1-2. Uzye uwulayo wape Ayizeya 65:16, 17 wungatwavwa wuli pano tukusipicizya intazi?

MU 2017 twakweti ukulongana kwa citungu ukuzima nkaninye kuno kwalinji nu mutwe wa kuti “Mutanenuka!” Ko-o ukulongana kwatwavwizye ukumanya vino tungacita pakusipicizya intazi. Nomba papisile imyaka 4 pano twakwatizile ko-o ukulongana. Swinya tucili tukusipicizya intazi mwe yo-o insi imbipe.

² Antazi ci zino mwapisilemo? Mwe wamwi pamwi mwafwizilwe wa lupwa lwinu nanti iviwuza vinu. Pamwi wamizanile ni ndwala imbipe. Nanti pamwi mukusipicizya intazi zino zikakwiza pa mulandu wa wukote. Mwe wamwi namwe pamwi mwaponezilwe nu wusanso. Pamwi ku ncende kuno mwikalila kwaponile ivimvulunganya nanti pamwi wamicuzyanga. Nanti pamwi mukucula pa mulandu na vino indwala ye corona ilesile nanti pa mulandu wa vintu vinji. Tukalondesya sana ukwizalola pano zyo-o intazi zilisila nu kwiwililwa ku ciyayaya!​—Wazyani Ayizeya 65:16, 17.

3. Acani cino tuzipizile ukutwalilila ukucita pe yo-o impindi, swinya amulandu ci?

³ Ivintu vikuya vikuwipilakovye mu nsi. Swinya tuzipizile ukwenecela ukupita mu ntazi na zinjinye inkulu zino ziliwalondekwa ukusipicizya. (Mat. 24:21) Fwandi tuzipizile ukutwalilila ukusipicizya. Amulandu ci? E Yesu watili: “Simpisyanji amuno mwakwe conye co-o mulitulila uwumi winu.” (Luk. 21:19) Na cino cingatwavwa akwelenganya pe vino wanji wakasipicizya intazi inkolane na zino tukupitamo.

4. Amulandu ci wuno tungalandila ukuti e Yehova we kasipicizya mukulu ukucila wonsinye?

⁴ Uzye weweni wino wasipicizya sana ukucila wonsionye? We Yehova Leza. Pamwi mwazunguka ukwivwa wo-o. Lelo mungivwicisya co-o icisinka nga mwelenganyapo sana. Yo-o insi ikatekwa  ne Satana swinya mwizula intazi ntupunye. Nanti aca kuti e Yehova wawa na maka ya kufumyapo intazi pa mpindi iyili yonsinye, watwalilila ukulindilila ukuficila uwanda wuno wimika wize wufike. (Roma. 9:22) Pano wo-o uwanda wutani wufike acili watwalilila ukusipicizya. Lekani tulande pa vintu 9 vino akasipicizya.

5. Uzye izina lyakwe Leza lyakwelengulwa wuli, swinya mukayivwa wuli pe wo-o umukwelengula?

⁵ Ukukwelengula izina lyakwe. E Yehova wakunda nkaninye izina lyakwe swinya akalonda wonsinye ukulicindika. (Ayize. 42:8) Lelo lyakwelengulwa ukucila pa myaka 6,000 yino yapitapo. (Amalu. 74:10, 18, 23) Lyatalisile ukukwelengula mu Edeni pano e Ciwa (cino cikasula Uwalwambo) wawipizizye e Leza ukuti wimile Adamu ne Eva icintu cino calinji nu kulenga wawe ni nsansa. (Inta. 3:1-5) Ukufumilila pe yoyo impindi ukufika ni lelo watwalilila ukumuwipizya ukuti akakwima awantu ivintu vino vingalenga wawa ni insansa. E Yesu wivwile uwuwi nkaninye pa mukwelengula wuno wizile pi zina lye Yisi. Awuli mulandu wuno wasambilizizye awasambi wakwe ukupepa ukuti: “Tata witu uwa mwi yulu, izina lyako ilitele licindikwe.”​—Mat. 6:9.

