Nakwasilwe mu 1955, swinya twawa watatu mu lupwa lwitu, nene ane muno ne nkwangu. Nakulizile mu musumba wumwi uwa mu Finland, wuno pe yo-o impindi wakakwita ukuti Vantaa.

Nakwasilwe pa nsizi ya myaka vye mitici ukufumilila pano e mama wabatizizwe nu kuwa Ante ya kwe Yehova. Lelo nanti ciwe wo-o, e tata atalondanga ukusambilila ivya mu Baibolo. Swinya walesyanga ne mama ukutusambilizya Baibolo nanti ukutusenda mukulongana. Acino e mama watusambilizyanga vye nga cakuti e tata asipo.

Ukufuma ku wutici wane ntalondangapo ukucita icili consinye cino calinji nu kulanjizya ukuti ntivwilanga e Yehova. Ku cakulolelako, pano nalinji ni myaka 7 umusambilizya wamfulizilwe nkaninye pa mulandu wakuti nakananga ukulya twa keke tuno wakapanjila nu wazi tuno wakakwita ukuti verilättyjä. Acino wizile ang’ang’anula umulomo ni kasa lyonga ne linji walemezileko e foloko nu kusenda ka keke pa kuti andisye. Lelo nizile mupampula e foloko kwi kasa.

E tata wafwile lyo ndi ni myaka 12. Ukufuma pano wafwizile, natalisile ukuzanwa mukulongana. Awanawitu na wankazi mwi wungwe wambisileko sana amano, na co-o calenzile ntalike ukulunduluka mu vya kwe Leza. Natalisile ukuwazya nu kuyisambilizya Baibolo na mabuku yano yakalanda pe Baibolo cila wanda. Swinya nizile mbatizwa pa 8, August mu 1969 lyo ndi ni myaka 14.

Natili namalavye isukulu, natalisile ukuwomba wu payiniya wa mpindi zyonsi. Ne pansizi ya ma sabata  vye matici, nizile inja mukuwombela kuno wakawizya wacefile ku Pielavesi, mupipi na ku Finland.

Ku Pielavesi, akuno twayile atumanyana ne Sirkka e wakwane. Nizile imukunda pa mulandu wakuti walinji amuyicefye swinya watemilwe e Yehova. Atalondangapo ukuwa ni vintu ivivule nanti imikalile ya papela. Swensinye twalondanga ukuwomba ukufika pano papelezile amaka yitu mu mulimo wa kwe Yehova swinya twayipelesizye ukuwomba umulimo uwuli wonsinye wuno walinji nu kutupa. Acino twizile atutwalana pa 23 March, 1974. Pa nsizi ya kutwalana, tutayilepo na mukupuza, lelo twasozilepo ukuya ku Karttula, kuno kwalondekwanga sana wakawizya ukucila na ko-o kuno twalinji.

Ukufumilila pano twatwalinevye, e Yehova watulanjizizye ukuti walinji nu kuwatusakamala nga ca kuti twawika ivya Wufumu inkolelo. (Mat. 6:33) Ku cakulolelako, pano twalinji ku Karttula, tutakweti e motoka. Pa kutalika twawomvyangavye injinga. Lelo mu mpindi ya mpepo, imicele yapilukanga ica kuti kwawanga ne ayisi. Acino pa kuti tuye mukuwizya ku ncende zya mutali, mwe talitali yi wungwe, twalondekwanga ukuwomvya e motoka. Nomba tutalinji ni ndalama izyakukalila.

E mukulu wane wizile atutandalila ukwasowa nu kwenecela. Swinya wizile atupa ne motoka yakwe. Pano watupanga, lyo walipila ni vipepala vyonsinye ivye motoka. Cino sweswe twalondekwanga vye ukucita, akukalilamo amafuta. Wonye avino twizile atuwa ne motoka yino twalondanga.

E Yehova watulanjizizye ukuti watusakamalanga mwe vino vyalondekwanga. Cino sweswe twazipizilevye ukucita, akukolezya ivya Wufumu.

