1-2. Antazi ci zino awantu wa kwe Yehova wakapitamo?

UMUTUMWA Paulo wawomelezizye Timoti ukutwalilila ukuwombesya mu mulimo wa kuwizya. (2 Tim. 4:5) Swensinye tukakonka ko-o ukusunda ukwa kutwalilila ukuwombesya mu mulimo wa kuwizya. Lelo manda yamwi cisipepuka. Awanawitu na wankazi wamwi wakakwivwa intete zya kuwizya. (2 Tim. 4:2) Teyelenganyani pe vino awanawitu na wankazi wano wawawinda ukuwizya mu nsi muno wikalila! Lelo nanti ciwe wo-o wakawizya asa mulandu nu kutina ukuti nga wawalema wangawawika mu vifungo.

² Awantu wa kwe Yehova awavule wakapita mu ntazi zino zingawafupula. Ku cakulolelako, awavule pa kuti wasakamale indupwa zyawo mwe vino wakulonda wakawombesya nkaninye. Wakalonda ukuwombesya nkaninye mu mulimo wa kuwizya. Lelo pa mulandu wakutonta, wakazana ukuti wawombavye katici pa nsilo ye sabata. Wamwi pa mulandu wakulwalilila nanti uwukote wakapotwa ukuwombesya mu mulimo wa kwe Yehova. Wanji nawo wakayilola ngati watacindama kwe Yehova. E nkazi Mary * walanzile ukuti: “Impindi mvule nga nayivwa uwuwi nkawombesya nkaninye pa kuti ntalike ukuyivwa icete. Nomba ko-o ukuwombesya kukamala amaka ica kuti nkapotwa nu kuwombesya mu mulimo wa kuwizya.”

3. Avyani vino twandi tulandepo mwe co-o icipande?

³ Asa mulandu ni ntazi zino tungapitamo, e Yehova angatupa amaka yano yangatwavwa ukusipicizya nu kutwalilila ukumuwombela pano papelezile amaka yitu. Nomba pano tutani tulande pe vino Yehova angatwavwa, lekani tutalicile ukulanda pe vino wavwizye Paulo ne Timoti ukutwalilila ukuwombesya mu mulimo asa mulandu ni ntazi zino wapitangamo.

4. Antazi ci zino Paulo wapisilemo?

⁴ E Paulo wapisile mu ntazi imvule nkaninye zino zyalondekwanga  ukuti e Yehova awamwavwa. Maka maka pano awalwani wakwe wamumile, ukumupola amawe nga nu kumuwika mu vifungo. (2 Kor. 11:23-25) E Paulo ativwanga insoni zya kunena wanji ukuti nawenye wafupulwanga. (Roma. 7:18, 19, 24) Cinji aca kuti walwile indwala yino yalinji ngati “amunga mu muwili” wakwe yino walondanga ukuti e Leza afumye pe weliwe.​—2 Kor. 12:7, 8.

5. Avyani vino Paulo wacisile asa mulandu ni ntazi zino wapisilemo?

⁵ E Yehova wapile Paulo amaka yano yamwavwizye ukutwalilila ukuwizya asa mulandu ni ntazi zino wapitangamo. Ku cakulolelako, pano wamuwisile mu cifungo ku Roma watwalilizile ukuwizizya awantu ukuwikako na wamuwutekonye. (Imili. 28:17; Flpi. 4:21, 22) Wanji wano wawizizyanga awantu wano wamulondanga na wano wamutandalilanga. (Imili. 28:30, 31; Flpi. 1:13) Cinji aca kuti pe yilyanye impindi apano walembezile na wina Klistu wawuye amakalata yano yatwalilizile ukuwawomya swinya yano yakatuwomya na sweswenye. Ica kulolelako ca kwe Paulo cavwizye nkaninye awina Klistu wa mu Roma ica kuti watwalilizile ukuwizya ilyasi lizima nu “kusipa konsi.” (Flpi. 1:14) Nanti aca kuti impindi zimwi e Paulo atawombanga ndi vino umweneco walondanga ukuwomba, welezyanga ukuwomba ukulingana na pano papelezile amaka yakwe. Ukucita wo-o kwalenzile umulimo wa kuwizya ukuya pa nkolelo.”​—Flpi. 1:12.

