1. Uzye avyani vino mungapanga ukucita?

 TWAKUNDA nkaninye e Yehova pamulandu wakuti swe wina Klistu. Swinya tukalonda ukuwombesya ukufika pano pangapelela amaka yitu mu mulimo wakwe. Nga tukulonda ukuwombesya, tuzipizile ukupanga ivya kucita mu mulimo wa kwe Yehova. Ponga ngati akuwombesya akuwa ni miwele ya wina Klistu, ukusambilila imilimo imipya nga nukulola inzila zino tungakwavwilamo wanji. *

2. Amulandu ci wuno tuzipizile ukupanjila ivya kucita mu mulimo wa kwe Yehova nu kuwombesya ukuvificilisya?

² Amulandu ci wuno tuzipizile ukutwalilila ukulunduluka mu mulimo wa kwe Yehova? Amuno tukalonda ukusecelesya umukwasi witu uwa kwi yulu. E Yehova akakwivwa icete nga walola tukuwomvya ivyawila vino twawa navyo ni milimo yino twamanya ku kumuwombela ukufika pano papelezile amaka yitu. Cinji acakuti, tukalonda ukulunduluka mu mulimo wa kwe Yehova pa kuti twakwavwa awanawitu na wankazi. (1 Tes. 4:9, 10) Swensinye tuzipizile ukutwalilila ukulunduluka asa mulandu ni myaka yino twamala mukuteyanya. Lekani tulole vino tungacita wo-o.

3. Ukulingana ne 1 Timoti 4:12-16, avyani vino umutumwa Paulo wawomelezizye e Timoti ukucita?

³ Pano umutumwa Paulo walembezile e Timoti e kalata ya kutalicilapo lyo e Timoti wawomba wu eluda pa myaka imivule, nanti acakuti pe yoyo impindi lyo acili amutici. Lelo nanti ciwe wo-o, e Paulo wamuwomelezizye ukutwalilila ukulunduluka. (Wazyani 1 Timoti 4:12-16.) Pano tukusambilila pa mazwi yano Paulo wanenile e Timoti, mwandi mulole ukuti kwalinji ivintu viwili vino  walondanga e Timoti ukulundulukamo. Icakutalicila acakuti, walondanga e Timoti ukuwa ni miwele ya wina Klistu ponga ngati ukusanguluka, ulukundo ni suwilo. Apano nukuzifyako mwe vino wawazyanga ku cintu wavule, ukuwomelezya nga nukusambilizya. Icakulolelako ca kwe Timoti candi citwavwe ukulola vino ukupanga icete ivya kucita kungalenga tuwe swe wawomvi wa kwe Yehova awazima. Swinya twandi tulole ni nzila zino tungalundululilamo umulimo wakuwizya.

4. Ukulingana na Wafilipi 2:19-22, acani cino calenzile e Timoti ukuwa amuwomvi umuzima uwa kwe Yehova?

⁴ Acani calenzile e Timoti awe amuwomvi wa kwe Yehova umuzima? Apamulandu wakuti walinji ni miwele ya wina Klistu. (Wazyani Wafilipi 2:19-22.) Ukulingana na vino Paulo wamulondolozile, afwile walinji amuyicefye, uwacisinka, umucincile swinya umusintililwepo. Wakunzile nkaninye awanawitu na wankazi swinya wa wasakamalanga. E Paulo wakunzile nkaninye e Timoti swinya wamusuwizile icakuti wamupangako ni milimo imiwomenye. (1 Kor. 4:17) Naswenye nga cakuti tuli ni miwele imizima yino Yehova akalonda, alitukunda swinya aliwatupa ni milimo imivule mwi wungwe lyakwe.​—Amalu. 25:9; 138:6.

5. (a) Mungacita wuli pa kuti mumanye muno muzipizile ukuzifya? (b) Ndi vino tuweni pacikope, uzye e nkazi akulanjizya wuli ukuti akulonda ukuwa ni cikuku?

