Uzye Mwamanya?
Amulandu ci Wuno Davidi Wazumilizizye Wano Watalinji Awina Israeli Ukuwa pa Wasilika Wakwe?
PA WASILIKA wa kwe Davidi wamwi wano watalinji awina Israeli palinji e Zeleki umwina Amoni, e Yuriya umu Hiti, ne Itima umwina Moabu. a (1 Imila. 11:39, 41, 46) Swinya palinji awa ‘Kereti, awa Peleti. . . nawa Gati.’ (2 Sam. 15:18) Awantu wa mu Gati walinji awa Filisiti swinya cikaloleka ngati awa Kereti na wa Peleti nawo wafwile walinji aluko ulupalamilesye sana nawa Filisiti.—Ezek. 25:16, Josh. 13:2, 3; 1 Sam. 6:17, 18.
Amulandu ci wuno e Davidi wazumilizizye wa-a awonsi ukuwa pa wasilika wakwe? Amuno wasuwizile ukuti walinji awa cisinka kwe weliwe. Ni cicindamisye aca kuti waweni ukuti walinji ni cisinka kwe Yehova. Ku cakulolelako, e dikishonali yimwi yino yikalanda pe Baibolo yalanda pa wa Kereti na wa Peleti ukuti: “Pano e Davidi watekanga swinya pano ivintu vyatazile nkaninye, wa-a awonsi watwalilizile ukuwa awa cisinka kwe weliwe.” Walanjizizye wuli ukuti walinji ni cisinka? Pano ‘awina Israeli wongolosile’ Imfumu Davidi nu kukonka “Sheba,” awina Kereti na wina Peleti weni watwalilizilevye ukuwa ni cisinka kwe Davidi nu kumwavwa pano Sheba wapondosile. (2 Sam. 20:1, 2, 7) Impindi yinji pano awina Kereti na wina Peleti walanjizizye ukuti walinji ni cisinka kwe Davidi, apano e Adonija umwana wakwe walondanga ukuyiwika pa wufumu pa kuti acinge e Solomoni. Lelo wawombesizye ukwavwa e Davidi nu kuwika e Solomoni pa wufumu, amuno awino Yehova wasozile.—1 Izya. 1:24-27, 38, 39.
Winji wino atalinji amwina Israeli wino watwalilizile ukuwa ni cisinka kwe Davidi, we Itai umwina Gati. E Itai na wasilika wakwe 600 watunjilizile imfumu Davidi pano umwana wakwe e Abisolomu wamupondocezile nu kulenga awina Israeli nawonye ukupondocela e Davidi. E Davidi wanenile e Itai ukuti pa mulandu wa kuti atalinji amwina Israeli atazipizile ukuyisanzyamo mu wulwi. Lelo e Itai wamwasusile ukuti: “Mulali, nenji nkulapa izina lya Mfumu nkuti nandi ndange nkaya nawe konsinye kuno ungaya, chingatenga kungawa imfwa-nye”—2 Sam. 15:6, 18-21.
E Ittai walinji ni cisinka kwe Davidi imfumu yino Yehova wasonsile
Nanti aca kuti awina Kereti, awina Peleti na wina Gati watalinji awina Israeli, wamanyile ukuti e Yehova we Leza wa cisinka swinya wamucindisile nkaninye. Wamanyile nu kuti e Yehova nye awino wasozile e Davidi ukuwa pa wufumu. E Davidi afwile wivwile icete nkaninye pa kuwa na wonsi wa cisinka awakumutunjilila!
a Isundo lya kwe Leza lino lyawa pa Amasundo 23:3-6 litazumilizizye awina Amoni na wina Moabu ukuwa aluko longa na wina Israeli. Lyo-o iwaliko likasula mukuti, awina Amoni na wina Moabu watalinji nu kupiluka ukufuma mu luko lwawo nu kuwa awikalansi mu Israeli. Lelo nga ca kuti wazumila ukupepa kwa cisinka, walinji nu kuwakwikala ponga na wina Israeli nu kuwawombela ponga ivintu. Lolani mwi buku lya kuti Insight on the Scriptures, pa mutwe wakuti “Ammonites” [awina Amoni], apano muye pa kamutwe akatici aka kuti “Intermarriage With Israelites” [“Ukutwazizyanya na Wina Israeli”] pifwa. 95.