Mu 1978 pano twalinji kwi Sukulu lya Payiniya, umwanawitu wumwi pe wano watusambilizyanga, e Raimo Kuokkanen, a watuwomelezizye ukulemba e fomu ya kuya kwi Sukulu lya Gilead. Acino twizile atutalika ukusambilila Icizungu pa kuti twize tuye kwe lyo-o isukulu. Lelo mu 1980, lyo tutani tulembe na yo-o e fomu, wizile awatwita ukuya mukuwombela pa musambo ku Finland. Pe yoyo impindi, wano wakawombela pa Bethel lyo watawazumilizya ukulemba e fomu ya kuya kwi Sukulu lya Gilead. Lelo nanti ciwe wo-o, twalondanga ukuya mukuwombela ukuli konsinye kuno Yehova walola ukuti akuno tuzipizile ukuya, asa kuno sweswe tukulonda. Acino twazumizile ukuya ku musambo ku Finland kuno watutumile. Nomba tutalesile ukusambilila Icizungu, amuno twelenganyanga ukuti wanda  wumwi tungiza tuwe nu longo lwa kuya kwi Sukulu lya Gilead.

Papisilevye imyaka mitici, Iwumba Lino Likatungulula lizile alizumilizya wano wakawombela pa Bethel ukulemba e fomu ya kuya kwi Sukulu lya Gilead. Tutalemile na kwisote, twizile atulemba yo-o e fomu. Kweni tutacisile wo-o pa mulandu wakuti tutalondanga ukuwombela pa Bethel. Lelo apa mulandu wa kuti twalondanga ukuwa nu longo ulwa kuya mukuwombela ukuli konsinye kuno wakawizya wakulondekwa. Acino wizile awatwita kwi Sukulu lya Gilead ilya namba 79 lino twizile atumala mu September, 1985. Swinya watutumile ukuya mukuwombela ku Colombia.

Pano twafisilevye mu Colombia, watunenile ukutalika ukuwombela pa musambo. Kweni nelezyanga na maka yane yonsinye ukuwomba umulimo wuno wampile, lelo pansizi ya mwaka vye wonga, natalisile ukuyivwa ukuti wazipizile ukumpako umulimo wunji. Wo-o awuno walinji amuku wakutalicila swinya uwa kulecelezya mu wumi wane, ukulenga ukuti wampeko umulimo wunji. Acino wizile awatutuma ukuya mukuwomba wu mishonari mu musumba wa Neiva, mu citungu ca Huila.

Nayitopwanga lyonsinye ukuwomba umulimo wakuwizya. Pano nawombanga wupayiniya ku Finland lyo ncili nemusimbe, nayanga mukuwizya ukufuma umutondo tondo ukufika amanguzi. Swinya pano twatwalinevye ne Sirkka naponye twawombesyanga nkaninye. Mpindi zimwi nga ca kuti tukuwombela ku ncende zya kutali, twalalanga mwe motoka. Na co-o calenganga tutasumba impindi yakupita swinya twatalika zuwa ukuwomba umulimo uwanda wuno wukukonkapo.

Pano twawombanga wu mishonari, twatalisile ukwivwa icete nkaninye ukuwomba umulimo wakuwizya ngati avino twayivwanga pa kutalika. Iwungwe lizile alikula, swinya awanawitu na wankazi mu Colombia walinji nu mucinzi, ulukundo swinya wasalifyanga.

Kwalinji incende zimwi mupipi na kuno twawombelanga kuno kutalinji Inte zya kwe Yehova. Nelenganyanga pe vino ilyasi lizima lyalinji nu kufika kwe zyo-o incende. Amuno kwalinji utumawumba twawasilika wano wapanganga ivyongo, na co-o calenzile ciwe acitale kwe wano watalinji awikala nsi. Acino napefile ukuti wumwi kwe zyo-o incende ayize awe Ante ya kwe Yehova. Nelenganyanga ukuti weyo umuntu angiza afume kwe zyo-o incende nu kwiza ku Neiva mu kusambilila icine. Swinya napefile ukuti, nga cakuti wabatizwa nu kuwa we songo mu vya kwe Leza, ayize anyocele kunsi ya kumwawo mukusambilizyako wanji. Nomba ntamanyile ukuti e Yehova awino wamanyile inzila iyizima yino walinji nu kuwomvya, yino yalinji nu kuwa icete ukucila na pe vino nelenganyanga.

Patazimvile, nizile ntalika ukutungulula umulumendo wumwi isambililo uwizina lya kuti Fernando González. We-e umulumendo wikalanga ku Algeciras, itauni limwi pe yano kutalinji wa Nte. Wapitanga ama kilometer ukucila pe 50 (30 mi) cila sabata pa kwiza ku ncito ku Neiva. Swinya wapekanyanga icete nkaninye isambililo ica kuti watalisile nu kuzanwa mukulongana. Ukufumililavye pano watalisile ukusambilila, wacitanga nga wanyoncela kwi tauni kuno wikalanga, walonganikanga awawuye nu kutalika ukuwasimicilako vino wasambililanga mu Baibolo.

