AWANAWITU na wankazi awavule wano wayile mukuvwamba uwikazi uwuzima ku nsi zinji, wanyocela ku nsi zya kumwawo. Swinya waya na mu kuwombela kuno wakawizya wacepa pa mulandu wa kukunda Yehova na wantu. (Mat. 22:37-39) Avyani vino waipusula swinya e Yehova wawalambula wuli pe vino wacita? Pa kwasuka ya-a amawuzyo, katulandeko pa wanawitu na wankazi wamwi ku Cameroon.

Mu 1998 umwanawitu uwizina lya kuti Onésime wafumile ku mwawo ku Cameroon nu kuya yikala ku nsi yinji pa myaka 14. Uwanda wumwi pano wayile mu kulongana e kalanda walanzile pa cilanjililo cimwi cino camufisile sana pa mwezo. E kalanda watili, “Yelenganyani ukuti awantu wawili wakuswela inswi mu luzi ululi longanye, wenga pano akuswelela zikuliila nkaninye nomba umuwuye pole. Uzye cingawa icetenye kwe wino zisakuliila ukwikalilila pa cifulo icili conganye? Awe. Lelo angaya kuno zikuliila pa kuti nawenye aswele invule.”

Co-o icilanjililo calenzile Onésime atalike ukwelenganya pa kunyocela ku mwawo ku Cameroon kuno awavule walondanga ukusambilila Baibolo. Lelo walangulukanga nga ca kuti aliya akawelele, amuno wayile ayikala imyaka imivule ku nsi yinji. Nomba pa kuti amanye nga ca kuti aliya akawelele nga wanyocela ku Cameroon, wayile ayikalako imyezi 6 pano atani acintileko. Mu 2012, apano wizile acintilila.

Umwanawitu Onésime walanzile ukuti: “Nazipizile ukupiluka mu vivule. Ku cakulolelako, kuno nikalanga pa kutalika kutalungula nkani ndi vino ku Cameroon, ni mikaliile nye yapusana ni ya ko-o. Cinji aca kuti ivilimba vino twikalilanga kuno nalinji vyapusine na vino nazanile ko-o. Lelo cino canjavwanga ukukanawika amano ku vilimba vino nazanile ko-o, akuwika sana amano pano ukulongana ku kutungululwa.”

Mu 2013, umwanawitu e Onésime wizile atwala e Géraldine, wino wanyosile ku Cameroon pa nsizi ya kwikala imyaka 9 ku France. Uzye e Yehova wawalambula wuli pa mulandu wa kusolapo ukucita ivintu ivicindamisye mu wumi? E Onésime watili: “Twalinji nu longo lwa kuzanwa kwi Sukulu lya Kawizya wa Wufumu swinya pe yo-o impindi tukawombela pa Bethel. Umwaka wuno wasizile, twavwizye na masambililo 20 mwi wungwe litu ukulunduluka ukufika na kulubatizyo. Pa mpindi yo-o nkayivwa ukuti nkaswelela ku cifulo icizima kuno zikaliila.” (Mar. 1:17, 18) E Géraldine walunzilepo ukuti: “E Yehova wampaala nkaninye ukucila na vino nelenganyanga.”

E nkazi uwizina lya kuti Judith wizile acintila ku United States, lelo nanti ciwe wo-o walondesyanga nkaninye ukulundulula umulimo wakwe uwa kuwizya. Watili, “Lyonsinye nga natandalilila wa lupwa lwane ku Cameroon, uwanda wa kunyocelamo ku United States nalilanga nkaninye. Amuno nasyanga awantu awavule ko-o wano walondanga ukusambilila Baibolo.” Lelo camuwomelanga ukupingulapo zuwa ukunyoka ku Cameroon, amuno wawombanga incito inzima yino yamwavwanga ukusakamala e tata wakwe ku ndwala yino wakweti. Ukusuwila mwe Yehova kwalenzile ukuti anyocele ku Cameroon. Walanzile ukuti manda yamwi walucilanga ku United States. Nomba pa kuti aleke ukulucila vino wasile, wapepanga sana kwe Yehova. Swinya e Yehova wamwavwizye ukupitila mwe kangalila wa muputule ne wakwakwe wano wizile awamuwomelezya nkaninye.

