Nakwasilwe mu 1983. Pano nakulanga nalinji nu wumi uwuzima nkaninye. Lelo pano nafisya imyaka 10, nizile intalika ukwivwa uwulumila umuwili wonsinye. Pa nsizi ya myaka yiwili kwalinji cimwi cino cacitisile. Wanda wumwi nalile nakatuka umutondo tondo nazanile amanama yatakuwomba. Nelezizye na maka yane yonsinye ukupita lelo naposilwe. Ukufumilila pe wulyanye uwanda nsitela mpitepo mpaka ni lelo. Yo-o indwala yalenzile ukuti ndeke ukukula. Nkaloleka vye ngati ne mutici.

Pa nsizi ya myezi mitici ukufumilila pano nalwalizile, inte zya kwe Yehova wawili wantandalizile. Ilivule nga wamwi wantandalila navwamanga. Lelo pano wa-a awanaci wantandalizile ntavwamile swinya twalanzile nawo. Walile walanda pe Paradaise, nizusile vino nivwile ku wutici lyo indi ni myaka 5. Pe yoyo impindi kwalinji e mishonari wumwi uwi zina lya kuti Jethro wino wizanga mukuwizya cila mwezi lyonga mu kaya kitu. We-e mishonari wafumanga ku Suriname swinya watalisile nu kutungulula e tata isambililo lye Baibolo. Namutemilwe nkaninye amuno walinji sana ni cikuku kwe nene. Swinya pano ntani ndwale e Tatakulu wansendanga limwi limwi mukulongana kuno kwawelanga monye mukaya. Fwandi pano umwanaci wenga pe wa-a wano wantandalizile uwi zina lya kuti Florence walile wambuzya nga ca kuti ningakunda ukusambilila Baibolo, nazumizile.

E Florence wizile anyoka uwanda wunji nu mulume e Justus, swinya twatalisile ukusambilila nawo e Baibolo. Walile wamanya ukuti ntamanyile ukuwazya, watalisile ukunsambilizya. Mu kupita kwa mpindi namanyile ukuwazya. Uwanda wumwi wizile awanena ukuti wawatumile ukuya mu kuwombela ku Suriname. Ku cawulanda kutalinji uwili wensinye mu Orealla wino walinji nu kutwalilila ukunsambilizya Baibolo. Lelo cino nkasalifya aca kuti e Yehova atanjiwilizile.

Patazinvile nu kuzimba watumile e payiniya na winji mu Orealla uwizina lya kuti Floyd. Twizile atumanyana pano wawizyanga ku ng’anda ni ng’anda. Walile wankolowozya nga ca kuti ningakunda ukusambilila Baibolo, nizile imwentula. Pano wankolowozizye umulandu wuno nasecezile, namunenile ukuti nasambililanga e Baibolo ku nsizi mwe broshuwa ya kuti Cinshi Cintu Lesa Afwaya Kuli Ifwe? Namunenile nu kuti twatalisile ni buku lya kuti Icine Icitungulula ku Mweo wa Muyayaya. * Namulondololezile cino calenzile ukuti ndeke ukusambilila Baibolo. Pa nsizi ya kumala ukusambilila mu Icine Icitungulula ku Mweo, nawenye wamutumile ukuya mukuwombela kunji. Swinyanye nasyazile vye ukwasowa uwakuntungula isambililo lye Baibolo.

Mu 2004 kwalinji wapainiya awayiwele wawili awonsi wano wizile mukuwombela mu Orealla. Wa-a walinji  we Granville ne Joshua. Wanda wumwi pano wawizyanga ku ng’anda ni ng’anda wizile awanzana. Pano wankolowozizye nga ca kuti ningakunda ukusambilila Baibolo namwentuzile. Nawanenile ukuti twize tutalike ukusambilila nawo mwi buuku lya Icine Icitungulula ku Mweo. Cino nacitizile wo-o, nalondanga ukulola nga ca kuti vino waliwansambilizya vilikolana na vino wano twasambililanga nawo pa kutalika wansambilizizye. E Granville wanenile ukuti watalisile nu kulongananga mu kaya kitunye. Nanti aca kuti nikalanga vye pa ng’anda mupipi ni myaka 10, walile wanena ukuti kuli ukulongana natalisile ukuvwambisya sana ukuzanwako. Pano uwanda wa kulongana wafisile e Granville wizile anyamula nu kunkwezya pa kanjinga ka kwa cilema antwala na mukulongana.

