1. Amulandu ci wuno tukakwivwila icete ukuwa Inte zya kwe Yehova?

TUKAKWIVWA icete nkaninye ukuwa Inte zya kwe Yehova! Amuno tukakwitilwa pi zina lyakwe, tukalanjizya ukuti swe Nte zyakwe ukupitila mukuwizya nu kusambilizya. Ngatwavwa wino wawa nu mwezo ‘wuno wukalonda ukupusuka’ tukasecelela nkaninye. (Imili. 13:48) Tukakwivwa wulyanye vino Yesu wayivwile. ‘Wasecelezile nkaninye’ pano awasambilizi wakwe wamusimicizile ivizima vino wazanile mu mulimo wakuwizya.​—Luk. 10:1, 17, 21.

2. Tungalanjizya wuli ukuti twacindamika umulimo wa kuwizya?

² Tukalola umulimo wakuwizya ukuti wacindama nkaninye. Umutumwa e Paulo wawomelezizye Timote ukuti: “Uwayilolela we mwenecho, swinya uwalola nimisambilizizye yako.” Watili nukuti: “Ndi ukuchita wowonye apano ungayitula uyize utule nawanji wano wakukwivwa.” (1 Tim. 4:16) Acino wo-o umulimo wuno tukawomba wukapususya awantu. Tukayisakamala sweweneco amuno swewatekwa wa Wufumu wa kwe Leza. Tukacita ivintu vino vingacindika Yehova nukulanjizya ukuti twasuwila ilyasi ilizima lino tukawizya. (Flpi. 1:27) Tukalanjizya ukuti tukusakamala imisambilizizye yitu nga cakuti tukuyipekanizizya lyankani pano tutani tuye mu mulimo, nu kupepa ukuti e Yehova atwavwe pano tutani tutalike ukuwizya.

3. Avyani vino tungazana pano tukuwomba umulimo wa kuwizya pa Wufumu? Landani pa cakulolelako.

³ Nanti acakuti tungawombesya mu mulimo wakuwizya, tungazana ukuti awatici vye awano wangazumila ukwivwa kwi lyasi ilizima lino tukawizya pa Wufumu. Yelenganyani pe vino vyaciticizile Umwanawitu Georg Lindal. We-e umwanawitu wawomvile umulimo wa kuwizya wenganye mu ncende izilekane lekane izya Iceland ukufuma mu 1929 ukufika mu 1947. Nanti acakuti wapile awantu awavule nkaninye amabuku, kusi nanti wenganye pe wa-a wino wazumizile ukuwa Inte ya kwe Yehova. Walemvile ukuti: “Wamwi kwe yo-o incende watazumila mwe Baibolo, lelo awavule wasilonda vye ukuteyelezya kwi lyasi ilizima.” Napano watumile wamishonari wano wafumile kwi sukulu lya Gilead ukuya  mukuwombela ko-o, papisile imyaka 9 pakuti wamwi wasolepo ukuyipa nu kubatizwa. *

4. Tungayivwa wuli ngacakuti awantu wakukana ukuteyelezya kwi lyasi ilizima?

⁴ Cikatuluma nkaninye nga cakuti awantu wakukana ukuteyelezya kwi lyasi ilizima. Tungayivwa ndivino Paulo wayivwile pano walinji “namalanda makulu, nichikonko” pamulandu wakuti awaYuda wakananga ukuzumila ukuti e Yesu awili e Mesiya. (Roma. 9:1-3) Pamwi mukasambilizya wumwi e Baibolo. Swinya mukakwelezya na maka ukuwa mwe wakasambilizya awazima. Mukamupepelako nukumupepela ukuti e Yehova awamwavwa. Nomba mwazana ukuti asa mulandu na vyonsinye vyo-o vino mukacita, cawa vye nge mukapala mukokwa amamba, asiwomvya vino akusambilila swinya musozilepo nu kuleka ukumutungulula isambililo lye Baibolo. Nanti pamwi musitela mwavwepo uwili wensinye ukulunduluka ukufika ku lubatizyo. Uzye muzipizile ukuyivwa uwuwi nu kwelenganya ukuti e Yehova atakupala umulimo wa kuwizya wuno mukawomba? Mwe co-o icipande twandi twasuke amawuzyo yawili: (1) Acani cino cikalanjizya ukuti tukuwomba icete umulimo wakuwizya? (2) Avyani vino tuzipizile ukwenecela pano tukuwizya?

