1. Avyani vino Yehova wamicitila?

UZYE calinji wuli pa kuti muwe mwe Nte ya kwe Yehova? Nce pamwi mwivwile “ilyasi lizima” pamuku wa kutalicila ukufuma ku wakwasi winu, kwe wano mwawombanga nawo, wano mwasambililanga nawo nanti pamwi wa Nte wizile pa ng’andanye. (Mar. 13:10) Pa nsizi kwalinji wino wawombesizye nkaninye ukumitungulula isambililo lye Baibolo. Mwasambilizile ukuti e Yehova wamikunda swinya na mwemwenye mwatalisile ukumukunda. E Yehova wizile amileta mwi wungwe lyakwe. Swinya pa mulandu wa kuti pe yo-o impindi mukakonka e Yesu, mwawa ni suwilo lya kwikala umuyayaya ku nkolelo. (Yoha. 6:44) Tusakuvwilika ukuti mukasalifya nkaninye e Yehova pa kuwomvya weyo umuntu ukumisambilizya icisinka ca mu Baibolo nu kumipocelela mwi wungwe lyakwe.

2. Avyani vino twandi tusambilile mwe co-o icipande?

² Pa mulandu wa kumanya icisinka ca mu Baibolo, twawa nu longo lwa kwavwa wanji ukwiza mu nzila yino ikatwala awantu ku wumi. Swe wamwi pamwi cikatupepucila ukuwizizya wanji ilyasi lizima lelo cikatuwomela ukutalika ukutungulula isambililo lye Baibolo. Uzye na mwemwenye avino mukayivwa? Nga vino cawa vimwi vino walanzile mwe co-o icipande vingamyavwa. Twandi tulande pe vino tungacita pa kuti twapanga awasambi. Twalanda na pe vino tungacita pa kucimvya intazi zino zingalenga twatina ukutalika ukutungulula isambililo. Nomba katetutalicile ukulanda pa mulandu wuno tuzipizile ukuwela swe wakawizya swinya wakasambilizya awi lyasi lizima.

3. Amulandu ci wuno tukawizizya?

³ Pano e Yesu walinji mu nsi wapile awasambilizi wakwe umulimo wuno wakweti imbali ziwili. Uluwali lwa kutalicila wawanenile ukuya mu kuwizya ilyasi lizima ilya Wufumu swinya wawasambilizizye ni vyakuwizya. (Mat. 10:7; Luk. 8:1) Ku cakulolelako, wawanenile ivya kucita nga ca kuti awantu wazumila ukuteyelezya kwi lyasi lizima ilya Wufumu nanti wakana. (Luk. 9:2-5). Wawanenile ukuti walinji nu kuwizizya awantu awavule swinya mu nsi mvule pano watili ilandwe zima “liliwizwa mu nsi yonsi.” (Mat. 24:14; Imili. 1:8) E Yesu wanenile awasambilizi wakwe ukuwizizya awantu pa Wufumu wa kwe Leza na vino wulicita asa mulandu wakane nanti wazumile.

4. Ukulingana ne Mateyu 28:18-20, acani cinji cino tuzipizile ukucita ukulunda pa kuwizya pa Wufumu?

⁴ Uluwali lwa citi wili wawanenile ukusambilizya awantu ukukonka vyonsinye vino wawanenile. Uzye wo-o umulimo wa kusambilizya, walinji nu kupelela vye ku wasambilizi wa kwe Yesu ndi vino wamwi wakalanda? Awe. Amuno e Yesu walanzile ukuti wo-o umulimo walinji nu kutwalilila ukufika na “ku nsilo yansi.” (Wazyani Mateyu 28:18-20.) Cikaloleka ukuti walanzile ya-a amazwi ku wasambi wano wacizile 500. (1 Kor. 15:6) Swinya mu cilolwa cino walanjizizye e Yohani walenzile ciloleke apatiswenye ukuti akalonda awasambilizi wakwe wonsinye wakwavwa wanji ukusambilila pe Yehova.​—Ukuwu. 22:17.

5. Ukulingana ne 1 Wakorinte 3:6-9, uzye Paulo walanjizizye wuli ukulemenkana kuno kwawa pa kuwizya nu kusambilizya?

⁵ E Paulo pa kutwavwa ukumanya ukuti tutazipizile ukupelela vye pa mulimo wa kukomela, wakolinye umulimo wa kupanga awasambilizi kwe vino cikawa pa kuti icimelwa cikule. Wizusizye awina Korinte icisinka ca kuti: “Nenji nalembeka Apolo witilila . . . Mwenji mwe calo ca kwe Leza.” (Wazyani 1 Wakorinte 3:6-9.) Swe wawomvi mu “calo ca kwe Leza.” Tukakomela ukupitila mu kuwizya nu kusembelezya ukupitila mu kusambilizya. (Yoha. 4:35) Lelo twamanya ukuti e Yehova awino akamezya imbeyu nanti ukupalamika awantu kwe weliwe.

