Umulapo “acilayo ca maka muno mwasanzyamo ukuficilisya vyonsinye vino mwalaya ukuwikamo ne Yehova ukuwa we kamboni.” Wungawa akulandavye nanti ukulemba.

Wamwi wangakwelenganya ukuti aciwipe ukulapa, amuno e Yesu walanzile ukuti: “Mutize muwalapa . . . Ukuwa muwati ‘Eta’ pamwi ‘Awe,’ chino chalusya vyonye-vyoo achitela chafuma kumuwipe.” (Mat. 5:33-37) Kweni, nanti acakuti e Yesu walanzile ya-a amazwi, wamanyile ukuti mu masundo yano Yehova wapile e Musa mwalinji nimilapo swinya na wawomvi wa kwe Yehova nye awa cisinka walapanga. (Inta. 14:22, 23; Ukuf. 22:10, 11) Cinji acakuti wamanyile nukuti ne Yehova nye akalapa. (Hebe. 6:13-17) Fwandi e Yesu atasulangapo mukuti tutazipizile ukulapa. Lelo watusokangavye ukuti tutazipizile ukulapa imilapo yino yitakweti nu wupiliwulo. Tuzipizile twakwizuka ukuti ukusunga umulapo amulimo uwutele. Acino tuzipizile ukuficilisya vino twalanda.

Avyani vino muzipizile ukucita nga waminena ukuti lapani? Ica kutalicila, muzipizile ukusinincizya ukuti mulificilisya cino mwalaya. Nga cakuti mukuvwilika nga mulificilisya, cingazipavye ukukana lapa. Amuno e Baibolo yikatusoka ukuti: “Achizima ukuntalayilizya chimwi, ukulusya ukulayilizya swinya upotwa ukuchichita.” (Ekawi. 5:5) Icaciti wili, muzipizile ukwelenganya pa ivisinka vya masundo ya mu Baibolo vino vikalanda pa milapo nukupingulapo ukulingana ne kampingu yinu iyisambiliziwe icete. Avisinka vya masundo ci vyovyonye?

Yimwi imilapo yikakwivwana nu kulonda kwa kwe Leza. Ku cakulolelako, Inte zya kwe Yehova wakalapa imilapo pano wakutwalana. E siwinga ne nawinga wakalayana pa minso ya wantu na pankolelo ya kwe Yehova ukuti walitwalilila ukukundana, ukusungana nu ku cindikana uwumi wawo wonsinye. (Awatwalane wamwi wasilanda ya-a amazwi pano wakutwalana lelo wakalanga lyo walapa kaali kwe Yehova.) Nga cawa wo-o, wakawa amulume nu muci swinya wazipizile ukutwalilila ukuwa mwi twala ‘uwumi wawo wonsinye.’ (Inta. 2:24; 1 Kor. 7:39) Imilapo yi twala yacindama nkaninye swinya yawa akulingana nu kulonda kwa kwe Leza.

Yimwi imilapo yisikwivwana nu kulonda kwa kwe Leza. Umwina Klistu wacisinka atazipizile ukulapa imilapo ponga ngati akutunjilila insi ya kumwawo ukuwomvya ivyanzo nanti ukulapa ukuti waleka ukuwa amwina Klistu. Amuno ukucita wo-o kutalingana navino amasundo ya kwe Leza yakalanda. E Baibolo yalanda ukuti umwina Klistu ‘asa wa mwakwe yo-o insi,’ fwandi tutazipizile ukuyisanzya mu vikanza vya nsi nanti ukulwa inkondo.​—Yoha. 15:19; Ayize. 2:4; Jemu. 1:27.

 Yimwi imilapo yikawa ukulingana ne kampingu. Mpindi zimwi tuzipizile ukuwalola imilapo ukulingana nukusunda kwa kwe Yesu ukwakuti “panji imfumu vino avyakwe, nivyakwe Leza panji Leza.”​—Luk. 20:25.

Ku cakulolelako, tuti pano umwina Klistu akulonda ukupoka icipepala cakuwa amwikala nsi nanti akulonda ukupoka icitupa, wazana ukuti pakucita wo-o azipizile ukulapa. Nga cakuti ku nsi yakumwawo, pakulapa kukawa ukucita vimwi vino visikwivwana na masundo ya kwe Leza, lyo weyo umwina Klistu atalizumila ukulapa pamulandu ne kampingu yakwe yino wasambilizya icete. Nga cawa wo-o, ncepamwi uwuteko wungamuzumilizya ukupilulako amazwi yamwi mu mulapo pakuti e kampingu yakwe yingamuzumilizya.

Ukulapa umulapo wuno uwuteko wutuzumilizizye ukufumyamo amazwi, kungalingana ni sundo lino likazanwa pa Waroma 13:1, pano pakati: “Lekani wila muntu awatontela wakateka wansi.” Fwandi nga cawa wo-o umwina Klistu umweneco awino azipizile ukupingulapo ukuti asaciwipe ukulapa amuno lyo amasundo yakwe Leza yazumilizya kaali ukucita wo-o.

Cacindama nkaninye ukwivwila vino e kampingu yino twasambilizya icete yikutunena nga cakuti watunena ukuti tulape ukuwomvya icintu cimwi nanti ukuwomvya umuwili. Ku cakulolelako, awa Sukuti na wina Roma wawomvyanga ulupanga pakulapa. Wawomvyanga co-o icanzo ku kulanjilila amaka ye ka leza kankondo kano wasuwizilemo. Ne wa Griki nawo watumpulanga ikasa mupela pano wakulapa. Amuno wamanyile ukuti kupela kwawa wumwi uwa maka nkaninye wino akakwivwa vino wakulanda, vino wakucita swinya wino akasakamala awantu wonsinye.

Kweni e kapepa wa kwe Yehova atanga akumbatile nu kukontamila kwe fulagi nanti kucili consinye cino cikatunjilila ukupepa kwa wufi. Nomba uzye mungacita wuli nga cakuti pano muli mu koti waminena ukuti muleme pe Baibolo nukulapa ukuti mwandi mulande icisinka? Nga cawa wowo mungasolapo ukucita vino waminena. Amuno na mu Baibolo nye mwawa awawomvi wa kwe Yehova awa cisinka wano walafilepo ukuwomvya umuwili. (Inta. 24:2, 3, 9; 47:29-31) Icicindamisye cino muzipizile ukuwakwizuka acakuti, nga mwalapa umulapo wamusango wowo, muzipizile ukumanya ukuti mukulapa pa nkolelo pa kwe Leza ukuti mwandi mulande icisinka. Muzipizile ukuyipekanya ukwasuka ivisinka ku mawuzyo yonsinye yano wangamikolowozya.

Pamulandu wakuti twacindamika nkaninye wuciwuza witu ne Yehova, tuzipizile ukupepelapo nukwelenganyapo sana nga watunena ukuti tulape. Cinji acakuti tuzipizile ukusinincizya ukuti vino twapingulapo vikwivwana ni visinka vya mu Baibolo ne kampingu yino twasambilizya icete. Mwakwizuka ukuti lyonsinye nga mwalapa muzipizile ukuficilisya.​—1 Pet. 2:12.