⁵ Panjilani lya nkani cino mukulonda ukuwombelapo. Mwapepa kwe Yehova nu kwelenganyapo pakuti mulole muno muzipizile ukuzifyako. Solanipo uluwali longa luno mukulola ukuti muzipizile ukuwombelamo. Ku cakulolelako, mungalundako ukuwa ni cikuku nanti ukwelezya na maka ukuwa nu mwezo wakwavwa awanawitu nawa nkazi. Cinji acakuti mungakwelezya ukupanga umutende nu kutetela wanji. Mungakolowozyako e ciwuza wino mwasuwila pakuti amyavweko ukulola muno muzipizile ukuzifya.​—Imilu. 27:6.

6. Mungacita wuli pakuzifyako imiwele yinu?

⁶ Mwawombesya pa kuficilisya vino mwapanga. Nomba mungacita wuli wo-o? Inzila yonga yino tungacitilamo wo-o, akuvwambilizya ivyewo vino vikulanda pe cino tukulonda ukuwombelapo. Ku cakulolelako, tuti mukulonda ukuwatetela wanji. Mungatalicila ukuwazya nu kwelenganya pa malyasi yamu Baibolo yano yakulanda pe wano watetezile na wano watatetezile wanji. Lekani tulandeko pe Yesu. E Yesu wayikundilanga ukutetela wanji. (Luk. 7:47, 48) Atawikanga vye amano pa viwipe vino wanji wacitanga, lelo wawikanga amano pa vizima. Wapusineko nawa Falise wano “wasulanga  awawuye wonsi.” (Luk. 18:9) Pansizi ya kuwazya nu kwelenganya pe ya-a amalyasi, mungayikolowozya ukuti: ‘Avyani vino nkalola mwe wanji? Amiwele ya musango ci yino nkawikako sana amano?’ Ne nga cakuti cikamitalila ukutetela wumwi, mungalemba imiwele imizima yonsinye yino mwalola mwe weyo umuntu. Nukuyikolowozya ukuti; Uzye e Yesu akalola wuli we-e umuntu? Uzye angamutetela? Ukuyisambilizya kwa musango wo-o, kungamwavwa ukupiluka mwe vino mukakwelenganya pe weyo umuntu. Pakutalika cingatuwomela ukutetela wino atuluvinye, lelo nga cakuti tukwelezya na maka ciliwa tupepucila ukutetela wanji.

7. Uzye Imilumbe 22:29, yikalanjizya wuli ukuti e Yehova akawomvya awantu wano wamanya imilimo?

⁷ Inzila yonga yino tungapanjilamo ivya kucita akusambilila ivya kuwomba imilimo. Teyelenganyani pa wawomvi wano wakalondekwa pa kuzenga ivikulwa vya Misambo, ama Ng’anda ya Wufumu, ni Vikulya vya Kulonganilamo Ukulongana ku Kulu. Awavule wano wakawomba yo-o imilimo wakalanga lyo wasambililako kaali ku wanawitu na wankazi wano wamanya ivya kuyiwomba. Ndi vino tuweni pa cikope awanawitu na wankazi wakusambilila ivya kuwomba umulimo wakuzifya ama Ng’anda ya Wufuma ni Vikulwa vya Kulonganilamo Ukulongana ku Kulu. E Yehova Leza, ‘Imfumu yamuyayaya’ ne Yesu Klistu ‘Imfumu yazyamfumu’ wakuwomba imilimo imikulu ukupitila mukuwomvya awanawitu na wankazi mu nzila izilekane lekane. (1 Tim. 1:17; 6:15; wazyani Imilumbe 22:29.) Tukalonda ukuwomba ukufika pano papelezile amaka yitu nukuwomvya vino twamanya kukucindika Yehova asa ku kuyicindamika swe weneco.​—Yoha. 8:54.