 E nkazi Judith walanzile ukuti: “Nalile nanyocela ku Cameroon, mu myaka vye yitatu navwizye awantu 4 ukuyipa kwe Yehova nu kubatizwa.” Swinya wizile awa nu longo lwa kuwombako wupainiya uwuyiwele. Pe yo-o impindi watwalwa kwe kangalilila wa muputule e Sam-Castel, swinya wakaitopwa ukuwombela ponga mwe wo-o umulimo. Uzye mumanyile cino cacitisile kwe tata wakwe? Pa mulandu wa kuwombela ponga nu lupwa lwakwe kwizile akuloleka icipatala ku nsi yinji wano watili wandi wawombele pa ndwala ye tata wakwe ukwasowa nu kuwalipilisya. Icizima aca kuti wamuwombezile icete sana, swinya pe yo-o impindi wapola.

Umwanawitu uwi zina lya kuti Victor wafumile ku Cameroon nu kucintila ku Canada. Pa nsizi ya kuwazya icipande cimwi mu Lupungu lwa kwe Malonda cino calandanga pa masambililo ya papela, watalisile ukwelenganya sana pa masambililo yano wasozilepo. Co-o calenzile asolepo vye ukusambilila umulimo wumwi wuno wutalinji nu kumusendela sana impindi, ukucila ukutwalilila na masambililo yakwe aya ku university. Umwanawitu Victor walanzile ukuti: “Amasambililo yano nasozilepo, yanjavwizye ukuzana zuwa incito swinya yalenzile ntalike na wupainiya.” Mu kupita kwa mpindi wizile atwala e Caroline, swinya wayile mu kutandala ku Cameroon. Pano watani wanyocelemo ku Canada wayile awatandalako na pa Bethel ya mu Cameroon. Pe ko-o ukutandala awanawitu na wankazi wamwi awa pa Bethel wayile awawawomelezya ukuti welenganyepo ukuwombela mu nsi yawonye iya Cameroon. E Victor watili: “Twaweni ukuti pasi cimwi cino cingatulesya ukuwomba umulimo, amuno lyo kali kali twapepusya imikaliile.” Nanti aca kuti pe yo-o impindi e Caroline walwalanga, wa-a awatwalane wasozilepo ukunyoka ku Cameroon.

E Victor ne Caroline watalisile wupainiya wa mpindi zyonsi pa kuti wavwe wonsinye wano walondanga ukusambilila Baibolo. Acino watalisile ukusunga indalama zino waliwawonvya nga watalika wupainiya. Pano watani waye ku Cameroon wawonvileko imyezi mitici ku Canada pa kuti wize wawe ne transporti yakuyila ku Cameroon. Uzye e Yehova wawalambula wuli? Wizile awawa nu longo lwa kuzanwa kwi Sukulu lya Kawizya wa Wufumu, ukuwombako wupaininya uwuyiwele swinya pe yo-o impindi wawa mu wuzengo. Umwanawitu e Victor watili, “Ukusya imikaliile mizima kwatwavwa ukusintilila sana pe Yehova swinya akatusakamala mwe vyonsinye vino tukalonda.”

Mu 2002, umwanawitu e Alain, wino wasambililanga pa university ya ku Germany, wizile awazya e trakiti ya kuti Mwe Bacaice Finshi Mukacita mu Bumi Bwenu? Vino wawazizye mwe we-e trakiti vyalenzile apiluke mwe vino walondanga ukucita mu wumi. Co-o calenzile ukuti mu 2006, awe nu longo lwa kuzanwa kwi Sukulu lya Wanawitu Awasimbe swinya wamutumile ku Cameroon nye kuno wakwatizilwe.

Walile pano wafika ku Cameroon, wayile ayinjila incito yino yamusilangako impindi ya kuwomba umulimo wa kuwizya. Mu kupita kwa mpindi kwizile akuloleka incito inzima yino watalisile ukuwomba. Lelo watalisile ukusakamikwa pa mulandu wa kuti itamusilanga impindi inkulu iya kuwomba umulimo wa kuwizya. Acino walile wapocelela e kalata ya kuti asonsilwe ukuwa we painiya umuyiwele, wasozilepo ukuleka incito. Lelo e songo wa ncito wamunenile ukuti nga watwalilila ukuwomba walinji nu kutalika ukumufolesya indalama invule. Nanti ciwe wo-o, e Alain wakanile amuno walondanga ukuficilisya vino wavwambisyanga ukucita mu wumi. Mu kupita kwa mpindi wizile atwala e Stéphanie, e nkazi wino wisilepo ku France pa mpindi ntali pano atani aye ku Cameroon. Nomba antazi ci zimwi zino e Stéphanie wapisilemo pa nsizi ya kunyoka ku Cameroon?