5. Amulanduci wuno asawelyonsi pano tukazana vino tukwenecela mwe wo-o umulimo wakwe Yehova?

⁵ E Baibolo yikalanda pamuntu wino akacita ukulonda kwa kwe Leza ukuti: “Umuntunyene weyo akachita vyonsi ichete.” (Amalu. 1:3) Co-o citakusula mukuti vyonsinyene vino tukawomba mu mulimo wa kwe Yehova viliwawa ukulingana na vino tukwenecela. Amuno pa mulandu wakuti tutapwililika, uwumi witu ‘wizulamo ni ntazi.’ (Job 14:1) Swinya wano wakatucuzya wangatulesya ukuwomba umulimo wakuwizya. (1 Kor. 16:9; 1 Tes. 2:18) Fwandi akuvyani kuno Yehova akamanyila ukuti tukuwombesya mu mulimo wakuwizya? Lekani tulole ivisinka vimwi ivya masundo ya mu Baibolo vino vyandi vitwavwe ukwasuka lyo-o iwuzyo.

6. Avyani vino vikalenga Yehova ukusecelela pa mulimo witu?

⁶ E Yehova akalola vyo tukawombesya na vyo tukasipicizya. Cino cikalenga Yehova ukusecelela mu mulimo witu asa pe vyo vikafumamo lelo ape vino tukatwalilila ukuwa awacincile pa mulandu na vyo twamukunda. E Paulo walemvile ukuti: “Leza asi ninkota, ataliyiwilila vino mwawomba, nanta lukundo luno mwalanjizya muno a lizina lyakwe, kuno mukupyunjila watele, ndivino mucili mukucita.” (Hebe. 6:10) E Yehova asikwiwilila ulukundo lwitu na vino tukawomba, asa mulandu nukuti tutavwapo wumwi ukulunduluka ukufika na ku lubatizyo. Amazwi yano Paulo wanenile awina Korinti, yakulanda pe mwemwenye. Acino nanti mukuwombesya kwinu mutafumile vino mwenecelanga, muwakwizuka ukuti: “Ukuzunkuntika kwinu [ukuwombesya] mu Mfumu kusi akwavye.”​—1 Kor. 15:58.

7. Acani cino tungasambililako kwe vino umutumwa Paulo walanzile pa mulimo wakuwizya?

⁷ E Paulo wawombanga icete nkaninye  umulimo wakwe uwa wumishonari. Wapanzile na mawungwe amapya mu misumba imivule. Nomba pano wamwi watalisile ukumulengulula nu kulanda ukuti atamanya ukusambilizya, atatalisile ukuyilumvya nukupenda awantu wano wavwizye ukuwa awina Klistu. Lelo walanzile vye ukuti: “Nawombesya nkaninye.” (2 Kor. 11:23) Wulyanye vino calinji kwe Paulo, namwenye mwakwizuka ukuti e Yehova akalola vyo mukawombesya na vyo mukasipicizya.

