Uwanda wumwi pano e nkazi wi zina lya kuti Helen wawizyanga pe kastandi mu musumba wa Baguio ku Philippines, waweni awakazyana wawili wafuma wakupita. Pano wakuya wakupalamila wizile awamwentulila. Lelo watatezile waye pe kastandi. Nomba kuno wayile wapisile wakwelenganya vye pa kumwentula kwe nkazi.

Walile wa-a awakazyana wakwela basi ukunyocelamo ku ng’anda, wizile awalola icipampa ca jw.org pa ng’anda ya Wufumu. Pano wacilola vye wizile awacikolanya na cino waweni pe kastandi. Acino wizile awika paponye nu kuya pa Ng’anda ya Wufumu pa cipampa cino wakatantika impindi zya kulongana.

E sabata wino wakonsilepo wa-a awakazyana wizile awaya mu kulongana pe yilyanye ing’anda ya Wufumu. Lelo cino cawazungusizye aca kuti pano winjila vye mu ng’anda ya Wufumu wizile awalola Helen. Swinya wamwizusile ukuti awili mwanaci wino wawamwentulizile. E nkazi Helen watili, “Pano nalola wandungama nizile insakamala katici. Natalisile ukwelenganya ukuti pamwi pali vimwi vino nduvinye.” Lelo awakazyana wizile awamulondololela vino calinji pano wamuweni pe kastandi.

Wa-a awakazyana wayitofilwe nkaninye ukulongana nu kuwa ponga na wanawitu na wankazi. Swinya pa nsizi ya kulongana walile walola awanawitu na wankazi watalika ukupyela, nawonye wizile awawuzya nga ca kuti wangawavwako. Umukazyana wenga pe wa-a wacintila ku nsi yinji. Lelo umuwuye watalisile ukuzanwa mu kulongana nu kusambilila Baibolo, pa mulandu vye wa kuwamwentulila!