8. Mungacita wuli pakuti mumanye muno muzipizile ukuzifya?

⁸ Solanipo cino mukulonda ukuwombelapo. Amwinye muno mukulola ukuti muzipizile ukuzifyako? Mungakolowozya wa eluda mwi wungwe muno mwawa nanti e kangalila wamuputule pakuti wamyavweko ukulola muno muzipizile ukuwombelapo. Ku cakulolelako, nga cakuti waminena ukuti muzipizile ukuzifyako mwe vino mukalanda nu kusambilizya, mungawakolowozya ukuti wamyavwe ukumanya pano muzipizile ukuwombelapo mwe lolo uluwali. Nga waminena, muzipizile ukuwombesya na maka ukuzifyamo. Nomba mungacita wuli wo-o?

9. Nga cakuti mwapanga ukuzifyako mumwi, mungacita wuli pakuti muficilisye?

⁹ Mwawombesya ukuficilisya vino mwapanga. Tuti mukulonda ukuwa mwe wakasambilizya awazima. Mungawazya mwe broshuwa yakuti Twalililani Ukuwika Amano ku Kuwazya nu Kusambilizya. Nga cakuti wamipa uluwali lumwi mukulongana kwa mikalile, munganenako umwanawitu wumwi wino wamanya ivya kulanda icete amalyasi ukuti ayivweko vino mupekinye pano mutani muye mukulanda ku ng’anda ya wufumu nukuminena muno muzipizile ukuzifya. Mwapekanizizya kucili amalyasi pakuti na wanji walola ukuti mukawombesya swinya mwe wasintililwepo.​—Imilu. 21:5; 2 Kor. 8:22.

10. Landani pa cakulolelako cevino tungacita pakuzifyako imiwombele yitu.

¹⁰ Uzye mungacita wuli nga cakuti mwe cino mukulonda ukuwomba muli cimwi cino cikamitalila nkaninye ukucicita? Mutazipizile ukuleka lelo muzipizilevye ukutwalilila ukuwombelapo. Wonye avino calinji na ku mwanawitu e Garry wino atawazyanga icete. We-e umwanawitu akakwizuka vino wivwanga insoni nga akuwazya mukupongomoka pa kulongana kwa piwungwe. Lelo nanti ciwe wo-o, watwalilizilevye ukwelezya na maka ukuzifyako. Pe yo-o impindi akalanda ukuti vino awanawitu wamwavwizye navino wawazyanga mu ma buku yitu vyalenga awalanda icete amalyasi mu Ng’anda ya Wufumu, pakulongana kwamuputule nga nu kwa citungu.

11. Acani cino cilitwavwa ukuwomba imilimo imivule mwi wungwe lya kwe Yehova ngati we Timoti?

 ¹¹ Uzye e Timoti wizile awa we kalanda swinya e kasambilizya muzima? Kweni e Baibolo yitalandapo. Ukwasowa nu kuvwilika e Timoti afwile wizile atalika ukuwomba icete nkaninye imilimo. Amuno wakonsile vino Paulo wamuwomelezizye. (2 Tim. 3:10) Nasweswenye nga cakuti tukuzifyako vino tukawomba, tuliwawomba imilimo imivule mwi wungwe lya kwe Yehova.