8. Avyani vino tuzipizile twakwizuka pa mulimo witu?

⁸ Umulimo witu wukasecelesya Yehova. Yesu watumile awasambi wakwe 70 ukuya mukuwizya pa Wufumu. Wa-a awasambi wanyosile “nichimwemwe.” Acani calenzile ukuti wawe ni nsansa? Wanenile e Yesu ukuti: “Nimizimu miwipenye yatutontelanga ndi twayikalipilila mwizina lyako!” Lelo e Yesu pakuwalunjika walanzile ukuti: “Ukuwa mutize muwazewela muno imizimu miwipe yikuwatina, ukuwa sechelanji amuno amazina yinu yawalikwa mwiyulu.” (Luk. 10:17-20) Wawanenile wo-o, amuno wamanyile ukuti ase lyonsi pano waliwazana ivya musango wo-o mu mulimo wa kuwizya. Tutamanya nu kumanya wano wizile awawa awina Klistu pe wa-a wano awasambilizi wawizizizye. Fwandi cino calinji nu kulenga wasecelela nkani asa kuvula kwe wano wawizizyanga. Akumanya ukuti Yehova wivwanga icete pa mulimo wawo.

9. Uzye pa Wagalatiya 6:7-9 pakati avyani vino vilifumamo nga tutalesile ukuwomba umulimo wakuwizya?

⁹ Tuliwa nu wumi wa muyayaya nga tutanenusile. Nga tukuwombesya mu mulimo wakuwizya nu kusambilizya pa Wufumu lyo-o ‘tukutandila ku Muzimu.’ Amulandu ci wuno tungalandila wo-o? Amuno nga tukuwomba umulimo wakuwizya, lyo tukulanjizya ukuti tukulonda umuzimu uwutele watutungulula. E Yehova watulaya ukuti nga ‘tutatonsile’ alitupa uwumi wamuyayaya. Alipa swensinye co-o icilambu nampo nga twavwapo wumwi ukufika ku lubatizyo nanti awe.​—Wazyani Wagalatiya 6:7-9.

10. Amulandu ci wuno wamwi wakazumilila ne wamwi wakakana ukuteyelezya kwi lyasi ilizima lino tukawawizizya?

¹⁰ Vino vyawa mu mwezo wa muntu avino vikalenga akane nanti ukuzumila. E Yesu walondolozile co-o icisinka mu cilanjililo ce wino watanzile imbeyu pa misili imilekane lekane. Lelo imbeyu vye zino zyalinji pa musili uwuzima azino zyamezile. (Luk. 8:5-8) E Yesu walanzile ukuti imisili imilekane lekane ikakwimililako awantu wano imyezo yawo yikapingulapo ivipusane pusane nga cakuti twawawizizya “amazwi yakwe Leza.” (Luk. 8:11-15) Wulyanye vino katanda wa mbeyu atawa na maka ya kumezya vino watanda, avino nasweswenye tutawa na maka pa myezo ye wano tukawizizya. Umulimo witu awakutwalilila vye ukukomela imbeyu zya Wufumu. Umutumwa Paulo wavwanzile ukuti, “Leza alilambula wilamuntu ndimuno imilimo yakwe yawela,” asakulingana na vino vikufuma ku mulimo wakwe.​—1 Kor. 3:8.

11. Amulandu ci wuno e Yehova wasecelezile mwe vino Noa wawomvile nanti acakuti awantu wakanile ukumwivwa? (Lolani icikope pa nkupo.)

¹¹ Ukufuma nakali awawomvi wa kwe Yehova wawizizyanga awantu wano wakananga ukuteyelezya. Ku cakulolelako e Noa, walinji amuntu wino “wawizyanga ivyawulungamane.” (2 Pet. 2:5) Wawomvile wo-o umulimo imyaka mupipi ne 40 nanti 50. E Noa afwile wenecelanga ukuti awantu walinji nukuteyelezya kwe weliwe. Lelo e Yehova asitela alandepo vino vyalanjizyanga ukuti awantu walinji nu kumwivwa pano akuwasoka. Cino wamunenile vye pano wamulondolelanga ivya kuzenga uwato acakuti: “Uliyinjila mu wato, wewe na wanako, nu wakwako na wanyokovyala wa muka wanako.” (Inta. 6:18) Swinya pano wamunenanga vino uwato walinji nukuwa, e Noa afwile wilusile ukuti asa wavule wano walinji nu kumwivwa. Amuno uwato nga wutayanile. (Inta. 6:15) Ndi vino twamanya kutalinji  nanti wumwinye wino wateyelezizye kwe Noa. (Inta. 7:7) Uzye e Yehova waweni ukuti e Noa atawomvile nkani umulimo wakuwizya? Awe mukwai! E Yehova wasecelezile nkaninye pe vino Noa wawomvile, amuno wakonsile vyonsinye vino e Yehova wamunenile ukucita.​—Inta. 6:22.

