Mwe wo-o umwaka, iwungwe lya kwe Yehova lizile alipilukako mwe vimwi vino vyalenzile awasambi we Baibolo ukulemenkana nkaninye. Mu Ulupungu lwa kwe Kalinda watalisile ukuwikamo amazwi yakulondolola amawaliko yano wawomvyanga pa kulongana kwa mwe sabata ukwa Kupepa nu Kulumbanya Yehova. Cinji acakuti, Awasambi we Baibolo wizile awafumya e kalenda yino watantisilepo amawaliko yakuwomvya pa kulongana cila sabata apano ni ndwimbo zya kuwomvya pano wakuyisambilizya na pa mapepo ya lupwa.

Pe ko-o ukulongana, Awasambi we Baibolo wasimikanga vino vyawaciticilanga mu mulimo wakuwizya, ukupepa, ukwimbila nga nu kulondolola umulandu wuno wasalifizyanga e Yehova. E Eva Barney, wino wabatizizwe mu 1923 lyo ali ni myaka 15, watili: “Ngu kulonda ukulandapo pe vino vyakuciticila mu wumi, kwawanga ukwimilila nu kutalika ukulanda amazwi ndi vino, ‘Nkulonda ukusalifya e Tatakulu pa vizima vyonsinye vino wancitila.’” Awanawitu na wankazi wamwi, wivwanga icete nkaninye ukulandapo. E nkazi Barney walanzile nu kuti: “Umwanawitu Godwin uwa cisongo, wawanga ni vivule ivya kusalifizyapo e Tatakulu. Lelo nga cakuti umuci walola ukuti e katungulula watonta, wazutanga vye wa Godwin mwe jaketi nawo awikala.”

Uwanda wonga mu mwezi, cila liwungwe lyonga na lyonga wasunkananga ku kulongana ukuyiwele ukwa Kupepa, Ukulumbanya Yehova nu Kusimika pe vino vyawaciticizile. Ulupungu lwa kwe kalinda ulwa April 1, 1923, lwalondolozile pe ko-o ukulongana ukuti: “Wapawulanga pakasi impindi yakulongana pa kuti kuwe iya kulandapo nu kusimika pe vino wawomvile mu mulimo swinya ni yakuwomelezya wakawomba . . . . Twamanyile ukuti ukucita wo-o kwalinji nu kulenga awanawitu na wankazi ukulemenkana nkaninye.”

E Charles Martin, e kawizya wa ku Vancouver mu Canada uwa myaka 19, wayitopwanga nkaninye kwe ko-o ukulongana. Walanzile ukuti: “Kwe ko-o ukulongana akuno natalicizile ukusambilila ivya kuwomba umulimo wa kuwizya ku ng’anda ni ng’anda. Amuno cila mpindi kwawanga wano wasimikanga pe vino wawomvile umulimo wa ku ng’anda ni ng’anda. Na co-o, calenzile manye ivya kucita pa kutalika ukulanzyanya na wantu nu kwasuka amawuzyo yano wankolowozya.”

“Amanda ya kuwizya” yalenganga awanawitu na wankazi walemenkane nkaninye. Mu Ulupungu lwa kwe Kalinda ulwa April 1 1923 mwalinji icakuwilizya ica kuti: “Pa kuti kuwe ukulemenkana mwe wo-o  umulimo . . . , pe ciwili pa 1 May, 1923 wuliwa awanda wakuti swensinye twize tuye mukuwomba umulimo wa kuwizya. Swinya wonye avino twandi twasunkana pe ciwili cila mwezi pakuya mu kuwizya . . . Cinji acakuti, uwili wensinye mwi wungwe, azipizile ukuzanwako.”

Awasambi we Baibolo awacitici nawonye wayanga mu kuwizya. E Hazel Burford wino walinji ni myaka 16 pe yoyo impindi, walanzile ukuti: “Mu kalibuku kano twawomvyanga mwalinji ivya kulanda vino vyatwavwanga mu mulimo wa kuwizya. a Swinya nene ne shikulu twawombesyanga nkaninye mu mulimo wa kuwizya.” Lelo nanti ciwe wo-o, vino umwanawitu wumwi uwacisongo wacitanga vyazungusizye nkaninye e nkazi Burford. We-e nkazi walanzile ukuti: “Umwanawitu uwacisongo atalondanga nawizizya awantu. Amuno pe yoyo impindi, wamwi watamanyile ukuti Awasambi we Baibolo wonsinye ukuwikako na ‘nawalumendo na wakazyana,’ wazipizile ukulumbanya e Kelewula witu.” (Amalu. 148:​12, 13) Asa mulandu na vyonsinye vyo-o, e nkazi Burford watwalilizile ukuwomba umulimo wa kuwizya icakuti mwizile amufuma ivizima. Ku cakulolelako, wizile azanwa kwi sukulu lya citiwili ilya Gilead swinya wizile atalika ukuwomba wumishonari ku Panama. Mukupita kwa mpindi awanawitu wano wivwanga uwuwi nga cakuti awacitici wakuwomba umulimo wakuwizya wizile awaleka.

