1-2. Ukulingana na vino vyawa pa Imilimo 8:27-31, 35-38, acani cino calenzile e cilolo umwina Ethiopia asolepo ukubatizwa?

UZYE MUKALONDA ukubatizwa nu kuwa umusambi wa kwe Klistu? Ukukunda Yehova kwalenga awavule wasolepo ukubatizwa. Lekani tulande pa ca kulolelako ce cilolo wino wawombanga kwe namfumu wa ku Ethiopia.

² We-e umwina Ethiopia walile wasambilila vye mu Mawaliko ukuti azipizile ukubatizwa, atalemile na kwi sote wasozilepo ukubatizwa paponye (Wazyani Imilimo 8:27-31, 35-38.) Uzye acani cino calenzile asolepo ukubatizwa? Ukwasowa nu kuvwilika afwile wakunzile sana vino wa wazyanga mwi buku lya kwe Ayizeya pano walinji mwi celeta ukufuma ku Yerusalemu ukuya ku Ethiopia. Swinya walile Filipi wamulondololela vino vyalinji mwi buku lya kwe Ayizeya, wakunzile sana ukumanya vino e Yesu wamucitizile. Nomba acani cino calenzile e cilolo aye ku Yerusalemu? Amuno wakunzile sana e Yehova. Twamanya wuli? Wayile ku Yerusalemu mu kupepa e Yehova. Afwile walesile ukuya kuno wapepanga nu kutalika ukupepa ponga nu luko lwa wantu wano wayipile kwe Leza wa cisinka. Ukukunda e Yehova akuno kwalenzile asolepo ukubatizwa nu kuwa umusambi wa kwe Klistu.​—Mat. 28:19.

3. Avyani vino vingalenga wumwi ukupotwa ukubatizwa? (Lolani akambokosi ka kuti “ Uzye Umwezo Winu Wawa Ngati Amusili ci?”)

³ Ukukunda e Yehova akuno kungalenga namwenye musolepo ukubatizwa. Swinya ulukundo nye lungalenga mupotwe ukubatizwa. Munzila ci? Lolani vimwi vino vingalenga. Mungakunda sana iviwuza na wa lupwa wano wasilongana ica kuti mungatalika ukulola ngati walimipata nga mwasolapo ukubatizwa. (Mat. 10:37) Nanti mungalanga mwakunda ukucita  vimwi vino mwamanya nu kumanya ukuti e Leza wapata, ica kuti mukapotwa ukuvileka. (Amalu. 97:10) Nanti pamwi mwakunda ukuzevya kumwi muno mwawa ivya mu mipepele ya wufi. Pamwi kwawa vimwi vino mucili mukakwizuka vino vyalenganga mwawa ni nsansa pano mukuzevya. Ivya musango wo-o vingalenga mupotwe ukuleka ukukonka intambi zino e Yehova wapata. (1 Kor. 10:20, 21) Fwandi cingazipa ukuyiwuzya ukuti, “Avyani, nanti weweni wino nene nakunda sana?”

4. Acintu ci icicindame sana cino cizipizile ukulenga wumwi ukusolapo ukubatizwa?

⁴ Kwawa ivivule vino vingalenga mutemwe e Yehova nu kumusalifya. Ku ca kulolelako, pano mutani mutalike ukusambilila e Baibolo ni Nte zya kwe Yehova, mufwile mwacindisile sana Baibolo. Nanti pamwi mwatemilwe sana e Yesu. Nomba pa mulandu wa kuti mwamanya icete vino Inte zya kwe Yehova zyawa, mufwile mukatemwa sana ukuwa nawo ponga. Lelo vyonsinye vyo-o asa vino vingalenga musolepo ukuyipa kwe Yehova nu kubatizwa. Ukukunda Yehova akuno kulilenga musolepo ukubatizwa. Nga mwakunda sana Yehova, pasi nanti cimwi cino cilimilesya ukumuwombela. Ukukunda e Yehova akuno kulilenga mubatizwe swinya kulimyavwa nu kutwalilila ukumuwombela ni cisinka na pano mwabatizwa.