E Fernando wizile abatizwa mu January 1990, pansizi ya myezi 6 ukufumilila pano watalicizile ukusambilila. Swinya wizile atalika nu kuwomba wu payiniya wa mpindi zyonsi. Wo-o vino kwizile akuwako  e Nte wenga wino walinji amwikala nsi wa ku Algeciras, awa ku musambo waweni ukuti cingazipa ukutumako wapayiniya awayiwele. Acino mu February 1992, iwungwe lizile alipangwa.

E Fernando atapelezilevye pa kuwomba umulimo wakuwizya kunsi ya kumwawo. Watili watwala, wizile awaya nu muci e Olga ku San Vicente del Caguán, itauni linji kuno kutalinji wa Nte. Swinya nakonye wayile awapanga iwungwe. Mu 2002, wizile awamusonta ukutalika ukuwomba wu kangalila wa muputule swinya ukufika na pe yo-o impindi wacili watwalilila ukuwomba wo-o umulimo.

Kwe vyo-o vino vyacitisile, nasambilizileko pe vino cacindama ukunena e Yehova mukulungatika pano tukupepela pa mulimo wuno tungawomba mwi wungwe lyakwe. Tuzipizile twakwizuka ukuti, e Yehova angacita cino sweswe tutanga tukumanisye ukucita. Ni cicilepo aca kuti, wo-o amulimo awakwe, asa witu awe.—Mat. 9:38.

Mu 1990 wizile awatunena ukutalika ukuwomba umulimo wakutandalila ama wungwe. Umuputule wakutalicila walinji mu musumba wukulu uwa Bogotá. Twalinji ni ntete amuno twalolanga ngati tutalinji nu kukumanisya ukuwomba wo-o umulimo. Nene ne wakwane, swe wantu vye wano watamanya ni vitu ivivule. Swinya tutawelezizyepo ukwikala mu misumba iyikulu. Lelo nanti ciwe wo-o, e Yehova waficilisizye uwulayo wuno wawa pa Wafilipi 2:13 pano pakati: ‘We Leza wino akawawomya mwemwe, akalenga mwalondesya nu kucitapo cimwi.’

Mukupita kwa mpindi wizile awatutuma ku muputule wunji mu ncende yino yawezile ku Medellín, kuno tendanzilepo pa kutalika. Awantu kwe yo-o incende walinji nu wunkalwe nkaninye ica kuti watatinanga nanti cimwinye. Ku cakulolelako, wanda wumwi pano natungululanga isambililo mu ng’anda, nizile injivwavye awantu watalika ukupikana palonde. Pano nivwilevye wo-o, nalondanga ukupona pansi nkupame, nomba naweni umusambi atwalilizilevye ukuwazya paragrafu ko-o lyo atesile nu mwezo. Watili wamala ukuwazya, wizile alenga ukuti afumeko katici palonde. Patazimvile, wizile anyoka lyo asenzile na wana wawili swinya walanzile ukuti, “Munteteleko mukwai tenati nsende awana.”

Kwalinji na vinjinye ivya kutinya vino vyatuciticilanga. Wanda wumwi pano twawizyanga ku ng’anda ni ng’anda, e wakwane wafumile asamazile lyo akuloleka uwantete. Walanzile ukuti wumwi atekulonda ukumupika. Co-o campezizye amano. Lelo mukupita kwa mpindi twizile atwivwa ukuti atalondanga ukupika e wakwane, lelo walondanga ukupika umonsi wumwi wino wakonkine nawe.

Mukupita kwa mpindi, twasusile twawelela na vyo-o ivyongo vino vyacitikanga. Twasambilizileko ku wanawitu na wankazi awa kwe yoyo incende, wano wapisile muntazi izikolaneko na zino twapitangamo swinya zimwi zyalinji azikulu nu kutulusya. Twizile atuzana ukuti wo-o vino e Yehova wawavwanga, na sweswenye walinji nu kutwavwa. Twivwilanga nu kukonka vino wa eluda awa kwe yoyo incende watunenanga, nu kusila vino vyasyala mu makasa ya kwe Yehova.