6. Avyani vino tuzipizile ukwelezya na maka ukucita pano tukusambilizya wanji Baibolo?

⁶ Tukavwamba wano wawa nu mwezo uwuzima wuno ‘wukavwamba uwumi wa muyayaya.’ (Imili. 13:48) Pa kuti awantu wa musango wo-o wawe awasambilizi, tuzipizile ukuwavwa (1) ukwivwicisya, (2) ukusuwila, nu (3) ukuwomvya vino wakusambilila mwe Baibolo. (Yoha. 17:3; Kolo. 2:6, 7; 1 Tes. 2:13) Swensinye mwi wungwe tungavwa amasambililo ye Baibolo ukupitila mu kuwalanjizya ulukundo nu kuwapocelela ni nsansa nga wiza mukulongana. (Yoha. 13:35) E katungulula azipizile awasumba impindi inkulu nu musambi. Swinya azipizile ukumwavwa ukucimvya ivisambilizyo vya wufi ni ntambi vino vyawa ngati ‘amalinga amawome.’ (2 Kor. 10:4, 5) Pa kuti umuntu apiluke mwe vyonsinye vyo-o pakapita impindi. Lelo nga ca kuti wapiluka mukafuma ivizima.

7. Amulandu ci wuno tukawizizya nu kusambilizya wanji ilyasi lizima?

⁷ Amulandu ci wuno tukawombela umulimo wa kuwizya nu kusambilizya? Umulandu wa kutalicila awa kuti twakunda Yehova. Nga tukwelezya na maka yitu yonsinye ukwivwila isundo lya kuwizya nu kupanga awasambilizi lyo tukulanjizya ukuti twakunda Leza. (1 Yoh. 5:3) Lonye lo-o ulukundo aluno lwalenzile mutalike ukuwizizyako wanji. Uzye capepusile ukwivwila lyo-o isundo? Awe nakalya! Ukwasowa nu kuvwilika pamwi mwivwile ni ntete pano mwayile mukuwizya pa muku wa kutalicila. Lelo pa mulandu wa kumanya ukuti wo-o awuli mulimo  wuno Yesu wamipa ukuwomba, mwatwalilizile ukuwomba. Swinya pamwi pa mulandu wa kuwomba imiku imivule catalika ukumipepucila ukuwomba. Nga pakutungulula isambililo lye Baibolo peni mukayivwa wuli? Uzye mukakwivwa intete? Nga vino cawa, muzipizile ukupepa kwe Yehova ukuti amipe amaka ya kunena wumwi ukuti mutalike ukusambilila nawe Baibolo. Nga mwacita wo-o alimyavwa ukutalika ukuvwambisya ukupanga awasambilizi.

8. Ukulingana ne Marko 6:34, acani cinji cino cikalenga twasambilizya awantu?

⁸ Ica citi wili, ukukunda awantu akuno kukalenga twawasambilizya icisinka ca mu Baibolo. Impindi yimwi e Yesu na wasambilizi wakwe pa nsizi ya kuwombesya sana mu mulimo, watonsile. Acino pano walondanga ukuti wapuze iwumba lyawakonsile. E Yesu pano wawalola wawivwizile uluse nu kutalika ukuwasambilizya “ivintu ivivule.” (Wazyani Marko 6:34.) Nanti aca kuti e Yesu watonsile wawombesizye nkaninye. Amulandu ci? Amuno wamanyile vino wa-a awantu wayivwanga. Walondanga ukuwavwa amuno waweni ukuti waculanga nkaninye swinya walondekwanga ukuwapa isuwilo. Wonye avino awantu wawa na pe yo-o impindi. Wakapita mu ntazi imvule swinya wakalondekwa ukuwapa isuwilo cingatenga wakaloleka ngati wawa ni nsansa swinya ivintu vikawazipila mu wumi. Wawa ngati ang’onzi insowe zino zitawa ne kacema wa kuzitungulula. Umutumwa e Paulo walanzile pa wantu wa musango wo-o ukuti awantu wano watamanya Leza swinya wano watawa ni suwilo. (Efes. 2:12) Wawa pa “nzila yino yalungama kwilowelwe”! (Mat. 7:13) Nga twelenganya pe vino awantu wano wawa mu cifulo cino tukawizizyamo wakavwambisya ukumanya Leza, ulukundo lulilenga tuwavwe. Ninzila inzima yino tungawavwilamo akutalika ukuwatungulula isambililo lye Baibolo.

