Uzye mwawazizye nkaninye e magazini ya Ulupungu lwa kwe Malonda iya nombanye? Mukwai, lolani nga ca kuti mungasuka amawuzyo yano yakonkapo:

Uzye muzipizile mwalola wuli awapakwe?

Tukasalifya pi suwilo lino wakwata; lelo tusiwalola ukuti wacindama sana ukulusye wanji. Tusitalika ukukumbwa nanti ukukoncezya vino wakacita. (Yuda 16) Tutazipizile ukuwakolowozya amawuzyo pa kuti watunene vimwi pi suwilo lino wakwata.—w20.01, ifwa. 29.

Avyani vino vingalenga musinincizye ukuti e Yehova wamiwikako amano pa lwinu?

E Baibolo ikalanjizya ukuti wamiweni pano mutani mukwatwe. Akakwivwa amapepo yinu. Akamanya vino mukwelenganya, vino vili mu mwezo winu, na vino mwamukunda. (1 Imila. 28:9; Imilu. 27:11) Wamipalamika kwe weliwe.—w20.02, ifwa. 12.

Ampindi ci yino tuzipizile ukulanda na yino tuzipizile ukumyalala?

Tuzipizile ukuwizya pe Yehova. Tuzipizile ukulanda nga ca kuti wumwi watalika ukucita vino vingalenga afume mu nzila. Waeluda wazipizile ukulanda nga ca kuti wumwi akulondekwa ukumusunda. Tuzipizile ukumyalala nga watuwuzya vimwi pe vino umulimo witu wukawombwa mu nsi muno walesya umulimo witu. Tutazipizile ukusokolola inkama.—w20.03, amafwa. 20-21.

Awupusano ci wuno wawa pe makanta wa mwe Joel icipandwa 2 nu wa mu Ukuwumbulika icipandwa 9?

E Joel 2:20-29 ikalanda ukuti e Leza walinji nu kumuwinjila ukutali swinya walayile ukuti walinji nu kunyosezyapo vino makanta wononile. Pa nsizi walinji nu kupongolola umuzimu wakwe uwutele. Wo-o uwusesemo waficilisizwe pano awina Babiloni wasansile awina Israeli na vino vizile avicitika pa nsizi. E makanta wa mu Ukuwumbulika 9:1-11 akakwimililako awapakwe wano wasikwivwa ni ntete ukuwizya uwupinguzi wa kwe Leza pe yo-o insi imbipe swinya wo-o uwukombe wukalenga wano wakacita iviwipe ukwivwa uwuwi.—w20.04, amafwa. 3-6.

Uzye imfumu ya kukambazwa ke kamani amfumu ci?

Ansi ya Russia na wano wakayitunjilila. Watwalilila ukusansa awantu wa kwe Leza, ukulesya umulimo wa kuwizya nu kupata sana wa Nte. Imfumu ya kukambazwa ke kamani yatwalilila ukulwisyanya ni mfumu ya kukambazwa ke ndilo.—w20.05, ifwa. 13.

Uzye kutawa “ivikomwa vya ku muzimu” na vinji ukucila pe vino vyawa pa Wagalatiya 5:22, 23?

Awe. Umuzimu wutele wukatwavwa ukuwa ni vikomwa na vinji ndi vino uwulungamane. (Efes. 5:8, 9)—w20.06, ifwa. 17.

Awuwipe ci wuno wawa mukuwika ivyewo vya pa lwinu pa intaneti?

Vino mukuwika pa intaneti mpindi zimwi vingalenga vye wanji walola ukuti mukayivwa pe vino mwakwata swinya mutayicefya.—w20.07, amafwa. 6-7.

Avyani vino awina Klistu wazipizile ukusambilila ku walondo wa nswi?

Wakaya mukuwizya pa mpindi inzima swinya kuno kukazanwa awantu. Wamanya ivya kuwonvya iviwombelo swinya wawa awasipe. Swensinye avino tuzipizile ukucita pano tukuwizya.—w20.09, ifwa. 5.

Uzye tungavwa wuli wano tukatungulula amasambililo ukukunda Yehova?

Tungawawomelezya ukuti wawazya e Baibolo cila wanda nu kwelenganyapo sana pe vino wakuwazya. Swinya tungawasambilizya ivya kupepa.—w20.11, ifwa. 4.

Uzye amazwi ya kuti “mwa kwe Klistu wonsi walizyulupuka wawe nu wumi” yasanzyamo na waweni?—1 Kor. 15:22

Umutumwa Paulo atasulanga ukuti awantu wonsinye walizyulupuka. Lelo walandanga pa wina Klistu awapakwe wano ‘wasangululwa mwe Klistu Yesu.’ (1 Kor. 1:2; 15:18)—w20.12, amafwa. 5-6.

Amulimo ci wuno awapakwe waliwomba pa nsizi ya ‘kupilulwa ngati akukumpansya kwi linso’ pano ipenga lya kulecelezya lililila?—1 Kor. 15:51-53.

Waliwombela ponga ne Klistu ukucema awantu ku nsonzo ya cela. (Ukuwu. 2:26, 27)—w20.12, amafwa. 12-13.