1. Ukulingana ne Mateyu 7:13, 14, amulandu ci wuno tungalandila ukuti twawa pa wulendo?

SWENSINYE twawa pa wulendo wa kuya ku nsi mpya yino yiliwatekwa ne kateka wa lukundo e Yehova. Cila wanda tukakwelezya na maka ukutwalilila ukupita mwe yo-o nzila ya ku wumi. Lelo impindi zimwi cisipepuka ukutwalilila ukupitamo pa mulandu wa kuti yawa amfyenenkane wulyanye vino e Yesu walanzile. (Wazyani Mateyu 7:13, 14.) Swinya pamulandu wa kukanapwililika, cikapepuka sana ukufuma mwe yo-o inzila.​—Gal. 6:1.

2. Avyani vino twandi tusambilile mwe co-o icipande? (Lolani na kambokosi kano kakuti “ Ukuicefya Kukatwavwa Ukutwalilila Ukupita mu Nzila Infyenenkane.”)

² Pa kuti tutwalilile ukupita mwe yo-o inzila imfyenenkane, tufwile ukuikundila ukupiluka mwe vino tukakwelenganya, vino twatemwa na mwe vino tukacita. Umutumwa e Paulo wawomelezizye awina Klistu wa mu Korinte ukutwalilila ‘ukupiluka.’ (2 Kor. 13:11) Amazwi yano walanzile yakawomba na mwe yanye amanda. Mwe co-o icipande twalanda pe vino e Baibolo na wasongo mu vya kwe Leza wangatwavwa ukutwalilila ukupita mwe yo-o inzila. Twasambilila na pa mpindi yino cingatuwomela ukukonka vino iwungwe lya kwe Yehova likutunena. Twalola na vino ukuicefya kungatwavwa ukupiluka nu kutwalilila ukusecelela pano tukuwombela Yehova.

3. Uzye e Baibolo ingatwavwa wuli?

³ Citapepuka ukuyimanya vino twawa pa mulandu wa kuti umwezo witu awicenjezya swinya ungatusovya. (Jere. 17:9) Capepuka sana ukutalika “ukuyiwipa” sweweneco. (Jemu. 1:22) Fwandi tuzipizile ukuwonvya Izwi lya kwe Leza pa kuti tumanye muno tuzipizile ukupiluka. Amuno Izwi lya kwe Leza likasokolola  vino twawa mu kasi, akuli kuti vino ‘tukakwelenganya’ na vino tukalonda ukucita. (Hebe. 4:12, 13) Lelo pa kuti twakonka vino Baibolo ikutunena ukuwikako na wano Yehova wasonta tuzipizile ukuicefya.

4. Avyani vino vikalanjizya ukuti Imfumu e Shauli yizile iwa ni cilumba?

⁴ Vino Imfumu Shauli yacisile vikalanjizya vino vingafumamo nga tuli ni cilumba. E Shauli wizile awa nkaninye ni cilumba ica kuti walesile nu kulola ukuti wazipizile ukupiluka. (Amalu. 36:1, 2; Haba. 2:4) Ku cakulolelako icilumba cakwe cizile aciloleka pano wakanile ukukonka vino Yehova wamunenile ukucita nga wacinvya awina Amaleki. Walile pano Samueli waya wamunena ukuti aluvinye wakanile, swinya watalisile ukuipokolola nu kupa wanji imilandu. (1 Sam. 15:13-24) Pano co-o citani cicitike kwalinji impindi yimwi pano walanjizizye imiwele iyili yonganye. (1 Sam. 13:10-14) Ku ca wulanda wazumilizizye umwezo wakwe ukuwa ni cilumba. Na cino cafumilemo aca kuti e Yehova wizile amukalipila swinya wizile amukana.

5. Avyani vino tungasambililako kwi lyasi lya kwe Shauli?

⁵ Nga tutakulonda ukukolanya e Shauli, tuzipizile ukuyikolowozya ukuti: ‘Uzye pano nkuwazya Baibolo nkatalika ukuyipokolola nga nazana vimwi vino nsicitamo icete? Uzye nkatalika ukulola ngati vino nkacita vitawipa sana? Uzye nkatalika ukupa wanji imilandu pa viluwo vyane?’ Nga twazana ukuti avyo tukacita, tuzipizile ukupiluka mwe vino tukakwelenganya na vino tukacita. Amuno nga tutakupiluka wuciwuza witu ne Yehova wungasila.​—Jemu. 4:6.

