1. Uzye e Yehova wawomyanga wuli awawomvi wakwe awa ku nsizi?

 IZWI lya kwe Leza lyalondolola awonsi wa cisinka wano walembwamo ukuti walinji awawome. Lelo nawonye asa welyonsi pano aweneco wayilolanga ukuti walinji awawome. Ku cakulolelako, impindi zimwi e David wayilolanga ukuti walinji amuwome ngati ‘amyamba’ ne mpindi zimwi “wawanga nintete.” (Amalu. 30:7) Winji walinji we Samusoni. Nanti acakuti walinji na maka pano umuzimu wutele wamwavwanga, wamanyile ukuti ukwasowa amaka ya kwe Yehova “walinji nu kutonta ndi vino wila muntu.” (Kapa. 14:​5, 6; 16:17) Wa-a awonsi walinji awawome pa mulandu wakuti e Yehova awino wawapanga amaka.

2. Amulandu ci wuno umutumwa Paulo walandizile ukuti walinji amutonte swinya umuwome? (2 Wakorinte 12:​9, 10)

² Umutumwa Paulo wamanyile ukuti walondekwanga amaka ukufuma kwe Yehova. (Wazyani 2 Wakorinte 12:​9, 10.) E Paulo walwalanga ndi vino naswenye tukalwala. (Gal. 4:​13, 14) Mpindi zimwi camutalilanga nu kucita icizima. (Roma. 7:​18, 19) Swinya manda yamwi wasakamikwanga nu kwivwa intete pe vino vingamuciticila. (2 Kor. 1:​8, 9) Lelo pano walolanga ukuti walinji amutonte apano wawanga na maka. Amunzila ci? Amuno e Yehova wamupanga amaka yano walondekwanga pa kuti asipicizye intazi zino wapitangamo.

3. Amawuzyo ci yano twandi twasuke mwe co-o icipande?

³ E Yehova watulaya ukuti wandi awatupa amaka yakusipicizya intazi. (1 Pet. 5:10) Lelo tutazipizile ukwenecela ukuti wandi awatupa amaka ukwasowa ukucitapo cimwi. Ku cakulolelako, nga cakuti umuntu ali ni vyakulya pa mbale, asikwenecela ukuti vyandi viyitwale pa mulomo ivyeneco. Lelo akawomvya ikasa nu kutalika ukulya. Wonye avino cawa na kwe Yehova. Wayipekanya ukutupa amaka yano tukalondekwa, lelo kwawa vimwi vino tuzipizile  ukucita. Avyani vino Yehova watuwicilako ivya kutuwomya? Avyani vino tuzipizile ukucita pa kuti atupe amaka? Mwe co-o icipande twandi twasuke ya-a amawuzyo ukupitila mukulanda pe kasesema Yona, e Mariya e nyina wa kwe Yesu nu mutumwa Paulo. Twasambilila na pe vino e Yehova watwalilila ukuwomya awawomvi wakwe mwe ya-a amanda.

4. Uzye e Yehova angatupa wuli amaka?

⁴ Cimwi cino tuzipizile ukucita pa kuti Yehova atupe amaka, akupepa kwe weliwe. Aliyasuka ipepo litu ukupitila mukutupa ‘amaka makulu nkani . . . yano yasi amaka yitu.’ (2 Kor. 4:7) Cinji acakuti, angatuwomya nga tukuwazya Izwi lyakwe e Baibolo nu kwelenganyapo pe vino tukuwazya. (Amalu. 86:11) Amuno amazwi yakwe yano yawa mu Baibolo “aya maka.” [NWT] (Hebe. 4:12) Fwandi nga cakuti mwapepa swinya mukuwazya ne Baibolo e Yehova alimipa amaka yano mukulondekwa pa kuti musipicizye intazi swinya mutwalilile ukumuwombela ni nsansa nanti ukutwalilila ukuwomba umulimo wuno mukulola ukuti awuwome. Lekani tulande pe vino Yehova wawomizye e kasesema Yona.

