UZYE mukakwivwa wuli nga ca kuti mwapocelela e kalata ya kuwomelezya ukufuma kwe Ciwuza winu uwa pa mwezo? Wonye avino calinji kwe Timoti. Wapocelezile e kalata ukufuma ku mutumwa e Paulo wino tukakwita ukuti e kalata waciti wili kwe Timoti. Ukwasowa nu kuvwilika e Timoti afwile wavwanvile icifulo icimyalale pa kuti awazye we-e kalata wino wafumile kwe ciwuza wakwe. Pamwi wayiwuzyanga nu kuti: ‘Uzye Paulo ali wuli? Uzye kuli mumwi muno akulonda ukunjavwa pa kuti nawomba icete umulimo? Uzye muli vimwi vino vinganjavwa ukuwomba icete umulimo wa kuwizya, ukusambilizya nu kwavwa wanji?’ Ndi vino twandi tulole yo-o kalata yasusile amawuzyo yonsinye yano Timoti wakweti ukucila nape yano wenecelanga. Lelo mwe co-o icipande twalanda vye pa visinka vitici vino vingatwavwa.

E Timoti walile wawazya vye amazwi ya kutalicila mwe we-e kalata, afwile waweni ukuti e Paulo wamuwisileko sana amano. Amuno wamwisile ukuti “Umwanane umukundikwe.” (2 Tim. 1:2) E Timoti wapocelezile we-e kalata mupipi nu mwaka wa 65 C.E. Pe yo-o impindi lyo wacila ni myaka 30 swinya lyo wawomba ni myaka imivule mu wueluda. E Timoti wasambilizile ivivule kwe Paulo. Amuno wawonvile nawe ukucila pa myaka 10.

E Timoti afwile wawomelezizwe nkaninye pano wamanyile ukuti e Paulo acili watwalilila ukusipicizya intanzi. Pe yo-o impindi e Paulo walinji mu Roma swinya kwasyazile vye katici ukuti wamukome. (2 Tim. 1:15, 16; 4:6-8) E Timoti ukwasowa nu kuvwilika waweni ukuti e Paulo walinji ni suwilo. Amuno walanzile ukuti: “Nkuzizimicizya mu vintu vyonsi.” (2 Tim. 2:8-13) Wulyanye vino amazwi yano Paulo wawuzizye e Timoti yamuwomelezizye, avino yangatuwomelezya na sweswenye.

E Paulo wawomelezizye e Timoti ukutwalilila ukulola umulimo wa kwe Leza ukuti wacindama nkaninye. Walondanga ukuti atwalilile ‘ukulilimya icawila cino Leza wamupile’ (2 Tim. 1:6) Pe lyo-o iwaliko e Paulo wawonvizye izwi lyaci Griki ilya kuti khaʹri·sma pano walandanga pa “cawila.” Lyo-o izwi likasula icawila cino umuntu atayine nu kupwa ukulingana na vino ali. Wapocelezile co-o icawila pano wapilwe umulimo wa kuwombela iwungwe lya kwe Leza mu nzila iyiwele.​—1 Tim. 4:14.

Uzye e Paulo wawomelezyanga e Timoti ukucita cani na co-o icawila? Ukwasowa nu kuvwilika pano e Timoti wivwile vye amazwi ya kuti “uwalilimya icawila cako ngati amulilo,”  afwile welenginye pa mulilo wuno awantu wapembanga mu ma ng’anda wuno nga ca kuti watakuwikapo inkuni walekanga ukulilima. Fwandi pa kuti wutwalilile ukulilima walondekanga ukuwikapo inkuni. E Dikishonari yimwi yalondolozile lyo-o izwi lino e Paulo wawonvizye ilya kuti (a·na·zo·py·reʹo) ukuti likasula ukutalika na swinya nanti ukuwilimya na swinya. Fwandi e Paulo wamunenanga ukuti akundisye umulimo swinya awombesya. Mu mazwi yanji tungati wamunenanga ukuti: ‘Wika umwezo ku mulimo wako!’ Wonye avino cifwile ukuwa na kwe sweswenye. Tuzipizile twawombesya mu mulimo witu.