6. Awupusano ci wuno walinji pa Mfumu e Shauli na pa Mfumu Davidi?

⁶ Lelo palinji uwupusano pe Shauli na pa Mfumu Davidi yino yatemilwe “isundo lya Mfumu e Leza.” (Amalu. 1:1-3) E Davidi wamanyile ukuti e Yehova akacindamika wano waicefya nu kucefya awacilumba. (2 Sam. 22:28) Swinya wazumilizizye isundo lya kwe Leza ukupilula amelenganyo yakwe. Walenvile ukuti: ‘Ndi cindika e Yehova amuno akansaila. Na mu mpindi ya wusikunye, amelenganyo yane yakandunjika.’​—Amalu. 16:7.

7. Avyani vino tuliwacita nga ca kuti twaicefya?

⁷ Nga ca kuti twaicefya tuliwaleka Izwi lya kwe Leza lyatulunjika pano tutani tucite iviwipe. Izwi lya kwe Leza liliwa ngati alizwi lino likutunena ukuti: “Inzila yo-o ko-o. Amuno pitanji.” Liliwatusoka nga twati twafuma munzila. (Ayize. 30:21) Nga tukwiwila e Yehova ivintu viliwatuzipila. (Ayize. 48:17) Ku cakulolelako tutaliwafulwa nga ca kuti wumwi watusunda pe vino tukuluvyanya. Co-o cililenga tupalamile sana kwe Yehova amuno tulimanya ukuti amukwasi witu wino akatusakamala.​—Hebe. 12:7.

8. Ukulingana ne Jemusi 1:22-25, uzye izwi lya kwe Leza lyawa wuli ngati acilola?

⁸ Izwi lya kwe Leza tungalikolanya ku cilola. (Wazyani Jemusi 1:22-25.) Swe wavule nga tukulonda ukuya kumwi tukailola mu cilola pano tutani tufume pa ng’anda. Nga twacita wo-o cikapepuka ukuzifya muno tukulola ukuti musi icete pano wanji watani watulole. Wonye avino cikawa nga ca kuti tukuwazya Baibolo cila wanda, ikatwavwa ukulola muno tungapiluka mwe vino tukakwelenganya nu kucita. Awavule wazana ukuti cikawapepucila ukupituluka iwaliko lya wanda umutondo tondo pano watani wafume pa ng’anda. Ukucita wo-o kukalenga wawa ni mpindi inkulu iya kwelenganyapo nu kulola vino wangaviwonvya pano wakuwomba. Ukulunda pi waliko lya wanda tuzipizile twawa ni mpindi ya kuwazya Baibolo nu kwelenganya sana pe vino tukuwazya. Ukucita wo-o kungaloleka ngati kutacindama  sana, lelo kungatwavwa ukutwalilila ukupita mwe yo-o inzila imfyenenkane yino ikatwala awantu ku wumi.

9. Ampindi ci yino e ciwuza angatulunjika?

⁹ Uzye kwalinjiko impindi yimwi pano mwacisileko vino vyalinji nu kulenga wuciwuza winu ne Yehova ukusila? (Amalu. 73:2, 3) Uzye pano e ciwuza winu e songo mu vya kwe Leza wamilunjisile mwivwile nu kukonka vino waminenile? Nga mwavikonsile lyo mwacisile icete nkaninye swinya tutakuvwilika ukuti mukasalifya pe vino e ciwuza winu wamyavwile.​—Imilu. 1:5.

10. Uzye muzipizile ukucita wuli nga ca kuti e ciwuza winu wamilunjika?

¹⁰ Izwi lya kwe Leza likatwizusyako ukuti: “E ciwuza ndi wakucisa lyo wakukunda.” (Imilu. 27:6, [NWT]) Uzye ya-a amazwi yasula mwinye? Katulanjilile: Yelenganyani ukuti mukulonda ukulamba umusewo muno mukapita sana wa motoka. Pano mwatalika vye ukulamba, e foni yalila nga mwawika amano kwe foni. Ukwasowa nu kwenecela mwiza mwalola vye e ciwuza winu wamilema kwikasa nu kumizutila ku nsizi na maka ica kuti mwivwa ni kasa lyaluma swinya lyatwalilila ukuluma pa manda amavulenye. Uzye vwilani mungafulilwa e ciwuza winu pa mulandu wa kuti wamizusile ikasa? Awe! Lelo mungamusalifya nkaninye pa kumipususya. Wonye wo-o avino cikawa nga ca kuti e ciwuza witu watusoka pa viwipe vino twakunda ukulanda nanti ukucita. Kweni pakutalika tungivwa uwuwi. Lelo tutazipizile ukumufulilwa, amuno Baibolo ikati umutumpe akafulwa zuwa. (Ekawi. 7:9) Acino nga ca kuti e ciwuza winu wamisoka pe cimwi muzipizile ukumusalifya pa kusipa kwakwe pa kuti amilunjike.

