1-2. Avyani vino muzipizile ukucita pano mukuwazya Baibolo? Lanjililani.

 YELENGANYANI ukuti mukulonda ukukala ing’anda. Uzye vwilani avyani vino mungakunda ukulola pano mutani muyikale? Uzye akumitumila icikope cino cikulanjizya vino ing’anda yikaloleka pa nkolelo? Ukwasowa nu kuvwilika asa vino mungacita. Mungatemwa ukuya mukufika kuno kwawela yoyo ing’anda, ukuyizinguluka yonsinye mukasi na kulonde nu kulola uwukulu. Swinya ncepamwi mungakunda nu kukolowozya umweneco pe vino wayizenzile. Cino mukucitila wo-o, mukuvwamba ukulola vino yiliwaloleka nga cakuti mwayikala yawa ayinu.

² Wonye avino tungacita pano tukuwazya Baibolo. Umusambilile sana ivya mu Baibolo wumwi wakolinye e Baibolo “ku cikulwa icitali nkaninye, cino wazenga pa lufula uluzike.” Nomba tungacita wuli pa kuti tumanye icete vino vyawa mu Baibolo? Mutazipizile ukuwazya mu luwilo. Amuno ukucita wo-o, kungalenga mwasambilila vye ivisinka vya papela nanti “intaliko ya vikulu vya kuwumbulika kwakwe Leza.” (Hebe. 5:12) Lelo ndi wulyanye vino mungacita ku ng’anda yino mukulonda ukukala, muzipizile ukuvwambilizya ivisinka ivizike ivya mu Baibolo. Inzila yimwi yino yingamyavwa ukucita wo-o, akulola vino iwaliko lino mukuwazya lilemenkine na mawaliko yanji aya mu Baibolo. Cinji acakuti, mwakwelezya na maka ukwivwicisya ivisinka vino mwazumilamo nu kulola imilandu yino yalenga muvisuwile.

3. Avyani vino umutumwa Paulo wawomelezizye awina Klistu wawuye ukucita swinya amulandu ci? (Waefeso 3:​14-19)

³ Pa kuti twivwicisye vino vyawa mwi Zwi lya kwe Leza, kuli vimwi  vino tuzipizile ukuwawikako sana amano pano tukuwazya. Umutumwa Paulo wawomelezizye awina Klistu wawuye ukuwikako sana amano pano wakuwazya Izwi lya kwe Leza pa kuti ‘wiluke . . . cino uwupapatale nu wutali nu wukulu nu wuzike wa lukundo vikusula.’ Nga wacita wo-o, apano walinji ‘nukusimpa imisisi mulufula’ lwi suwilo lyawo. (Wazyani Waefeso 3:​14-19.) Wonye avino nasweswe tuzipizile ukucita. Lekani tusambilile pe vino tuzipizile ukucita pa kuti twakwivwicisya ivizike vino vyawa mwi Zwi lya kwe Leza.

4. Avyani vino tungacita pa kupalamila kwe Yehova? Landani pa cakulolelako.

⁴ Swe wina Klistu tutazipizile ukupelela vye pa kwivwicisya amasesemo ya mu Baibolo aya kutalicila. Nga cakuti Yehova watwavwa nu muzimu wakwe uwutele, tungasambilila “ivintu vizike vyakwe Leza.” (1 Kor. 2:​9, 10) Fwandi cingazipa nga cakuti mwatalisile ukuyisambilizya Baibolo, swinya ukucita wo-o, kungalenga mupalamile sana kwe Yehova. Ku cakulolelako, mungavwambilizya pe vino vikalanjizya ukuti Yehova wakunzile nkaninye awawomvi wakwe awa ku nsizi, na vino vikalanjizya ukuti wakunda na mwemwenye. Swinya mungayisambilizya na pe vino walondanga awawomvi wakwe awa ku kali wamupepa na vino akalonda twamupepa pe yo-o impindi. Cinji acakuti, mungayisambilizya na pa masesemo yano yakalanda pe Yesu.

5. Alisambililo ci lino mungatemwa ukuvwambilizizyapo ivyewo na vinji?

⁵ Wamwi wano watemwa ukuvwambilizya ivya mu Baibolo walanzile pa malyasi yano wangatemwa ukumanyilapo na vinji. Vimwi vino walanzile vili mu kambokosi kakuti “ Amalyasi Yakuvwambilizyapo Pano Mukuyisambilizya.” Mungakwivwa icete nkaninye ukuwazya ya-a amalyasi ukuwomvya Icisontelelo ca Mpapulo sha Watch Tower nanti Icitabo ca Kwafwa Inte sha kwa Yehova Ukusanga Ifyebo. Ukuvwambilizya ivyewo na vinji pano mukuyisambilizya kulimyavwa ukuwa ni suwilo iliwome nu kuzana amano ‘ya kwe Leza.’ (Imilu. 2:​4, 5) Lekani nomba tulande pa malyasi ya mu Baibolo yamwi amazike yano tuzipizile ukuwikako sana amano pano tukuyisambilizya.

