1. Amulandu ci wuno awantu awavule wakapotelwa ukumanya icisinka?

MWE ya-a amanda kwawa imipepele imivule. Yo-o imipepele yikalanda ukuti swe wina Klistu. Yikati nu kuti ikapepa Leza mu nzila yo akalonda. Wo-o awuli umulandu wuno casiliwicila awavule, watamanya ukwakuya. Wakakolowozya ukuti, “Uzye kwawa ukupepa konganye ukwa cisinka? Uzye imipepele yonsinye ikasecelesya Leza?” Uzye swe Nte zya kwe Yehova twasinincizya ukuti vino tukasambilizya avya cisinka? Uzye tukapepa Yehova mu nzila yino ikalonda? Tutanga twavwilika nga cakuti twalola uwusinincizyo wuno wukalanjizya ukuti vino tukasambilizya avya cisinka swinya tukapepa Yehova mu nzila yino akalonda. Nomba awusinincizyo ci wuno twakwata? Lekani tulole.

2. Ukulingana ne 1 Watesalonika 1:5, cani calenzile ukuti e Paulo asinincizye ukuti cino wazanile calinji acisinka?

² Umutumwa Paulo wasinincizizye ukuti cino wazanile acisinka. (Wazyani 1 Watesalonika 1:5.) Wayisambilizyanga nkaninye Izwi lya kwe Leza. Acino calenzile atavwilika nanti katicinye ukuti wazanile icisinka. Asa pa mulandu wakuti vino wasambililanga vyalenganga akwivwa icete. Wazumizile ukuti: “Amazwi Matele yonsi yafutilwa numupo wakwe Leza.” (2 Tim. 3:16) Avyani vino Amawaliko ya musambilizizye? Amawaliko yalenzile azane uwusinincizyo wa kuti e Yesu awili e Mesiya wino walayilizilwe. Icintu cino intunguluzi zya simapepo awa Yuda zyasozilepo ukukana ku mufulonye. Cingatenga zyalandanga ukuti zyasambilizyanga awantu icisinka. Zyacitanga ivintu vino e Leza wapata. (Tait. 1:16) E Paulo wapusineko na zyo-o intunguluzi zya wa Yuda. Amuno wasuwizile mwe vyonsinye vino wasambililanga mwi Zwi lya kwe Leza. Atasolanga vino angazumilamo na vino atanga azumilemo. Wayipekinye ukusambilizya nukukonka “ukulonda kwa kwe Leza” konsinye. ​—Imili. 20:27.

3. Uzye pakusinincizya ukuti tuzanile icisinka tuzipizile ukumanya ivyasuko vyonsinyene kumawuzyo yano twawa nayo? (Lolani akambokosi kano kakuti, “ Imilimo ya kwe Yehova na Melenganyo yakwe, ‘Avivulenye vino ntanga vwange nkumeko.’”)

 ³ Awantu wamwi wakalola ngati ukupepa kwa cisinka kuzipizile ukwasuka amawuzyo yonsinyene ukuwikako nayalyanye yano Baibolo yitalandapo. Uzye co-o cingacitika? Katulande pe Paulo. Cingatenga wawomelezizye awina Klistu wawuye ukuti “yelezyani ivintu vyonsi,” walanzile ukuti kwalinji ivivule vino ativwicisizye. (1 Tes. 5:21) Walemvile nukuti “Amuno tukamanya katici katici,” ati nu kuti “cino tukalola kanonzi cili ngati acinzungwani cino cikuloleka nakamfinzi mfinzi mu chilola.” (1 Kor. 13:9, 12) E Paulo ativwicisizye vyonsinye ndi vino cawa na kwesweswenye. Lelo wamanyileko vimwi pa kulonda kwa kwe Yehova. Vyonye vino wamanyile vyalenzile asinincizye ukuti wazanile icisinka.

4. Avyani vino tungacita pakusinincizya ukuti twazana icisinka? Swinya twasambilila vyani?

⁴ Icintu conga cino cingatwavwa ukusinincizya ukuti twazana icisinka, akukolanya imipepele yino Yesu watalisile kwe vino Inte zya kwe Yehova wakacita. Mwe co-o icipande twandi tusambilile ukuti awina Klistu wa cisinka (1) wakakana amakolania, (2) wacindika izina lya kwe Yehova, (3) watemwa icisinka ca mu Baibolo, ne (4) wakundana nkaninye.

5. Avyani vino tukasambililako kwa kwe Yesu panzila inzima iya kukupepelamo e Leza, swinya tungawomvya wuli vino watusambilizizye?