5. Amulandu ci wuno e kasesema Yona walondecelanga uwakumuwomya?

⁵ E kasesema Yona walondekwanga sana uwakumuwomya. Wasamazile umulimo uwutale wuno Yehova wamupile. Na cino cafumilemo acakuti watili afwe ku ma ng’wimbi swinya kwasyazile kwempe, nga wakomesizye na wano walinji mu wato. Pano wamusumbizile mwe sumbi, icinswi icikuulu cizile acimumilula. Uzye mukwelenganya ukuti e Yona wivwile wuli pano walinji munda ya cinswi? Pakutalika afwile welenganyanga ukuti wandi afwe. Swinya afwile walolanga ngati e Yehova alesile ukumwavwa. Ukulanda vye icisinka, afwile walinji ni ntete nkaninye.

6. Ukulingana ne Yona 2:​1, 2, 7, avyani vino vyavwizye e Yona ukuwa amuwome pano walinji munda ya cinswi?

⁶ Avyani vino vyavwizye e Yona ukuwa amuwome pano walinji munda ya cinswi? Icakutalicila, alipepo. (Wazyani Yona 2:​1, 2, 7.) Nanti acakuti e Yona ativwizile e Yehova, walapizile nu kusuwila ukuti walinji nu kwivwa ipepo lyakwe. Cinji cino camwavwizye, akwelenganya pa mawaliko yano wawazizyepo ku nsizi. Twamanya wuli ukuti avino wacitanga? Twamanya wo pa mulandu wakuti amazwi yano walanzile mwi pepo yano yalembwa mwi buku lya kwe Yona icipandwa 2 yakolana na yano tukazana mwi buku lya Amalumbo. (Ku cakulolelako, linganyani e Yona 2:​2, 5 ku Amalumbo 69:1; 86:7.) Cikaloleka apatiswenye ukuti e Yona wamanyile nkaninye ya-a ama vesi. Swinya ukwelenganyapo sana kwamwavwizye ukusuwila ukuti e Yehova walinji nu kumwavwa. E Yehova wizile amupususya swinya e Yona wizile azumila ukuya mukuwomba umulimo wuno wamupile.—Yona 2:10–3:4.

7-8. Uzye umwanawitu wumwi uwa ku Taiwan wazanile wuli ivya kumuwomya pano wapitanga mu ntazi?

⁷ Icakulolelako ca kwe Yona cingatwavwa pano tukupita mu ntazi. Lekani tulande pa mwanawitu Zhiming, b uwa ku Taiwan wino akalwalilila nkaninye. Cinji acakuti, wa lupwa lwakwe wakamucuzya pa mulandu na vino wazumilamo. Lelo ipepo nu kuyisambilizya avino vikamuwomya. Watili. “Mpindi zimwi nga cakuti nawa ni ntazi, nkasakamikwa nkaninye ica kuti mpotwa nu kuyisambilizya.” Lelo nanti ciwe wo-o, asinenuka. Walanzile nu kuti, “Ica kutalicila, nkapepa kwe Yehova swinya nkatalika ukuteyelezya ku ndwimbo zya Wufumu. Ukulunda pe vyo-o, nkatalika ukwimbila mwi zwi lya pansi mpaka umwezo awikala. Apano mukulecelezya nkatalika ukuyisambilizya”

⁸ Ukuyisambilizya kwawomizye nkaninye e  Zhiming. Ku cakulolelako pano watani wamulepule pa mulandu ni ndwala yino walwile, e nasi wumwi wamunenile ukuti uwazi wacefile mu muwili, acino walondekwanga ukumuwikamo uwazi na wunji. Nomba uwusiku pano watani wamulepule wawazizyepo pe nkazi wino wakweti intazi iyiliyonga ni yakwe. Wazanile ukuti we-e nkazi uwazi wacefile nkaninye ukucila na pe weliwe lelo wakanile ukuti wamuwikemo wunji swinya wapozile. Co-o ica kulolelako cavwizye nkaninye e Zhiming ukutwalilila ukuwa ni cisinka.