6. (a) Avyani vino Yehova akacita pa kuti vye aficilisye ukulonda kwakwe? (b) Amulandu ci wuno tungalandila ukuti vino Yehova akalonda ukucitila awantu na vyo akalonda insi ukuwa avya “muyayaya”? (Waefeso 3:11)

⁶ Lekani tulande pe vino Baibolo yikalanda pa kulonda kwa kwe Leza. E Yehova asipotwapo ukuficilisya cino akulonda ukucita. Amulandu ci? Amuno nga wapanga ukucita cimwi, asiwomvya vye inzila yonga lelo akawomvya inzila izilekane lekane pa kuti vye aficilisye vino akulonda. Cinji acakuti asikwimilila vye pa cintu conga, mpindi zimwi angapilukako na mumwi pa kuti vye aficilisye ukulonda kwekwe. E Yehova akaya akutusokololela katici katici mwe Baibolo ‘chino akalonda ukuchita ukufumilila umuyayaya.’ (Efes. 3:11.) Swinya akawomvya inzila izilekane lekane pa kuficilisya ko-o ukulonda kwakwe. Cinji acakuti, akaya akuficilisya amuno ‘consi cino welewula cawa ni nsilo nanti incito yakwe colico.’ (Imilu. 16:4) Asa vyo-o vitupu, vino vikafuma mwe vyo akacita viliwako umuyayaya. Avyani vino Yehova akalonda ukucita swinya avyani vino wapilulako, pa kuti aficilisye konye ukulonda kwakwe?

7. Pano awantu wakutalicila wapondosile vye, uzye e Yehova wacisile wuli pa kuti aficilisye ukulonda kwakwe? (Mateyu 25:34)

⁷ E Yehova walondololezile e Adamu ne Eva umulandu wuno wawelewulizile. Wawanenile ukuti, “kavulanji muwakwatana, mwize mwizuzye insi yonsinye. . . nivintu vyonsi ivyawumi munsi.” (Inta. 1:28) Napalyanye pano e Adamu ne Eva wapondosile nu kulenga awantu wonsinye wawa awawembu, ukulonda kwa kwe Yehova kweni kutapilusile. Lelo wapiluzile vye inzila yakuwomvya pa kukuficilisya. Walile vye e Adamu ne Eva wapondoka, atalemile na kwisote, paponye wapanzile Uwufumu kwi yulu wuno walinji nu kuwomvya pa kuficilisya vino akalonda ukucita kunsi na ku wantu. (Wazyani Mateyu 25:34.) Pa mpindi injanane, watumile umwana wakwe ukwiza mukusambilizya awantu pa Wufumu nu kupa uwumi wakwe ngati anzuwi ku kuluwula awantu kuluwembu ni mfwa. Swinya pano Yesu wazyulupusile wanyocezile kwi yulu mukuteka mu Wufumu wa kwe Leza. Lelo asa vyo-o vitupu, kwawa na vinjinye vino vingatwavwa ukumanya ukulonda kwa kwe Leza.

8. (a)  Amulandu ci uwukulu wuno wawa mu Baibolo? (b) Ukulingana na Waefeso 1:​8-11, avyani vinji vino Yehova akalonda ukucita? (Lolani ni cikope pa nkupo.)

⁸ Umulandu uwukulu wuno wawa mu Baibolo awa kuti izina lya kwe Yehova lize licindamikwe pano alificilisya ukulonda kwakwe munsi ukuwomvya Uwufumu wuno wuliwatekwa ne Yesu. Ukulonda kwa kwe Yehova kutalitela kupiluke. Watulaya ukuti vyonsinye vino walanda vilicitika. (Ayize. 46:​10, 11, Hebe. 6:​17, 18) Nombanye wandi alenge insi ukuwa we paradaise muno awana wano wafuma mwe Adamu ne Eva waliwa awapwililike, awalungamane swinya waliwakwikala “umutende wape!” (Amalu. 22:26) Asa vyo-o vitupu vino Yehova akalonda ukucita. Lelo akalonda nu kulemenkanya ivyelewulwa vyonsinye munsi na mwi yulu. Nga wacita wo-o, apano wonsinye waliwamucindika ukuti we Kateka wawo. (Wazyani Waefeso 1:​8-11.) Uzye mutivwile icete sana ukulola vino Yehova wacita pa kuti vye aficilisye ukulonda kwakwe?