⁵ Pano Yesu walinji mu nsi na pano walinji kwi yulu, wapepanga Yehova wenganye. Wacitanga wo-o amuno wamukunda nkaninye. (Luk. 4:8) Wasambilizizye na wasambi wakwe ukuti awino wapepa wenganye. E Yesu na wasambilizi wakwe wasitela wawomvyepo amakolania pakupepa. Kusi nanti wenganye wino angapanga cino cingakola e Leza amuno asiloleka. (Ayize. 46:5)  Uzye cawa icetenye ukupanga ikolania lya muntu wino wamwi wakalola ukuti amutele nu kutalika ukulipepa? Mwi sundo lya citi wili pa masundo 10 yano e Yehova wapile awantu wakwe, watili: “Utize uwayichitila ikolania nanti ikolano lyachintu chimwi ichamwiyulu nanti ichamunsinye mo-o . . . Utize uwafukamila ikolania limwi.” (Ukuf. 20:4, 5) Acino wano wakalonda ukusecelesya Yehova wamanya ukuti watazipizile wawomvya amakolania pakupepa.

6. Akupepa kwa musango ci kuno Inte zya kwe Yehova zikakonka mwe ya-a amanda?

⁶ Awantu wano wakasambilila pa malyasi yakali wakalanda ukuti mumpindi zya watumwa, awina Klistu wapepangavye e Leza wenganye. Ku cakulolelako ibuku limwi lino likalanda pa malyasi ayakukali likalanda ukuti awina Klistu “wafwile wapasile nkaninyene ukuwomvya amakolania” muvifulo vyakupepelamo. Inte zya kwe Yehova nawonye wakakolanya awina Klistu wakutalicila. Tusipepa amakolania ya wantu wano wamwi wakalola ukuti “awatele,” nanti aya wangeli; ne Yesu nye tusimupepa. Swinya tusisalyuta na kwe flagi nanti ukucita icili consinye muno mwasanzyamo ukupepa uwuteko nanti insi. Asa mulandu na vino awantu wamwi wangavwamba ukuti tucite, tukasolapo ukwivwila amazwi ya kwe Yesu ayakuti: “Uwafukamila Imfumu e Leza wako wenganye-nsu awino uwamupakata!”​—Mat. 4:10.

7. Avyani vino vikalanjizya ukuti Inte zya kwe Yehova zyapusana ni mipepele yinji?

⁷ Awantu awavule mwe ya-a amanda, wakakwivwa icete ukuteyelezya kwa simapepo awalumbuke pano wakupepesya. Wawakunda nkaninye icakuti kwela wakawapepa nu kuwapepa. Awavule wakaya ku macalici yawo, wakakala amabuku yawo, swinya wakawapa indalama imvule pakuti watunjilila utuwungwe twawo utwa mipepele. Wamwi wakazumila vyonsinyene vino wasimapepo wakawanena. Wakakwivwa icete ukulola wasimapepo wawo nomba nge walola e Yesu! Lelo wano wakapepa Yehova mu nzila yino akalonda wasikonka awantu. Nanti acakuti tukacindika wano wapwa umulimo wakutungulula, tukakwivwila amazwi ya kwe Yesu yano watili: “Mwensinye mwewanyina.” (Mat. 23:8-10) Tusipepa awantu. Asa mulandu navino wangawa. Nampo nga awasimapepo nanti antunguluzi zya mapolitiki. Swinya tusitunjilila na vino wakalonda ukucita. Tusiyisanzya mu vyansi. Vyonsinye vyo-o vino twalandapo, vikalanjizya ukuti twapusanako nkaninye na wamipepele yonsinye yino yikalanda ukuti awina Klistu.​—Yoha. 18:36.

8. Twamanya wuli ukuti e Yehova akalonda izina lyakwe ukucindikwa nukuti limanyikwe kwe wonsinye?

⁸ Impindi yimwi e Yesu wapefile ukuti “Tata, leka izina lyako lichindamikwe.” E Yehova umweneconye wasusile lyo-o ipepo ni zwi ikulu ukufuma mwi yulu, walayile e Yesu ukuti alililenga licindikwe. (Yoha. 12:28) E Yesu walenzile izina lya kwe Yisi ukucindikwa pano wawombanga umulimo wakwe uwa munsi. (Yoha. 17:26) Wo-o awuli umulandu wuno awina Klistu wacisinka wakalola ukuti alongo ulukulu ukuwomvya izina lya kwe Leza nu kulenga wanji walimanye.