6. Ukulingana ne 2 Wakorinte 12:9, 10, acani cino cavwanga Paulo ukuwombesya mu mulimo wa kuwizya?

⁶ E Paulo wamanyile ukuti e Yehova awino wamwavwanga mu milimo yonsinye yino wawombanga. Walanzile ukuti amaka ya kwe Leza yalolekanga mwe weliwe pano atonsile. (Wazyani 2 Wakorinte 12:9, 10.) E Yehova wawomvizye umuzimu wakwe uwutele ukulenga e Paulo ukutwalilila ukuwombesya mu mulimo wa kuwizya asa mulandu ni ntazi zyonsinye zino wapisilemo ndi vino ukumucuzya nga nu kumuwika mu vifungo.

7. Antazi ci zino Timoti wakweti zino zyange zilenge apotwe ukuwomba icete umulimo?

⁷ E Timoti nawenye wazipizile ukusintilila pa muzimu wa kwe Leza pa kuti awawomba icete umulimo wa kuwizya. Wapitanga ponga ne Paulo mu mawulendo ya wumishonari. Cinji aca kuti e Paulo wamutumanga mu kutandalila nu kuwomelezya amawumgwe. (1 Kor. 4:17) E Timoti afwile wayilolanga ngati atafisilepo ukuwomba wo-o umulimo. Pamwi acino calenzile  nu kuti e Paulo amunene ukuti: “Atiza wumwi awakusula muno we mutici.” (1 Tim. 4:12) Cinji aca kuti e Timoti walwalililanga. Yo-o indwala yakwe yalinji ngati amunga mu muwili.” (1 Tim. 5:23) Lelo e Timoti wamanyile ukuti e Yehova walinji nu kuwomvya umuzimu wakwe uwutele wuno walinji nu kulenga atwalilile ukuwizya nga nu kwavwa awina Klistu wawuye.​—2 Tim. 1:7.

8. Uzye Yehova akawomya wuli awantu wakwe mwe ya-a amanda?

⁸ Na peyonye impindi e Yehova akatupa amaka yakwe yano “yacila aya wuntu” yano yakatwavwa ukutwalilila awa cisinka. (2 Kor. 4:7) Acino lekani tulande pa vintu 4 vino akawomvya ukutwalilila awacisinka kwe weliwe. Akuli ukuti ipepo, e Baibolo, awina Klistu wanji nu mulimo wa kuwizya.

9. Uzye ipepo lingatwavwa wuli?

⁹ Akatuwomya ukupitila mwi Pepo. Pa Waefeso 6:18, e Paulo watuwomelezya ukuwa nu “mute wakupepa” kwe Leza. Nga tukucita wo-o, e Leza alitwavwa. Wonye wo-o avino calinji kwe Jonnie, wino akakwikala ku Bolivia pano wapisile mu ntanzi imvule. E wakwakwe na wakwasi wakwe wowilinye wizile awalwala pa mpindi yonganye. We-e umwanawitu citamupepucizile ukusakamala awalwale watatu pa mpindi iyili yonganye. Ku cawulanda, e mama wakwe wizile afwa. Swinya papisile impindi pa kuti e wakwawe ne yisi wapole. E Jonnie walanzile ukuti, “Cino canjavwanga sana nga nawa nu wulanda, akupepa kwe Yehova nu kumunena vyonsinye vino nkuyivwa.” E Yehova wapile Jonnie amaka yano yamwavwizye ukutwalilila ukusipicizya. Umwanawitu Ronald e eluda ku Bolivia, wamutumizile ukuti e mama wakwe wamulemile ni ndwala ye kansa. Ku cawulanda pa nsizivye ya mwezi wonga wizile afwa. Acani cino cavwizye we-e umwanawitu ukusipicizya? Watili: “Nga nkupepa nkamunena e Yehova vyonsinye vino nkuyivwa. Namanya ukuti akanjivwicisya ukucila vino umuntu uwili wensinye anganjivwicisya ukuwikako na nemweneconye.” Impindi zimwi tungalola ngati twapotwa ukusipicizya intazi yino tukupitamo ica kuti na mazwinye ayakulanda mwi pepo yangasila. Lelo e Yehova weni akalonda twapepa kwe weliwe asa mulandu tungapotwa ukumunena vino tukuyivwa mu mwezo.​—Roma. 8:26, 27.

10. Ukulingana na Waheberi 4:12, amulandu ci wuno ukuwazya Baibolo nu kwelenganyapo kwacindamila?

¹⁰ Akatuwomya ukuwomvya Baibolo. Nga tukulonda e Yehova awatuwomya nu kutusansamusya tuzipizile twawazya Amawaliko wulyanye vino ne Paulo wacitanga. (Roma. 15:4) Lelo pa kuti atwavwe ukulola vino Amawaliko yangatwavwa mu wumi witu, tuzipizile ukuwazya nu kwelenganyapo sana. (Wazyani Waheberi 4:12.) E Ronald wino tulanzilepo watili: “Nkakwivwa icete amuno uwanda wusipita ukwasowa ukuwazyapo Baibolo. Nga nawazya nkakwelenganyapo sana pa miwele ya kwe Yehova nu kulola vino wasakamalanga awawomvi wakwe awa ku nsizi. Ukucita wo-o kukambomya nkaninye.”