12. Cani calenzile e Jeremiya awasecelela asamulandu nukuti awantu wa mucuzyanga nukukana ukuteyelezya kwe weliwe?

¹² E kasesema Jeremiya afwile wawomvile umulimo wakuwizya ukucila pa myaka 40 asamulandu nu kuti watamwivwanga swinya wamucuzyanga. ‘Intusi zino wamutukanga na vino wamukalipilanga’ vyalenzile afupuke awavwamba nu kuleka umulimo wuno Yehova wamupile. (Jere. 20:8, 9) Icizima acakuti atanenusile! Acani cino camwavwizye ukutwalilila ukusecelela mu mulimo wakwe? Akuwika amano ku vintu viwili ivicindame. Ica kutalicila acakuti, amazwi yano wanenanga awantu yawapanga ‘impindi ya kunkolelo iyizima ni suwilo.’ (Jere. 29:11) Cinji acakuti wamanyile ukuti e Yehova awino wamusozile ukuti awamulandilako ku wantu nu kuwasambilizya. (Jere. 15:16) Na sweswenye tukasambilizya awantu pe vino Yehova aliwacitila kunkolelo, swinya tukakwitilwa na pi zina lyakwe. Nga twawika amano pe vyo-o ivintu viwili ivicindame, tuliwasecelela asamulandu awantu wakane nanti wazumile ukuteyelezya.

13. Tukasambililako cani kucilanjililo ca kwe Yesu cino cawa pe Mar. 4:26-29?

¹³ Pakapita impindi pakuti wumwi awe ni suwilo. E Yesu walondolozile co-o icisinka mucilanjililo ce katanda wa mbeyu wino wasile watanda aya na mukulala. (Wazyani Marko 4:26-29.) Zyo-o imbeyu zyakulanga katici katici. E katanda atakwetipo amaka yakucita icili consinye cino calinji nu kulenga zikule zuwa. Wonye wo-o avino nasweswenye pangapita impindi pakuti twize tulole kuno umusambi akuwomvya vino akusambilila. Icisinka aca kuti tutanga tupaticizye umusambi ukulunduluka zuwa, wulyanyene vino umulimi atange apaticizye ivilimwa ukukula zuwa ukulingana na vino akulonda. Acino mutazipizile ukufupuka nanti ukunenuka nga mwalola ukuti umusambi asa kulunduluka ukulingana na vino mwenecelanga. Umulimo wakupanga awasambi wawa ngati awulimi wuno wukalondeka ukutekanya.​—Jemu. 5:7, 8.

14. Acakulolelako ci cino cikulanjizya ukuti pangapita impindi pakuti awantu watalike ukuteyelezya pano tukuwawizizya?

¹⁴ Muncende zimwi pakapita impindi pakuti wumwi alunduluke nukupingulapo ukubatizwa. Katulande pankazi wawili, e Gladys ne Ruby Allen. Wa-a wankazi wawili awa ng’anda yonganye. Mu 1959 wawatumile ukuya mukuwombela wu payiniya wampindi zyonsi mu citungu ca Canada ku Quebec. * Awantu wakananga ukwivwa kwi lyasi lizima pa mulandu wakutina wasimapepo na winamupalamano wawo. E Gladys walanzile ukuti: “Twawombanga ku ng’anda ni ng’anda amaawala 8 cila wanda pa myaka yiwili. Lelo patalinji nanti wumwi wino walondanga ukuteyelezya. Awantu wacitangavye nga wiyula icisakati wazana ukuti asweswe, awanyocela namukasi. Lelo tutanenusile.” Mukupita kwa mpindi twizile atutalika ukumanyana nawantu icakuti wamwi wizile awatalika nukuteyelezya. Pe yo-o impindi mwe wo-o umusumba muli amawungwe yatatu.​—Ayize. 60:22.