6. Amulandu ci wuno Leza wazumilizizye awantu ukuti wayiteka?

⁶ Awavule wakalwisya Leza ni mitecele yakwe. E Yehova awino wayana ukuteka mu nsi na mwi yulu. Swinya imitecele yakwe mitupunye ayino yazipa ukucila yonsinye. (Ukuwu. 4:11) Lelo e Satana walenzile awantu na wangeli wamwi ukutalika ukwelenganya ukuti e Leza atayana ukuteka. Palinji nu kupita impindi pa kuti cimanyikwe ukuti e Yehova awino wayana ukuteka. Pa mulandu wa kuti Yehova wawa na mano nkaninye wazumilizya ukuti awantu wayitungulule pa mpindi intali pa kuti wayilolele ukuti nga watakutungululwa naweliwe watange watunguluke. (Jere. 10:23) Ukutekanya kwa kwe Leza akuno kulilenga awantu wamanye ukuti awino wayana ukuteka mu nsi na mwi yulu. Kulilenga wamanye nu kuti imitecele yakwe ayino yazipa swinya ayino yingaleta vye umutende mu nsi.

7. Awaweni wano wapondocela Yehova swinya avyani vino alicita kwe woliwo?

⁷ Wucipondoka wa wana wakwe wamwi. E Yehova atelewuzile awangeli na wantu na kalema kamwi. Lelo e Satana (cino cikasula ukuti e Kakanya) wapondocezile Yehova. Swinya walenzile Adamu ne Eva ukupondocela Yehova. Pa nsizi, awangeli na wantu wanji wizile awamupondocela. (Yud. 6) Mu kupita kwa mpindi awantu wakwe awina Israeli wizile awamukana nu kutalika ukupepa twa leza twa wufi. (Ayize. 63:8, 10) E Yehova wayivwile uwuwi nkaninye, lelo watwalilizile ukusipicizya. Swinya alitwalilila ukusipicizya ukuficila pano aliyonona wa cipondoka wonsinye. E Yehova na wawomvi wakwe wonsinye awa cisinka walisecelela nkaninye pano kutaliwa intazi zyonsinye zino zikalenga wasipicizya!

8-9. Awufi ci wuno wakawipizya e Yehova, swinya acani cino tuzipizile ukucitapo?

⁸ Uwufi wa kwe Satana. E Satana wawipizizye e Job na wawomvi wa kwe Yehova wonsinye ukuti wakawombela e Yehova pa mulandu wa kuti akawapa vimwi. (Job 1:8-11; 2:3-5) Swinya acili watwalilila ukuwawipizya ukufika ni lelo. (Ukuwu. 12:10) Tungalanjizya ukuti Satana we cawufi nga ca kuti tukusipicizya intazi swinya tukutwalilila awa cisinka kwe Yehova pamulandu wa kumukunda. Acino nga mwatwalilila ukusipicizya, alimilambula wulyanye vino walambuzile e Job.​—Jemu. 5:11.

⁹ E Satana akawomvya wa simapepo wa mu mipepele ya wufi pa kuwipizya e Leza ukuti wakalala swinya awino akalenga awantu wacula. Wamwi nga ca kuti umwana wafwa, wakalanda  nu kuti we Leza wamusenda amuno akulonda awangeli na wanji kwi yulu. Wo-o wawa amukwelengula uwukulu nkaninye kwe Leza. Sweswe twamanya ukuti e Yehova Amukwasi wa lukundo. Awuli umulandu wuno nanti twalwalanye nanti twafwilwa wino twakunda tusipa Leza imilandu. Twamanya nu kuti alifumyapo indwala nu kuzyulupula wonsinye wano wafwa. Fwandi cingazipa ukunenako wonsinye wano wangatemwa ukumanya ukuti e Yehova we Leza wa lukundo. Nga tukucita wo-o tuliwalenga Leza akwasuka wino akamukwelengula.​—Imilu. 27:11.

10. Uzye Amalumbo 22:23, 24 yakasokolola cisinka ci pe Yehova?

¹⁰ Ukulola awawomvi wakwe wakucula. E Yehova we Leza wa luse. Akayivwa uwuwi nkaninye nga walola tukucula pa mulandu wa lufyengo, ukulwala nanti pa mulandu wa kukanapwililika kwitu. (Wazyani Amalumbo 22:23, 24.) E Yehova akatwivwicisya sana nga tukucula. Co-o cikalenga awavwambisya ukufumyapo uwuwipe. Swinya wonye avino alicita. (Linganyaniko Ukufuma 3:7, 8; Ayizeya 63:9.) Impindi yiliyiza pano “alipyela aminsozi yonsi ku minso yawo, kutaliwa imfwa swinya. Amalanda yataliwako nanti akulila, nanti awulumilanye.”​—Ukuwu. 21:4.