Pano Timoti wawazyanga we-e kalata wazanile icintu na cinjinye icicindame cino calinji nu kumwavwa ukuwomba icete umulimo wakwe. E Paulo wamuwuzizye ukuti: “Sunjilila ivintu vizima vino wapilwe mu maka ya muzimu mwimicile wuno wawa mwe sweswe.” (2 Tim. 1:14) Acawila ci conye icicindame cino Timoti wapocelezile? Nga mwizuka mu vesi 13 e Paulo walanzile pa mazwi “mazima” nanti “amazwi ya kusimicila,” yano yawa mu Mawaliko. (2 Tim. 1:13) Pa mulandu wa kuti e Timoti walinji we kawizya, wazipizile ukusambilizya icisimicile mwi wungwe na ku wantu wanji. (2 Tim. 4:1-5) Swinya e Timoti wapilwe umulimo wa wukacema pa kuti awacema in’gonzi zya kwe Leza. (1 Pet. 5:2) Lelo pa kuti atwalilile ukucinjilila icisinka icicindame cino wasambilizyanga, wazipizile ukusintilila sana pa muzimu wa kwe Yehova na pi Zwi lyakwe.​—2 Tim. 3:14-17.

Nasweswenye mwe ya-a amanda twawa nu mulimo wa kusambilizya icisinka kwe wanji. (Mat. 28:19, 20) Lyonsinye tuzipizile twakwizuka ukuti wo-o umulimo wacindama nkaninye. Lelo pa kuti tuwuwombe icete tuzipizile twawazya sana Baibolo nu kupepa nkaninye. (Roma. 12:11, 12; 1 Tim. 4:13, 15, 16) Ukulunda pe wo-o umulimo, tungawa nu longo lwa kuwombako wueluda nanti umulimo wa mpindi zyonsi. Nga twapwa lo-o ulongo apano tuzipizile ukuyicefya nkaninye nu kusuwila sana Leza. Fwandi pa kuti tutwalilile ukusunjilila icawila cino twapwa, tuzipizile ukucicindika nkaninye nu kusintilila pa kwavwa kwa kwe Yehova.

Umulimo wunji wuno e Timoti wakweti, awakusambilizya wanji ivya kuwomba umulimo wuno wawombanga. Awuli umulandu wuno e Paulo wamukonkomecezizye ukuti: “Amazwi yano wivwile nkusambilizya . . . usambilizye awantu wano wasuwila uleke wayamanye. Alya kuti nawo wasambilizye awantu wanji.” (2 Tim. 2:2) Cino e Paulo walandangapo aca kuti e Timoti walinji nu kusambilizya awantu vyonsinye vino weliwe wamusambilizizye. Wonye wo-o avino na wano wawa ni milimo mwi wungwe lya kwe Leza wazipizile ukucita. Watazipizile ukwivwa akaso ukusambilizyako wanji imilimo yimwi yino wamanya. Lelo wazipizile ukuwasambilizya vyonsinye vino vingawavwa ukuwomba icete imilimo. Swinya watazipizile ukwelenganya ukuti nga wasambilizya wanji imilimo wangiza wamanye ivivule ukuwacila nanti ukuwomba icete umulimo ukucila vino wakawomba. Fwandi pano wakuwasambilizya, wazipizile ukuwasambilizya vino vingawavwa ukuwa awasongo mu vyakwe Leza asa kuwasambilizya vye utwa papela. Nga wakucita wo-o pano wakusambilizya awonsi awasuwilwe walilenga iwungwe ukulunduluka sana.

Tusakuvwilika ukuti e Timoti walolanga we-e kalata ukuti acawila iciyiwele ukufuma kwe Paulo. Swinya afwile wawazyangamo uwila nu waca nu kwelenganyapo sana pe vino angawonvya ivyewo vino vyalinji mwe kalata ku mulimo wuno wawombanga.

Ko-o ukusunda kuno kwawa mwe we-e kalata, kwacindama sana na kwe sweswenye. Nomba uzye tungalanjizya wuli ukuti tukukukonka? Tungalanjizya nga ca kuti tukutwalilila ukulilimya icawila citu ngati amulilo, tukusunjilila ivintu ivizima vino twapwa swinya tukutwalilila ukusambilizya wanji vyonsinye vino twamanya. Nga twacita vyonsinye vyo-o, ‘tuliwawombesya mu mulimo witu wonsinye’ wulyanye vino ne Timoti wacisile.​—2 Tim. 4:5.