Iwungwe likalola itwala lya pakutalika ukuti lyasilizile palyanye pano umonsi watwite winji. Swinya likalola itwala ilipya ukuti alini itwala pe yoyo impindi. Pakuti twivwicisye umulandu wuno twalandila wo-o, lekani tulole vino e Yesu walanzile pakulekana na pakutwala naswinya.

Pe Mateyu 19:9, e Yesu walanzile umulandu wa mu Mawaliko wuno wungalenga vye awatwalane ukulekana. Watili: “Wensi wino wiza wawinga umuci, nkandi nga a ku wuzelele [uwucende], watwala winji, ye akuzeleluka [wacita uwucende].” Kwe ya-a amazwi yano e Yesu walanzile tukasambililako ukuti (1) uwuzelele awuli umulandu wutupunye wuno Amawaliko yalandapo ukuti awuno wungamala itwala, ne (2) ukuti umonsi nga waleka umuci ukucila pe wo-o umulandu wa mu Mawaliko swinya watwala winji lyo wazeleluka [wacita uwucende]. *

Uzye e Yesu wasuzile mukuti umonsi ndi wacita uwuzelele, waleka nu muci, lyo wawa amuntungwa ukulingana na Mawaliko ica kuti angaye atwale winji? Awe asa muno wasuzile. Amuno umuci uwakaele nga akulonda angasolapo ukumutetela nanti awe. Nga cakuti wakana ukumutetela, swinya walekana ukulingana ni sundo lya wuteko, lyo apano wonsinye wasyala nu wuntungwa wakutwalana na wino wakulonda.

Tuti umuci wakana ukuti walekane swinya watetela ne wakwakwe, nomba umulume wapaticizya ukuti mpakanye walekane swinya wapoka ni vipepala vyakulekanilanapo, acani cino cingacitika? Nga cawa wo-o, lyo umonsi asa muntungwa ukulingana na Mawaliko ukuya mukutwala winji, amuno umuci ayikundizile ukumutetela swinya akulonda watwalilile ukuwa nawe mwi twala. Fwandi nga wasolapo ukuya mukutwala winji pano asa muntungwa, lyo wacita uwucende na swinya. Nga wacita wo-o, waeluda walimupanjila komiti ya wupinguzi nayinji, pakuti wawombele pe wo-o umulandu.​—1 Kor. 5:1, 2; 6:9, 10.

Nga cakuti umonsi wino asa muntungwa ukulingana na Mawaliko watwala winji, uzye iwungwe likalola wuli itwala ilipya ni lya pakutalika? Uzye itwala lya pakutalika lyo licili litwalilizile ukulingana na Mawaliko? Uzye napenyonye impindi umuci angasolapo ukutetela umulume nanti awe? Uzye iwungwe liliwalola itwala ilipya ukuti alya wucende?

Ku nsizi, iwungwe lyalolanga ukuti uwakaele nga atafwile, atatwite nanti ukutwalwa, swinya atacisilepo nu wuzelele lyo itwala ilipya alya wucende. Lelo tuzipizile twakwizuka ukuti, pano Yesu walandanga pakulekana napakutwala nanti ukutwalwa naswinya, atalandangapo pa wakaele. Walanzile vye ukuti, umonsi wino waleka umuci pa milandu yino asa ya mu Mawaliko, nukutwala winji lyo wacita uwucende. Itwala lya musango wo-o lino Yesu walinginye ku wucende alino likamala itwala lya pakutalika.

Nga cakuti itwala lyasila swinya umonsi watwala nu mwanaci winji, lyo calala casila ku muci  wapakutalika atanga asolepo ukutetela umulume nanti ukukanamutetela. Atazipizile awacula na melenganyo yakuti, uzye mutetele nanti ntakamutetele, amuno lyo cilazile casila. Cinji aca kuti iwungwe lilitwalilila ukulola itwala ilipya ukuti alya mwisundo asa lya muwucende. *

Icakulolelako cino twafuma mukulandapo, tecikulanda pakulekana pa mulandu wakuti umonsi wacita uwucende. Nomba cingawa wuli nga cakuti umonsi atacisile uwucende lelo wasolapo ukuleka umuci nu kutwala winji? Nanti, uzye cingawa wuli nga cakuti umulume atacisile uwuzelele pano walekanga umuci, nomba wiza wacita uwuzelele pansizi yakulekana swinya watwala winji nanti acakuti umuci walondanga ukumutetela nukuti wanyosyanye? Icasuko acakuti, mwe vyonsinye vyo-o viwili, musanzizyemo uwucende. Amuno umonsi alesile umuci nu kutwala umwanaci winji, na co-o cilenzile itwala lya pakutalika ukusila. Itwala ilipya alino lisyazile likupendwa ukulingana ni sundo lya wuteko. Ulupungu lwa kwe Malonda ulwa cizungu ulwa November 15, 1979, ifwa 32 lwalanzile ukuti, “Pa mulandu wakuti ayinjizile mwi twala ilipya, atanga alimale nu kunyocela kwe calu wakwe [kwe wakwakwe wapakutalika]; amuno itwala lya pakutalika lyasilizile pa mulandu wakulekana, ukucita uwucende nukutwala winji.”

Ko-o ukwivwicisya ukupya kusakusula mukuti awina Klistu watacindamika itwala. Walicindika nkaninye swinya wakalola uwucende ukuti aluwembu uluwipe. Umonsi wino waleka umuci pano pasi umulandu wa wucende swinya watwala winji napano asa muntungwa ukulingana na Mawaliko, wa eluda walimupanjila komiti ya wupinguzi pa mulandu wa wucende. (Nga ca kuti umwanaci wino watwala, amubatizwe, lyo nawenye walimuwombelapo mwe komiti ya wupinguzi pa mulandu wa wucende.) Nanti acakuti itwala ilipya litaliwa alitwala lya wucende ndi vino twamanyile kunsizi, pangapita imyaka imivule pakuti we-e umonsi ayize afikepo ukuwomba imilimo iyili yonsinye iyiyiwele mwi wungwe. Pangalondekwa ukuti awantu waleke ukwivwa uwuwi pa viwipe vino wacisile nanti waleke ukumulola ukuti atayine nukucindikwa. Fwandi pano wa eluda watani welenganye pakumupa imilimo iyili yonsinye mwi wungwe, wazipizile ukutalicila ukulola na pe vino ivintu vili ku muci uwakaele wino umulume wacisile uwuzelele ku mufulonye pakuti amuleke, na pa wana wano wasya wakankamula.​—Mala. 2:14-16.

Pa mulandu na vyonsinye vyo-o vino vikafumamo mukuleka umuntu nu kutwala winji, awina Klistu wazipizile walola itwala ndi vino e Yehova akalilola.​—Ekawi. 5:4, 5; Hebe. 13:4.