1. Uzye acani cino umuntu azipizile ukutalicilapo ukucita pano atani atalike ukuzenga ing’anda?

YELENGANYANI ukuti wumwi wasolapo ukuzenga ing’anda. Amanyile ni ng’anda yino akulonda ukuzenga. Uzye mungati acani cino azipizile ukutalicilapo ukucita pano atani atalike ukuzenga? Ukwasowa nu kuvwilika, azipizile ukwikala pasi nu kulola zino alisumbapo. Amuno ndi wacita wo-o apano cingamwavwa ukumanya nga ca kuti alikwanisya ukuzenga nanti atalikwanisya. Nga wamanya indalama zino alisumbapo, apano angiza amale ukuzenga ing’anda yakwe.

2. Ukulingana ni waliko lye Luka 14:27-30, acani cino wumwi azipizile ukwelenganyapo pano atani abatizwe?

² Nga ca kuti ukutemwa Yehova nu kusalifya pe vino wamicitila kulenzile ukuti mutalike ukwelenganya pa kubatizwa, lyo vino mukulonda ukucita vili ngati aweyo wino akulonda ukuzenga ing’anda. Amulandu ci wuno twalandila wo-o? Lolani amazwi yano Yesu wavwanzile pe Luka 14:27-30. (Wazyani.) Pa-a e Yesu walandanga muno casula ukuwa umusambi wakwe. Wavwanzile ukuti nga tukulonda ukumukonka, tuzipizile ukuyipekanya ukucula nu kuleka ukucita vimwi vino twakunzile ukucita. (Luka 9:23-26; 12:51-53) Acino pano wumwi atani abatizwe azipizile ukwelenganizizya lya nkani vino aliwapitamo nga wawa umusambi wa kwe Klistu. Ukucita wo-o, akuno kulilenga ayize atwalilile ukuwombela Yehova ni cisinka nga wabatizwa.

3. Avyani vino twandi tusambilile?

³ Nanti aca kuti pa kuti tubatizwe tuzipizile ukuleka ukucita vimwi swinya tungapita na mu ntazi, lelo amapaalo yano tulipocelela pe yo-o impindi na ku nkolelo nga twabatizwa yatanga yalingane ni cili consinye. Fwandi lekani tusambilile pa mawuzyo yamwi amacindame nkaninye pa lubatizyo. Nga twalanda pe ya-a  amawuzyo apano mwandi mwasuke iwuzyo lya kuti, “Uzye njipekinye ukubatizwa?”

4. (a) Uzye ukuyipa kwe Yehova akuli ukucita wuli? (b) Uzye “ukuyikana” kuno kwalandwa pe Mateyu 16:24 akuli ukucita wuli?

⁴ Uzye ukuyipa akuli ukucita uli ? Pano mutani mubatizwe, muzipizile ukuyipa. Akuli ukuti ukupepa kwe Yehova ukufuma pa nsi ya mwezo winu nu kumunena ukuti mukulonda mwamuwombela wenganye ku ciyayaya. Nga mwayipa kwe Yehova, lyo ‘mwayikana’ mwe weneco. (Wazyani Mateyu 16:24.) Nga mwayikana, lyo mwawa nu longo ulukulu ulwa kuwa uwa kwe Yehova. (Roma. 14:8) Mu nzila yinji, lyo mwamulaya ukuti mwandi mwawika vye amano ku kumuwombela nu kumusecelesya, mutandi mwacita vino mukulonda. Ukuyipa wawa amulapo uwucindame nkaninye kwe Yehova. Asitupaticizya ukuti mpaka tufwile ukulapa. Lelo nga twamulaya, akalonda ukuti twikalilile ku mulapo witu.​—Amalu. 116:12, 14.

5. Awupusano ci wuno wawa pa kuyipa nu kubatizwa?

⁵ Awupusano ci wuno wawa pa kuyipa nu kubatizwa? Umuntu nga wayipa, akayipa palwakwe mwi pepo kwe Yehova, kusiwa wumwi wino akamanya. Lelo akakwiza mu kubatizwa lyo awantu wonsinye wakulolako. Akavule kukawa ukubatizwa pa kulongana kwa muputule nanti ukwa citungu. Umuntu nga wabatizwa apano cikamanyikwa kwe wanji ukuti fwandi wayipa kali kwe Yehova. * Swinya apano wakamanya nu kuti watemwa Yehova e Leza wakwe nu mwezo wakwe wonsinye, nu wumi wakwe wonsinye, na melenganyo yakwe yonsinye na maka yakwe yonsinye. Cikaloleka apatiswenye ukuti akulonda ukuwombela e Yehova umuyayaya.​—Mar. 12:30.

6-7. Ukulingana ne 1 Peter 3:18-22 amilandu ci yiwili yino ulubatizyo lwacindamila?