9. Avyani vino mungacita nga cakuti mukusakamikwa nkaninye pa mulandu ni ntazi?(Lolani ni cikope.)

⁹ Uzye mukatela amupepapo kwe Yehova pano mukupita mu ntazi? Nanti uzye mukatonta nkaninye icakuti amupotwa nu kuyisambilizya? Mwakwizuka ukuti e Yehova akamanya vino mukuyivwa. Fwandi nanti aca kuti mwalanda vye amazwi yatici mwi pepo, mungasuwila ukuti wandi amipe vino mukulonda. (Efes. 3:20) Nga cakuti cikamiwomela ukuyisambilizya pa mulandu wakulwala, ukutonta nanti ukusakamikwa, mwakwelezya ukuteyelezya kwe Baibolo iyikopwe nanti ku mabuku yitu yano yakalanda pe Baibolo. Swinya mungateyelezyako na ku ndwimbo nu kutamba amavidyo yano yawa pa jw.org. E Yehova wandi awamiwomya swinya alicita wo-o, nga cakuti mukupepa kwe weliwe nu kuvwamba ivyasuko ku mapepo yinu mu Baibolo na mu vintu vinji vino watuwicilako.

10. Uzye awanawitu na wankazi wakatuwomya wuli?

¹⁰ E Yehova angawomvya awanawitu na wankazi kukutuwomya. Wangawa “awakasansamusya” pano tuli ni ntazi na pano cikutuwomela ukuwomba umulimo uwutale. (Kolo. 4:​10, 11) Tukalondekwa ukuwa ni viwuza maka maka pano tukupita “muntazi.” (Imilu. 17:17) Nga ca kuti twatonta, awanawitu na wankazi wangatupa vino vikulondekwa, wangatusansamusya nu kutuwomelezya ukutwalilila ukuwombela Yehova ni cisinka. Lekani tulande pe vino e Mariya e nyina wa kwe Yesu wamuwomizye ku wantu wanji.

11. Amulandu ci wuno e Mariya walondecelwanga ukumuwomya?

¹¹ E Mariya walondekwanga ukuwa amuwome pa kuti acite ukulonda kwa kwe Yehova. Teyelenganyani pe vino afwile wivwile pano umungeli wamunenile pa mulimo uwuwome wuno  Yehova wamupile. Pe yoyo impindi lyo atatwalwa, lelo umungeli wamunenile ukuti walinji nu kuwa pa wukulu. Swinya atakwetipo umwana pa kuti amanye ivya kusunga nu kukuzya akanya, lelo wamupile umulimo wakukuzya e Yesu wino walinji nu kuwa we Mesiya. Cinji acakuti, e Mariya walinji we mwali, nomba walinji nu kulondololela wuli e Jozefu wino wamwimazile ukuti wandi awe pa wukulu? Ukwasowa nu kuvwilika calinji nu kumuwomela nkaninye.—Luk. 1:​26-33.

12. Ukulingana ne Luka 1:​39-45, uzye e Mariya wamuwomizye wuli?

¹² Acani cino cawomizye e Mariya ukuwomba umulimo uwuyiwele swinya uwuwome wuno Yehova wamupile? Wanenileko wanji ukuti wamwavwe. Ku cakulolelako, wakolowozizye umungeli e Gabrieli ukuti amulondololele na vinji pe vino calinji nu kuwa pa kuti awombe umulimo wuno Yehova wamupile. (Luk. 1:34) Patazimvile nu kuzimba, wakatusile nu kuya “kunsi yamyamba” mu Yuda mukutandalila e lupwa lwakwe e Elizabeth. Wo-o uwulendo wazifile nkaninye. E Elizabeth wasalifizye nkaninye e Mariya. Cinji acakuti, e Yehova wavwizye e Elizabeth ukulanda amazwi yakuwomelezya aya mu wusesemo yano yalandanga pa mwana wino walinji mwi fumo lya kwe Mariya. (Wazyani Luka 1:​39-45.) E Mariya walanzile ukuti e Yehova “wasokolola amaka ni kasa lyakwe.” (Luk. 1:​46-51) E Yehova wawomvizye umungeli e Gabrieli ne Elizabeth, ukuwomelezya Mariya.

