1. Acani cino cikalenga twasecelela sana?

 E YEHOVA akalonda twawa ni nsansa. Twamanya ukuti avino akalonda, amuno ukusecelela acikomwa ca muzimu wutele. (Gal. 5:22) Tukasecelela nkaninye nga cakuti tukuwombako umulimo wakuwizya nukwavwako awanawitu na wankazi munzila izilekanelekane. Amuno mukupa mwawa insansa imvule ukucila zino zyawa mukupocelela.​—Imili. 20:35.

2-3. (a) Ukulingana ne Wagalatiya 6:4, avintu ci viwili vino vingatwavwa ukutwalilila ukusecelela pano tukuwomba umulimo wa kwe Yehova? (b) Avyani vino twandi tusambilile mwe co-o icipande?

² Umutumwa Paulo walanzile pavintu viwili vino vingatwavwa ukutwalilila ukuwa ni nsasa vino vyawa pe Wagalatiya 6:4, (Wazyani.) Ica kutalicila, tuzipizile ukuwombela Yehova ukufika pano papelezile amaka yitu. Swinya pano tukumuwombela ukufika pano papelezile amaka yitu tuzipizile tuwasecelela. (Mat. 22:36-38) Ica citi wili acakuti, tutazipizile ukuwayilinganya kwe wanji asamulandu napano tukupelela ukuwomba pamulandu nu wumi, vino twamanya nanti icawila cino twawa naco, tuzipizile ukusalifya kwe Yehova. Mwakwizuka ukuti vyonsinye vino twawa navyo vyafuma kwe weliwe. Cinji acakuti nga wumwi akawombesya mu milimo yimwi ukucila pevino tukawomba, tuzipizile twasecelela ponga nawe. Amuno lyo atakuwomvya coco icawila pakuti acindame ukucila wanji nanti pakuti ivintu viwamuzipila lelo akuciwomvya ku kusecelesya Yehova. Fwandi ukucila ukuwacimvyanya nawe, tuzipizilevye ukusambililako.

³ Mwe co-o icipande, twandi tusambilile pevino vingatwavwa ukukana yivwa uwuwi nga cakuti tukulola ngati tutakuwombesya mu mulimo wa kwe Yehova ukulingana navino tukulonda. Swinya twasambilila navino tungawomvya icete icawila cino twawa naco nu kusambililako kwe wanji.

4. Avyani vino vingalenga tuwayivwa uwuwi? Landani pa cakuloleleko.

⁴ Awawomvi wa kwe Yehova wamwi wasiwomba ukulingana na vino wakalonda ukuwombesya mu mulimo wa kwe Yehova, pamulandu nu wukote nanti ukulwalilila. Wonye avino calinji na kwe Carol. We-e nkazi wayilepo mukuwombela kuno wakawizya wacepa. Peyoyo impindi watungululanga amasambililo ye Baibolo 35 swinya wavwizye na wantu awavule ukuyipa nu kubatizwa. Ukwasowa nu kuvwilika e Carol wawombesyanga nkaninye. Nomba mukupita kwa mpindi wizile alwala sana swinya impindi izivule wikalanga vye pa ng’anda. Watili: “Pamulandu wakulwalilila nsiwombesya ndivino wanji wakawombesya. Swinya nkayilola ngati nsine mwina Klistu umuzima ngati woliwo. Nsiwomba ukulingana navino nkalonda ukuwomba, na co-o cikalenga nayivwa uwuwi nkaninye.” E Carol akalonda ukuwomba ukufika pano papelezile amaka yakwe mu mulimo wa kwe Yehova. Wo-o vino akalonda ukucita acintu icizima nkaninye. Tutakuvwilika nanti katicinye ukuti e Yehova akasalifya pe vino akawombesya ukufika pano papelezile amaka yakwe.

5. (a) Avyani vino tuzipizile ukwizuka nga cakuti tukuyivwa uwuwi pamulandu wakulola ngati tusakuwombesya? (b) Ndivino tuweni pa vikope, uzye umwanawitu watwalilila wuli ukuwomba ukufika pano papelezile amaka yakwe?

