TEYELENGANYANI katici vino awangeli “wakasecelela” kwi yulu ukulola kuno cila mwaka ing’onzi zya kwe Yehova izyamutengo nkaninye zikunyocela mwi wungwe lyakwe! (Luk. 15:7, 10) Nga pano munyosile mwi wungwe nanti nga mwayoka kaali, manyani ukuti e Yesu, awangeli ne Yehova wakunda nkaninye ukumilola kuno mwanyoka mwi wungwe. Lelo pano mukuzifya wuciwuza winu ne Yehova, mungasunkanya intazi. Antazi ci zyozyonye, swinya acani cino cingamyavwa ukuzicimvya?

Awanawitu na wankazi awavule wacili wakayivwa uwuwi na pano wanyokanye. Ncepamwi mungivwicisya vino Imfumu Davidi yayivwanga. Nanti acakuti e Yehova wamutetezile pa luwembu luno wacisile, Davidi walanzile ukuti: “Naliwilizwa nuluwembu.” (Amalu. 40:12; 65:3) Ngacakuti wumwi wanyoka mwi wungwe, ncepamwi pangapita imyaka imivule ukwasowa ukuti aleke ukuyipa imilandu nukwivwa insoni. E Isabelle wino walinji kunzi yakuteyanya ukucila pa myaka 20. * wavwanzile ukuti, “Napotwanga ukuzumila ukuti e Yehova angantetela.” Nga cakuti mwafupulwa, wuciwuza winu ne Yehova wunganyocela pansi. (Imilu. 24:10) Acino asacakwelezya ukuleka ica musango wo-o cimiciticile.

Wamwi wakasakamikwa nkaninye nga welenganya pe vino vikalondekwa pakuti wazifye wuciwuza wawo ne Yehova. Wakalola ngati watanga wakwanisye. Pano Antoine wanyosilevye mwiwungwe wavwanzile ukuti: “Nayivwanga ngati niwilizile vyonsinye vino nasambilizile na vino nacitanga mu mulimo wa kwe Yehova pano ntani mbingwe.” Ukuyivwa wo-o, kungalenga awavule wapotwa ukuwombela e Yehova na maka yawo yonsinye.

Ku cakulolelako, tuti ing’anda ya kwe wumwi yononeka ku cimuza icikulu. Pamwi we-e umweni wa ng’anda nga welenganya pe vino visanzizyemo pakuzifya ing’anda, angalola ngati umulimo wukuzile nkaninye swinya atalikwanisya. Avino pamwi namwenye mungatalika ukuyivwa nga cakuti wuciwuza winu ne Yehova wononesile pa mulandu nuluwembu luno mwacisile. Mungatalika ukulola ngati muliwalondekwa ukucita ivivule pakuti muzifye  wuciwuza winu ne Yehova. Lelo mwakwizuka ukuti mutaliwawomba mwenga wo-o umulimo.

E Yehova akatunena swensinye ukuti: “Kanonzi nkasi twivwane.” (Ayize. 1:18) Cino mwakwizuka aca kuti, mwawombesya nkaninye pakuti mutalike ‘ukwivwana’ ne Yehova. Swinya wamikunda nkaninyene wo-o vino mwawombesya. Teyelenganyani katici: Pamulandu wakuti mwanyoka mwiwungwe, mwapa e Yehova amaka ya kusinila Satana ukuti we cawufi.—Imilu. 27:11.

Wo-o vino mwanyocela mwi wungwe cayilanjizya apatiswenye ukuti mwapalamila kwe Yehova, ne nawe wamilaya ukuti alipalamila kwe mwemwe. (Jemu. 4:8) Wonsinye wacili wakakwivwa icete nkaninye ukulola kuno mwanyoka mwi wungwe. Lelo nanti ciwe wo-o kuli na cinji icintu icicindame cino muzipizile ukucita. Co-o icintu akuwomya wuciwuza winu ne Yehova, Umukwasi winu. Nomba acani cino cingamyavwa ukucita wo-o?