9. Uzye awina Klistu wakutalicila walanjizizye wuli ukuti wacindisile izina lya kwe Leza?

⁹ Pano iwungwe lya kutalicilapo ilya wina Klistu lyapanzilwe vye, e Yehova wapiliwucizile kwe wano asa waYuda ‘ku kusenda awantu awizina lyakwe.’ (Imili. 15:14) Wa-a awina Klistu wakutalicila wivwanga icete nkaninyene ukuwomvya izina lya kwe Leza nukulisambilizya kwe wanji pakuti nawonye walimanye. Awatumwa na wasambilizi wa kwe Yesu wawomvyanga izina lya kwe Leza pano wawizyanga na pano walembanga amabuku ya mu Baibolo. *  Vyo-o vino wacitanga vyalanjizizye apatiswenye ukuti awano wamanyisyanga wanji pi zina lya kwe Leza.​—Imili. 2:14, 21.

10. Twamanya wuli ukuti wa Nte awano wakakwimililako izina lya kwe Yehova?

¹⁰ Awusinincizyo ci wuno wukalanjizya ukuti Inte zya kwe Yehova awantu wano wakakwitilwa pi zina lyakwe? Mwe ya-a amanda intunguluzi zya simapepo zikakwelezya na maka yawo yonsinye ukufisa izina lya kwe Leza. Icakuti walifumyamo na mu ma Baibolo yawo, swinya mu macalici yamwi wakalesya nukuwomvya izina lya kwe Leza pano wakupepa. * Ukwasowa nu kuvwilika Inte zya kwe Yehova zitupunye awano wakacindika izina lya kwe Leza. Kutawa imipepele iyili yonsinye yino yikamanyisya izina lya kwe Leza ukucila pa Nte zya kwe Yehova. Tukakwelezya na maka ukucita ivintu ukulingana ni zina lino tukakwitilwako ilya kuti Inte zya kwe Yehova. (Ayize. 43:10-12) Twafumya ama Baibolo ye New World Translation ukucila 240 milioni. Yo-o e Baibolo ikawomvya izina lya kwe Yehova mu vifulo muno wakapiliwula we Baibolo wafumizyemo. Swinya tukafumya amabuuku yano yakalanda pi zina lya kwe Yehova ukucila ivitundu 1,000.

11. Uzye awina Klistu wakutalicila walanjizizye wuli ukuti watemilwe icisinka ca mu Baibolo?

¹¹ E Yesu watemilwe nkaninye icisinka ca mu Baibolo, akuli kuti, icisinka pe Leza na vyonsinye vino ali mukucita. Vyonsinye vino Yesu wacitanga vyalanjizyanga ukuti wazumizile  icisinka ca mu Baibolo. Wasambilizyangako na wanji pa cisinka ca mu Baibolo. (Yoha. 18:37) Nawasambilizi wa kwe Yesu awacisinka nawonye wacikunzile nkaninye. (Yoha. 4:23, 24) Umutumwa Peter walanzile pa mipepele ya wina Klistu ukuti “inzila yakusimicila.” (2 Pet. 2:2) Pamulandu na vyo wa-a awina Klistu watemilwe icisinka ca mwe Baibolo wakananga ivisambilizyo vyamipepele ya wufi, intambi, ni visambilizyo vya wantu vino vyapusine ni cisinka ca mu Mawaliko. (Kolo. 2:8) Na mwe yanye amanda awina Klistu wa cisinka wakakwelezya na maka ukupita mu “inzila ya kusimicila.” Vyonsinye vino wazumilamo na vino wakakwikala vikasimpwa pi Zwi lya kwe Yehova.​—3 Yoh. 3, 4.

12. Uzye awa mwi Wumba Lino Likatungulula wakacita wuli nga walola ukuti pali pamwi pano tuzipizile ukupiluka mwe vino twivwicisizye kali, swinya amulandu ci wuno wakacitila wo-o?

¹² Inte zya kwe Yehova wasilanda ukuti wakakwivwicisya vyonsinye ivya mu Baibolo. Impindi yimwi nawonye waluvyanyapo pakulondolola ivisambilizyo vya mu Baibolo nanti vino iwungwe lizipizile ukutungululwa. Lelo tutazipizile ukuzunguka pe co-o. E Baibolo yisipita na mu mbali, yikatunena ukuti awantu wa kwe Yehova waliwaya wakwivwicisya icisinka ca mu mawaliko katici katici. (Kolo. 1:9, 10) E Yehova akatusokololela icisinka katici katici. Fwandi tuzipizile ukuyikundila ukulindilila mpaka pano twivwicisya icisinka icete cete. (Imilu. 4:18) Awa mwi Wumba Lino Likatungulula wasilema nakwisote nga cakuti walola ukuti pali pamwi pano tuzipizile ukupiluka mwe vino twivwicisizye icisinka ca mu Baibolo nanti vino twacitanga. Awa mu macalici yamwe ya-a amanda wakapilula ivisambilizyo vyawo pa kuti vye wasecelesye awantu wawo. Nanti ukuti wamanyikwe munsi. Lelo swe Nte zya kwe Yehova tukapiluka mwe vino twamanyile amuno tukalonda ukupalamila kwe Yehova nukumupepa ukulingana na vino Yesu wamupepanga. (Jemu. 4:4) Tusipiluka pa mulandu wakuti awantu wapilusile mwe vino walolanga ivintu, lelo ukwivwicisya icisinka ca mu Mawaliko akuno kukalenga tupiluke. Ala twakunda nkaninye icisinka ca mwe Baibolo!​—1 Tes. 2:3, 4.