13. Avizima ci vino e nkazi uwa ku Bolivia wazanilemo mukunenako wanji pe vino wapitangamo?

¹³ Ndi wulyanye vino calinji kwe Mariya, namwemwenye awanawitu na wankazi wangamiwomya. Wonye avino ne nkazi Dasuri uwa ku Bolivia walondekwanga uwakumuwomya. Pano tata wakwe walwile wizile awamuteka mu cipatala swinya e Dasuri wayikundizile ukuwamusakamala. (1 Tim. 5:4) Ukucita wo-o kutapepusile. E Dasuri watili, “Impindi izivule nayivwanga ngati ntandi nkumanisye.” Uzye wanenileko wanji ukuti wamwavwe? Pakutalika asitela anenepo uwili wensinye. Walanzile ukuti, “Ntalondanga ukutamya awanawitu na wankazi. Nelenganyanga ukuti ‘e Yehova awino walinji nu kunjavwa.’ Lelo nizile injiluka ukuti, wo-o vino nayipawulanga kwe wanji calinji ngati nkulonda ukumala intazi nenga.” (Imilu. 18:1) Acino e Dasuri wasozilepo ukulembela awawuye wamwi pa ntazi zino wakweti. Walanzile nu kuti, “Ungapotwa na mwazwi ya kuwomvya pakulondolola vino awanawitu na wankazi wambomizye. Wandetelanga ivya kulya ku cipatala nu kumbazizya amawaliko yakunsansamusya. Alongo uluyiwele ukumanya ukuti tutawa swenga. Twawa mu lupwa ulukulu ulwa kwe Yehova. Awanawitu na wankazi wakayikundila ukutusakamala mwe vino tukulondekwa, ukuwa caponga nasweswe pano tukupita mu ntazi nu kutuwomelezya ukutwalilila ukuwombela Yehova.”

14. Amulandu ci wuno tuzipizile ukukonka ukwavwa kwa eluda?

¹⁴ Inzila yonga yino Yehova akawomvya pakutuwomya, akupitila mwa eluda. Wa-a wawa avyawila vino akawomvya ku kutuwomya nu kutusansamusya. (Ayize. 32:​1, 2) Fwandi nga cakuti musakamisilwe, mwawanena vino vikumitamya. Swinya nga cakuti wamyavwa, mutalema na kwisote ukuvikonka. Amuno e Yehova angawawomvya kukumiwomya.

15. Alisuwilo ci lino swe wina Klistu swensinye twawa nalyo?

¹⁵ Isuwilo litu ilya mu Baibolo, lingatupa amaka yakutwalilila ukuwombela Yehova. (Roma. 4:​3, 18-20) Swe wina Klistu swensinye nampo nga twawa nu longo lwakwikala munsi nanti kwi yulu, twawa ni suwilo lyakwikala umuyayaya. Lyo-o isuwilo likatwavwa ukusipicizya intazi, ukutwalilila ukuwizya Ilyasi Lizima nu  kuwomba imilimo imilekane lekane mwi wungwe. (1 Tes. 1:3) Swinya lyonye isuwilo alino lyavwizye nu mutumwa Paulo.

16. Amulandu ci wuno e Paulo walondecelwanga ukumuwomya?

¹⁶ E Paulo walondekwanga ukumuwomya. Mwe kalata yino walembezile awina Korinte, wayikolinye umweneco ku nyungu. “Wamutiticizyanga,” “camuzungusyanga,” “wamucuzyanga,” swinya “wamucisanga.” [NWT] Cinji acakuti uwumi wakwe walinji mu wusanso. (2 Kor. 4:​8-10) E Paulo walemvile ya-a mazwi pano walinji pawulendo waciti tatu uwa wumishonari. Pa nsizi yakulemba ya-a mazwi, apano wizile apita na mu ntazi iziwipisye nkaninye. Awantu wamucuzyanga, wawundwanga muwato swinya wamuwikanga mu vifungo.

17. Ukulingana ne 2 Wakorinte 4:​16-18, acani cino cavwizye e Paulo ukusipicizya intazi?

¹⁷ Ukuwika amano pi suwilo lya kunkolelo, kwavwizye e Paulo ukusipicizya intazi. (Wazyani 2 Wakorinte 4:​16-18.) Wanenile awina Korinte ukuti nanti aca kuti umuwili wayanga ‘ukononeka,’ atalinji nu kuleka co-o cilenge anenuke. E Paulo wawisile sana amano ku vya ku nkolelo. Swinya isuwilo iliwome lino wakweti, lyalenzile awasipicizya intazi zyonsinye zino wapitangamo pa kuti vye ayize apocelele icilambu. Cinji acakuti, welenganyanga nkaninye pe lyo-o isuwilo, na co-o calenzile awayivwa ngati ‘akupiluka umupya uwanda nuwanda.’