Mu kupita kwa mpindi e Granville wambomelezizye ukuti ndembesye mwi sukulu. Wanenile ukuti: “Nanti aca kuti usipita, ukulanda kweni ungalanda. Uwanda wumwi ulilanda ni lyasi lye Baibolo. Ntakukwivwisya vye icete, vilicitika.” Ya-a amazwi yano walanzile yambomelezizye nkaninye.

Natalisile ukuya mu kuwizya ne Granville. Nomba pa mulandu wa kuti inzila invule zyalinji na mabampu nkaninye ni vizinji, calenganga ukuti natonta nkaninye pa kanjinga kano nikalangapo. Acino nanenile e Granville ukuti awansendela mwe wilubala pano tukuwizya. Ukuwonvya yo-o inzila kwatwavwizye nkaninye. Nizile imbatizwa mu April 2005. Swinya pansizi vye ya kubatizwa awanawitu wampile umulimo wa kuwombela ku mabuku na ku vivwanjilo.

Ku cawulanda mu 2007 e tata wizile afwa mu wusanso wa paluzi. Twalinji nu wulanda nkaninye. Lelo e Granville watusansamusizye ukuwonvya amawaliko swinya wapepezile ponga nasweswe. Nomba pa nsizi vye ya myaka yiwili kwacitisile na cinjinye cino cizile acituputula umutembeleko. E Granville nawenye wizile afwila pa luzi.

Mwi wungwe mwasyazile vye umuwonvi wino akatumicila wenga. Ala nayivwile uwuwi nkaninye pano e ciwuza wane e Granville wafwile. Amuno wanjavwizye sana ukupalamila kwe Yehova swinya wanjavwanga na mwe vinjinye vino nasowezyanga. E sabata wino wakonsilepo pa nsizi ya mfwa yakwe, anemuno nalinji nu kuwazya Ulupungu lwa kwe Malonda. Lelo pa nsizi ya kuwazya vye amaparagrafu yawili natalisile ukulila, ica kuti nafumile na pa platifomu pa mulandu wa kuti naposilwe ukusipicizya.

Natalisile ukwivwako icete pano awanawitu ukufuma kwi wungwe linji wizile mu kutunjilila iwungwe litu. Swinya iofesi lya musambo nalyo lyatumileko e painiya umuyiwele e Kojo. Cimwi cino nakunzile sana akulola e mama nu muzuna wane umonsi watalika ukusambilila Baibolo. Swinya patazinvile nu kuzimba wizile awabatizwa. Mu March 2015, nasonsilwe ukuwa umuwonvi wino akatumicila. Mu kupita kwa mpindi nizile indanda ni lyasi lye Baibolo. Pe wo-o uwanda nalukusizye ivilamba vya cimwemwe pano nizusile amazwi yano e Granville wasile anena aya kuti: “Uwanda wumwi ulilanda ilyasi lye Baibolo. Ntakukwivwisya vye icete, vilicitika.”

Umulawasa wa JW Broadcasting^® walenga manye ukuti kwawa awanawitu na wankazi awavule wano wakapita mu ntazi iyikolane na yino nkapitamo. Lelo asa mulandu ni ntazi zino wakapitamo, wakatwalilila ukusecelela. Co-o canjavwa ukumanya ukuti kuli ivivule vino ningawomba mwi wungwe lya kwe Yehova. Pano nasambilizile icine natalisile ukwelenganya pa kuwonvya uwumi wane mu kuwombela Yehova. Co-o calenzile ndembesye ukuwomba wupainiya wa mpindi zyonsi. Mu September 2019 napocelezile ilyasi ilizima nkaninye! Wanenile ukuti nsonsilwe ukuwomba wueluda mwi wungwe litu muno mwawa wakawizya 40.

Nkasalifya ku wanawitu na wankazi wonsinye wano wantungululanga isambililo lye Baibolo ukuwikako na wonsinye wano wanjavwa ukumanya ivya kuwizya. Lelo icicindamisye cino nkasalifya nkani aca kuti e Yehova atanjiwilizile.