Mwakwelezya ukupanga ivyakucita mu mulimo wa kwe Yehova vino mungakumanisya. Pamwi mucili mukakwizuka vimwi vino mwasambilizile mu Baibolo pe Yehova na pi suwilo lya kunkolelo lino watulaya. Lelo muzipizile ukutwalilila ukuzifya imikalile yinu iya awina Klistu. Akuli ukuti ukuwizya lyonsinye, ukuzanwa mukulongana nu kuzanwa lyonsinye ponga na wamunyonko mwi wungwe. Pe vimwi vino mungatantika ukucita pawa na vyo-o.

Muwalanda ne Yehova lyonsinye. Umukwasi winu uwa kwi yulu wamanya ukuti manda yamwi cingamipota ukupepa kwe weliwe pa mulandu nu kuyipa imilandu pe vino mwacisile. (Roma. 8:26) Lelo nga cawa wo-o apano “muwapepa nanti kulechelezya,” muwamunena vino mukulondesya ukuwa e ciwuza wakwe naswinya. (Roma. 12:12) E Andrej walanzile ukuti: “Nivwanga insoni swinya nayipanga nkaninye imilandu pe vino nacisile. Lelo nga napepavye, nivwanga ni cete. Nawanga nu mutende.” Nga mutamanyile amazwi yano mwandi mulande mwi pepo, mungawazya amapepo yakulapila yano Imfumu Davidi yalanzile. Ya-a amapepo yakazanwa mu Amalumbo 51 ne 65.

Mwawazya Baibolo cila wanda. Muwayisambilizya sana ivya kwe Leza. Ukucita wo-o kulimyavwa ukukunda sana e Yehova. (Amalu. 19:7-11) E Felipe walanzile ukuti “Cino calenzile isuwilo lyane litonte swinya mfike na mukuluvyanya, akukanayisambilizya Baibolo.” Walanzile nukuti; “Ntalondanga ukulumisya e Yehova umwezo naswinya, acino nasinincizyanga ukuti cila wanda nawazya Baibolo.” Namwenye mungacita ndi vino Felipe wacisile. Ngacakuti mukuvwamba ilyasi lino lingamyavwa pano mukuyisambilizya Baibolo, mungakolowozyako e ciwuza winu e songo mu vyakwe Leza ukuti amyavwe.

Womyani Wuciwuza Winu na Wamunyonko. Wamwi wano wakanyoka mwi wungwe wakatalika ukulola ngati awanawitu na wankazi waliwawavwilika. E Larissa walanzile ukuti: “Nalinji ni nsoni. Nalolanga ngati ndumisizye awanawitu na wankazi imyezo. Natwalilizile ukuyivwa wo-o pa mpindi intali.” Mwamanya ukuti waeluda na wanawitu wasongo mu vya kwe Leza wakalondesya nkaninye ukumyavwa pakuti muzifye wuciwuza winu ne Yehova. (Lolani akambokosi kakuti “ Vino Waeluda Wangacita”) Watemwa nkaninyene wo-o vino mwanyoka mwiwungwe, swinya wakalonda muwawa ni nsansa.—Imilu. 17:17.

Acani cino cingamyavwa ukupalamila kuwa mwi wungwe? Mwazanwa nawo mukulongana konsinye. Swinya mwaya nawo mu mulimo wakuwizya. Uzye ukucita wo-o kulimyavwa wuli? E Felix watili: “Awanawitu na wankazi wamfulukanga nkaninye swinya walondanga ukuti nyoke mwi wungwe. Co-o calenzile nayivwa ukuti nacindama. Wanjavwizye ukutalika ukulola ukuti naninye ne cilundwa ci wungwe. Nukulola ukuti e Yehova wantetela, swinya ningatwalilila ukumuwombela.”—Lolani akambokosi kakuti “ Vino Mungacita”

E Satana alitwalilila ukumiletela “intazi” zino zingalenga muleke ukuzifya wuciwuza winu ne Yehova. (Luk. 4:13) Acino twalililani ukuwomya wuciwuza winu ne Yehova!

E Yehova walaya ing’onzi zyakwe ukuti: “Ndivwamba zino zyasowa, nkanyosye zino zikapitapita azisowa, nyepele zino zyachisika, mpozye zino zyalwala.” (Ezek. 34:16) E Yehova wavwa awavule ukuzifya wuciwuza wawo naweliwe. Akalondesya ukwavwa namwemwenye pakuti wuciwuza winu naweliwe wuwawomelako cila wanda.