15. Uzye vino vyawa pe 1 Wakorinte 3:6, 7, vikatusambilizya cani pa mulimo wakupanga awasambi?

¹⁵ Pakalondeka awantu awavule pakwavwa wumwi ukulunduluka. Wonsinyene mwiwungwe wangawombela ponga ukwavwa wumwi ukulunduluka ukufika na kulubatizyo. (Wazyani 1 Wakorinte 3:6, 7.) Ku cakulolelako, tuti umwanawitu wasila wumwi wino akulonda ukusambilila e trakiti nanti e magazine. Nomba wazana ukuti atandi akumanisye ukunyocelako  pa mpindi yino wapangine. Acino wanena umwanawitu winji ukuti anyoceleko kwe co-o icipempu. We-e kawizya wacita icipempu nu kutalika isambililo. Swinya nga waya mukutungulula isambililo akasendako awanawitu nawa nkazi awalekane lekane. Wonsinye wa-a wano akasenda wakaya mukwavwa umusambi mu nzila imvule. Wa-a awanawitu na wankazi wano wakayako wangavwa umusambi ukuwa ni suwilo iliwome mwe Yehova. Swinya nawonye wakasecelela ponga ukulola kuno umusambi wino wavwizyeko akubatizwa.​—Yoha. 4:35-38.

16. Acani cino cingalenga muwasecelela mu mulimo wakuwizya asamulandu nukulwalilila nanti amaka yacefile?

¹⁶ Pamwi pe yo-o impindi musiwomba nkani umulimo wa kuwizya ndi vino mwawombanga ku nsizi pa mulandu wakuti mukalwalilila nanti amaka yacefile. Naponye mungasecelela nga mwawomba ukulingana na pano papelezile amaka yinu. Katetulande pa cakulolelako ca Mfumu Davidi. Pano e Davidi na wonsi wakwe wayile mukupokolola indupwa zyawo niviya vino awina Amaleke wasenzile, awonsi wamwi 200 pe wa-a wano walinji ne Davidi wasyazile wakulonda iviya. Amuno watonsile. Walile wacimvya, wapokolozile iviya ivivule ivya mutengo ku walwani wawo. Pano wanyosile, e Davidi wawanenile ukuti wankanye pakasi iviya kwe wonsinye, na kwe walyanye wano wasyazile wakulonda iviya. (1 Sam. 30:21-25) Lyo-o ilyasi likatusambilizyako icintu icicindame pa mulimo witu uwakupanga awasambi. Nanti mutanga muwombe ukulingana na vino mukulonda mu mulimo wakupanga awasambi, muwakwizuka ukuti, nga mwawomba pano papelezile amaka yinu, muliwasecelela ukulola umusambi uwili wensinye wamanya e Yehova nu kusolapo ukubatizwa.

17. Acani cino tukasalifizya e Yehova?

¹⁷ Tukasalifya nkaninye e Yehova wo-o vino akalola ukuwombesya kwitu. Wamanya ukuti tutanga tupaticizye awantu ukuteyelezya kwi lyasi lizima nanti ukuwapaticizya ukutalika ukumupepa. Lelo akalola vino tukawombesya mu mulimo wakwe na vino twamukunda, swinya akatulambula. Akatusambilizya navino tungacita pakutwalilila ukusecelela pe vilyanye vino tukuwomba ukulingana na maka yitu. (Yoha. 14:12) Fwandi ukwasowa nukuvwilika e Yehova aliwasecelela mu mulimo witu, cikulu vye tutanenusile!