11. Uzye ukuwazya Baibolo kwavwa wuli e nkazi wino wafwizilwe umulume?

¹¹ Nga ca kuti tukwelenganya sana pe vino tukuwazya mwi Zwi lya kwe Leza tutaliwasakamikwa nkani pa ntazi zino tuliwapitamo. Lolani vino ukuwazya Baibolo kwavwa e nkazi wumwi wino wafwizilwe umulume. E eluda wumwi wanenile we-e nkazi ukuti angasambilila amasambililo amacindame nkaninye nga wawazya ilyasi lya kwe Job. We-e e nkazi pa nsizi yakumala ukuwazya ilyasi lyakwe Job, icakutalicila cino wacisile akupa Job imilandu pe vino welenganyanga. Mu melenganyo yakwe watalisile nu kusoka Job ukuti: “Job! Utati wawikavye amano ku ntazi zino ukupitamo!” Lelo pa nsizi yakwelenganyapo sana wilusile  ukuti nawenye welenganyanga wulyanye vino Job welenganyanga. Ukucita wo-o kwamwavwizye ukupiluka mwe vino welenganyanga swinya kwamuwomizye nu kumwavwa ukutwalilila ukusipicizya intazi ya kufwilwa umulume.

12. Uzye Yehova akatuwomya wuli ukuwomvya awaanwitu na wankazi?

¹² Akatuwomya ukupitila mu wina Klistu wanji. E Yehova akawomya awantu wakwe ukupitila mu wina Klistu wawuye. E Paulo walembezile awina Klistu wawuye ukuti walucilanga nkaninye ukuti wize ‘wakawomelezyanye’. (Roma. 1:11, 12) E nkazi Mary wino tulanzilepo wakunda nkaninye ukuwa ponga na wina Klistu wawuye. Watili: “E Yehova wawomvizye awanawitu na wankazi wano watamanyile na vino napitangamo. Amazwi yano wandembelanga na vino wanenanga vyawanga avilyanye vino nalondanga ukwivwa pe yoyo impindi. Ukucita wo-o kwanjavwizye ukumanyana icete na wanawitu na wankazi wano wapitanga mu ntazi izikolaneko na zino napitangamo nu kulola vino wacitanga pa kusipicizya. Wa eluda nawo wanjavwizye ukumanya ukuti nacindama mwi wumgwe.”

13. Uzye tungawomelezyanya wuli nga twiza mukulongana?

¹³ Inzila nzima yino tungawomelezyamo awanawitu nawa nkazi apano tuli pa kulongana. Nga muli pa kulongana mungawomelezya wanji ukupitila mukuwanena ukuti mwawakunda swinya mukasalifya pe vyonsinye vino wakawombesya. Ku cakulolelako, e eluda uwizina lya kuti Peter wanenile e nkazi wino watwalwa kwe wino asilongana ukuti: “Mukatuwomelezya nkaninye nga twamilola. Amuno lyonsinye mukakwiza na wana winu wonsinye 6 swinya mukakwasuka ivyasuko ivizima nkaninye mwensinye.” We-e nkazi wivwile icete nkaninye icakuti walanzile nu kuti: “Ya-a amazwi yano mwalanda yamfika nkaninye pa mwezo. Ala mutamanyilevye vino mwambomelezya!”

14. Uzye umulimo wa kuwizya wukatwavwa wuli?

¹⁴ Akatuwomya ukupitila mu mulimo wa kuwizya. Nga twawizizyako wamwi tukakwivwa icete nkaninye asa mulandu wazumile nanti awe. (Imilu. 11:25) E nkazi uwizina lya kuti Stacy walola vino ukuwombako umulimo wa kuwizya kukatuwomya. We-e nkazi walinji nu wulanda nkaninye pano uwa mu lupwa lwakwe wawinzilwe. Watalisile nu kuyiwuzya ukuti, ‘Uzye kwalinji vimwi vino nazipizile ukucita pa kuti imwavwe?’ Camuwomezile nkaninye ukuleka ukwelenganyapo. Nomba uzye mumanyile cino camwavwizye? Amulimo wa kuwizya. Ukuwombako umulimo wa kuwizya kwalenganga awika amano ku wantu wamu cifulo cino akawizizyamo ukucila ku ntazi yino wapitangamo. Walanzile ukuti: “E Yehova wizile ampa isambililo lino lyalundukanga nkaninye. Ala nawomelezizwe mukwivwavye. Cino canjavwa sana amulimo wa kuwizya.”

