AMASAKAMIKA yangawa ngati acisendo cimwi icimwame mu mwezo witu. (Imilu. 12:25) Uzye mukatela amuyivwapo uwuwi pa mulandu na masakamika? Uzye mukatela amuyivwapo ukuti mutanga mu sipicizye vino mukupitamo? Nga mukatela amuyivwapo wo-o, lyo mutawa mwenga. Swe wavule twasakamikwapo pa mulandu wakupita mu ntazi izilekane lekane ponga ngati akusakamala wa lupwa lwitu awalwale, ukufwilwa wano twakunda, nu kuponelwa na masanso nanti ukupitavye mu ntazi zinji. Nomba acani cino cingatwavwa ukusipicizya? *

Ica kulolelako ca kwe David candi citwavwe ukumanya vino tungacita pakuti tusipicizye nga twasakamikwa. Wapisile mu ntazi imvule swinya mpindi zimwi uwumi wakwe wawanga na mu wusanso. (1 Sam. 17:34, 35; 18:10, 11) Acani cino cavwanga e David ukusipicizya pano wasakamikwanga? Swinya uzye tungamukolanya wuli?

E David wapisile mu ntazi izivule pa muku wonganye. Ku cakulolelako, teyelenganyani pe vino vyacitisile pano wasamalanga Imfumu Shauli wino walondanga ukumukoma. Pano e David na wonsi wano walinji nawo wanyosile mu wulwi, wazanile ukuti awalwani wawo wasenzile iviya vyonsinye. Wosile ama ng’anda nukusenda indupwa zyawo mu wuzya. Uzye e David wacisile wuli pano vyo-o vya muciticizile? E Baibolo yikati e “David nawantu wakwe awatalika ukulosya, awalanga wakulila awasuka awatonta.” Cinji acakuti e David wizile asakamikwa nkaninye pamulandu wakuti awonsi wano wasuwizile ‘walondanga ukumupola namawe.’ (1 Sam. 30:1-6) E David wizile asunkanya intazi zitatu zino zyamuponezile pa muku wonganye. Iyakutalicila ayakuti, ulupwa lwakwe lwalinji mu wusanso. Swinya watinanga ukuti awonsi wano walinji nawo wangamukoma ne e Shauli lyo acili akumusamazya. Ukwasowa nukuvwilika e David afwile wasakamikwanga nkaninye!

Avyani vino David wacisile? Atalemile na kwi sote, ‘wasuwizile mwe Yehova e Leza wakwe.’ Nomba uzye e David wacisile wuli wo-o? Wapefile kwe Yehova pakuti amwavwe swinya welenginye na pe vino wamwavwizye ku nsizi. (1 Sam. 17:37; Amalu. 18:2, 6) E David wamanyile ukuti wazipizile ukukolowozya kwe Yehova pakuti amunene ivyakucita. Acino wakolowozizye kwe Yehova pe vino azipizile ukucita. Pano Yehova wanenile e David vino walondanga ukuti acite, e David atalemile na kwisote ukuvicita. Nacino cafumilemo acakuti e Yehova walambuzile e David na wonsi wano walinji nawo swinya wayile awanyosya indupwa zyawo nukupoka iviya vino awalwani wawo wasenzile. (1 Sam. 30:7-9, 18, 19) Uzye mwavilola ivintu vitatu vino David wacisile? Wapefile kwe Yehova pakuti amwavwe, wizukanga vino Yehova wamwavwizye ku nsizi swinya wacisile ukulingana navino Yehova wamunenile ukucita. Uzye tungakolanya wuli e David? Katulande pa vintu vitatu.

1. Mwapepa. Impindi iyili yonsinye nga twasakamikwa tungapepa kwe Yehova pakuti atwavwe nu kutupa amano. Angatwavwa nga cakuti twamunena vyonsinye vino vili mu mwezo vyo vikutusakamika. Nga asa wowo tungapepa ipepo ilifupi ilya mu mwezo ukulingana na vino ivintu vili pe yoyo impindi. Lyonsinye nga twapepa kwe Yehova lyo tukulanjizya  ukuti twamusuwila ndi vino David wamusuwizile wino watili: “Imfumu e Leza we Katula wane; welilinga lyane iwome. E Leza wane wekachinjilila wane, akansunga umutende.” (Amalu. 18:2) Uzye ipepo likawomba? E nkazi e Kahlia e payiniya watili: “Nga napepa nkawa nu mutende. Ipepo likanjavwa ukutalika ukwelenganya ndivino Yehova akakwelenganya swinya likalenga imusuwila sana”. Fwandi ukwasowa nu kuvwilika ipepo cawa acawila ukufuma kwe Yehova cino cikatwavwa ukusipicizya pano tusakamisilwe.

2. Mwakwelenganya pe vino Yehova wamyavwizye ku nsizi. Nga mwelenganya pe vino vyamiciticizilepo ku nsizi, uzye mungizuka intazi zimwi zino mwasipicizizye pa mulandu wakuti e Yehova wamwavwizye? Nga twelenganya pe vino Yehova watwavwizye ku nsizi na vino wavwizye awawomvi wakwe awaku kaali, tukawa nu mutende swinya tukamusuwila sana. (Amalu. 18:17-19) E Joshua e eluda watili “Nalemba amapepo yano Yehova wasuka. Na co-o calenga ndakwizuka impindi pano nalenzile e Yehova ivintu vimwi swinya navino wampile vilyanye vino namulenzile.” Fwandi nga cakuti tukwelenganya pevino Yehova watwavwizye ku nsizi ciliwatwavwa ukusipicizya nga twasakamikwa.

3. Mwawombelapo. Pano tutani tupingulepo ukucita icili consinye, tuzipizile ukuvwambilizya mu mawaliko pakuti yatwavwe. (Amalu. 19:7, 11) Awavule wazana ukuti nga wakuvwambilizya ivyewo pa mawaliko yamwi, apano cikawapepucila ukwivwicisya vino wakuwazya nukulola vino wangaviwomvya mu wumi. E eluda uwizina lyakuti Jarrod watili: “Ukuvwambilizya ivyewo kukanjavwa ukumanya ivivule nukwivwicisya vino Yehova akunena. Naco cikalenga nakonka vino nkuwazya pakuti nacita vino akalonda.” Nga cakuti tukuvwambilizya mu mawaliko pakuti tulole vino Yehova akutunena nukuvikonka, tuliwawa nu mutende swinya tuliwasecelela na pano tusakamisilwe.

E David wamanyile ukuti pakuti atwalilile ukusipicizya walondekwanga ukwavwa ukufuma kwe Yehova. Wasalifyanga nkaninye pe vino wamwavwanga. Icakuti watili: E Yehova akampa “maka yakuchimvizya amalinga yawo. We Leza awino akambomya.” (Amalu. 18:29, 32) Mpindi zimwi tungakwelenganya ukuti intazi zino tukupitamo aziwome nkaninye tutanga tukumanisye ukuzicimvya nu kusipicizya. Lelo icisinka acakuti nga Yehova watwavwa tungacimvya intazi iyili yonsinye nanti yingakula wuli. Nga cakuti tukupepa kwe Yehova ukuti atwavwe, tukwelenganya pe vino watwavwizye ukusipicizya intazi ku nsizi swinya tukukonka na vino akutunena, tungasuwila ukuti aliwatupa amano na maka yakusipicizya nga cakuti twasakamikwa.