18. Uzye isuwilo lya ku nkolelo lyawomya wuli Tihomir nu lupwa lwakwe?

¹⁸ Isuwilo lya ku nkolelo lyawomizye nkaninye umwanawitu Tihomir uwa ku Bulgaria. Pa nsizi vye ya myaka mitici, umuzuna wakwe umulumendo e Zdravko, wizile afwa mu wusanso wapa musewo. Na co-o calenganga e Tihomir manda yamwi awawa nu wulanda nkaninye. Nomba pa kuti wasipicizya ponga nu lupwa lwakwe, welenganyanga sana pe vino ukuzyulupuka kuliwa. Walondolozile ukuti: “Twelenganyanga pe kuno tulisunkanya e Zdravko, pa vyakulya vino tulimupekanizizya, wano tuliyita nga cakuti twasunkana ponga nga wazyulupuka apano na pe vino tulimusimicila vino vyasyazile vikucitika mu manda ya kulecelezya.” E Tihomir watili ukuwika sana amano kwi suwilo lya  ku nkolelo kwawavwanga ukuwa na maka yakusipicizya nu kutwalilila ukulindilila pano Yehova alizyulupula e Zdravko.

19. Mungacita wuli pa kuti muwe ni suwilo iliwome pe vino vilicitika ku nkolelo?

¹⁹ Mungacita wuli pa kuti muwe ni suwilo iliwome pe vino vilicitika ku nkolelo? Ku cakulolelako, nga cakuti mwawa ni suwilo lyakwikala munsi, mwawazya amawaliko yano yakalanda pe vino Paradaise iliwa nu kwelenganyapo. (Ayize. 25:8; 32:​16-18) Swinya mwakwelenganya na pe vino imikalile yiliwa munsi mpya. Mwavipanga ukuti akuno muli. Weweni wino mwalola? Amazwi ya musango ci yano mukwivwa? Mwivwa wuli? Cinji cino cingamyavwa ukwelenganya ukuti muli mu Paradaise, akutamba ivikope vino vyawa mu mabuku yitu, vino vikalanjizya vyo insi mpya yiliwa. Nanti mungatamba amavidyo ya ndwimbo ndi vino izya kuti Ukuwa mu nsi Mpya, Insi Mpya yili Mupipi Nkaninye, nu lwa kuti Yelenganya Vino Ciliwa. Nga mukwelenganya sana pe vino insi mpya yiliwa, muliwalola Intazi zino mukupitamo ukuti ‘azyapa ka mpindi katichi.’ (2 Kor. 4:17) Isuwilo lino Yehova wamipa, lingamyavwa ukuwa mwe wawome.

20. Tungawa wuli na maka na palyanye pano tukuyivwa ukuti tutonsile?

²⁰ Nanti acakuti tungivwa ukutonta, ‘ndi Leza alinaswe lyo tukucimvya.’ (Amalu. 108:13) E Yehova watunena vyo tuzipizile ukucita pa kuti awatuwomya. Fwandi nga cakuti mukulonda ukumyavwa ukuwomba umulimo uwuwome, ukusipicizya intazi nanti ukutwalilila ukuwombela Yehova ni nsansa, mwapepa ukufuma pansi ya mwezo nu kuvwamba uwutunguluzi wa kwe Yehova ukupitila mukuyisambilizya. Swinya mwalenga ukuti awanawitu na wankazi wamyavwa. Cinji acakuti mwakwelenganya sana pe vyo ivintu viliwa ku nkolelo. Nga mwacita wo-o, apano muliwa ‘namaka yonsi yano yakafuma muwukankala wakuchindamikwa kwakwe, [Leza] alyakuti muwazizimicizya kwakwe vyonsi nuwuchimyamya’ mbali nu kusecelela—Kolo. 1:11.