5. Amawuzyo ci yano twandi tusambilile?

⁵ E Yesu watili tuzipizile ukutemwa e Yehova nu mwezo witu wonsinye, uwumi witu wonsinye, amelenganyo yitu yonsinye na maka yitu yonsinye. (Mar. 12:30) Nomba tungacita wuli pa kuti tutemwe sana e Yehova nu kumucindika? Tukatalika ukumutemwa nga tukwelenganya sana pe vino watutemwa. (1 Yoh. 4:19) Avyani vinji vino muliwacita nga ca kuti mwatemwa sana e Yehova? *

6. Ukulingana na Waroma 1:20, anzila ci yonga yino yingamyavwa ukusambilila pe Yehova?

⁶ Sambililani pe Yehova ukupitila mwe vino welewula. (Wazyani Waroma 1:20; Ukuwu. 4:11) Muwakwelenganya pa vimelwa ni vinyama na vino vikalanjizya ukuti Yehova awa mano nkaninye. Swinya muwasambilila na pe vino umuwili wa muntu wapangwa mu nzila yakuzungusya. (Amalu. 139:14) Yelenganyani na pa maka yano Yehova wawika mwi lanzi. Nanti ciwe wo-o, ilanzi alutanda luno lwawa pa ntanda imvule zino Yehova wapanga. * (Ayize. 40:26) Ukwelenganya nkaninye pe vino Yehova welewula kulilenga muwe sana na katina. Lelo ukumanya vye ukuti awa maka swinya awa mano kwawa vye antaliko ya kumumanya nu kuwa e ciwuza wakwe. Muzipizile ukusambilila na vinji pe weliwe.

7. Pa kuti mukunde sana e Yehova, acani cino mutazipizile mwavwilika?

⁷ Mutafwile mwavwilika ukuti e Yehova wamikunda nkaninye. Uzye mukapotwa ukuzumila ukuti e Kelewula wa nsi ni yulu wamimanya swinya akamisakamala? Lyo fwandi muwakwizuka ukuti e Yehova ‘atawa ukutali kwe sweswe wenga na wenga.’ (Imili. 17:26-28) ‘Akavwambilizya mu myezo yonsinye’ swinya wamilaya nu kuti, ‘ndi mwamuvwamba alileka mu muzane.’ (1 Imila. 28:9) Awuli umulandu wuno mukusambilila ne Baibolo amuno e Yehova ‘wamipalamika kwe weliwe.’ (Jere. 31:3) Muliwamutemelwako pano mukuya mukumanyilako ivizima na vinji vino wamicitila.

8. Uzye mungalanjizya wuli ukuti mukasalifya pe vino Yehova wamikunda?

 ⁸ Inzila yonga yino mungalanjizya ukuti mukasalifya pe vino Yehova wamikunda, akulanda nawe mwi pepo. Nga ca kuti mukumunena vino vikumisakamika swinya mukumusalifya na pe vyo wamicitila, muliwa mukundilako. Icakuti wuciwuza winu na weliwe wuliwawomelako pano mukulola vino akwasuka amapepo yinu. (Amalu. 116:1) Mulisinincizya ukuti akakwivwicisya nkaninye vino mukapitamo. Lelo pa kuti mupalamile sana kwe Yehova, muzipizile ukumanya vino watemwa na vino wapata, nu mulandu wuno akacitila ivintu vimwi. Swinya muzipizile nu kumanya vino akalonda muwacita. Ukusambilila mwi Zwi lyakwe, e Baibolo akuno kulimyavwa ukumanya icete vino akalonda muwacita.

9. Uzye mungalanjizya wuli ukuti mukasalifya pe Baibolo?

⁹ Muwakunda sana Izwi lya kwe Leza, e Baibolo. E Baibolo wenganye awino akatunena icisinka pe Yehova nu mulandu wuno Yehova wapanjizile awantu. Mungalanjizya vye ukuti mukasalifya pe Baibolo nga mukuwazya cila wanda nu kukonka vino mukuwazya swinya mukupekanizizya na lyankani pano mutani musambilile na wino akamitungulula isambililo. (Amalu. 119:97, 99; Yoha. 17:17) Uzye mukawazya Baibolo cila wanda? Uzye mukakonka vino mwatantika ukuwazya Baibolo?