9. Pano tukuwazya Baibolo, avintu ci vino tungamanya pe vino vilicitika ku nkolelo?

⁹ Lekani tulande pa wusesemo wuno wawa pa Intaliko 3:15 wuno Yehova walanzile munsi ya Edeni. b Wo-o uwusesemo walanda pe vino vyalinji nu kucitika pa kuti Yehova aficilisye ukulonda kwakwe. Lelo nanti ciwe wo-o, palinji nu  kupita imyaka imivule pa kuti vicitike. Pe vino vyalinji nu kucitika, pawa ni kwata lya kwe Abrahamu muno mwalinji nu kufuma e Klistu. (Inta. 22:​15-18) Mu 33 C.E., e Yesu wizile awamuluma kucitende ngati avino amawaliko yalandizile lya nkani. (Imili. 3:​13-15) Lelo kwasyala iciputulwa ca mpindi ukucila na pa myaka 1,000 pa kuti iciputulwa cakulecelezya ica wusesemo wakufwanta Satana ku mutwe cize cificiliswe ku nkolelo. (Ukuwu. 20:​7-10) Cinji acakuti, e Baibolo yikatusokololela na vinji ivivule vino viliwacitika pano uwulwani wuno wawa pakasi ka mitecele ya kwe Satana ni wungwe lya kwe Yehova wuliwipisya nkani nkaninye.

10. (a) Avyani vino vyandi vicitike nombanye? (b) Tungapekanya wuli umwezo na melenganyo yitu? (Lolani futunoti.)

¹⁰ Lekani nomba tulande na pe vinji ivikulu vino Baibolo yalandizile lyankani ukuti vilicitika. Icakutalicila, inko zilipunda ukuti “umutende vyonsi vili ichete!” (1 Tes. 5:​2, 3) Nga cawa wo-o, ‘apano’ uwucuzi wukulu wulitalika, pano inko zilisansa ukupepa kwa wufi konsinye. (Ukuwu. 17:16) Swinya kuliwa icimanyilo cino ciliwalanjizya “umwana wamuntu akwiza mumawingo ya mwiyulu namaka nuwukankala wukulu.” (Mat. 24:30) Cinji acakuti, e Yesu alipingula awantu nu kupawunkanya ing’onzi ni mbuzi. (Mat. 25:​31-33, 46) Lelo na peyonye impindi e Satana atalilekapo ukulwisya Yehova. Pa mulandu nu wukali alilenga inko zino Baibolo yikakwita ukuti e Gogi waku Magogi ukusansa awantu wa kwe Yehova. (Ezek. 38:​2, 10, 11) Mweyilyanye impindi ya wucuzi wukulu, apano awapakwe walilongana ponga ne Yesu ni vita vya kwiyulu mukulwa inkondo ya Armagedoni. Inkondo Armagedoni nye ayino yiliwa ansilo ya wucuzi wukulu. c (Mat. 24:31; Ukuwu. 16:​14, 16) Nga cakuti vyonsinye vyo-o vyasila, apano e Yesu alitalika ukuteka pa myaka 1,000.—Ukuwu. 20:6.

11. Uzye ukuwa nu wumi wa muyayaya kwatukuma wuli? (Lolani ni cikope.)

¹¹ Teyelenganyani pe vino viliwacitika pa nsizi ya myaka 1,000. E Baibolo yikalanda ukuti e Kelewula witu “wawika impindi ya muyayaya  mu myezo” yitu. [NWT] (Ekawi. 3:11) Yelenganyani pe vino co-o catukuma na vino cakuma wuciwuza witu ne Yehova. Mwi buku lya kuti Palameni Kuli Yehova, ifwa 319, mwawa amazwi amazima nkaninye aya kuti: “Pa nsizi ya kwikala imyaka imyanda, amasauzandi, amamilioni, nanti amabilioni, tuliwaya tukumanyilako na vinji pe Yehova Lesa ukucila na pe vino twamanya pe yo-o impindi. Lelo nanti ciwe wo-o, tuliwalola ngati kucili kuli ivizima ivivule vino tutani tusambilile. . . Ungapotwa ni vyakulondolola vino ivintu vilizipa na vino ciliwakwivwika icete ukwikala mu paradaise. Ivizima vino viliwako vililenga twapalamila lyonsinye kwe Yehova.” Nga pe yo-o impindi, avyani vino tuzipizile twakwelenganyapo sana pano tukuwazya Izwi lya kwe Leza?