11. Uzye e Yehova akayivwa wuli pa wawomvi wakwe wonsinye wano wafwa?

¹¹ Ukufwilwa awantu wano wakunda. Uzye e Yehova akayivwa wuli pa wawomvi wakwe awacisinka wonsinye wano wafwa? Akalucila nkaninye ukwiza walola na swinya! (Job 14:15) Teyelenganyani vino akalucila ukwizalola e ciwuza wakwe Abrahamu na swinya. (Jemu. 2:23) Nanti e Musa wino walandanga nawe icinso ni cinso. (Ukuf. 33:11) Nanti yelenganyani vino akalucila ukwizalola e David na wakimbila wa malumbo wanji pano waliwakwimbila indwimbo zya kumulumbanya. (Amalu. 104:33)  Kweni nanti aca kuti wa-a wonsinye wafwa ataliwilila. (Ayize. 49:15) Akakwizuka tonsinye pe woliwo. Mu nzila yinji tungati wonsinye kwe weliwe “awawumi.” (Luk. 20:38.) Uwanda wumwi aliwazyulupula nu kutalika ukuteyelezya ku mapepo yawo ayakufuma pansi ya mwenzo. Swinya alitalika ukupocelela ukupepa kwawo na swinyanye. Acino nga ca kuti mwafwilwa, mwakwelenganya pa malyasi ya musango wo-o. Ukucita wo-o kuliwamisansamusya nkaninye.

12. Avyani vino vikalenga e Yehova ayivwa uwuwi sana mwe ya-a amanda?

¹² Ulufyengo mu nsi. E Yehova wamanyile ukuti pano wucipondoka watalisile mu Edeni ivintu vyalinji nu kuya vikuwipilakovye. Wapata nkaninye uwuwipe, ulufyengo ni vimvulunganya vino vikacitika mu nsi. Akawikako sana amano kwe wano watawa na wakuwavwa ndino wandekwa na wamukamfwilwa. (Zaka. 7:9, 10) E Yehova akakwivwa uwuwi nkaninye nga ca kuti walola awawomvi wakwe wakucula nanti wawanyepa mu cifungo. Acino mwensinye mwe wano mukusipicizya nawe ponga, manyani ukuti wamikunda nkaninye.

13. Avintu ci ivya muselu vino Yehova akalola awantu wakucita, swinya alicitapo wuli?

¹³ Ukuvula kwa wuzelele mu nsi. E Yehova welewuzile awantu ukuti wamukolanya. Lelo e Satana akalonda ukuti wacita iviwipe. Pano Leza “walola ukuti uluwembu lwakula ku wantu mu nsi alwilwintika pe cino welewuzile awantu mu nsi. Co-o acimuvitisya nkaninye.” (Inta. 6:5, 6, 11) Uzye ivintu vikatela avizipapo ukufuma pe yoyo impindi? Nanti katicinye! E Satana akakwivwa icete nkaninye nga walola vino uwuzelele wukuya wukuvulilako mu nsi uwa wonsi na wonsi wawuye, awanaci na wanaci wawuye nga nu wawonsi na wanaci. (Efes. 4:18, 19) Lelo akavwivwa icete na nkani nga walola awawomvi wa kwe Yehova wakucita imembu inkulu. E Yehova alilanjizya ukuti wapata uwuwipe pano alifumyapo uwuwipe na wano wakacita iviwipe wonsinye wano wasilapila.

14. Avyani vino awantu wakacita ku nsi na kuvinyama?

¹⁴ Vino awantu wakakonona insi yino wapanga. Awantu wasipelelavye pakucuzya awantu wano wakateka lelo wakakonona ni nsinye. Cinji aca kuti wasisakamala ni vinyama ndi vino Leza walanzile. (Ekawi. 8:9; Inta. 1:28) Awasambilile wamwi walanda ukuti pamulandu na vino awantu wakakonona insi, cililenga imiti yimwi * ni vinyama vimwi ukufika kwe 1,000,000 ukulowa mu myakavye mitici yino yikwiza. Co-o cikalenga awantu wasakamikwa sana pe vino insi yiliwa ku nkolelo! Nomba cino tukasalifya aca kuti e Yehova walaya ukuti aliyonona “wonsinye wano wakakonona insi” nu kulenga insi yonsinye ukuwa we Paradaise.​—Ukuwu. 11:18; Ayize. 35:1.

15-16. Acani cino cingatwavwa ukutwalilila ukukolanya ukusipicizya kwa kwe Yehova? Lanjililani.