⁵ Nga cakuti manda yamwi mukuyivwa uwuwi pa mulandu wakuti mutakuwombesya ukulingana na vino mukalonda, muzipizile ukuyikolowozya ukuti, ‘Acani cino Yehova akulonda ncite?’ E Yehova akalonda mwawomba ukufika pano papelezile amaka yinu ukulingana na vino ivintu vili mu wumi. Ku cakulolelako: tuti e nkazi wino ali ni myaka 80 akuyivwa uwuwi pa mulandu wakuti atakuwombesya mu mulimo ndivino wawombesyanga pano walinji ni myaka 40. Akwelenganya ukuti nanti acakuti akuwombesya ukufika pano papelezile amaka yakwe, atakusecelesya Yehova. Nomba uzye vwilani co-o acisinka? Teyelenganyani pe co-o, nga cakuti we-e nkazi wawombesyanga pano walinji ni myaka 40 swinya napano ali ni myaka 80 akuwomba ukufika pano papelezile amaka yakwe. Icisinka acakuti lyo atalekapo ukuwombesya. Nga cakuti twatalika ukulola ngati tusakuwombesya pakuti tusecelesye e Yehova, tuzipizile ukwizuka ukuti e Yehova awino akatunena vino tuzipizile ukucita pa kumusecelesya. Nga cakuti tukuwomba ukufika pano papelezile amaka yitu e Yehova aliwakwivwa icete.​—Linganyaniko ne Mateyu 25:20-23.

6. Avyani vino mukusambililako kwe Maria?

⁶ Tuliwawa ni nsansa nkaninye nga cakuti tukuwika vye amano kwe vino tungakumanisya ukuwomba asa kwe vino tutanga tukumanisye. Lekani tulande pe Maria wino waleka ukuwomba ndivino wawombanga kaali pamulandu wa kulwala. Pakutalika wasakamikwanga nkaninye swinya wayilolanga ngati atacindama. Nomba wizile ayelenganya pe nkazi wumwi mwi wungwe wino atapitanga lelo walalanga vye, acino wasozilepo ukumwavwa. E Maria watili. “Natantisile ukuti twawomba nawe mu mulimo ukuwomvya e foni na makalata. Lyonsinye pano nkunyoka ku ng’anda na wanga ni nsansa nkaninye amuno nalolanga ukuti navwako e nkazi yane.” Nasweswenye tungasecelela nga cakuti tukuwikavye amano kwe vino tungakumanisya ukuwomba asa pevino tutanga tukumanisye. Nomba avyani vino muzipizile ukucita nga cakuti kwawa imilimo yimwi yino mwamanyisya sana ukuwomba?

7. Avyani vino umutumwa Peter wawomelezizye awina Klistu ukucita?

⁷ Mwe kalata yakutalicila yino umutumwa Peter walemvile wawomelezizye awanawitu ukuti, wazipizile ukuwomvya icawila consinye cino wakwata nanti imilimo iyili yonsinye yino wamanya ku kuwomelezya awina Klistu wawuye. E Peter walemvile ukuti: ‘Wensi wapochelela  ichawila kwakwe Leza achaleka wazipila ukuchiwomvya kukuchitila wanji ivizima ukuti awe amuwomvi musuwilwa wakwe.’ (1 Pet. 4:10) Tutazipizile ukutina ukuwomvya icawila cino twawa naco ukulola ngati wamwi wandi wivwe akaso nanti wandi wivwe uwuwi. Nga cakuti tukutina tutaliwawomvya icawila cino Yehova watupa ukufika pano papelezile amaka yitu.

