Ukulingana ne 1 Wakorinte 15:8, e Paulo watili: “Nga pa kupelelechezya pakwe wonsi, ngati a kwakwe wino wakwatwa mu mpindi ntayana, aloleka na kwakwe nene.” Pa-a e Paulo walandanga pe vino vyamuciticizile pano waweni icilolwa cakwe Yesu muwucindami wamwi yulu. Nomba wasuzile mwinye pano walanzile ukuti wakwasilwe mu mpindi “ntayana nanti ukwasowa ukuwoma”? Kaali twamanyile ukuti calinji ngati e Paulo wapocelezile ulungo lwakukwatwa nanti ukuzyulupucila ku wumi wakumuzimu pano impindi yitani yifike iyakuti ciwe wo-o. Swinya pano palinji nukupita imyaka imivule pakuti ko-o ukuzyulupuka kwize kucitike. Lelo pa nsizi yakwivwicisya muno yo-o e vesi yikasula, twaweni ukuti cicindime ukupiluka mwe vino twivwicisizye kaali.

Kweni molimonye, pa-a e Paulo walandanga pe vino vyacitisile pano wapilusilevye. Nomba uzye wasuzile mwinye pano walanzile ukuti wakwasilwe “mu mpindi ntayana nanti ukwasowa ukuwoma”? Kwawa imilandu imivule yino yalenga tumanye muno wasulanga.

Ukupiluka kwakwe kwalinji akwakuzungusya swinya ukwasowa ukwenecela. Ilivule cikazungusya awantu nga cakuti umwana wakwatwa ukwasowa ukuwoma. Pano e Sauli (wino mukupita kwa mpindi wizile awatalika ukwita ukuti e Paulo) wayanga ku Damasika mukucuzya awina Klistu, atenecelanga ukuti angalola icilolwa ca kwe Yesu wino wazyulupusile. Camuzungusizye nkaninye pe vino wapilusile swinya cazungusizye na wina Klistu nye wano walondanga ukuya mukucuzya kwe wo-o umusumba. Swinya wizile aleka nukulola pa kampindi kamwi.​—Imili. 9:1-9, 17-19.

Wapilusile pa mpindi pano kutalinji nanti wumwinye wino wenecelanga ukuti angapiluka. Izwi lya ciGriki lino wapiliwula ukuti ukukwatwa“mu mpindi ntayana” lingapiliwulwa nukuti “ukukwatwa pano impindi yitani yifike.” E Jerusalem Bible yalanda ukuti: “Calinji ngati nakwasilwe pano kutalinji uwili wensinye wino wenecelanga.” Pano e Paulo wapilukanga lyo-o Yesu wanyocela kaali kwi yulu. Fwandi ukupusanako na wano Paulo walandapo mu mavesi yakutalicila, weni asitela alolepo e Yesu pano wayanga kwi yulu. (1 Kor. 15:4-8) Wo-o vino e Yesu walolecezile kwe Paulo, calenzile nawe awe nulongo lwa kulolako e Yesu ukuti wazyulupusile nanti acakuti calolesile ngati cacitisile “pano impindi yitani yifike” nanti pano kutalinji uwili wesinye wino wenecelanga.

Amazwi yano walandanga yalanjizizye ukuti waicefizye. Awasambilile wamwi wakalanda ukuti amazwi yano e Paulo wawomvizye, yalinji ngati ayakulengulula. Nga cakuti wo-o vino awasambilile wamwi wakalanda avino Paulo welenganyanga, lyo wayilolanga ukuti atayine ukuwa amutumwa. Walanzile nukuti: ‘Amuno ne wakupelelecezya pa watumwa wonsi swinya naponye ntazipila nanti ukwitwa ilyawutumwa amuno nayimvizye Ikeleziya lya kwe Leza. Ukuwa muno Leza wamfwila inkumbu, indi ndivino indi.’​—1 Kor. 15:9, 10.

Cikaloleka ngati ya-a amazwi yano Paulo wawomvizye yakalanda pe vino Yesu walolecezile kwe weliwe mu nzila yakuzungusya swinya ukwasowa nukwenecela pano wapilusile. Mu nzila yinji tungalanda ukuti walolanda ngati atayine ukumusokololela vyo-o ivintu vyakuzungusya. Ukwasowa nukuvwilika, e Paulo wacindamisile nkaninye vino vyamuciticizile. Swinya vyalenzile asinincizye ukuti molimo nye e Yesu wazyulupusile ku wafwe. Cinji acakuti awuli umulandu wuno walandilangapo sana pe vino vyamuciticizile pano akusambilizya wanji pakuzyulupuka kwa kwe Yesu.​—Imili. 22:6-11; 26:13-18.