13. Amiwele ci imicindame yino awina Klistu wa cisinka wafuma wakalanjizya? Uzye Inte zya kwe Yehova wakalanjizya wuli yo-o imiwele?

¹³ Awina Klistu wakutalicila wamanyicizilwe ku miwele imizima imivule, lelo yino yapuzilemo alukundo. E Yesu walanzile ukuti: “Ndi mwakundana apano awantu wonsi walimanya kuno mwe wasambilizi wane.” (Yoha. 13:34, 35) Inte zya kwe Yehova insi yonsinye wakundana swinya walemenkana. Twapusana nkaninyene ni mipepele yinji amuno twawa vye ngati alupwa longa. Asa mulandu nukuti twafuma mu nsi impusane pusane swinya tusikonka intambi izili zyonga. Tukalola vino twakundana nga tuli pa kulongana kwa pi wungwe, ukwa muputule nu kwa citungu. Co-o cikalenga tusinincizye ukuti tukapepa Yehova mu nzila yino ikamusecelesya.

14. Ukulingana na Wakolose 3:12-14, anzila ci iyicindame yino tungalanjizizyamo ulukundo?

¹⁴ Amawaliko yakatuwomelezya ukuti “kundanani nkaninye.” (1 Pet. 4:8) Inzila yonga yino tukalanjizizyamo ukuti twakundana akutetelana nu kuzizimicizyanya. Tukakwelezya na maka ukupako awa mwi wungwe vino tukweti nu kuwapocelela. Tukacita wo-o na kwe walyanye wano watuluvinye. (Wazyani Wakolose 3:12-14.) Nga tukulanjizya ulukundo lwa musango wo-o lyo tukulanjizya ukuti swe wina Klistu wa cisinka.

15. Anzila ci na zinji zino zikalanjizya ukuti tukakolanya awina Klistu wakutalicilapo?

¹⁵ Kwawa na vinjinyene vino tukacita pakupepa  Yehova vino vikalanjizya ukuti twakolana na wina Klistu wakutalicilapo. Ku cakulolelako twateyaniziwa icete wulyanye vino calinji ku wina Klistu wakutalicilapo. Nasweswenye twawa na wakangalila wa miputule, waeluda na watumikila. (Flpi. 1:1; Tait. 1:5) Wulyanye vino awina Klistu wakutalicila wacindisile itwala, uwazi, na vino walolanga wano wazipizile ukupanga icupo, avino na kwe sweswenye cawa. Asa vyo vitupu naswenye tukacinjilila iwungwe kwe wano wakakana ukukonka amasundo ya kwe Leza.​—Imili. 15:28, 29; 1 Kor. 5:11-13; 6:9, 10; Hebe. 13:4.

16. Avyani vino tukasambililako ku mazwi ya pa Waefeso 4:4-6?

¹⁶ E Yesu walanzile ukuti awavule waliwalanda ukuti awasambilizi wakwe, nu kuti asa wonsi wano akalola ukuti awakusimicila. (Mat. 7:21-23) Amawaliko yakatunena ukuti mu manda yakulecelezya awavule “waliwaloleka kulonde ngati awakapepa.” (2 Tim. 3:1, 5) Lelo Baibolo yikalanda ukwasowa nu kupita mumbali ukuti kwawavye “isuwilo lyonga” lino Leza wazumilizya.​—Wazyani Waefeso 4:4-6.

17. Uzye wakapepa wa cisinka wano wakakonka vino Yesu wacitanga awaweni?

¹⁷ Uzye wakapepa wa cisinka ya-a amanda awaweni? Tusambilizile uwusinincizyo uwuvule. Tuweni inzila ya kupepelamo e Leza yino e Yesu wasambilizizye nga na vyo awina Klistu wakutalicilapo wapepanga Leza. Vyonsinye vyo-o vilenzile tusinincizye ukuti, Inte zya kwe Yehova awali wakapepa wa cisinka. Alongo ulukulu nkaninye ukuwa awantu wa kwe Yehova, ukumanya icisinka pe weliwe na vino akalonda ukucita. Acino lekani tutwalilile ukulemasya icisinka cino twasambilila nu mwezo witu wonsinye.