¹⁵ Teyelenganyani pa vintu ukuvula vino umukwasi wa kwi yulu wasipicizya pa mintapendwa ya myaka. (Lolani akambokosi kano kakuti “ Ivintu Vino Yehova Akasipicizya.”) E Yehova angafumya uwuwipe impindi iyili yonsinye, lelo nanti ciwe wo-o watekanya. Ica kuti mukutekanya kwakwe mwafuma ivizima nkaninye. Pa kutwavwa ukwivicisya cino tukulandapo teyelenganyani pe co-o icilanjililo. Tuti umulume nu muci wawanena ukuti umwana wino ali mukukwatwa alikwata ni ndwala. Swinya atalizimba alifwa zuwanye. Nomba wazumilizya ukuti umwana akwatwe. Pano wakwatwa watemwa nkaninye nanti acakuti ciliwawomela ukumusakamala. Pa mulandu wakukunda umwana, wasolapo ukusipicizya intazi zyonsinye nu kutwalilila  ukumusakamala ukuficila pano wangapelela.

¹⁶ Wonye avino na swe wana wakwe Adamu ne Eva twawa. Tukakwatwa nu luwembu. Lelo e Yehova watukunda swinya watuwikako amano. (1 Yoh. 4:19) Ukupusanako na wakwasi wa mucilanjililo, e Yehova weni alicitapo na cimwi. Wasola impindi yino alifumizyapo vyonsinye vino vikacuzya awantu mu nsi. (Mat. 24:36) Ulukundo lwa kwe Leza luzipizile ukulenga nasweswenye ukutwalilila ukusipicizya ukufika pano tungapelela.

17. Uzye amazwi ya pa Waheberi 12:2, 3 yangatwavwa wuli ukutwalilila ukusipicizya?

¹⁷ E Yehova wawa acakulolelako icizima sana ku kusipicizya. E Yesu wakolanyanga sana ukusipicizya kwa kwe Yisi. Pano walinji mu nsi wasipicizizye amazwi amawipe, umukwelengula nu kupamantilwa pa cimuti pa mulandu witu. (Wazyani Waheberi 12:2, 3.) Ukwasowa nu kuvwilika, ukusipicizya kwa kwe Yehova akuno kwalenzile ne Yesu nye atwalilile ukusipicizya, swinya kungamyavwa na mwemwenye.

18. Ukulingana ne 2 Peter 3:9, avyani vino vyacitika pa mulandu wakutekanya kwe Yehova?

¹⁸ Wazyani 2 Peter 3:9. E Yehova wamanya impindi inzima iya kwizayononelapo yo-o insi imbipe. Swinya pa mulandu wakutekanya kwakwe, calenga awantu awavule ukumumanya. Cinji aca kuti ama milioni ya wantu wakumupepa. Wonsinye wa-a wakasalifya nkaninye pe vino Yehova wasipicizizye wasuka wakwatwa, wasambilila ivya kumukunda nu kuyipa kwe weliwe. Swinya ciliyiza ciloleke apatiswenye ukuti e Yehova wacisile icete pa kutwalilila ukusipicizya pano alilambula ama milioni ya wantu wano walitwalilila ukusipicizya!

19. Acani cino tuzipizile twavwambisya ukucita, swinya avyani vino vilifumamo?

¹⁹ Kwe Yehova tukasambililako vino tungatwalilila ukusecelela pano tukusipicizya. Amuno asa mulandu na malanda nu wucuzi wuno Satana waleta, e Yehova watwalilila ukuwa we ‘Leza wa nsansa.’ (1 Tim. 1:11) Nasweswenye tungatwalilila ukusecelela pano tukulindilila ukuti ayize acindike izina lyakwe, alanjizye ukuti awino wayana ukuteka, nu kufumyapo intazi zyonsinye zino tukapitamo pe yo-o impindi. Acino lekani tutwalilile ukusipicizya. Amuno tutawa swenga, nu mukwasi witunye uwa kwi yulu watwalilila ukusipicizya. Nga twacita wo-o, tuliwa nu longo lwa kwikala umuyayaya ndi vino Baibolo yalanda ukuti: “Awalongo umuntu wino akulanga ali ni suwilo pano akwelezwa. Amuno ndi wacimvya wacita icete, alipocelela icilambu ca wumi cino Leza walayilizya wano wamukunda.”​—Jemu. 1:12