Ukulongana kwa citungu kwalenzile awanawitu na wankazi ukulemenkana nkaninye. Pa kulongana kwa citungu ukuvule wasolanga uwanda wakuya mu mulimo. Ku cakulolelako pano kwalinji ukulongana kwa citungu mu Winnipeg ku Canada, wawomelezizye wonsinye wano wazanilweko ukuti wize wawombeko mu mulimo wakuwizya pa 31 March. Awavule wawomvileko wo-o umulimo swinya mwizile amufuma ivizima. Icizima acakuti, awantu mupipi ne 7,000 wizile awazanwa ku kulongana kuno kwakonsilepo mu Winnipeg pa 5 August. Wo-o walinji amuku wakutalicilako ukuvula kwa wantu pa kulongana kwa citungu mu Canada.

Ukulongana kwa citungu kuno kwacindime nkaninye ku wantu wa kwe Yehova mu 1923, kwalinjiko pa 18-26 August ku Los Angeles mu California. Pano kwasyazile ama sabata matici ukuti kuwe ukulongana, Awasambi we Baibolo wamwi wawomvizye ama nyuzipepala pa kwita awantu, swinya wapile  awantu utupepala twakwitila awantu ku kulongana ukucila pe 500,000. Ne wamwi wawomvizye ama motoka pano walemvile amazwi ya kwitila awantu ku kulongana kwa citungu.

Pa ciwelusi pa 25 August, umwanawitu Rutherford walanzile ilyasi lino lyalandanga pa “Ng’onzi ni Mbuzi.” Mwe lyo-o ilyasi walondolozile ukuti “Ing’onzi” awantu wakwe Yehova awalungamane wano waliyikala mu paradise monye munsi. Swinya walanzile na pe vino vingawavwa nu kuwazya pano patinji “Ukusoka.” Lyo-o ilyasi lyalanzile pe kilisitendomu swinya wanenile awantu ukuti fumani mwe “Babiloni mukulu.” (Ukuwu. 18:​2, 4) Mukupita kwa mpindi Awasambi we Baibolo wano wawombesyanga mu mulimo wa kwe Yehova walemenkine ponga nu kufumya e tirakiti yino yalandanga pe vino vingawavwa ukutwalilila ukuwa awa cisinka kwe Yehova.

Pa wanda wakulecelezya uwa kulongana kwa citungu, umwanawitu Rutherford walanzile ilyasi ku wantu ukucila pe 30,000 lino lyalinji nu mutwe wakuti “Inko Zyonsinye Zikuya kwe Armagedoni, Lelo Imintapendwa ya Wantu Wano Wacili nu Wumi Watalitela Wafwe.” Pa mulandu wa kuti Awasambi we Baibolo wenecelanga ukuti awantu awavule walinji nu kwiza, wasoncezile icikulwa icipya mu Los Angeles ku Coliseum. Swinya awanawitu wawisile amasipika pa kuti wonsinye wano wazanilweko wateyelezya. Ne wanji awavule wateyelezizye ko-o ukulongana pa redyo.

Mu 1923, kwalinji ukulunduluka mu mulimo wa kuwizya mu Africa, mu Europe, mu India, na mu South America. Umwanawitu A. J. Joseph wavwilizizyeko mu mulimo wa kufumya amabuku ku India mu ci Hindi, Tamil, Telugu, ni ci Urdu nanti aca kuti walinji nu mulimo wakusakamala umuci na wana 6.

Umwanawitu e Alfred Joseph ne Leonard Blackman awa ku Sierra Leone, walenzile uwavwilizyo kuwa kuma ofesi makulu ku Brooklyn mu New York. Pa 14 April, 1923 wizile awawasuka. Umwanawitu Alfred watili, “Pa ciwelusi uwusiku wantumizile e foni nu kunkolowozya ukuti, ‘Uzye amwe wano mwalenzile uwavwilizyo ku Watch Tower Society ukuti mukuvwamba wakawizya?’” E Alfred nawe wasusile ukuti “Eta.” Nawe e William R. Brown watili, “Anemuno wantumile ukwiza.” Pe wulyanye uwanda apano wafisile ukufuma ku Caribbean nu muci e Antonia na wana wawo wawili e Louise ne Lucy. Awanawitu walondesyanga nkaninye ukupocelela e Brown nu lupwa lwakwe.