⁶ Uzye ukubatizwa kwacindama? Lolani amazwi yano yakazanwa pi waliko lye 1 Peter 3:18-22. (Wazyani.) Wulyanye vino uwato walinji acimanyisyo cakuti e Noa walinji ni suwilo mwe Yehova, avino nu lubatizyo lukalanjizya ukuti umuntu wayipa kwe Yehova. Nomba uzye ulubatizyo lwacindama? Ee lwacindama sana. E Peter walanzile umulandu wuno lwacindamila. Umulandu wa kutalicila awa kuti ‘aluno lulitupususya.’ Lelo lulitupususya vye nga ca kuti vino tukucita vikulanjizya ukuti twasuwila mwe Yesu nu kuti watufwizile, azyulupuka aya na kwi yulu, nu kuti pa mpindi yo-o wikala kwi kasa “lya kwe Leza ilya kwe ndilo.”

⁷ Umulandu wa citi wili awa kuti, nga twabatizwa tukawa ne “kampingu umuzima.” Nga twayipa kwe Leza nu kubatizwa tukawa swe viwuza vya kwe. Swinya nga twalapila nu kusuwila mu nzuwi ya kwe Yesu, e Yehova akatutetela pa mawembuko yitu. Co-o acino cikalenga tuwawa ne kampingu umusanguluke.

8. Acani cino cizipizile ukulenga umuntu apingulepo ukubatizwa?

⁸ Acani cino cizipizile ukulenga musolepo ukubatizwa? Pa mulandu wa kusambilila Baibolo mumanyile ivivule nkaninye pe Yehova, vino watemwa na vino akacita ivintu. Vino musambilizile pe Yehova vimifisile sana pa mwezo swinya vilenzile mu mutemwe nkaninye. Ukutemwa e Yehova acili icintu icicindame cino cifwile ukulenga mupingulepo ukubatizwa.

9. Uzye cikasula cani ukubatizizwa mwi zina lya kwe Tata ni lya Mwana ni lya muzimu uwutele, ndi vino vyawa pe Mateyu 28:19, 20?

⁹ Cinji cino cingalenga wumwi asolepo ukubatizwa akusambilila nu kusinilwa ukuti vino asambilizile mwe Baibolo avya cisinka. Lolani vino e Yesu walanzile pano wapile awantu wakwe umulimo wa kupanga awasambi. (Wazyani Mateyu 28:19, 20.) Ukulingana na vino Yesu  walanzile, wonsinye wano wakubatizwa wazipizile ukubatizizwa mwi zina lya kwe Tata, ilya Mwana ni lya muzimu wutele.” Uzye amwinye muno mwasula ya-a amazwi? Casula mukuti wino akulonda ukubatizwa azipizile ukuzumila nu mwezo wakwe wonsinye ukuti vino e Baibolo yikalanda pe Yehova, e Yesu, na pa muzimu uwutele avisinka. Vyo-o ivisinka vya mu Baibolo vyazipa nkaninye ica kuti vikatufika pa mwezo. (Heb. 4:12) Lekani tulandeko pe vimwi.

10-11. Avisinka ci pa Mukwasi witu uwa kwi yulu vino mwasambiliIa nu kumanya?

¹⁰ Uzye mwivwile wuli pano mwasambilizile vye ukuti izina lya Mukwasi witu uwa kwi yulu “we Yehova,” ‘awa maka yonsinye mu nsi na mwi yulu,’ swinya we “Leza wa cisinka wenganye?” (Amalu. 83:18; Ayize. 37:16) Yelenganyani na vino mwayivwile pano mwamanyile ukuti awili e Kelewula swinya ‘awino alitupususya.’ (Amalu. 3:8; 36:9) Wapekinye nu kuti tutulwe ku luwembu ni mfwa nu kutupa isuwilo lya kwikala umuyayaya. (Yoha. 17:3) Uwanda wuno muliyipa nu kubatizwa apano mulimanyikwa ukuti mwe Nte ya kwe Yehova. (Ayize. 43:10-12) Swinya muliwa mu lupwa lwa wanawitu na wankazi wano winikwa izina lya kwe Leza ica kuti wakanenako na wanji pe lyo-o izina .​—Amalu. 86:12.

¹¹ Ala twasyuka nkaninye pa kwivwicisya vino e Baibolo ikasambilizya pa Mukwasi witu! Ukuzumila nu kwivwicisya vyo-o ivisinka vya mu Baibolo ivicindame sana, kulilenga muyikundile ukupa uwumi winu kwe Yehova nu kubatizwa.

12-13. Avyani vino mwasambilila pa Mwana?

