanawitu J.F.  Rutherford watumile kalata ku mawungwe yonsinye. Mwe yo-o kalata walanzile ukuti “umulimo wakuwizya pa Wufumu wawomvilwe nkaninye mwe wo-o umwaka. Swinya awasambi we Baibolo wavwizye awantu awavule nkaninyene ukucila pa myaka yonsinye iya ku nsizi.” Walunzilepo nu kuti: “Kuli imilimo imivule na yinjinye yino yikulondeka ukuwombwa. Womelezyani na wanjinye ukuwombako wo-o umulimo uwucindame.” Cikalanjizya apatiswenye ukuti awasambi we Baibolo wakonsile vino umwanawitu wawanenile ukucita. Amuno mu 1922, awanawitu wawomvile umulimo wakuwizya pa Wufumu mukusipa vino wasitela wawombepo imyaka yonsinye.