8. Ukulingana ne 1 Wakorinte 4:6, 7, amulandu ci wuno tutazipizile twayivwila pa cawila cino twawa naco?

⁸ Tuzipizile twawomvya ivyawila vino twawa na vyo ukufika pano papelezile amaka yitu. Lelo nanti ciwe wo-o, tutazipizile twayivwilapo. (Wazyani 1 Wakorinte 4:6, 7.) Nga cakuti mwamanya ivya kupanga amasambililo ye Baibolo, muzipizile mwawomvya coco icawila. Lelo muzipizile mwakwizuka ukuti mutazipizile mwayivwilapo. Ku cakulolelako, tuti pano mwalinji mu mulimo wakuwizya mwawomvile icete nkaninye, icakuti mwapanzile ni sambililo lye Baibolo. Swinya mukulondesya sana nukusimicilako awamwi wumba lya mulimo lino mwawamo. Nomba pano mwasunkana pi wumba, e nkazi winji awino watalicilapo ukusimika ukuti pano walinji mu mulimo wakwetiko ulongo lwakusyalika magazini. Nga mwalola pa-a, we-e nkazi wasyalisile magazini ne namwe mwatalisile isambililo lye Baibolo. Uzye mungacita wuli nga cawa wo-o? Kweni nanti acakuti nga mwasimika vino mwawomvile mu mulimo mungawomelezyako na wanji, cingazipa ukukanalanda pe yoyo impindi nu kwiza simikako impindi yinji pano muli sunkana pakuti mutakivwisye insoni e nkazi wino wasyalisile magazini. Nga mwacita wo-o mulilanjizya ukuti mwawa ni nkumbu. Lelo nanti ciwe wo-o mutazipizile ukuleka ukupanga amasambililo ye Baibolo. Amuno lyo acili icawila cino mwawa naco.

9. Tuzipizile twawomvya wuli ivyawila vino twakwata?

⁹ Tuzipizile twakwizuka ukuti vyonsinye ivyawila vino twawa navyo vyafuma kwe Yehova. Twaviwomvya ku kuwomya iwungwe asa ku kuyicindamicilako. (Flpi. 2:3) Nga cakuti tukuwomvya amaka yitu na vino twacenjelemo ku kucita ukulonda kwa kwe Yehova, tuliwasecelela nkaninye. Twawomvya ivya wila vino twawa navyo kukusecelesya Yehova asakuvwambisya ukuyilanjizya ukuti tukawombesya ukucila wanji nanti ukuti twacindama ukuwacila.

10. Amulandu ci wuno tutazipizile ukuyilinganya kwe wanji?

¹⁰ Nga tutacenjezile tungatalika ukuyilinganya kwe wanji wano twalola ukuti wasiwomba icete imilimo yimwi yino sweswe tukawomba icete. Ku cakulolelako, umwanawitu angalanga akalanda icete amalyasi ya ku cintu wavule. Co-o lyo acili icawila cakwe. Nomba kucawulanda, wino akalanda icete amalyasi ncepamwi angakwelenganya ukuti wacindama ukucila umwanawitu wino asilanda  icete nkani amalyasi. Lelo icisinka acakuti, wino asilanda icete nkani amalyasi angalanga wamanya ivyakupocelela awantu, ukusambilizya awana wakwe swinya wacincila mu mulimo wakuwizya. Tukakwivwa icete nkaninye ukuwa nawanawitu na wankazi wano wakawomvya ivyawila vyawo ku kuwombela Yehova nu kwavwa wanji.

11. Amulandu ci wuno tuzipizile ukukolanya e Yesu?

¹¹ Nanti acakuti tutazipizile ukuyilinganya kwe wanji, tungasambililako ivivule ku wawomvi wa kwe Yehova. Lekani tulandeko pe Yesu. Nanti acakuti tutapwililika ngati avino walinji. Tungasambililako ivivule ku miwele yakwe imizima nakwe vino wa wombanga. (1 Pet. 2:21) Nga cakuti tukwelezya na maka ukumukolanya, tuliwa swe wawomvi wa kwe Yehova awazima swinya tuliwawomba icete umulimo wa kuwizya.

12-13. Avyani vino tukusambililako ku Mfumu David?

¹² Mu Baibolo mwawa ivya kulolelako vya wanaci na wonsi awacisinka swinya wano tungakolanya nanti acakuti watalinji awapwililike. (Hebe. 6:12) Katetulandeko pe David. E David awo Yehova wanenile ukuti “awili muntu wino nkulonda.” Ne Baibolo yinji yalanda ukuti, “umuntu wa mwezo ndu wane.” (Imili. 13:22) Nomba e David atalinji amupwililike. Amuno impindi yimwi nawenye wizile acita nu luwembu ulukulu. Lelo nanti ciwe wo-o, wawa acakulolelako icizima nkaninye. Amulandu ci? Amuno pano wamulunjisile pe cino waluvinye atatalisile ukuyipokolola. Lelo wapocelezile ukusunda swinya walapizile pe cino wacisile. Na co-o calenzile e Yehova amutetele.​—Amalu. 51:3, 4, 10-12.