¹² Teyelenganyani vino mwayivwile pano mwasambilizile vyo-o pa Mwana ukuti, awino wakonka pe Yehova ukucindama mu nsi na mwi yulu. Wapile uwumi wakwe pa mulandu witu. Nu kuti nga tukulanjizya isuwilo mu nzuwi yakwe, uluwembu lwitu lungatetelwa, tungawa iviwuza vya kwe Yehova, swinya tungiza tuwe nu wumi wa muyayaya. (Yoha. 3:16) Awili e simapepo witu Umukulu. Akatwavwa pa kuti tuwe iviwuza vya kwe Leza nu kuyitopwa ivizima vino vyafuma mu nzuwi yakwe. (Hebe. 4:15; 7:24, 25) Pa mulandu wa kuti Amfumu ya Wufumu wa kwe Leza, awino Yehova aliwomvya pa kulenga izina lyakwe ukucindikwa, ukufumyapo iviwipe, nu kuleta amapaalo ya muyayaya mu Paradise. (Mat. 6:9, 10; Ukuwu. 11:15) Swinya awino tuzipizile twakolanya. (1 Pet. 2:21) Watusizile icilanjililo ce vino tuzipizile ukuwomvya uwumi witu, pano wawomvizye uwumi wakwe wonsinye mukucita vye ukulonda kwa kwe Leza.​—Yoha. 4:34.

¹³ Mulikunda sana Umwana wa kwe Leza, e Yesu, nga mukwivwila vino e Baibolo yikasambilizya. Co-o cililenga musolepo ukuwomvya uwumi winu mukucita ukulonda kwa kwe Leza ndi vino Yesu wacisile. Ica kuti mwe weneco nye mulipingulapo ukuyipa kwe Yehova nu kubatizwa.

14-15. Avyani vino mwasambilila pa muzimu uwutele?

¹⁴ Uzye mwacisile wuli pano mwasambilizile vyo-o ivisinka vya mu Baibolo pa muzimu uwutele? Umuzimu uwutele ase Leza, lelo amaka yano Yehova akawomvya. Wawuwomvizye ukutungulula wano walembanga Baibolo, swinya wukatwavwa ukwivwicisya nu kuwomvya vino tukasambilila mwe Baibolo. (Yoha. 14:26; 2 Pet. 1:21) E Yehova akawomvya umuzimu uwutele pa kutupa “amaka yano yacila pa wuntu.” (2 Kor. 4:7) Umuzimu uwutele wukatupa amaka ya kuwizya ilyasi lizima, ukucimvya amelezyo, ukuleka ukusakamikwa, nu kusipicizya intazi. Wukatwavwa ukuwa ni ‘vikomwa vya ku muzimu.’ (Gal. 5:22) E Yehova akapa uwilanye umuzimu wakwe uwutele kwe wano wakamwivwila swinya wano wakamulenga .​—Luka. 11:13.

¹⁵ Ala cikatuletela icimwemwe ukumanya  ukuti e Yehova akawomvya umuzimu wakwe uwutele pa kutwavwa ukutwalilila ukumuwombela! Nga mwazumila vyo-o vino Baibolo yikalanda pa muzimu uwutele, mulipingulapo mwe weneco ukuyipa kwe Yehova nu kubatizwa

16. Avyani vino twasambilila ukufika pa-a?

¹⁶ Nga mwasolapo ukuyipa kwe Yehova nu kubatizwa, lyo mwapingulapo ukucita icintu icicindame nkaninye. Ukulingana na vino tusambilizile, muzipizile ukwelenganizizya lyankani vino muliwapitamo nga mwabatizwa na vino muliyipusulako. Lelo mwakwizuka ukuti amapaalo yano mulipocelela yalusya pe vyonsinye vino mungayipusulako nanti ukupitamo. Ulubatizyo lungamipususya, swinya lungalenga muwe ne kampingu muzima. Icintu icicindamisye cino cizipizile ukumilenga ukubatizwa akukunda e Yehova. Muzipizile nu kuzumila nu mwezo winu wonsinye ukuti vino Baibolo ikasambilizya pe Tata, Umwana, na pa muzimu uwutele avisinka. Pa nsizi ya kusambilila vyonsinye vyo-o, Uzye nomba mungati muyipekinye ukubatizwa?