15. Avyani vino mwasambilila kwe vino nkazi Mary walanzile?

¹⁵ Wamwi wakalola ngati wasiwombesya mu mulimo wa kuwizya pamulandu na vino ivintu vili mu wumi wawo. Nga ca kuti namwemwenye avino mukayivwa, mwakwizuka ukuti e Yehova akakunda nkaninye pe vino mukawombesya. Lolani vino e nkazi Mary wino tulanzilepo wacisile. Pano wacintizile ku ncende yino walandanga icitundu cinji watalisile ukulola ngati atawombesyanga mu mulimo wa kuwizya. Watili, “Impindi yimwi nga nawa nu longo lwa kwasukapo mu kulongana nalandangavye utumazwi tutici nanti pamwi ukuwazyavye iwaliko. Ne nga tuli mu mulimo napelelangavye pa kupa umuntu e trakiti.” Co-o calenganga awalola ngati atawombesyanga mu mulimo wa kuwizya nga wayilinganya kwe wanji wano wamanyile co-o icitundu. Lelo wizile apiluka mwe vino welenganyanga. Wilusile ukuti e Yehova angamuwomvya asa mulandu nu kukanamanya icitundu. Walanzile nu kuti, “Vino Baibolo ikasambilizya  vyapepuka nkaninye. Swinya avino vingapilula awantu.”

16. Avyani vino vingavwa wonsinye wano wakavwambisya ukuwizya lelo wasifuma pa ng’anda pamulandu wakulwala?

¹⁶ E Yehova akalola swinya akasalifya nkaninye pe vino tukawombesya asa mulandu nu kulwalilila nanti ukukanawa na maka ya kufuma pa ng’anda. Angatwavwa ukuwizizyako wano wakatusakamala ndi vino wadokota na wanasi nanti wano wakwiza mukutulola. Nga ca kuti tukulinganya vino tukawomba yo-o impindi kwe vino twawombanga ku nsizi tuliwafupulwa. Lelo nga tukuwikavye amano kwe vino Yehova akatwavwa pe yo-o impindi tuliwa na maka ya kusipicizya intazi zyonsinye ni nsansa.

17. Ukulingana ne Ekawizya 11:6, amulandu ci wuno tuzipizile ukutwalilila ukuwizya nanti aca kuti tutaweni ivizima papo na papo?

¹⁷ Pa mbeyu zino tukakomela tusimanya zino zingamela nu kutalika ukukula. (Wazyani Ekawizya 11:6.) Ku cakulolelako, e nkazi Barbara wino ali ni myaka kuma 80 watwalilila ukuwizya ukuwomvya e foni na makalata. Mwe kalata yimwi yino walemvile, wawisilemo Ulupungu lwa kwe Malonda ulwa March 1, 2014 luno lwatinji, “Avyani Vino e Leza Wamicitila?” Nanti aca kuti atamanyile wano walembezile we-e kalata, icakunguzusya aca kuti wayile aficila ku watwalane wawili wano walesile ukuwombela Yehova pa myaka 27 pa nsizi ya kuwingwa. Pano wapocelezile we-e kalata, wawazizyemo imiku imivule. Umulume walolanga ngati e Yehova awino walandanga nawe mukulungatika. Wa-a awatwalane wizile awatalika ukulongana na swinya. E nkazi Barbara wawomelezizwe nkaninye pa vizima vino vyafumile mwe kalata wenganye wino walemvile!

18. Avyani vino tuzipizile ukucita pa kuti Leza awatuwomya?

¹⁸ E Yehova watupekanizizya inzila imvule izya kutwavwilamo. Pe zyo-o pawa ipepo, e Baibolo, awanawitu na wankazi nu mulimo wa kuwizya. Nga tukuwomvya vyonsinye vyo-o, lyo tukulanjizya ukuti twasuwila ukuti e Yehova angatwavwa swinya akalondesya ukutwavwa. Acino lekani lyonsinye tutwalilile ukusuwila Umukwasi witu uwa kwi yulu, wino akalondesya ukulwila “wonsinye wano imyezo yawo itawa na kasinza na weliwe.”​—2 Imila. 16:9.