12. Uzye wanji wamyavwa wuli?

¹² Swensinye tukakwivwa icete nkaninye nga cakuti wanji watwavwa. Pano tuli mucipatala, tukakwivwa icete nkaninye nga cakuti wano wawa mwe Komiti wa Kwivwanilamo ni Vipatala nanti wano wawa mu Mawumba ye Wano Wakapempula Awalwale watutandalila. Ne nga cakuti tukupita mu ntazi, tukakwivwa icete nkaninye ukulola e eluda wino atutandalizile awisileko amano pano tukulanda swinya watusansamusya. Swinya nga tukulonda uwakutwavwa kwi sambililo lye Baibolo, tukakwivwa icete nkaninye nga cakuti e payiniya wino wamanya ukusambilizya icete wazumila ukuya na sweswe kwi sambililo swinya watunenako navimwi vino vingatwavwa ukutungulula icete. Awanawitu wano twalandapo mwe zyonsinye zyo inzila wakakwivwa icete nkaninye ukutwavwa. Nasweswenye nga cakuti tukuyikundila ukwavwako wanji tungawa ni nsansa izili zyonganye ndi zino wa-a awanawitu wakakwata. E Yesu watili, “Ukupa akwalongo wuli ukulusye ukupochelela.” (Imili. 20:35) Nga cakuti mukulonda ukuwombesya mu mulimo wa kwe Yehova mwe zyo-o inzila zino twalandapo nanti mu nzila zinji, acani cino cingamyavwa ukuficilisya?

13. Avyani vino muzipizile ukuwakwizuka pano mukupanga ivya kucita?

¹³ Mwapanga ivya kucita vino mumanyile ivya kuvificilisya. Ku cakulolelako, ncepamwi mungakwelenganya ukuti, ‘nkulonda ukuwombesya sana mwi wungwe lya kwe Yehova.’ Lelo nanti ciwe wo-o, ncepamwi mutanga mumanye ivya kucita pakuficilisya vino mwapanga swinya ncepamwi citanga cimipepucile ukumanya nga cakuti muficilisizye nanti awe. Acino mwapanga ivyakucita vino mumanyile. Mungalemba pamwi vino mukupanga ukucita nukulola vino mungavificilisya.

14. Amulandu ci wuno muzipizile ukuyipekanya ukupiluka pano mukupanga ivya kucita?

¹⁴ Mwayipekanya ukupiluka pano mukupanga ivya kucita. Amulandu ci? Amuno tutakwatapo amaka yakupilula ivintu mu wumi. Ku  cakulolelako: Umutumwa Paulo wavwilizizyeko ukupanga iwungwe ilipya mu Tesalonika. Ukwasowa nu kuvwilika, e Paulo walondesyanga ukuti awakwikala mu lyanye pakuti awawomelezya awina Klistu awapya. Lelo awalwani wizile awamuwinga mwe wo-o umusumba. (Imili. 17:1-5, 10) Wanga e Paulo akane ukufuma mu musumba nga waletelezile awanawitu na wankazi. Lelo nanti ciwe wo-o, e Paulo atanenusile. Wacisile ukulingana navino ivintu vyalinji peyilyanye impindi. Mukupita kwa mpindi wizile atuma e Timoti ukuya mukwavwa awina Klistu awapya. (1 Tes. 3:1-3) Ukwasowa nukuvwilika, awina Tesalonika wafwile wivwile icete nkaninye ukulola e Timoti wayikundila ukuya mukuwavwa.

15. Uzye ukupiluka kwa vintu kukakuma wuli vino tukapanga ukucita?

¹⁵ Tungasambililako kwe vino vyaciticizile e Paulo mu Tesalonika. Ku cakulolelako, tungapanga ivya kucita, lelo ncepamwi ivintu mu wumi vingapiluka icakuti vilenge tupotwe nu kuficilisya vino twapanga. (Ekawi. 9:11) Nga vino cawa na kwe mwemwe, cingazipa ukupanga vino mungakumanisya ukuficilisya. Wonye avino e Ted ne Hiedi awatwalane wacisile. Pamulandu wakuti wenga pe wa-a walwalililanga, wizile awafuma pa Musambo. Lelo pamulandu nukukunda Yehova wizile awalola inzila nazinji izyakulundululilamo umulimo. Ica kutalicila, wizile awatalika ukuwomba wupayiniya wampindi zyonsi. Ne mukupita kwa mpindi, wizile awatalika ukuwomba wupayiniya uwuyiwele. Swinya e Ted wizile awa musambilizya ivya kuwomba wu kangalila wa muputule uwa kwavwilizya. Nomba pano imyaka ye wano wazipizile ukuwomba wukangalila yizile ayipiluka, e Ted ne Hiedi wizile awalola ukuti wakuzile watanga wawombe wo-o umulimo. Kweni nanti acakuti wivwile uwuwi, waweni ukuti wangawombela e Yehova na mu nzila zinjinye. E Ted walanzile ukuti, “Twasambililako ukuti tungawombela e Yehova na mu nzila nazinjinye.”