11. Acani cino cingalenga wumwi ukukanakonka ukusunda kwe ciwuza wakwe?

¹¹ Acani cino cingalenga wumwi ukukanakonka ukusunda kwe ciwuza wakwe? Acilumba. Awantu wa cilumba wakatemwa “ukwivwa vino wakulucila ukwivwa.” Swinya ‘wakakana ukwivwa ku vyacisinka.’ (2 Tim. 4:3, 4) Wasilonda wanji ukuwapanda amano amuno wakalola ngati walusya wonsinye. Lelo umutumwa Paulo watili: “Amuno ndi umuntu wumwi akuyitumvya, akuyicita uwuntu na pano awavye atela akuyiwipa vye.” (Gal. 6:3) Imfumu Solomoni yeni yalondolozile icete sana ya-a amazwi. Yalenvile ukuti: ‘Umwana umupina uwa mano wazipa walusya imfumu inkote yino yisipandwa amano.’​—Ekawi. 4:13.

12. Ukulingana na Wagalatiya 2:11-14, avyani vino tukasambililako ku mutumwa e Peter?

¹² E Peter waicefizye nkaninye pano umutumwa Paulo wamulunjisile. (Wazyani Wagalatiya 2:11-14.) Wanga alonde nge wafulizilwe e Paulo pa nzila yino wamusundizilemo na kuno wamusundizile. Lelo atamufulizilwe swinya wakonsile ukusunda. Cino calenzile amuno walinji na mano. Mukupita kwa mpindi e Peter walanzile pe Paulo ukuti ‘umwanawitu umukundikwe.’​—2 Pet. 3:15.

13. Avyani vino tuzipizile ukwelenganyapo pano tukulonda ukulunjika wanji?

¹³ Nomba avyani vino muzipizile ukwizuka nga ca kuti mukulonda ukulunjika e ciwuza winu? Pano mutani muye kwe ciwuza winu muzipizile ukuyiwuzya ukuti, ‘Uzye ‘nkuilungamika sana’?’ (Ekawi. 7:16) Umuntu wino akailungamika akapingula wanji ukulingana na vino umweneco akulola, asipingula ukulingana na vino Yehova akalola. Swinya weni asiwa nu luse pano akupingula wanji. Nga mwalola ukuti cayana ukulanda ne ciwuza winu cingazipa ukumanya pano pawezile intazi. Swinya muzipizile ukuwonvya amawuzyo  ya kuti umweneco amanye pano pawezile iciluwo. Muzipizile nu kusinincizya ukuti vino mukulanda vilingine na vino amawaliko yakalanda. Swinya muzipizile mwakwizuka nu kuti e ciwuza winu aliluwulula kwe Yehova asa kwe mwemwe. (Roma. 14:10) Muwasintilila pa mano yano yawa mwi Zwi lya kwe Leza pano mukwavwa wanji swinya mwawa ni cikuku ndi vino Yesu walinji. (Imilu. 3:5; Mat. 12:20) Amulandu ci wuno tuzipizile ukucitila wo-o? Amuno vino tukucita kwe wanji avino Yehova alicita kwe sweswe.​—Jemu. 2:13.

14. Avyani vino iwungwe lya kwe Leza likatupekanizizya?

¹⁴ E Yehova akawonvya iwungwe lyakwe ilya mu nsi pa kutwavwa ukutwalilila ukupita mwe yo-o nzila yino yaya ku wumi. Lyo-o iwungwe likatupekanizizya amavidyo, amabuuku nu kulongana vino vikatwavwa ukwivwicisya ivya mu Baibolo. Iwumba Lino Likatungulula likasintilila sana pa muzimu uwutele pano likupingula pa nzila inzima izya kuwizizyamo. Swinya nga wapingula pe vimwi wakakwiza mu kupitulukamo pa kuti walole nga ca kuti kuli mumwi muno wangapilulako. Cino wakacitila wo-o, amulandu wa kuti ‘ivintu mu nsi vikuya vikupiluka.’ Nomba pa kuti wapitile ponga ukulingana na vino ivintu vili mu nsi nawonye wazipizile ukupiluka.​—1 Kor. 7:31.