12. Tungalola wuli vyo vyawa mwi yulu? Landani pa cakulolelako.

¹² Izwi lya kwe Leza lya tulondololelako katici vino vingatwavwa ukwelenganya pe vyo Yehova akaloleka “mupela.”[NWT] (Ayize. 33:5) E Baibolo yalandapo ivintu vya kuzungusya pe Yehova na pa vyelewulwa vyakwe ivya kwi yulu. (Ayize. 6:​1-4; Dan. 7:​9, 10; Ukuwu. 4:​1-6) Ku cakulolelako, tungawazya pa vintu vya kuzungusya vyo Ezekiel waweni pano ‘iyulu liyusile ngatalika ukulola ivilolwa vya kwe Leza.’—Ezek. 1:1.

13. Ukulingana na Waheberi 4:​14-16, uzye mukayivwa wuli pe vino e Yesu akumicitila kwi yulu?

¹³ Teyelenganyani pe vino Yesu akutucitila kwi yulu ngati Amfumu swinya e Simapepo Mukulu uwa cikuku. Pa mulandu na weliwe twawa nu longo lwa kupalamila ‘kucilimba ca Wufumu [ica kwe Leza] ichankumbu nkumbu’ mwi pepo nu kumulenga ukuti atutetele nu kuti atwavwe pano “twasowelwa.” (Wazyani Waheberi 4:​14-16.) Fwandi cila wanda twakwelenganya sana pe vino e Yehova ne Yesu watucitila nga na pe vino wakutucitila kwi yulu.  Ulukundo luno wakatulanjizya luzipizile lwatufika pa mwezo nu kulenga twavwambisya ukuwombesya mu mulimo wa kwe Yehova nu kutwalilila ukumupepa.—2 Kor. 5:​14, 15.

14. Acani cimwi cino tungacita pakulanjizya ukuti tukasalifya pe vino e Yehova ne Yesu wakatucitila? (Lolani ni cikope.)

¹⁴ Inzila yonga yino tungalanjizizyamo ukusalifya kwe vino e Yehova nu mwana wakwe watucitila, akupitila mukwelezya na maka ukwavwa wanji ukuwa Ante zya kwe Yehova swinya awasambi wa kwe Yesu. (Mat. 28:​19, 20) Wonye avino nu mutumwa Paulo wacisile pakulanjizya ukusalifya kwe Yehova ne Klistu. Wamanyile ukuti e Yehova akalonda “awantu wonsi wize watulwe wamanye ukusimichila.” (1 Tim. 2:​3, 4) Cinji acakuti, wawombesyanga nkaninye mu mulimo wakuwizya kukwavwa awantu awavule pa kuti ‘angatula wamwi.’—1 Kor. 9:​22, 23.

15. Ukulingana na Amalumbo 1:​2, avyani vino vikalenga twawa ni nsansa?

¹⁵ E kalemba wilumbo wumwi walondolozile umuntu wansansa swinya wino akatunguluka ukuti aweyo wino “wakunda ukuwazya Isundo lya Mfumu e Leza” wino “akalisambilila umusanya nu wusiku.” (Amalu. 1:​1-3.) E kapiliwula we Baibolo wumwi uwi zina lyakuti Joseph Rotherham walanzile ukuti umuntu azipizile “awavwambisya ukukonka uwutunguluzi wa kwe Leza, ukuvwambilizya ivyewo na vinji, ukuyisambilizya nu kusumba impindi nkulu ukwelenganyapo.” Walanzile nu kuti wino akawazya Baibolo “azipizile awalola ukuti nga papita vye uwanda ukwasowa ukuwazya, lyo wowo uwanda wononeka vye.” Mungakwivwa icete ukuwazya Baibolo nga cakuti mukuwikako sana amano ku mazwi yonsinye nu kulola vino yalemenkine ni visinka viwuye. Ukulanda vye icisinka, ukwivwicisya vino vyawa mwi Zwi lwa kwe Leza kukakwivwika icete!

16. Avyani vino tulisambilila mu cipande cino cikonsilepo?

¹⁶ Vino Yehova akatusambilizya mwi Zwi lyakwe vitawoma ukwivwicisya. Mu cipande cino cikonsilepo tulisambilila pi tempile lya mankolanya lino e Paulo walondolozilepo mwe kalata yino walembezile awina Klistu Awaheberi. Lekani ukwivwicisya co-o icisinka kulenge swensinye twasecelela.