E Stéphanie watili: “Uwumi wane wutalinji icete pa mulandu wa muza ni vintu vinji vino nazanile ko-o. Acino nayanga liwili liwili ku cipatala mpaka insuka imbwelezya imkalile ya ko-o.” Uzye e Yehova wawalambula wuli pa kusipicizya kwawo? E Alain watili: “Wanda wumwi pano twaile mukuwizya ku kaya  kamwi kano kawezile ukutali sana na mutauni kano wakakwita ukuti Katé, twazanile awavule wano walondanga ukusambilila Baibolo. Twatalisile nu kutungulula awonsi wawili amasambililo pa foni. Mu kupita kwa mpindi wizile awabatizwa swinya wizile awapangamo ni wumba mwe kanye akaya.” E Stéphanie nawe watili: “Kutawa insansa zino zingalusya pe zino zyawa mu kwavwa awantu ukutalika ukuwombela e Yehova. Swinya zyonye zyo-o azili nsansa zino tukaitopwa ukufumilila pano twizila ko-o.” Pe yo-o impindi wa-a awatwalane wakawomba umulimo wa kutandalila amawungwe.

E Gisèle wabatizizwe pano wayile mu kusambilila ivya wudokota ku Italy. Wakumbwanga nkaninye pe vino awatwalane wano wamusambilizyanga e Baibolo wapepusizye imikaliile yawo pa kuti wawombesya mu mulimo wa kuwizya. Co-o calenzile e Gisèle nawenye atalike wupainiya wa mpindi zyonsi pano kwasyala katici ukuti amale amasambililo yakwe.

E Gisèle wamanyile ukuti nga wanyocela ku Cameroon angaya akawombe icete sana umulimo wa kwe Yehova. Nomba walangulukanga. Amulandu ci? Walanzile ukuti, “Cino nasakamalanga aca kuti nga nanyocela ku Cameroon ntalinji nu kukwata insambu zya kwikala ku Italy naswinya. Swinya nalinji nu kusya walupwa wamwi ni viwuza.” Lelo nanti ciwe wo-o mu May 2016, e Gisèle wanyosile ku Cameroon. Mu kupita kwa mpindi watwazilwe kwe Léonce, swinya patazinvile wawatumile ukuya mu kuwombela mwi tauni lya Ayos, muno wakawizya wacefile nkaninye.

Uzye imikaliile yawo yalinji wuli mu Ayos? E nkazi Gisèle watili: “Amalaiti yapitanga pa masabata amavule. Fwandi impindi nvule mafoni yawanga amazime. Co-o calenzile ukuti nsambilile nu kutenda pa nkuni. Cinji aca kuti pa kuya mukusemba aminzi twawonvyanga e wilubala swinya twayanga mukusemba uwusiku pano awantu wacepa ku luzi.” Acani cino cavwizye wa-a awatwalane ukusipicizya? E Gisèle watili: “E Yehova watwavwanga ukuwonvya umuzimu wakwe, awanawitu na wankazi, walupwa ni viwuza wano watutunjililanga mwe vino twasowezyanga. Swinya nkasalifya e Yehova pa kumpa e wakwane wino akantunjilila nu kumbomelezya.”

Uzye vino Gisèle wacisile ukunyocela ku mwawo vyalenzile ukuti awe ni nsansa? Ee! E Gisèle watili, “Nsivwilika nu kuvwilika ukuti e Yehova watupaala nkaninye. Nanti aca kuti impindi zimwi twapitanga mu ntazi ica kuti atufupulwa nu kufupulwa, ukutwalilila ukusipicizya kwalenga nene ne wakwane twalola ukuti, twacisile vilyanye vino twazipizile ukucita. Pe yo-o impindi twasuwila nkaninye e Yehova swinya twapalamila sana kwe weliwe.” Wa-a awatwalane walinji nu longo lwa kuzanwa kwi Sukulu lya Kawizya wa Wufumu, swinya pe yo-o impindi awapainiya awayiwele.

Wulyanye vino awalondo wakalondekwa ukusipa pa kuti waleme inswi invule, avino na wano wakanyocela ku nsi zya kumwawo wakalanjizya ukusipa ukupitila mu kuipusula ivivule pa kuti wawizizye wano wawa nu mwezo uwuzima wano wakalonda ukwivwa ilyasi lizima. E Yehova atalitela ayiwilile ulukundo luno wa-a awanawitu na wankazi walanjizya kwi zina lyakwe. (Nehe. 5:19; Hebe. 6:10) Uzye namwemwe mwacintila ku nsi yinji? Nga avino cawa, uzye wakawizya wi lyasi lizima kuno mwafuma wakulondekwa sana? Ala nga mwaikundila ukuyawombako wo-o umulimo kuli ivintu ivizima nkaninye vino vikumilindilila!​—Imilu. 10:22.