15. Antazi ci yino wakawizya wamwi wakwata?

¹⁵ Lyonsinye nga ca kuti iwungwe lya kwe Leza lyatunena ukuti kuli ukupiluka pe vino twivwicisizye amawaliko yamwi nanti pa vintu vye vinji tukaikundila ukupiluka. Nomba uzye tukacita wuli nga ca kuti vino iwungwe lya kwe Leza lyapingulapo vyakuma uwumi witu? Ku cakulolelako, pano Iwumba Lino Likatungulula lyaweni ukuti amang’anda ya wufumu ni vikulwa vinji ivya kulonganilamo vikulondekwa, lyapinguzilepo ukuti amang’anda ya wufumu yawonviwa na mawungwe ukucila pe lyonga. Co-o calenzile ukuti na mawungwe yamwi wayakumbinkaninye. Swinya calenzile nu kuti wakazye yamwi mu ncende zimwi pa kuti wazenjele awanawitu na wankazi mu ncende zinji muno yakulondekwa nkani. Nga ca kuti mukakwikala ku cifulo cino wakazya ivikulwa vya kupepelamo, manda yamwi cingamiwomela ukukonka ko-o ukupiluka. Amuno pamwi mukaya mu kulonganila ukutali. Wanji nawo wano wawombesizye ukuzenga nanti ukuzifya vyo-o ivikulwa, wangatalika ukulola ngati wononile vye amaka yawo ni mpindi yawo. Lelo  asa mulandu na vyonsinye vyo-o, mwapocelela ko-o ukupiluka. Ala tukamisalifya nkaninye!

16. Uzye iwaliko lya Wakolose 3:23, 24 lingatwavwa wuli ukutwalilila ukusecelela pano tukuwombela e Yehova?

¹⁶ Tulitwalilila ukusecelela nga ca kuti tukwizuka ukuti tukawombela e Yehova swinya awino akatungulula iwungwe lyakwe. (Wazyani Wakolose 3:23, 24.) Tungasambililako isambililo ilicindame ku mazwi yano Imfumu David yalanzile pano yasangulanga umusangulo wa kuzenjela itempile. Yatili: “Ukuwa nga nene neweni, na wantu wanenye nga awaweni, ukuti tusuke tufime ni myezo wonye wo-o? Amuno ivintu vyonsi vyafuma kwe wewe, acaleka ivyakonyene avino twakupa.” (1 Imila. 29:14) Nasweswenye nga tukusangulako lyo tukunyosezya e Yehova vino watupa kali. Twakunda sana akumanya ukuti nga tukuwonvya impindi yitu, amaka yitu, ni vyuuma vitu ku kutunjilila umulimo wa wufumu tukalenga e Yehova ukusecelela nkaninye.​—2 Kor. 9:7.

17. Amulandu ci wuno tutazipizile ukwivwa uwuwi nga twalola ukuti muli mumwi muno tusakucita icete?

¹⁷ Pa kuti tutwalilile ukupita mu nzila imfyenenkane, tuzipizile twakonka sana mu matamba ya kwe Yesu. (1 Pet. 2:21) Nga ca kuti kuli mumwi muno mwalola ukuti mutakucita icete, mutazipizile ukuyivwa sana uwuwi. Amuno lyo mukulanjizya vye ukuti mukalonda ukukonka uwutunguluzi wa kwe Yehova. Lyonsinye mwakwizuka ukuti e Yehova wamanya ukuti tutapwililika. Fwandi asikwenecela ukuti twacita ivintu ngati twapwilila ndi vino umwana wakwe wawa.

18. Avyani vino tuzipizile ukutwalilila ukucita?

¹⁸ Lekani swensinye tutwalilile ukuwika amano pe vino Leza watulaya, nu kutwalilila ukupiluka mwe vino tukakwelenganya, vino twakunda na vino tukacita. (Imilu. 4:25; Luka 9:62) Swinya lekani tutwalilile ukuicefya, ‘ukusecelela nu kupilululwa.’ (2 Kor. 13:11) Nga tukucita wo-o, “e Leza wa lukundo nu mutende aliwa [naswe].” Swinya alitwavwa ukutwalilila ukusecelela pe yo-o impindi, na ku nkolelo alitupa uwumi wa muyayaya.