10. Acintu ci cimwi cino calenga e Baibolo ukuyiwela sana?

¹⁰ Icintu cimwi cino calenga e Baibolo ukuyiwela aca kuti mwawa amalyasi ya wantu wano walinjiko pano e Yesu walinji munsi. E Baibolo alibuku lyonganye lino likalondolola vino Yesu watucitila. Nga mwasambilila vino Yesu walandanga nu kucita, muliwavwambisya ukuwa iviwuza vyakwe.

11. Uzye acani cino cingamyavwa ukutemwa e Yehova?

¹¹ Sambililani ukukunda Yesu pa kuti muwakundilako e Yehova. Amulandu ci? Amuno e Yesu wakolanyanga Yisi wulyanye vino wawa. (Yoha. 14:9) Fwandi nga mwasambilila sana pe Yesu apano muliwakundilako e Yehova. Teyelenganyani pe vino e Yesu wivwilanga uluse awapina, wano walwalililanga na  wano watakweti uwakuwavwa. Wa-a awantu walinji awasulwe nkaninye. Swinya yelenganyani na pa kupanda amano ukuzima kuno watusambilizizye pe vino tuzipizile twakwikala, ni vizima vino vikafumamo nga tukumwivwila.​—Mat. 5:1-11; 7:24-27.

12. Nga mwasambilila pe Yesu, acani cino muliyikundila ukucita?

¹² Cino cingamyavwa ukutemwa sana e Yesu, akwelenganya sana pa nzuwi yino wapile pa kuti tutetelwe uluwembu. (Mat. 20:28) Nga mwivwicisya ukuti e Yesu wayikundizile ukupa uwumi wakwe pa mulandu winu, mungalapila nu kulenga ukuti e Yehova amitetele. (Imili. 3:19, 20; 1 Yoh. 1:9) Pano mukuya mukutemelwako e Yehova ne Yesu, muliwapalamila ku wantu wano wakunda sana e Yehova nu Yesu.

13. Acani cino e Yehova wamipa?

¹³ Muwatemwa ulupwa lwa kwe Yehova. Walupwa lwinu ni viwuza wangapotwa ukwivwicisya cino mukulondela ukuyipa kwe Yehova. Wangatalika nu kumicuzya. Lelo e Yehova alimyavwa amuno wamipa awanawitu na wankazi wano wawa ngati awa lupwa lwinu. Wa-a awanawitu na wankazi watalitela wamilecelezye nga mwatwalilila ukuwa nawo ponga. (Mar. 10:29, 30; Hebe. 10:24, 25) Mu kupita kwa mpindi wa lupwa lwinu wangapingulapo ukuwombela Yehova nu kukonka amasundo yakwe.​—1 Pet. 2:12.

14. Ukulingana na vino vyawa pe 1 Yohani 5:3, avizima ci vino mwazana mukukonka amasundo ya kwe Yehova?

¹⁴ Muwasalifya pa masundo yano Yehova watupa swinya mwayakonka. Ncepamwi pano mutani mumanye Yehova, mwacitanga consinye cino mukulonda lelo pe yo-o impindi mufwile mwazana ukuti mwawa insansa mukukonka amasundo ya kwe Yehova. (Amalu. 1:1-3; wazyani 1 Yohani 5:3.) Yelenganyani pa kupanda amano kuzima kuno Baibolo yikalanda pa mulume, umuci, awakwasi na wana. (Efes. 5:22–6:4) Uzye mu lupwa lwinu mwawa insansa pa mulandu wakukonka vyo-o vino Baibolo yalanda? Uzye nomba mwawa ni nsansa pa mulandu wakukonka vino Baibolo yikalanda pe wano mufwile ukwizya nawo? Uzye pe yo-o impindi mungati mwawa ni nsansa ukucila vino mwalinji kali? (Imilu. 13:20; 1 Kor. 15:33) Ukwasowa nu kuvwilika mwawa sana ni nsansa.

15. Acani cino muzipizile ukucita nga mukulonda ukumanya vino vingamyavwa pa kuti mwakonka ivisinka vya masundo ya mu Baibolo?