Kweni mpindi zimwi twatinanga ni vyawufinye, vino twatunganyangavye. Ku cakulolelako, wanda wumwi nivwile ngati awanaci wawili wakupokota nu kutukana intusi palonde ya ng’anda pano nayile mukulola wamwi. Ntatemilwe ukulola kuno awantu wakupokota, nomba umweneco wa ng’anda wanenile ukuti tufume tuye tukikale pa vilimba vya palonde. Ku cakuzungusya, palonde  patalinjipo awanaci wano “wapokotanga,” lelo vyalinji avinyunyi viwili vino vyatolelezyanyanga.

Mu 1997, wansonsile ukuwa ne kasambilizya wa mwi sukulu lino witanga ukuti Isukulu lya Kukansha Ilya Butumikishi. b Nivwanga icete nkaninye ukuzanwa ku ma sukulu ya Wufumu, lelo nsitela njelenganyepo pakuwa ne kasambilizya.

Mukupita kwa mpindi, wizile awansonta ukuwa ne Kangalila wa Citungu. Pano wizile awafumyako wo-o umulimo, nizile inyocela mu muputule. Acino ukucila pa myaka 30, nayitopwa ukuwomba ngati we kasambilizya mu ma sukulu ya Wufumu na wukangalila wa muputule. Twazana ivizima ivivule mukuwomba yo-o imilimo. Lelo nanti ciwe wo-o, citalinji acipepuke, twapitangako na muntazi. Lekani misimicileko.

Nawa ne muntu wino asisakamala icili consinye. Conye acino canjavwa ukusipicizya intazi izivule. Lelo nanti ciwe wo-o, mpindi zimwi nacilanga mu cipimo ukuvwambisya ukulunjika utumilandu tonsinye mu ma wungwe. Impindi yimwi, nalinji na pankolelo ukunena wamwi ukuti wazipizile ukuwa nu lukundo ni nkumbu kwe wanji. Nomba niwililanga ukuti yonye imiwele ayino nanenenye ntakweti pe yoyo impindi.—Roma. 7:​21-23.

Mpindi zimwi nayivwanga uwuwi nkaninye, wo-o vino napotwanga ukuwomba icete. (Roma. 7:24) Wanda wumwi napefile kwe Yehova ukuti cingazipa ndekevye wu mishionari nu kunyocelemo ku Finland. Nomba uwanda wulyanye amanguzi, nizile inja mu kulongana. Vino nivwile pe ko-o ukulongana vyanjavwizye ukulola ukuti ntazipizile ukuleka wu mishonari, lelo nzipizile ukutwalilila ukuwomba nu kuzifyavye muno mwalondekwanga. Ukufika ni lelo lyo-o, ncili nkakwivwa icete pe vino e Yehova wasusile ipepo lyane. Swinya nkasalifya na pe vino wanjavwa ukuzifya mwe vino ntacitanga icete.

Nene ne wakwane, tukasalifya nkaninye e Yehova pakutupako ulongo ulwa kumuwombela mu mulimo wa mpindi zyonsi mupipi nu wumi witu wonsinye. Swinya nkamusalifya na pakumpa e ciwuza wane umukundikwe e Sirkka wino watwalilila ukuwa nu lukundo ni cisinka pa myaka yonsinye yo-o.

Nombanye nandi nkumanisye imyaka 70, swinya nandi ndeke nu kuwomba umulimo wakusambilizya na wukangalila wa muputule. Lelo nanti ciwe wo-o, co-o cisilenga ndawa nu wulanda. Amuno namanya ukuti cino cikasecelesya sana e Yehova, asa milimo yino tukawomba, lelo akuyicefya, ukuwa nu lukundo nga nu kusalifya pano tukumuwombela ni myezo yitu yonsinye.—Mika 6:8; Mar. 12:​32-34.

Pe yo-o impindi nsikwelenganyapo ukuti e Yehova wampile yo-o imilimo pa mulandu wa kuti nacindime ukucila wanji nanti pa mulandu na vino namanyile. Cinji aca kuti, pano wampanga atalolecesyanga pe vino naluvyanyanga nanti pe vino ntacitanga icete. Lelo wampile pa mulandu wa kuti wavulisya inkumbu. Swinya namanya ukuti e Yehova awino wanjavwanga, acino calenzile ndakumanisya ukuwomba. Ningalanda vye ukuti, amaka ya kwe Yehova yalolecela mukutonta kwane.—2 Kor. 12:9.