¹³ Tungasambililako kwe David ukupitila mu kuyikolowozya ukuti: ‘Nkacita wuli nga wansunda? Uzye nkazumila paponye iciluwo cino ncisile nanti nkatalika ukuyipokolola? Uzye nkatalika ukupa wanji imilandu? Uzye nkakwelezya na maka ukukana nyocezyapo iciluwo cino nacisile?’ Mungayikolowozya amawuzyo ndi vino ya-a pano mukuwazya amalyasi ya mu Baibolo aya wonsi nawanaci awacisinka. Uzye wapisileko mu ntazi zimwi izikolaneko nazino mukupitamo? Amiwele ci imizima yino walanjizizye? Pano mukuwazya ilyasi ilili lyonsinye muwayikolowozya ukuti ningawa wuli ne muwomvi wa kwe Yehova uwacisinka ngati avino wa-a walinji?’

14. Avizima ci vino tungazanamo mu kukolanya awanawitu na wankazi?

¹⁴ Tungazanamo ivizima nga cakuti tukukolanya awanawitu na wankazi asamulandu nukuti awasongo nanti awatici. Ku cakulolelako, uzye kuliko wumwi mwiwungwe wino mukulola ukuti akasipicizya intazi pamulandu wakumucuzya ku viwuza, kwa lupwa nanti pamulandu wakulwalilila? Uzye kuli yimwi imiwele imizima  yino muweni mwe weyo umuntu yino mungatemwa ukukolanya? Nga mukuwika amano ku miwele yakwe imizima, mulisambililako ivya kusipicizya intazi zino namwe mukupitamo. Tukasalifya nkaninye pakuwa nawanawitu na wankazi wano wawa nisuwilo.​—Hebe. 13:7; Jemu. 1:2, 3.

15. Avyani vino umutumwa Paulo wawomelezizye awina Klistu ukucita vino vingatwavwa ukutwalilila ukusecelela pano tukuwombela Yehova?

¹⁵ Swensinye tuzipizile ukuwomba ukufika pano pa pelezile amaka yitu pa kutunjilila umutende nu kulemenkana mwi wungwe. Lekani tulandeko pa wina Klistu wakutalicilapo. Wa-a awina Klistu walinji ni vyawila swinya ni milimo imilekanelekane. (1 Kor. 12:4, 7-11) Lelo co-o citalenzile mwi wungwe muwe ukupawunkana nanti ukutalika ukucimvyanya. E Paulo wawomelezizye wonsinye ukuti wazipizile ukuwomba ukufika pano papelezile amaka yawo pakuti “wawomesya umuwili wakwe Klistu.” Walembezile awina Efese ukuti: “Pano wila chawi cikuwomba ndimuno chikulondela, umuwili wonsi wukakula awuyiwomya mulukundo.” (Efes. 4:1-3, 11, 12, 16) Wonsinye wano wakonsile vino wawanenile watunjilizile umutende nu kulemenkana mwiwungwe swinya wonye avino cawa na mwiwungwe lya kwe Yehova mwe ya-a amanda.

16. Avyani vino tuzipizile ukutwalilila ukucita? (Waheberi 6:10)

¹⁶ Mutayilinganya kwe wanji. Lelo mwasambililako kwe Yesu nu kwelezya na maka ukukolanya imiwele yakwe imizima. Muwasambililako kuwawomvi wa kwe Yehova awi suwilo wano walembwa mu Baibolo nawa mwe ya-a amanda. Pano mukutwalilila ukuwomba ukufika pano papelezile amaka yinu, mwasuwila ukuti e Yehova “asi ninkota, atalitela ayiwilile vino mwachita.” (Wazyani Waheberi 6:10.) Acino twalillani ukuwombela Yehova ni nsansa nu kumanya ukuti akasalifya ukulola kuno mu kumuwombela ukufika pano papelezile amaka yinu pakuti mwamusecelesya.