9. Ukulingana na Wafilipi 2:13, uzye e Yehova angamyavwa wuli?

⁹ Nce pamwi mukatina ukutalika ukutungulula isambililo lye Baibolo, pa mulandu wa kwelenganya ukuti muliwasumba impindi inkulu ukupekanya nu kutungulula. Nga vino mukayivwa muzipizile ukupepa kwe Yehova. Muzipizile ukumunena ukuti amyavwe ukuwa nu mwezo wa kuvwambisya ukutalika ukutungulula isambililo lye Baibolo. (Wazyani Wafilipi 2:13.) Umutumwa e Yohani walanzile ukuti e Yehova akakwasuka amapepo yano yalingine nu kulonda Kwakwe. (1 Yoh. 5:14, 15) Nga mwacita wo-o e Yehova alimipa umwezo wa kutalika ukuvwambisya ukutungulula isambililo.

10-11. Avyani vino vingalenga tupotwe ukutalika ukutungulula isambililo?

¹⁰ Twamanya ukuti umulimo wa kusambilizya wacindama nkaninye. Lelo pamwi cingatuwomela ukuwomba ndi vino sweweneco tukalonda ukuwomba mu mulimo wa kupanga awasambi. Lekani tulandeko pa ntazi zimwi, tulole na vino tungazicimvya.

¹¹ Tungapotwa ukuwombesya ndi vino tukulonda. Ku cakulolelako, wakawizya wamwi awakote ne wamwi wakalwalilila. Uzye avino cawa na kwe mwemwe. Nga vino cawa lolani vimwi vino tusambilizileko ku ndwala ye COVID-19. Tusambilizile ukuti tungatungulula amasambililo ye Baibolo ukuwomvya amafoni nanti vinji ivya kupanga panga. Mungatungulula isambililo lye Baibolo pano muli pa ng’anda pamwinunye. Ukutungulula amasambililo ukuwomvya yo-o inzila muli uwuzima na wunjinye. Awantu wamwi wakalonda ukusambilila Baibolo lelo wasiwa ni mpindi pano awanawitu watantika ukuya mu kuwizya. Wamwi wakawa ni mpindi umutondo tondo nanti amanguzi. Uzye mutange muyikundile ukusambilila na wantu wa musango wo-o? Wonye avino ne Yesu wacisile. Wasambilizizye e Nikodemu uwusiku, amuno ayili mpindi yino we-e umonsi wakweti.​—Yoha. 3:1, 2.

12. Avyani vino vingalenga tusuwile ukuti tungawa swe wakasambilizya wazima?

 ¹² Tungalola ngati tutafisilepo ukutungulula isambililo. Tungakwelenganya ukuti tutamanya ivivule, suka nga twiza twamanya ivivule apano tulitalika ukutungulula isambililo lye Baibolo. Nga vino mukayivwa lolani ivintu vitatu vino vingamyavwa ukusinincizya ukuti mungatungulula. Ica kutalicila aca kuti e Yehova akalola ukuti mwafikapo ukusambilizya wanji. (2 Kor. 3:5) Ica citi wili e Yesu wino wapwa amaka munsi na mwi yulu awino wamipa wo-o umulimo. Co-o cikulanjizyavye ukuti wamisuwila. (Mat. 28:18) Ica citi tatu e Yehova na wanawitu wangamyavwa. E Yehova wavwizye e Yesu ukumanya vino angalanda swinya wonye avino alicita na kwe mwemwenye. (Yoha. 8:28; 12:49) Vinji vino mungacita nga mukulonda ukutalika ukutungulula isambililo lye Baibolo, mungawuzya e kangalila winu uwiwumba, e painiya nanti e kawizya winji ukuti amyavwe. Cimwi cino cingamyavwa ukuwa mwe wakasambilizya awazima akusucilila wakawizya wa musango wo-o ku masambililo yawo.

13. Amulandu ci wuno tuzipizile ukuyikundila ukupiluka mu nzila zino tukawomvya pa kusambilizya?

¹³ Cingatuwomela ukuwomvya iviwombelo ivipya ni nzila impya. Vino twatungululanga amasambililo ye Baibolo vyapiluka pe yo-o impindi. Ku cakulolelako, vino tukapekanya nu kutungulula amasambililo mwi buku lya kuti Ungikala Amanda Pe!, vyapusana nkaninye na vino twacitanga mu mabuku yanji. Amuno mwe lyo-o ibuku mwawavye amaparagrafu matici. Fwandi impindi inkulu ikasumbwa sana ku kulanzyanya nu musambi. Pano tukutungulula tukawomvya sana amavidyo, vino vyawa pa webusaiti yitu nga ne JW Library^®. Nga ca kuti mutamanya ivya kuwomvya vyo-o iviwombelo mungawuzya wumwi wino amanyile pa kuti amilanjizye ivya kucita. Swe wantu nga twawelezya ukucita vimwi mu nzila yimwi cisipepuka ukupiluka nga ca kuti vimwi vyapiluka. Lelo ukupitila mu kwavwa kwa kwe Yehova na wanji, mulilola ukuti camipepucila swinya muliwakwivwa ni cete pano mukutungulula isambililo. E painiya wumwi walanzile ukuti “yo-o inzila ayizima kwe kasambilizya na ku musambi nye.”

