E Yehova akalonda wano watwalana wawa ni nsansa nu kutwalilila ukuwa iviwuza uwumi wawo wonsinye. (Mat. 19:4-6) Nga ca kuti mukulonda ukutwala nanti ukutwalwa mungacita wuli pa kuti muzane uwa kutwalana nawe umuzima? Pa mulandu wa kuti Yehova awino watwelewuzile, wamanya icete sana vino vingalenga twize tuwe ni nsansa mwi twala litu. Fwandi pa kuti mwize muwe ni nsansa mwi twala linu, muzipizile ukukonka ivisinka vya masundo vino Yehova wawikako. Lekani tulandeko pe vimwi.

Icakutalicila, tuzipizile ukwivwicisya icisinka ca kuti: “Umwezo wa muntu awicenjezya ukulusya ivintu vyonsi.” (Jere. 17:9) Nga ca kuti awantu wawili wano wakulonda ukwinjila mwi twala wavwambana wangakundana sana. Nomba nga wapingulapo ukutwalana ukulinganavye na vino aweneco wakuyivwa wangiza wayivwa uwuwi mu kunkolelo. (Imilu. 28:26) Fwandi awuli umulandu wuno citange ciwele icete kwe wano wakuvwambana ukufika ukulanjizya ulukundo nanti ukulayana pano watani wamanyane icete.

Pa Imilumbe 22:3 pa kati: “Umuntu wa mano akalewuka nga walola intazi zikwiza, ukuwa umuntu cino amuntu awowo akayisuncilizya mu ntazi ayizuka pano aminzi yafika mu nsingo.” Awuwipe ci wuno wawa mukuwomvya intaneti pa kuvwamba uwakutwalana nawe? Wamwi wano walolanga ngati wazanile uwakutwalana nawe umuzima pa intaneti wizile awazana ukuti wawawipangavye. Wamwi awantu wawikapo ni vyewo vimwi pa intaneti ivya kuyilondolola aweneco pa kuti wiwile wanji indalama. Wamwi pe wa-a wakawipa nu kuti Ante zya kwe Yehova.

Kwawa intazi na yinjinye yino yawa mukukuwomvya intaneti pa kuvwamba uwakutwalana nawe. Pa mawebusayiti yamwi wawikapo insamusi nanti ama programu yamwi aya pa makompyuta vino wakalola ukuti avino vingavwa awantu ukumanya uwakutwalana nawe. Lelo kutawa nanti cimwi cino cikalanjizya ukuti ya-a amaprogramu yakawomba icete. Fwandi citange ciwemo amano ukuwomvya inzila zya pa kompyuta pa kupingula pa vintu ivicindame ndi ukusola uwakutwalana nawe umuzima wino angiza alenge tuwe ni nsansa mwi twala litu. Amuno ya-a amaprogramu nanti yangazipa wulinye yatange yalingane ni visinka vya mu Baibolo.​—Imilu. 1:7; 3:5-7.

 Pi waliko lya Imilumbe 14:15 tukazana icisinka cimwi ica kuti: “Umutumpe akasuwila cisuwile suwile. Umuntu mucenjele akapecela.” Pano mutani mupingulepo ukutwalana na wumwi, muzipizile ukumumanya icete sana. Lelo mutange mumumanye icete nga mwasunkanavye pa intaneti nanti mungasumba impindi inkulu wulinye ukulanzyanya nu kutumizyanya ivikope. Wamwi wano wavwamvile uwakutwalana nawe pa intaneti walile pano wasunkana, cawapezizye amano pano wamulola.

E kimbila wa malumbo walanzile ukuti: “Nsiyisanzya mu mupanda wa wantu wawipe, nsipecela wakacenjenzya [nanti wano wakayifisa vino wawa].” (Amalu. 26:4) Awavule wano wakavwamba awakutwalana nawo pa intaneti, wakawika ivikope ni vyewo vya wufi ivya kuyilondolola pa kuti awantu wanji wawalola ukuti wawa icetenye. Swinya wakalola ngati cawa icetenye ukuwipa uwufi. Pano wakutuma ivikope ni vyewo vinji wakafisa imiwele yawo imiwipe yino wakwata. Acino pano mukuvwamba uwakutwalana nawe pa intaneti muzipizile ukuyikolowozya ukuti: Uzye wa-a wano wakuti Ante zya kwe Yehova, mwelimonye awina Klistu awabatizwe? Uzye wuciwuza wawo ne Yehova wawa wuli? Uzye wawacindika mwi wungwe? Uzye imiwele yawo yawa wuli? Nanti uzye nawonye wangawa “awantu wawipe”? (1 Kor. 15:33; 2 Tim. 2:20, 21) Uzye awantungwa ukutwala nanti ukutwalwa ukulingana na vino Baibolo ikalanda? Muzipizile ukuzana ivyasuko ku mawuzyo yonsinye. Lelo pa kuti mumanye ivisinka vyonsinye, muzipizile ukukolowozyako na wa Nte wanji wano wamanya icete weyo umuntu. (Imilu. 15:22) Umuwomvi wa kwe Yehova atazipizile ukwelezya nanti katinye ukutwalana nu muntu wino asipepa Yehova. Nanti ukuwa ku “cikonkoli” icili conga nawe.​—2 Kor. 6:14; 1 Kor. 7:39.

Pa mulandu wa kuti mwawa uwusanso uwukulu mukuwomvya zyo-o inzila pa kuvwamba uwakutwalana nawe, kwawa inzila zinji inzima zino mungawomvya pa kuzanilamo nu kumanyilamo wino mukulonda ukutwalana nawe. Anzila ci zyozyonye? Nga ca kuti ivintu vili icete swinya tukusunkana ponga, tungamanyana na wanji pa kulongana kwa pi wungwe, ukwa muputule, ukwa citungu nga na kunji.

Nga ca kuti tutakulongana ponga ndi vino mu ndwala ye korona, tungawomvya iviwombelo vino tukuwomvya pa kulongana pa kuti tumanyane na wina Klistu wanji awasimbe. Mungalola pano wakulanda amalyasi na vino wakulumbulula isuwilo lyawo pano wakwasukapo. (1 Tim. 6:11, 12) Swinya pansizi ya kulongana mungawako ni mpindi ya kulanda nawo ukuwomvya Zoom mu tumawumba tuno wakapanga pa nsizi ya kulongana. Ukuwomvya yo-o inzila kungamyavwa ukumanya vino umuntu wino mukulonda ukutalika ukuvwambana nawe akakwivwana na wantu wanji. Co-o cingalenga mumanye imiwele yino wawa nayo. (1 Pet. 3:4) Mukupita kwa mpindi mulisuka mumumanye icete. Mulimanya nga ca kuti vino akalonda ukucita mu wumi wakwe avino namwemwe mukalonda. Swinya cilimyavwa nu kumanya nga ca kuti angiza awe e wakwinu muzima.

Nga ca kuti awasimbe wano wakulonda ukutwala nanti ukutwalwa wakukonka ivisinka vya mu Baibolo, ukwasowa nu kuvwilika waliwa ni nsansa mwi twala lyawo. Swinya apano walilola uwuzima wuno wawa mu mazwi ya mu milumbe aya kuti: “Wino wazana umuci umuzima [nanti umulume] lyo wazana icintu icizima, swinya e Yehova amupaazile.”​—Imilu. 18:22.