¹⁵ Impindi zimwi mungapotwa ukwivwicisya vino mungawomvya ivisinka vya masundo ya mu Baibolo vino mukasambilila. Awuli umulandu wuno iwungwe lya kwe Yehova likapekanizizya amabuku yano yakalondolola icete sana vino vyawa mwe Baibolo pa kuti yamyavwa ukuwa na maka ya kwiluka icizima ni ciwipe. (Hebe. 5:13, 14) Nga mukuwazya mwe ya-a amabuku nu kwelenganyapo sana, muliwalola vino ukukonka ivisinka vya masundo ya kwe Leza kungamyavwa, swinya mulitwalilila nu kuwa mwi wungwe lya kwe Yehova.

16. Uzye e Yehova wateyanya wuli awantu wakwe?

¹⁶ Muwakunda iwungwe lya kwe Yehova swinya mwalitunjilila. E Yehova wawika awantu wakwe mu mawungwe amalekane lekane. Swinya wasonta ne Yesu ukuwa umutwe wa ma wungwe yonsinye. (Efes. 1:22; 5:23) E Yesu nawe wasonta iwumba lya wonsi awapakwe ukuti watungulula umulimo wa kuwizya wuno wukuwombwa insi yonsinye. Wisile lyo-o iwumba lya wonsi awapakwe ukuti “umuzya wa cisinka swinya uwa mano.” Wa-a awonsi wawika sana amano ku mulimo wawo uwakutwavwa ukupalamila kwe Yehova nu kuwa iviwuza vyakwe. (Mat. 24:45-47) Inzila yonga yino umuzya wa cisinka akalanjizya ukuti akatusakamala, akusinincizya ukuti awonsi awafikepo  wasontwa pa kuti watucema. Waeluda wakatutungulula nu kutucinjilila. (Ayize. 32:1, 2; Hebe. 13:17; 1 Pet. 5:2, 3) Wakawombesya sana pa kuti watusansamusya nu kutwavwa ukupalamila sana kwe Yehova. Lelo wakawomba nu mulimo uwucindame uwa kutwavwa pa kuti twasambilizyako wanji pe Yehova.​—Efes. 4:11-13.

17. Ukulingana na Waroma 10:10, 13, 14, amulandu ci wuno tuzipizile twanenelako wanji pe Yehova?

¹⁷ Mwakwavwa wanji ukukunda Yehova. E Yesu wanenile awasambi wakwe ukusambilizya wanji pe Yehova. (Mat. 28:19, 20) Pamwi tungatalika ukwivwila lyo-o isundo lya kwe Yesu pa mulandu vye wa kuti avino tufwile ukuwomba. Lelo pano mukuya mukutemelwako e Yehova, muliwavwambisya ukunenako wanji vino mukusambilila ndi vino vyalanzile umutumwa Peter ne Yohani ukuti, ‘Tutanga tuleke ukulanda pa vintu vino twaweni nu kwivwa.’ (Imili. 4:20) Kutawa cimwi cino cikatuletela sana insansa ukucila pa kwavwa umuntu ukutemwa Yehova. Teyelenganyani vino e Filipi watemilwe pano wavwizye e cilolo wa ku Ethiopia ukusambilila icisinka ca mu Mawaliko mpaka wafika nu ku lubatizyo! Nga ca kuti mukwivwila isundo lya kwe Yesu ilya kuya mukuwizya ndi vino Filipi wacisile, lyo mukulanjizya ukuti mukulonda ukuwa Inte ya kwe Yehova. (Wazyani Waroma 10:10, 13, 14.) Nga mwacita wo-o apano na mwe mungawuzya ndi vino e cilolo wa ku Ethiopia wawuzizye ukuti: “Nga fwandi cani cikundesya ukubatizwa?”​—Imili. 8:36.

18. Avyani vino tulisambilila mu cipande cino cikonsilepo?

¹⁸ Nga mwasolapo ukubatizwa, lyo mwapingulapo ukucita icintu icicindame nkaninye. Pa mulandu wa kuti ukubatizwa kwacindama nkaninye, muzipizile ukwelenganya sana pe vino vyasanzyamo. Avyani vino muzipizile ukumanya pa lubatizyo? Avyani vino muzipizile ukucita pano mutani mubatizwe na pano mwabatizwa? Ya-a amawuzyo yaliyasukwa mu cipande cino cikonsilepo.