14. Acani cino tuzipizile twakwizuka nga ca kuti tukawombela mu cifulo muno awantu watatemwa ukuteyelezya kwi lyasi lizima? Swinya amulandu ci wuno tungalandila ukuti iwaliko lye 1 Wakorinte 3:6, 7 alyakuwomelezya nkaninye?

¹⁴ Tungakwikala kuno catala ukupanga isambililo. Awantu wamwi watatemwa ukuteyelezya kwi lyasi lizima ne wamwi weni wakakana nu kukana. Uzye acani cino cingatwavwa ukutwalilila ukuwizya nga ca kuti cawa wo-o? Mwakwizuka ukuti ivintu vikapiluka mwe yo-o insi yino twisilemo, ica kuti nawalyanye wano watatemilwe ukuteyelezya kwi lyasi lizima wangakunda ukuteyelezya. (Mat. 5:3) Ku cakulolelako, wamwi wano wakananga amabuku yitu wiza watalika ukusambilila Baibolo. Cinji aca kuti e Yehova awili mweneco wa mulimo wa kusinza. (Mat. 9:38) Cino akalonda vye kwe sweswe akukomela nu kusembelezya, umulimo wakumezya awakwe. (1 Kor. 3:6, 7) Acino nanti mutakwata isambililo nye lino mukatungulula, mwakwizuka ukuti e Yehova akatulambula pa mulandu wa kwavwa awantu ukusambilila pe weliwe asa pa mabuku yano tukapa awantu nanti pa masambililo yano tukatungulula! *

15. Uzye e Yehova akakwivwa wuli umuntu nga wazumila ukusambilila Baibolo watalika nu kuwomvya vino akusambilila?

¹⁵ E Yehova akasecelela nkaninye nga ca kuti wumwi wasambilila icisinka ca mu Baibolo  watalika nu kunenako wanji vino wasambilila. (Imilu. 23:15, 16) Swinya akasecelela sana nga walola awawomvi wakwe wakuwombesya mu mulimo wakuwizya nu kusambilizya. Ku cakulolelako asa mulandu ni ndwala ya kwe korona yino yaponile mu mwaka wa mulimo uwa 2020, twatunguluzile amasambililo ukufika kwe 7,705,765. Swinya twavwizye awantu ukufika kwe 241,994 ukuyipa kwe Yehova nu kubatizwa. Wa-a wano wabatizizwe nawo waliyavwa wanji ukuwa awasambi. (Luk. 6:40) Fwandi ukwasowa nu kuvwilika tukalenga e Yehova ukusecelela pano tukuwombako umulimo wa kupanga awasambi.

16. Avyani vino tuzipizile ukuvwambisya ukucita?

¹⁶ Umulimo wa kupanga awasambi wutapepuka, lelo e Yehova angatwavwa ukusambilizya wanji ukumukunda. Mungatantika ukuti mwatungulula isambililo nanti lyonganye. Mungazunguka ukulola vino vingafumamo nga mukukolowozya wonsinye wano mwawizizya nga wangatemwa ukusambilila Baibolo. Nga mukucita wo-o e Yehova alimipala nkaninye!

17. Uzye tuliwayivwa wuli nga tukutungulula isambililo lye Baibolo?

¹⁷ Ala alongo nkaninye ukuwombako umulimo wa kuwizya nu kusambilizya! Wo-o umulimo wukalenga twawa nkaninye ni nsansa. Umutumwa e Paulo wino wavwizye awina Tesalonika awavule ukuwa awasambi walondolozile vino wayivwanga pano watili: “Ukuwa kweni muno amwemwenye, mwemwenye na lwinu mwaleka tukulolela, tuli ni cimwemwe swinya muno amwemwenye tungayitumvizya ukucimvya kwitu pa nkolelo pa mfumu yitu e Yesu pano wiza wiza. Amwemwenye mwe kuwanzwa kwitu swinya mwe cimwemwe citu.” (1 Tes. 2:19, 20; Imili. 17:1-4) Wonye wo-o avino awavule wakayivwa na pe yonye impindi. E nkazi Stéphanie wino wavwa awasambi awavule ukufika ku lubatizyo walanzile ukuti, “Kutawa insansa zino zingacila pa kwavwa umuntu ukuyipa kwe Yehova.”