E Alfred walanzile nu kuti: “Uwanda wuno wakonsilepo umutondo tondo pano twalanzyanyanga ivya mu Baibolo ne Leonard ngati avino twacitanga lyonsinye cila sabata, twizile atulola umonsi umutali pa mu lyango. We-e umuntu walinji amwanawitu e William R. Brown. Wawombesyanga nkaninye mu mulimo wa kwe Yehova ica kuti uwanda wuno wakonsilepo  walondanga ukulanda ni lyasi lya kucintu wavule.” Pano nu mwezi wutani wusile, we-e umwanawitu wapile awantu amabuku yonsinye yano wafumile nayo. Wizile awamutumila na yanji ayali 5,000, swinya patalinji nu kuzimba nayonye walinji nu kuyamala zuwanye. Lelo nanti ciwe wo-o, we-e umwanawitu e Brown atamanyisilwe ukuti we kakazya wa mabuku. Impindi yonsinye pano wawombanga umulimo wa kwe Yehova, wakunzile nkaninye ukuwomvya amawaliko na co-o calenzile awantu wamwita ukuti Baibo Brown.

Awanawitu wizile awapingulapo ukuti wacinte ku musambo wa ku Barmen, pa mulandu wa kuti incende yacefile. Cinji acakuti, wivwile ukuti awasilika waku France walinji nu kusansa wo-o umusumba. Acino Awasambi we Baibolo wizile awazana icikulwa mu Magdeburg co waweni ukuti cingazipa ukuwapulintilamo. Swinya pa 19 June, wizile awamala ukulonganika ivya kuwomvya pa ku pulinta ni viwombelo vinji nu kucintila ku musambo wa ku Magdeburg. Pa wanda uwuli wonganye pano wamanyisizye awa kuma ofesi makulu ukuti wamala ukucinta, kwizile akufuma amanyuzipepala pano walanzile ukuti awasilika wa ku France waposile umusumba wa Barmen. Awanawitu wizile awalola ukuti wo-o vino wacinsile, calanjizizye apatiswenye ukuti e Yehova wawacinjililanga nu kuwavwa.

Umwanawitu George Young, uwa ku Brazil wino wawombanga umulimo wa kuwizya mu ncende izilekane lekane, wapanzile umusambo uwupya nu kutalika ukufumya Ulupungu lwa kwe Kalinda mu ci Portuguese. Mu myezi vye mitici wapile awantu amabuku ukucila pe 7,000. E Sarah Ferguson wivwile icete nkaninye pano umwanawitu George Young wayile ku Brazil nu ku tandalila ulupwa lwawo. We-e nkazi watalisile ukuwazya Ulupungu lwa kwe Kalinda ukufuma mu 1899, lelo asitela alanjizye ukuti wayipa ukupitila mu ku batizwa. Pa nsizi ya myezi vye mitici, e nkazi Ferguson na wana wakwe 4 wizile awapingulapo ukubatizwa.

Kunsilo ya mwaka, Ulupungu lwa kwe Kalinda ulwa December 15, 1923 lwalondolozile pe vino ukupiluka mwe vino wasunkananga mu kulongana kwa piwungwe, ukwa citungu ni vyakuwomba umulimo wakuwizya kwavwizye Awasambi we Baibolo ukulemenkana. Lwatili: “Cikuloleka apatiswenye ukuti awawomvi wa kwe Yehova wonsinye. . . wali ni suwilo iliwome . . . Acino lekani swensinye tuyipekanye ukuwomba imilimo na yinji nu kutwalilila ukuwombela Yehova ni nsansa mu mwaka wa 1924 wuno wukwiza.”

Umwaka wa 1924 wuno wakonsilepo walenzile Awasambi we Baibolo ukuwa ni nsansa nkaninye. Awanawitu awa pa musambo wawombesizye pa myezi yimwi mu kuzenga pe yo-o incende yino yawezile ku Staten Island, pano patatalimfile nkani ukufuma ku ma ofesi makulu aya ku Brooklyn. Wamazile ukuzenga ivikulwa kwe yo-o incende iyipya ku kutalika kwa mwaka wa 1924, swinya wavwizye na wanawitu na wankazi ukulemenkana nu kuwomvya inzila zya kuwizizyamo izilekane lekane zino wasitela wawomvyepo.