16. Uzye avyani vino tukusambililako pe Wagalatiya 6:4?

¹⁶ Tutanga tupilule ivintu vyonsinye vino vikatuciticila mu wumi. Acino tutazipizile twakwelenganya ukuti twacindama kwe Yehova pa mulandu ni milimo yino tukawomba. Swinya tutazipizile twayilinganya kwe wanji wano wakawomba imilimo yino sweswe tusiwomba. E Hiedi walanzile ukuti, “Kusiwa ukuwa ni nsansa nga cakuti ukuyilinganya kwe wanji.” (Wazyani. Wagalatiya 6:4.) Fwandi icicindamisye acakuti tuzipizile twalolavye inzila zino tungavwilamo wanji na vino tungatwalilila ukuwombela Yehova. *

17. Mungacita wuli pakuti mufikepo ukuwomba imilimo yimwi?

¹⁷ Cilimipepucila ukuwombela Yehova ukufika pano papelezile amaka yinu nga cakuti mwapepusya  imikalile swinya mwacefyanyako ni nkongole. Mwapanga ivya kucita ivipepuke vino vingamyavwa nukuficilisya ivikulu. Ku cakulolelako, nga cakuti mukalonda ukuwomba wupayiniya wa mpindi zyonsi, cingazipa ukutalicila ukuwombako wupayiniya wakwavwilizya pe yonye impindi. Ne nga cakuti mukalonda ukuwa mwe wawomvi wano wakatumicila, muzipizile mwawombesya sana mu mulimo wakuwizya nukutandalila awalwale na wacisongo mwi wungwe muno mwawa. Mwakwizuka ukuti vino mukuwomba pe yo-o imipindi avino vingalenga mwize muwombeko ni milimo na yinji kunkolelo. Acino mwawombesya ukufika pano papelezile amaka yinu mu mulimo uwuli wonsinye wuno wamipa.​—Roma. 12:11.

18. Tukusambililako cani kwe nkazi Beverley? (Lolani ni cikope)

¹⁸ Tutakosile apakuti tupotwe ukupanga ivya kucita nu kuvificilisya. Lolani vino calinji kwe nkazi e Beverley wino ali ni myaka 75. We-e nkazi walwile nkaninye swinya camuwomelanga ukupita. Lelo walondesyanga sana ukuwombako mwe Kampeni ya cizusyo. Acino wapanzile ivya kucita vino angakumanisya. Pano Beverley wakumanisizye ukuwombako mwe Kampeni yacizusyo, wivwile icete nkaninye. Ukuwombesya kwakwe kwalenzile na wanji wavwambisya ukuwombesya mu mulimo wakuwizya. E Yehova akakwivwa icete nkaninye pevino awacisongo wakawombesya nanti acakuti impindi zimwi vino wakapitamo visiwazumilizya.​—Amalu. 71:17, 18.

19. Avyani vimwi vino tungapanga ukucita?

¹⁹ Mwapanga ivya kucita vino mungakumanisya. Swinya mwawombesya ukuwa ni miwele yino yikasecelesya Yehova. Cinji acakuti, mwasambilila ivya kuwomba imilimo pakuti e Yehova awamiwomvya mu milimo imilekane lekane nga namwi wungwe lyakwe. Mwalola inzila zya kwavwizyamo awanawitu na wankazi. * Nga cakuti Yehova wamyavwa ngati avino wavwizye Timoti, ‘ukukula kwinu kuliwaloleka kwe wonsi.’​—1 Tim. 4:15.