17. Avyani vino muzipizile ukucita pano mutani mubatizwe?

¹⁷ Nga ca kuti mukulola ukuti mufisilepo ukubatizwa, lyo kufwile kuli ivivule vino mwacita pa kuti muwomye wuciwuza winu ne Yehova. * Ukusambilila Baibolo kwalenga mumanye ivivule pe Yehova ne Yesu, swinya mwawa ni suwilo. (Hebe. 11:6) Mwasuwila sana mwe vino e Yehova watulaya mwe Baibolo, musivwilika nanti katicinye ukuti ukusuwila mu nzuwi ya kwe Yesu kulimipususya ku luwembu ni mfwa. Asa vyo-o vitupu lelo mwalapila na kwe vyonsinye vino mwacitanga. Cikamiluma nkaninye nga mwizuka vino mwacitanga pano mutani musambilile Baibolo, co-o cikalenga mwapepa kwe Yehova pa kuti amitetele. Mwapiliwuka vino mwalinji ku nsizi swinya mwatalika ukucita vino vikasecelesya Yehova. (Imili. 3:19) Mukakwivwa icete ukunenako wanji vino mwazumilamo. Mwafisilepo ukuwa mwe wakawizya wano watabatizwa swinya co-o calenzile mutalike ukuwizizya ponga ni wungwe. (Mat. 24:14) E Yehova akakwivwa icete sana swinya akasecelela nkaninye nga walola vyonsinye vyo-o vino mwacita.​—Imilu. 27:11.

18. Avyani vinji vino muzipizile ukucita pano mutani mubatizwe?

¹⁸ Kwawa na vinjinye vino muzipizile ukucita pano mutani mubatizwe. Ukulingana na vino tusambilizile, muzipizile ukuyipa kwe Leza. Mufwile ukupepa kwe Yehova, ukumulaya ukuti muliwacita ukulonda kwakwe uwumi winu wonsinye. (1 Pet. 4:2) Apano munganena e kampanya wi wumba lya eluda ukuti mukulonda ukubatizwa. E kampanya alinena waeluda wamwi ukuti wamisunkanye. Waeluda nga wamisunkanya, mutazipizile ukuwasaya nanti ukwivwa intete. Mwakwizuka ukuti wamimanya  nkaninye swinya wamikunda sana. Nomba pa kuti wasinincizye ukuti mwivwicisya vino mwasambilila swinya mumanyile uwucindami wa kuyipa nu kubatizwa, walipituluka namwemwe mu masambililo ya kutalicilapo aya mwe Baibolo. Nga wazana ukuti mufisilepo, waliminena ukuti mulibatizwa pa kulongana kwa muputule nanti ukwa citungu kuno kukonsilepo.

19-20. Avyani vino muzipizile ukucita pa nsizi ya kubatizwa, swinya acani cino cilimyavwa?

¹⁹ Avyani vino muzipizile ukucita pa nsizi ya kubatizwa? * Izukani ukuti ukuyipa amulapo wuno e Yehova akakwenecela ukuti muliwaficilisya. Acino nga mwabatizwa mufwile ukutwalilila ukucita vino vikulanjizya ukuti mwabatizwa. Avyani vino vingamyavwa ukutwalilila ukucita vino mwalayile e Yehova?

²⁰ Twalililani ukupalamila sana ku wanawitu na wankazi. Mwakwizuka ukuti palyanye pano mwabatizizwe nye apano mwizile amuwa uluwali lwa “wanawitu awa mu nsi yonsinye.” (1 Pet. 2:17) Wa-a awanawitu na wankazi awalupwa lwinu. Muliwakunda sana nga mukuzanwa lyonsinye mu kulongana. Asa coco conga, mwawazya Baibolo cila wanda nu kwelenganyapo. (Amalu. 1:1, 2) Nga mwawazyako iciputulwa cimwi, mwatela amukutumalako katici nu kwelenganya pe vino mwawazya. Nga mukucita wo-o, vino mukuwazya viliwamifika sana pa mwezo. “Muwapepa ukwasowa ukuleka.” (Mat. 26:41) Nga mukupepa ukufuma pa nsi ya mwezo mulipalamila sana kwe Yehova. Swinya lyonsinye “muwavwamba Uwufumu wa kwe Leza inkolelo.” (Mat. 6:33) Mungacita wo-o nga mukuwika sana amano pa mulimo wa kuwizya nu kupanga awasambi. Ukuwizya lyonsinye, kuliwawomya isuwilo linu swinya kulimipa ulongo lwakwavwa wanji ukuwa pa musewo wa ku wumi wa muyayaya.​—1 Tim. 4:16.

21. Avyani vino vilifumamo nga mwabatizwa?

²¹ Nga mwapingulapo ukuyipa kwe Yehova nu kubatizwa lyo mwacita icintu icicindame nkaninye cino musitela mupingulepo. Kweni acisinka ukuti nga mwabatizwa muliwayipusula mwe vimwi nu kupita mu ntazi. Lelo mwakwizuka ukuti intazi zyonsinye zino mungapitamo “azya pa ka mpindi katici.” (2 Kor. 4:17) Mwakwizuka nu kuti nga mwabatizwa muliwa ni nsansa pe yo-o impindi swinya ku nkolelo muliyitopwa “uwumi uweneco weneco.” (1 Tim. 6:19) Acino, mwensinye mwe wano mukulonda ukubatizwa muzipizile ukwelenganyapo sana nu kupepelapo pano mukwasuka iwuzyo lya kuti, ‘Uzye njipekinye ukubatizwa?’